Utshovঅধ্যায় 69
69.1
শকুন্তলোবাচ
রাজন্সর্ষপমাত্রাণি পরচ্ছিদ্রাণি পশ্যসি
আত্মনো বিল্বমাত্রাণি পশ্যন্নপি ন পশ্যসি
69.2
মেনকা ত্রিদশেষ্বেব ত্রিদশাশ্চানু মেনকাম্
মমৈবোদ্রিচ্যতে জন্ম দুঃষন্ত তব জন্মতঃ
69.3
ক্ষিতাবটসি রাজংস্ত্বমন্তরিক্ষে চরাম্যহম্
আবয়োরন্তরং পশ্য মেরুসর্ষপয়োরিব
69.4
মহেন্দ্রস্য কুবেরস্য যমস্য বরুণস্য চ
ভবনান্যনুসংয়ামি প্রভাবং পশ্য মে নৃপ
69.5
সত্যশ্চাপি প্রবাদোঽয়ং যং প্রবক্ষ্যামি তেঽনঘ
নিদর্শনার্থং ন দ্বেষাত্তচ্ছ্রুত্বা ক্ষন্তুমর্হসি
69.6
বিরূপো যাবদাদর্শে নাত্মনঃ পশ্যতে মুখম্
মন্যতে তাবদাত্মানমন্যেভ্যো রূপবত্তরম্
69.7
যদা তু মুখমাদর্শে বিকৃতং সোঽভিবীক্ষতে
তদেতরং বিজানাতি আত্মানং নেতরং জনম্
69.8
অতীব রূপসংপন্নো ন কিংচিদবমন্যতে
অতীব জল্পন্দুর্বাচো ভবতীহ বিহেঠকঃ
69.9
মূর্খো হি জল্পতাং পুংসাং শ্রুত্বা বাচঃ শুভাশুভাঃ
অশুভং বাক্যমাদত্তে পুরীষমিব সূকরঃ
69.10
প্রাজ্ঞস্তু জল্পতাং পুংসাং শ্রুত্বা বাচঃ শুভাশুভাঃ
গুণবদ্বাক্যমাদত্তে হংসঃ ক্ষীরমিবাম্ভসঃ
69.11
অন্যান্পরিবদন্সাধুর্যথা হি পরিতপ্যতে
তথা পরিবদন্নন্যাংস্তুষ্টো ভবতি দুর্জনঃ
69.12
অভিবাদ্য যথা বৃদ্ধান্সন্তো গচ্ছন্তি নির্বৃতিম্
এবং সজ্জনমাক্রুশ্য মূর্খো ভবতি নির্বৃতঃ
69.13
সুখং জীবন্ত্যদোষজ্ঞা মূর্খা দোষানুদর্শিনঃ
যত্র বাচ্যাঃ পরৈঃ সন্তঃ পরানাহুস্তথাবিধান্
69.14
অতো হাস্যতরং লোকে কিংচিদন্যন্ন বিদ্যতে
যত্র দুর্জন ইত্যাহ দুর্জনঃ সজ্জনং স্বয়ম্
69.15
সত্যধর্মচ্যুতাত্পুংসঃ ক্রুদ্ধাদাশীবিষাদিব
অনাস্তিকোঽপ্যুদ্বিজতে জনঃ কিং পুনরাস্তিকঃ
69.16
স্বয়মুত্পাদ্য বৈ পুত্রং সদৃশং যোঽবমন্যতে
তস্য দেবাঃ শ্রিয়ং ঘ্নন্তি ন চ লোকানুপাশ্নুতে
69.17
কুলবংশপ্রতিষ্ঠাং হি পিতরঃ পুত্রমব্রুবন্
উত্তমং সর্বধর্মাণাং তস্মাত্পুত্রং ন সংত্যজেৎ
69.18
স্বপত্নীপ্রভবান্পঞ্চ লব্ধান্ক্রীতান্বিবর্ধিতান্
