Utshovঅধ্যায় 71
71.1
জনমেজয় উবাচ
যয়াতিঃ পূর্বকোঽস্মাকং দশমো যঃ প্রজাপতেঃ
কথং স শুক্রতনয়াং লেভে পরমদুর্লভাম্
71.2
এতদিচ্ছাম্যহং শ্রোতুং বিস্তরেণ দ্বিজোত্তম
আনুপূর্ব্যা চ মে শংস পূরোর্বংশকরান্পৃথক্
71.3
বৈশংপায়ন উবাচ
যয়াতিরাসীদ্রাজর্ষির্দেবরাজসমদ্যুতিঃ
তং শুক্রবৃষপর্বাণৌ বব্রাতে বৈ যথা পুরা
71.4
তত্তেঽহং সংপ্রবক্ষ্যামি পৃচ্ছতো জনমেজয়
দেবয়ান্যাশ্চ সংয়োগং যয়াতের্নাহুষস্য চ
71.5
সুরাণামসুরাণাং চ সমজায়ত বৈ মিথঃ
ঐশ্বর্যং প্রতি সংঘর্ষস্ত্রৈলোক্যে সচরাচরে
71.6
জিগীষয়া ততো দেবা বব্রিরেঽঽঙ্গিরসং মুনিম্
পৌরোহিত্যেন যাজ্যার্থে কাব্যং তূশনসং পরে
ব্রাহ্মণৌ তাবুভৌ নিত্যমন্যোন্যস্পর্ধিনৌ ভৃশম্
71.7
তত্র দেবা নিজঘ্নুর্যান্দানবান্যুধি সংগতান্
তান্পুনর্জীবয়ামাস কাব্যো বিদ্যাবলাশ্রয়াৎ
ততস্তে পুনরুত্থায় যোধয়াং চক্রিরে সুরান্
71.8
অসুরাস্তু নিজঘ্নুর্যান্সুরান্সমরমূর্ধনি
ন তান্সংজীবয়ামাস বৃহস্পতিরুদারধীঃ
71.9
ন হি বেদ স তাং বিদ্যাং যাং কাব্যো বেদ বীর্যবান্
সংজীবনীং ততো দেবা বিষাদমগমন্পরম্
71.10
তে তু দেবা ভয়োদ্বিগ্নাঃ কাব্যাদুশনসস্তদা
ঊচুঃ কচমুপাগম্য জ্যেষ্ঠং পুত্রং বৃহস্পতেঃ
71.11
ভজমানান্ভজস্বাস্মান্কুরু নঃ সাহ্যমুত্তমম্
যাসৌ বিদ্যা নিবসতি ব্রাহ্মণেঽমিততেজসি
শুক্রে তামাহর ক্ষিপ্রং ভাগভাঙ্নো ভবিষ্যসি
71.12
বৃষপর্বসমীপে স শক্যো দ্রষ্টুং ত্বয়া দ্বিজঃ
রক্ষতে দানবাংস্তত্র ন স রক্ষত্যদানবান্
71.13
তমারাধয়িতুং শক্তো ভবান্পূর্ববয়াঃ কবিম্
দেবয়ানীং চ দয়িতাং সুতাং তস্য মহাত্মনঃ
71.14
ত্বমারাধয়িতুং শক্তো নান্যঃ কশ্চন বিদ্যতে
শীলদাক্ষিণ্যমাধুর্যৈরাচারেণ দমেন চ
দেবয়ান্যাং হি তুষ্টায়াং বিদ্যাং তাং প্রাপ্স্যসি ধ্রুবম্
71.15
তথেত্যুক্ত্বা ততঃ প্রায়াদ্বৃহস্পতিসুতঃ কচঃ
তদাভিপূজিতো দেবৈঃ সমীপং বৃষপর্বণঃ
71.16
স গত্বা ত্বরিতো রাজন্দেবৈঃ সংপ্রেষিতঃ কচঃ
অসুরেন্দ্রপুরে শুক্রং দৃষ্ট্বা বাক্যমুবাচ হ
