অধ্যায় 72

72.1

বৈশংপায়ন উবাচ
সমাবৃত্তব্রতং তং তু বিসৃষ্টং গুরুণা তদা
প্রস্থিতং ত্রিদশাবাসং দেবয়ান্যব্রবীদিদম্

ঋষেরঙ্গিরসঃ পৌত্র বৃত্তেনাভিজনেন চ
ভ্রাজসে বিদ্যয়া চৈব তপসা চ দমেন চ

ঋষির্যথাঙ্গিরা মান্যঃ পিতুর্মম মহায়শাঃ
তথা মান্যশ্চ পূজ্যশ্চ ভূয়ো মম বৃহস্পতিঃ

এবং জ্ঞাত্বা বিজানীহি যদ্ব্রবীমি তপোধন
ব্রতস্থে নিয়মোপেতে যথা বর্তাম্যহং ত্বয়ি

স সমাবৃত্তবিদ্যো মাং ভক্তাং ভজিতুমর্হসি
গৃহাণ পাণিং বিধিবন্মম মন্ত্রপুরস্কৃতম্

কচ উবাচ
পূজ্যো মান্যশ্চ ভগবান্যথা তব পিতা মম
তথা ত্বমনবদ্যাঙ্গি পূজনীয়তরা মম

আত্মপ্রাণৈঃ প্রিয়তমা ভার্গবস্য মহাত্মনঃ
ত্বং ভদ্রে ধর্মতঃ পূজ্যা গুরুপুত্রী সদা মম

যথা মম গুরুর্নিত্যং মান্যঃ শুক্রঃ পিতা তব
দেবয়ানি তথৈব ত্বং নৈবং মাং বক্তুমর্হসি

দেবয়ান্যুবাচ
গুরুপুত্রস্য পুত্রো বৈ ন তু ত্বমসি মে পিতুঃ
তস্মান্মান্যশ্চ পূজ্যশ্চ মমাপি ত্বং দ্বিজোত্তম

অসুরৈর্হন্যমানে চ কচ ত্বয়ি পুনঃ পুনঃ
তদা প্রভৃতি যা প্রীতিস্তাং ত্বমেব স্মরস্ব মে

সৌহার্দে চানুরাগে চ বেত্থ মে ভক্তিমুত্তমাম্
ন মামর্হসি ধর্মজ্ঞ ত্যক্তুং ভক্তামনাগসম্

কচ উবাচ
অনিয়োজ্যে নিয়োগে মাং নিয়ুনক্ষি শুভব্রতে
প্রসীদ সুভ্রু ত্বং মহ্যং গুরোর্গুরুতরী শুভে

যত্রোষিতং বিশালাক্ষি ত্বয়া চন্দ্রনিভাননে
তত্রাহমুষিতো ভদ্রে কুক্ষৌ কাব্যস্য ভামিনি

ভগিনী ধর্মতো মে ত্বং মৈবং বোচঃ শুভাননে
সুখমস্ম্যুষিতো ভদ্রে ন মন্যুর্বিদ্যতে মম

আপৃচ্ছে ত্বাং গমিষ্যামি শিবমাশংস মে পথি
অবিরোধেন ধর্মস্য স্মর্তব্যোঽস্মি কথান্তরে
অপ্রমত্তোত্থিতা নিত্যমারাধয় গুরুং মম

দেবয়ান্যুবাচ
যদি মাং ধর্মকামার্থে প্রত্যাখ্যাস্যসি চোদিতঃ
ততঃ কচ ন তে বিদ্যা সিদ্ধিমেষা গমিষ্যতি

কচ উবাচ
গুরুপুত্রীতি কৃত্বাহং প্রত্যাচক্ষে ন দোষতঃ
গুরুণা চাভ্যনুজ্ঞাতঃ কামমেবং শপস্ব মাম্

আর্ষং ধর্মং ব্রুবাণোঽহং দেবয়ানি যথা ত্বয়া
শপ্তো নার্হোঽস্মি শাপস্য কামতোঽদ্য ন ধর্মতঃ

তস্মাদ্ভবত্যা যঃ কামো ন তথা স ভবিষ্যতি
ঋষিপুত্রো ন তে কশ্চিজ্জাতু পাণিং গ্রহীষ্যতি

ফলিষ্যতি ন তে বিদ্যা যত্ত্বং মামাত্থ তত্তথা
অধ্যাপয়িষ্যামি তু যং তস্য বিদ্যা ফলিষ্যতি

বৈশংপায়ন উবাচ
এবমুক্ত্বা দ্বিজশ্রেষ্ঠো দেবয়ানীং কচস্তদা
ত্রিদশেশালয়ং শীঘ্রং জগাম দ্বিজসত্তমঃ

তমাগতমভিপ্রেক্ষ্য দেবা ইন্দ্রপুরোগমাঃ
বৃহস্পতিং সভাজ্যেদং কচমাহুর্মুদান্বিতাঃ

যত্ত্বমস্মদ্ধিতং কর্ম চকর্থ পরমাদ্ভুতম্
ন তে যশঃ প্রণশিতা ভাগভাঙ্নো ভবিষ্যসি