কৃতানন্যাসু চোত্পন্নান্পুত্রান্বৈ মনুরব্রবীৎ
69.19
ধর্মকীর্ত্যাবহা নৄণাং মনসঃ প্রীতিবর্ধনাঃ
ত্রায়ন্তে নরকাজ্জাতাঃ পুত্রা ধর্মপ্লবাঃ পিতৄন্
69.20
স ত্বং নৃপতিশার্দূল ন পুত্রং ত্যক্তুমর্হসি
আত্মানং সত্যধর্মৌ চ পালয়ানো মহীপতে
নরেন্দ্রসিংহ কপটং ন বোঢুং ত্বমিহার্হসি
69.21
বরং কূপশতাদ্বাপী বরং বাপীশতাত্ক্রতুঃ
বরং ক্রতুশতাত্পুত্রঃ সত্যং পুত্রশতাদ্বরম্
69.22
অশ্বমেধসহস্রং চ সত্যং চ তুলয়া ধৃতম্
অশ্বমেধসহস্রাদ্ধি সত্যমেব বিশিষ্যতে
69.23
সর্ববেদাধিগমনং সর্বতীর্থাবগাহনম্
সত্যং চ বদতো রাজন্সমং বা স্যান্ন বা সমম্
69.24
নাস্তি সত্যাত্পরো ধর্মো ন সত্যাদ্বিদ্যতে পরম্
ন হি তীব্রতরং কিংচিদনৃতাদিহ বিদ্যতে
69.25
রাজন্সত্যং পরং ব্রহ্ম সত্যং চ সময়ঃ পরঃ
মা ত্যাক্ষীঃ সময়ং রাজন্সত্যং সংগতমস্তু তে
69.26
অনৃতে চেত্প্রসঙ্গস্তে শ্রদ্দধাসি ন চেত্স্বয়ম্
আত্মনো হন্ত গচ্ছামি ত্বাদৃশে নাস্তি সংগতম্
69.27
ঋতেঽপি ত্বয়ি দুঃষন্ত শৈলরাজাবতংসকাম্
চতুরন্তামিমামুর্বীং পুত্রো মে পালয়িষ্যতি
69.28
বৈশংপায়ন উবাচ
এতাবদুক্ত্বা বচনং প্রাতিষ্ঠত শকুন্তলা
অথান্তরিক্ষে দুঃষন্তং বাগুবাচাশরীরিণী
ঋত্বিক্পুরোহিতাচার্যৈর্মন্ত্রিভিশ্চাবৃতং তদা
69.29
ভস্ত্রা মাতা পিতুঃ পুত্রো যেন জাতঃ স এব সঃ
ভরস্ব পুত্রং দুঃষন্ত মাবমংস্থাঃ শকুন্তলাম্
69.30
রেতোধাঃ পুত্র উন্নয়তি নরদেব যমক্ষয়াৎ
ত্বং চাস্য ধাতা গর্ভস্য সত্যমাহ শকুন্তলা
69.31
জায়া জনয়তে পুত্রমাত্মনোঽঙ্গং দ্বিধা কৃতম্
তস্মাদ্ভরস্ব দুঃষন্ত পুত্রং শাকুন্তলং নৃপ
69.32
অভূতিরেষা কস্ত্যজ্যাজ্জীবঞ্জীবন্তমাত্মজম্
শাকুন্তলং মহাত্মানং দৌঃষন্তিং ভর পৌরব
69.33
ভর্তব্যোঽয়ং ত্বয়া যস্মাদস্মাকং বচনাদপি
তস্মাদ্ভবত্বয়ং নাম্না ভরতো নাম তে সুতঃ
69.34
তচ্ছ্রুত্বা পৌরবো রাজা ব্যাহৃতং বৈ দিবৌকসাম্
পুরোহিতমমাত্যাংশ্চ সংপ্রহৃষ্টোঽব্রবীদিদম্
69.35
শৃণ্বন্ত্বেতদ্ভবন্তোঽস্য দেবদূতস্য ভাষিতম্