71.17
ঋষেরঙ্গিরসঃ পৌত্রং পুত্রং সাক্ষাদ্বৃহস্পতেঃ
নাম্না কচ ইতি খ্যাতং শিষ্যং গৃহ্ণাতু মাং ভবান্
71.18
ব্রহ্মচর্যং চরিষ্যামি ত্বয্যহং পরমং গুরৌ
অনুমন্যস্ব মাং ব্রহ্মন্সহস্রং পরিবত্সরান্
71.19
শুক্র উবাচ
কচ সুস্বাগতং তেঽস্তু প্রতিগৃহ্ণামি তে বচঃ
অর্চয়িষ্যেঽহমর্চ্যং ত্বামর্চিতোঽস্তু বৃহস্পতিঃ
71.20
বৈশংপায়ন উবাচ
কচস্তু তং তথেত্যুক্ত্বা প্রতিজগ্রাহ তদ্ব্রতম্
আদিষ্টং কবিপুত্রেণ শুক্রেণোশনসা স্বয়ম্
71.21
ব্রতস্য ব্রতকালং স যথোক্তং প্রত্যগৃহ্ণত
আরাধয়ন্নুপাধ্যায়ং দেবয়ানীং চ ভারত
71.22
নিত্যমারাধয়িষ্যংস্তাং যুবা যৌবনগোঽঽমুখে
গায়ন্নৃত্যন্বাদয়ংশ্চ দেবয়ানীমতোষয়ৎ
71.23
সংশীলয়ন্দেবয়ানীং কন্যাং সংপ্রাপ্তয়ৌবনাম্
পুষ্পৈঃ ফলৈঃ প্রেষণৈশ্চ তোষয়ামাস ভারত
71.24
দেবয়ান্যপি তং বিপ্রং নিয়মব্রতচারিণম্
অনুগায়মানা ললনা রহঃ পর্যচরত্তদা
71.25
পঞ্চ বর্ষশতান্যেবং কচস্য চরতো ব্রতম্
তত্রাতীয়ুরথো বুদ্ধ্বা দানবাস্তং ততঃ কচম্
71.26
গা রক্ষন্তং বনে দৃষ্ট্বা রহস্যেকমমর্ষিতাঃ
জঘ্নুর্বৃহস্পতের্দ্বেষাদ্বিদ্যারক্ষার্থমেব চ
হত্বা শালাবৃকেভ্যশ্চ প্রায়চ্ছংস্তিলশঃ কৃতম্
71.27
ততো গাবো নিবৃত্তাস্তা অগোপাঃ স্বং নিবেশনম্
তা দৃষ্ট্বা রহিতা গাস্তু কচেনাভ্যাগতা বনাৎ
উবাচ বচনং কালে দেবয়ান্যথ ভারত
71.28
অহুতং চাগ্নিহোত্রং তে সূর্যশ্চাস্তং গতঃ প্রভো
অগোপাশ্চাগতা গাবঃ কচস্তাত ন দৃশ্যতে
71.29
ব্যক্তং হতো মৃতো বাপি কচস্তাত ভবিষ্যতি
তং বিনা ন চ জীবেয়ং কচং সত্যং ব্রবীমি তে
71.30
শুক্র উবাচ
অয়মেহীতি শব্দেন মৃতং সংজীবয়াম্যহম্
71.31
বৈশংপায়ন উবাচ
ততঃ সংজীবনীং বিদ্যাং প্রয়ুজ্য কচমাহ্বয়ৎ
আহূতঃ প্রাদুরভবত্কচোঽরিষ্টোঽথ বিদ্যয়া
হতোঽহমিতি চাচখ্যৌ পৃষ্টো ব্রাহ্মণকন্যয়া
71.32
স পুনর্দেবয়ান্যোক্তঃ পুষ্পাহারো যদৃচ্ছয়া
বনং যয়ৌ ততো বিপ্রো দদৃশুর্দানবাশ্চ তম্
71.33
