Utshovঅধ্যায় 70
70.1
বৈশংপায়ন উবাচ
প্রজাপতেস্তু দক্ষস্য মনোর্বৈবস্বতস্য চ
ভরতস্য কুরোঃ পূরোরজমীঢস্য চান্বয়ে
70.2
যাদবানামিমং বংশং পৌরবাণাং চ সর্বশঃ
তথৈব ভারতানাং চ পুণ্যং স্বস্ত্যয়নং মহৎ
ধন্যং যশস্যমায়ুষ্যং কীর্তয়িষ্যামি তেঽনঘ
70.3
তেজোভিরুদিতাঃ সর্বে মহর্ষিসমতেজসঃ
দশ প্রচেতসঃ পুত্রাঃ সন্তঃ পূর্বজনাঃ স্মৃতাঃ
মেঘজেনাগ্নিনা যে তে পূর্বং দগ্ধা মহৌজসঃ
70.4
তেভ্যঃ প্রাচেতসো জজ্ঞে দক্ষো দক্ষাদিমাঃ প্রজাঃ
সংভূতাঃ পুরুষব্যাঘ্র স হি লোকপিতামহঃ
70.5
বীরিণ্যা সহ সংগম্য দক্ষঃ প্রাচেতসো মুনিঃ
আত্মতুল্যানজনয়ত্সহস্রং সংশিতব্রতান্
70.6
সহস্রসংখ্যান্সমিতান্সুতান্দক্ষস্য নারদঃ
মোক্ষমধ্যাপয়ামাস সাংখ্যজ্ঞানমনুত্তমম্
70.7
ততঃ পঞ্চাশতং কন্যাঃ পুত্রিকা অভিসংদধে
প্রজাপতিঃ প্রজা দক্ষঃ সিসৃক্ষুর্জনমেজয়
70.8
দদৌ স দশ ধর্মায় কশ্যপায় ত্রয়োদশ
কালস্য নয়নে যুক্তাঃ সপ্তবিংশতিমিন্দবে
70.9
ত্রয়োদশানাং পত্নীনাং যা তু দাক্ষায়ণী বরা
মারীচঃ কশ্যপস্তস্যামাদিত্যান্সমজীজনৎ
ইন্দ্রাদীন্বীর্যসংপন্নান্বিবস্বন্তমথাপি চ
70.10
বিবস্বতঃ সুতো জজ্ঞে যমো বৈবস্বতঃ প্রভুঃ
মার্তণ্ডশ্চ যমস্যাপি পুত্রো রাজন্নজায়ত
70.11
মার্তণ্ডস্য মনুর্ধীমানজায়ত সুতঃ প্রভুঃ
মনোর্বংশো মানবানাং ততোঽয়ং প্রথিতোঽভবৎ
ব্রহ্মক্ষত্রাদয়স্তস্মান্মনোর্জাতাস্তু মানবাঃ
70.12
তত্রাভবত্তদা রাজন্ব্রহ্ম ক্ষত্রেণ সংগতম্
ব্রাহ্মণা মানবাস্তেষাং সাঙ্গং বেদমদীধরন্
70.13
বেনং ধৃষ্ণুং নরিষ্যন্তং নাভাগেক্ষ্বাকুমেব চ
করূষমথ শর্যাতিং তথৈবাত্রাষ্টমীমিলাম্
70.14
পৃষধ্রনবমানাহুঃ ক্ষত্রধর্মপরায়ণান্
নাভাগারিষ্টদশমান্মনোঃ পুত্রান্মহাবলান্
70.15
পঞ্চাশতং মনোঃ পুত্রাস্তথৈবান্যেঽভবন্ক্ষিতৌ
অন্যোন্যভেদাত্তে সর্বে বিনেশুরিতি নঃ শ্রুতম্
70.16
পুরূরবাস্ততো বিদ্বানিলায়াং সমপদ্যত
সা বৈ তস্যাভবন্মাতা পিতা চেতি হি নঃ শ্রুতম্
70.17
ত্রয়োদশ সমুদ্রস্য দ্বীপানশ্নন্পুরূরবাঃ
অমানুষৈর্বৃতঃ সত্ত্বৈর্মানুষঃ সন্মহায়শাঃ
70.18
বিপ্রৈঃ স বিগ্রহং চক্রে বীর্যোন্মত্তঃ পুরূরবাঃ
জহার চ স বিপ্রাণাং রত্নান্যুত্ক্রোশতামপি
70.19
সনত্কুমারস্তং রাজন্ব্রহ্মলোকাদুপেত্য হ
অনুদর্শয়াং ততশ্চক্রে প্রত্যগৃহ্ণান্ন চাপ্যসৌ
70.20
ততো মহর্ষিভিঃ ক্রুদ্ধৈঃ শপ্তঃ সদ্যো ব্যনশ্যত
লোভান্বিতো মদবলান্নষ্টসংজ্ঞো নরাধিপঃ
70.21
স হি গন্ধর্বলোকস্থ উর্বশ্যা সহিতো বিরাট্
আনিনায় ক্রিয়ার্থেঽগ্নীন্যথাবদ্বিহিতাংস্ত্রিধা
70.22
ষট্পুত্রা জজ্ঞিরেঽথৈলাদায়ুর্ধীমানমাবসুঃ