অহমপ্যেবমেবৈনং জানামি স্বয়মাত্মজম্
69.36
যদ্যহং বচনাদেব গৃহ্ণীয়ামিমমাত্মজম্
ভবেদ্ধি শঙ্কা লোকস্য নৈবং শুদ্ধো ভবেদয়ম্
69.37
তং বিশোধ্য তদা রাজা দেবদূতেন ভারত
হৃষ্টঃ প্রমুদিতশ্চাপি প্রতিজগ্রাহ তং সুতম্
69.38
মূর্ধ্নি চৈনমুপাঘ্রায় সস্নেহং পরিষস্বজে
সভাজ্যমানো বিপ্রৈশ্চ স্তূয়মানশ্চ বন্দিভিঃ
স মুদং পরমাং লেভে পুত্রসংস্পর্শজাং নৃপঃ
69.39
তাং চৈব ভার্যাং ধর্মজ্ঞঃ পূজয়ামাস ধর্মতঃ
অব্রবীচ্চৈব তাং রাজা সান্ত্বপূর্বমিদং বচঃ
69.40
কৃতো লোকপরোক্ষোঽয়ং সংবন্ধো বৈ ত্বয়া সহ
তস্মাদেতন্ময়া দেবি ত্বচ্ছুদ্ধ্যর্থং বিচারিতম্
69.41
মন্যতে চৈব লোকস্তে স্ত্রীভাবান্ময়ি সংগতম্
পুত্রশ্চায়ং বৃতো রাজ্যে ময়া তস্মাদ্বিচারিতম্
69.42
যচ্চ কোপিতয়াত্যর্থং ত্বয়োক্তোঽস্ম্যপ্রিয়ং প্রিয়ে
প্রণয়িন্যা বিশালাক্ষি তত্ক্ষান্তং তে ময়া শুভে
69.43
তামেবমুক্ত্বা রাজর্ষির্দুঃষন্তো মহিষীং প্রিয়াম্
বাসোভিরন্নপানৈশ্চ পূজয়ামাস ভারত
69.44
দুঃষন্তশ্চ ততো রাজা পুত্রং শাকুন্তলং তদা
ভরতং নামতঃ কৃত্বা যৌবরাজ্যেঽভ্যষেচয়ৎ
69.45
তস্য তত্প্রথিতং চক্রং প্রাবর্তত মহাত্মনঃ
ভাস্বরং দিব্যমজিতং লোকসংনাদনং মহৎ
69.46
স বিজিত্য মহীপালাংশ্চকার বশবর্তিনঃ
চচার চ সতাং ধর্মং প্রাপ চানুত্তমং যশঃ
69.47
স রাজা চক্রবর্ত্যাসীত্সার্বভৌমঃ প্রতাপবান্
ঈজে চ বহুভির্যজ্ঞৈর্যথা শক্রো মরুত্পতিঃ
69.48
যাজয়ামাস তং কণ্বো দক্ষবদ্ভূরিদক্ষিণম্
শ্রীমান্গোবিততং নাম বাজিমেধমবাপ সঃ
যস্মিন্সহস্রং পদ্মানাং কণ্বায় ভরতো দদৌ
69.49
ভরতাদ্ভারতী কীর্তির্যেনেদং ভারতং কুলম্
অপরে যে চ পূর্বে চ ভারতা ইতি বিশ্রুতাঃ
69.50
ভরতস্যান্ববায়ে হি দেবকল্পা মহৌজসঃ
বভূবুর্ব্রহ্মকল্পাশ্চ বহবো রাজসত্তমাঃ
69.51
যেষামপরিমেয়ানি নামধেয়ানি সর্বশঃ
তেষাং তু তে যথামুখ্যং কীর্তয়িষ্যামি ভারত
মহাভাগান্দেবকল্পান্সত্যার্জবপরায়ণান্