ততো দ্বিতীয়ং হত্বা তং দগ্ধ্বা কৃত্বা চ চূর্ণশঃ
প্রায়চ্ছন্ব্রাহ্মণায়ৈব সুরায়ামসুরাস্তদা
71.34
দেবয়ান্যথ ভূয়োঽপি বাক্যং পিতরমব্রবীৎ
পুষ্পাহারঃ প্রেষণকৃত্কচস্তাত ন দৃশ্যতে
71.35
শুক্র উবাচ
বৃহস্পতেঃ সুতঃ পুত্রি কচঃ প্রেতগতিং গতঃ
বিদ্যয়া জীবিতোঽপ্যেবং হন্যতে করবাণি কিম্
71.36
মৈবং শুচো মা রুদ দেবয়ানি; ন ত্বাদৃশী মর্ত্যমনুপ্রশোচেৎ
সুরাশ্চ বিশ্বে চ জগচ্চ সর্ব;মুপস্থিতাং বৈকৃতিমানমন্তি
71.37
দেবয়ান্যুবাচ
যস্যাঙ্গিরা বৃদ্ধতমঃ পিতামহো; বৃহস্পতিশ্চাপি পিতা তপোধনঃ
ঋষেঃ পুত্রং তমথো বাপি পৌত্রং; কথং ন শোচেয়মহং ন রুদ্যাম্
71.38
স ব্রহ্মচারী চ তপোধনশ্চ; সদোত্থিতঃ কর্মসু চৈব দক্ষঃ
কচস্য মার্গং প্রতিপত্স্যে ন ভোক্ষ্যে; প্রিয়ো হি মে তাত কচোঽভিরূপঃ
71.39
শুক্র উবাচ
অসংশয়ং মামসুরা দ্বিষন্তি; যে মে শিষ্যং নাগসং সূদয়ন্তি
অব্রাহ্মণং কর্তুমিচ্ছন্তি রৌদ্রা;স্তে মাং যথা প্রস্তুতং দানবৈর্হি
অপ্যস্য পাপস্য ভবেদিহান্তঃ; কং ব্রহ্মহত্যা ন দহেদপীন্দ্রম্
71.40
বৈশংপায়ন উবাচ
সংচোদিতো দেবয়ান্যা মহর্ষিঃ পুনরাহ্বয়ৎ
সংরম্ভেণৈব কাব্যো হি বৃহস্পতিসুতং কচম্
71.41
গুরোর্ভীতো বিদ্যয়া চোপহূতঃ; শনৈর্বাচং জঠরে ব্যাজহার
তমব্রবীত্কেন পথোপনীতো; মমোদরে তিষ্ঠসি ব্রূহি বিপ্র
71.42
কচ উবাচ
ভবত্প্রসাদান্ন জহাতি মাং স্মৃতিঃ; স্মরে চ সর্বং যচ্চ যথা চ বৃত্তম্
ন ত্বেবং স্যাত্তপসো ব্যয়ো মে; ততঃ ক্লেশং ঘোরমিমং সহামি
71.43
অসুরৈঃ সুরায়াং ভবতোঽস্মি দত্তো; হত্বা দগ্ধ্বা চূর্ণয়িত্বা চ কাব্য
ব্রাহ্মীং মায়ামাসুরী চৈব মায়া; ত্বয়ি স্থিতে কথমেবাতিবর্তেৎ
71.44
শুক্র উবাচ
কিং তে প্রিয়ং করবাণ্যদ্য বত্সে; বধেন মে জীবিতং স্যাত্কচস্য
নান্যত্র কুক্ষের্মম ভেদনেন; দৃশ্যেত্কচো মদ্গতো দেবয়ানি
71.45
দেবয়ান্যুবাচ
দ্বৌ মাং শোকাবগ্নিকল্পৌ দহেতাং; কচস্য নাশস্তব চৈবোপঘাতঃ
কচস্য নাশে মম নাস্তি শর্ম; তবোপঘাতে জীবিতুং নাস্মি শক্তা
71.46
শুক্র উবাচ