দৃঢায়ুশ্চ বনায়ুশ্চ শ্রুতায়ুশ্চোর্বশীসুতাঃ
70.23
নহুষং বৃদ্ধশর্মাণং রজিং রম্ভমনেনসম্
স্বর্ভানবীসুতানেতানায়োঃ পুত্রান্প্রচক্ষতে
70.24
আয়ুষো নহুষঃ পুত্রো ধীমান্সত্যপরাক্রমঃ
রাজ্যং শশাস সুমহদ্ধর্মেণ পৃথিবীপতিঃ
70.25
পিতৄন্দেবানৃষীন্বিপ্রান্গন্ধর্বোরগরাক্ষসান্
নহুষঃ পালয়ামাস ব্রহ্মক্ষত্রমথো বিশঃ
70.26
স হত্বা দস্যুসংঘাতানৃষীন্করমদাপয়ৎ
পশুবচ্চৈব তান্পৃষ্ঠে বাহয়ামাস বীর্যবান্
70.27
কারয়ামাস চেন্দ্রত্বমভিভূয় দিবৌকসঃ
তেজসা তপসা চৈব বিক্রমেণৌজসা তথা
70.28
যতিং যয়াতিং সংয়াতিমায়াতিং পাঞ্চমুদ্ধবম্
নহুষো জনয়ামাস ষট্পুত্রান্প্রিয়বাসসি
70.29
যয়াতির্নাহুষঃ সম্রাডাসীত্সত্যপরাক্রমঃ
স পালয়ামাস মহীমীজে চ বিবিধৈঃ সবৈঃ
70.30
অতিশক্ত্যা পিতৄনর্চন্দেবাংশ্চ প্রয়তঃ সদা
অন্বগৃহ্ণাত্প্রজাঃ সর্বা যয়াতিরপরাজিতঃ
70.31
তস্য পুত্রা মহেষ্বাসাঃ সর্বৈঃ সমুদিতা গুণৈঃ
দেবয়ান্যাং মহারাজ শর্মিষ্ঠায়াং চ জজ্ঞিরে
70.32
দেবয়ান্যামজায়েতাং যদুস্তুর্বসুরেব চ
দ্রুহ্যুশ্চানুশ্চ পূরুশ্চ শর্মিষ্ঠায়াং প্রজজ্ঞিরে
70.33
স শাশ্বতীঃ সমা রাজন্প্রজা ধর্মেণ পালয়ন্
জরামার্ছন্মহাঘোরাং নাহুষো রূপনাশিনীম্
70.34
জরাভিভূতঃ পুত্রান্স রাজা বচনমব্রবীৎ
যদুং পূরুং তুর্বসুং চ দ্রুহ্যুং চানুং চ ভারত
70.35
যৌবনেন চরন্কামান্যুবা যুবতিভিঃ সহ
বিহর্তুমহমিচ্ছামি সাহ্যং কুরুত পুত্রকাঃ
70.36
তং পুত্রো দেবয়ানেয়ঃ পূর্বজো যদুরব্রবীৎ
কিং কার্যং ভবতঃ কার্যমস্মাভির্যৌবনেন চ
70.37
যয়াতিরব্রবীত্তং বৈ জরা মে প্রতিগৃহ্যতাম্
যৌবনেন ত্বদীয়েন চরেয়ং বিষয়ানহম্
70.38
যজতো দীর্ঘসত্রৈর্মে শাপাচ্চোশনসো মুনেঃ
কামার্থঃ পরিহীণো মে তপ্যেঽহং তেন পুত্রকাঃ
70.39
মামকেন শরীরেণ রাজ্যমেকঃ প্রশাস্তু বঃ
অহং তন্বাভিনবয়া যুবা কামানবাপ্নুয়াম্
70.40
ন তে তস্য প্রত্যগৃহ্ণন্যদুপ্রভৃতয়ো জরাম্
তমব্রবীত্ততঃ পূরুঃ কনীয়ান্সত্যবিক্রমঃ
70.41
রাজংশ্চরাভিনবয়া তন্বা যৌবনগোচরঃ
অহং জরাং সমাস্থায় রাজ্যে স্থাস্যামি তেঽঽজ্ঞয়া
70.42
এবমুক্তঃ স রাজর্ষিস্তপোবীর্যসমাশ্রয়াৎ
সংচারয়ামাস জরাং তদা পুত্রে মহাত্মনি
70.43
পৌরবেণাথ বয়সা রাজা যৌবনমাস্থিতঃ
যায়াতেনাপি বয়সা রাজ্যং পূরুরকারয়ৎ
70.44
ততো বর্ষসহস্রান্তে যয়াতিরপরাজিতঃ
অতৃপ্ত এব কামানাং পূরুং পুত্রমুবাচ হ
70.45
ত্বয়া দায়াদবানস্মি ত্বং মে বংশকরঃ সুতঃ
পৌরবো বংশ ইতি তে খ্যাতিং লোকে গমিষ্যতি
70.46
ততঃ স নৃপশার্দূলঃ পূরুং রাজ্যেঽভিষিচ্য চ
কালেন মহতা পশ্চাত্কালধর্মমুপেয়িবান্