সংসিদ্ধরূপোঽসি বৃহস্পতেঃ সুত; যত্ত্বাং ভক্তং ভজতে দেবয়ানী
বিদ্যামিমাং প্রাপ্নুহি জীবনীং ত্বং; ন চেদিন্দ্রঃ কচরূপী ত্বমদ্য
71.47
ন নিবর্তেত্পুনর্জীবন্কশ্চিদন্যো মমোদরাৎ
ব্রাহ্মণং বর্জয়িত্বৈকং তস্মাদ্বিদ্যামবাপ্নুহি
71.48
পুত্রো ভূত্বা ভাবয় ভাবিতো মা;মস্মাদ্দেহাদুপনিষ্ক্রম্য তাত
সমীক্ষেথা ধর্মবতীমবেক্ষাং; গুরোঃ সকাশাত্প্রাপ্য বিদ্যাং সবিদ্যঃ
71.49
বৈশংপায়ন উবাচ
গুরোঃ সকাশাত্সমবাপ্য বিদ্যাং; ভিত্ত্বা কুক্ষিং নির্বিচক্রাম বিপ্রঃ
কচোঽভিরূপো দক্ষিণং ব্রাহ্মণস্য; শুক্লাত্যয়ে পৌর্ণমাস্যামিবেন্দুঃ
71.50
দৃষ্ট্বা চ তং পতিতং ব্রহ্মরাশি;মুত্থাপয়ামাস মৃতং কচোঽপি
বিদ্যাং সিদ্ধাং তামবাপ্যাভিবাদ্য; ততঃ কচস্তং গুরুমিত্যুবাচ
71.51
ঋতস্য দাতারমনুত্তমস্য; নিধিং নিধীনাং চতুরন্বয়ানাম্
যে নাদ্রিয়ন্তে গুরুমর্চনীয়ং; পাপাঁল্লোকাংস্তে ব্রজন্ত্যপ্রতিষ্ঠান্
71.52
বৈশংপায়ন উবাচ
সুরাপানাদ্বঞ্চনাং প্রাপয়িত্বা; সংজ্ঞানাশং চৈব তথাতিঘোরম্
দৃষ্ট্বা কচং চাপি তথাভিরূপং; পীতং তদা সুরয়া মোহিতেন
71.53
সমন্যুরুত্থায় মহানুভাব;স্তদোশনা বিপ্রহিতং চিকীর্ষুঃ
কাব্যঃ স্বয়ং বাক্যমিদং জগাদ; সুরাপানং প্রতি বৈ জাতশঙ্কঃ
71.54
যো ব্রাহ্মণোঽদ্য প্রভৃতীহ কশ্চি;ন্মোহাত্সুরাং পাস্যতি মন্দবুদ্ধিঃ
অপেতধর্মো ব্রহ্মহা চৈব স স্যা;দস্মিঁল্লোকে গর্হিতঃ স্যাত্পরে চ
71.55
ময়া চেমাং বিপ্রধর্মোক্তিসীমাং; মর্যাদাং বৈ স্থাপিতাং সর্বলোকে
সন্তো বিপ্রাঃ শুশ্রুবাংসো গুরূণাং; দেবা লোকাশ্চোপশৃণ্বন্তু সর্বে
71.56
ইতীদমুক্ত্বা স মহানুভাব;স্তপোনিধীনাং নিধিরপ্রমেয়ঃ
তান্দানবান্দৈববিমূঢবুদ্ধী;নিদং সমাহূয় বচোঽভ্যুবাচ
71.57
আচক্ষে বো দানবা বালিশাঃ স্থ; সিদ্ধঃ কচো বত্স্যতি মত্সকাশে
সংজীবনীং প্রাপ্য বিদ্যাং মহার্থাং; তুল্যপ্রভাবো ব্রহ্মণা ব্রহ্মভূতঃ
71.58
গুরোরুষ্য সকাশে তু দশ বর্ষশতানি সঃ
অনুজ্ঞাতঃ কচো গন্তুমিয়েষ ত্রিদশালয়ম্