Utshovঅধ্যায় 68
68.1
বৈশংপায়ন উবাচ
প্রতিজ্ঞায় তু দুঃষন্তে প্রতিয়াতে শকুন্তলা
গর্ভং সুষাব বামোরুঃ কুমারমমিতৌজসম্
68.2
ত্রিষু বর্ষেষু পূর্ণেষু দিপ্তানলসমদ্যুতিম্
রূপৌদার্যগুণোপেতং দৌঃষন্তিং জনমেজয়
68.3
জাতকর্মাদিসংস্কারং কণ্বঃ পুণ্যকৃতাং বরঃ
তস্যাথ কারয়ামাস বর্ধমানস্য ধীমতঃ
68.4
দন্তৈঃ শুক্লৈঃ শিখরিভিঃ সিংহসংহননো যুবা
চক্রাঙ্কিতকরঃ শ্রীমান্মহামূর্ধা মহাবলঃ
কুমারো দেবগর্ভাভঃ স তত্রাশু ব্যবর্ধত
68.5
ষড্বর্ষ এব বালঃ স কণ্বাশ্রমপদং প্রতি
ব্যাঘ্রান্সিংহান্বরাহাংশ্চ গজাংশ্চ মহিষাংস্তথা
68.6
বদ্ধ্বা বৃক্ষেষু বলবানাশ্রমস্য সমন্ততঃ
আরোহন্দময়ংশ্চৈব ক্রীডংশ্চ পরিধাবতি
68.7
ততোঽস্য নাম চক্রুস্তে কণ্বাশ্রমনিবাসিনঃ
অস্ত্বয়ং সর্বদমনঃ সর্বং হি দময়ত্যয়ম্
68.8
স সর্বদমনো নাম কুমারঃ সমপদ্যত
বিক্রমেণৌজসা চৈব বলেন চ সমন্বিতঃ
68.9
তং কুমারমৃষির্দৃষ্ট্বা কর্ম চাস্যাতিমানুষম্
সময়ো যৌবরাজ্যায়েত্যব্রবীচ্চ শকুন্তলাম্
68.10
তস্য তদ্বলমাজ্ঞায় কণ্বঃ শিষ্যানুবাচ হ
শকুন্তলামিমাং শীঘ্রং সহপুত্রামিতোঽঽশ্রমাৎ
ভর্ত্রে প্রাপয়তাদ্যৈব সর্বলক্ষণপূজিতাম্
68.11
নারীণাং চিরবাসো হি বান্ধবেষু ন রোচতে
কীর্তিচারিত্রধর্মঘ্নস্তস্মান্নয়ত মাচিরম্
68.12
তথেত্যুক্ত্বা তু তে সর্বে প্রাতিষ্ঠন্তামিতৌজসঃ
শকুন্তলাং পুরস্কৃত্য সপুত্রাং গজসাহ্বয়ম্
68.13
গৃহীত্বামরগর্ভাভং পুত্রং কমললোচনম্
আজগাম ততঃ শুভ্রা দুঃষন্তবিদিতাদ্বনাৎ
68.14
অভিসৃত্য চ রাজানং বিদিতা সা প্রবেশিতা
সহ তেনৈব পুত্রেণ তরুণাদিত্যবর্চসা
68.15
পূজয়িত্বা যথান্যায়মব্রবীত্তং শকুন্তলা
অয়ং পুত্রস্ত্বয়া রাজন্যৌবরাজ্যেঽভিষিচ্যতাম্
68.16
ত্বয়া হ্যয়ং সুতো রাজন্ময্যুত্পন্নঃ সুরোপমঃ
যথাসময়মেতস্মিন্বর্তস্ব পুরুষোত্তম
68.17
যথা সমাগমে পূর্বং কৃতঃ স সময়স্ত্বয়া
তং স্মরস্ব মহাভাগ কণ্বাশ্রমপদং প্রতি
68.18
সোঽথ শ্রুত্বৈব তদ্বাক্যং তস্যা রাজা স্মরন্নপি
অব্রবীন্ন স্মরামীতি কস্য ত্বং দুষ্টতাপসি
68.19
ধর্মকামার্থসংবন্ধং ন স্মরামি ত্বয়া সহ
গচ্ছ বা তিষ্ঠ বা কামং যদ্বাপীচ্ছসি তত্কুরু
68.20
সৈবমুক্তা বরারোহা ব্রীডিতেব মনস্বিনী
বিসংজ্ঞেব চ দুঃখেন তস্থৌ স্থাণুরিবাচলা
68.21
সংরম্ভামর্ষতাম্রাক্ষী স্ফুরমাণোষ্ঠসংপুটা
কটাক্ষৈর্নির্দহন্তীব তির্যগ্রাজানমৈক্ষত
68.22
আকারং গূহমানা চ মন্যুনাভিসমীরিতা
তপসা সংভৃতং তেজো ধারয়ামাস বৈ তদা
68.23
সা মুহূর্তমিব ধ্যাত্বা দুঃখামর্ষসমন্বিতা
ভর্তারমভিসংপ্রেক্ষ্য ক্রুদ্ধা বচনমব্রবীৎ
68.24
জানন্নপি মহারাজ কস্মাদেবং প্রভাষসে
ন জানামীতি নিঃসঙ্গং যথান্যঃ প্রাকৃতস্তথা
68.25
অত্র তে হৃদয়ং বেদ সত্যস্যৈবানৃতস্য চ
কল্যাণ বত সাক্ষী ত্বং মাত্মানমবমন্যথাঃ
68.26
যোঽন্যথা সন্তমাত্মানমন্যথা প্রতিপদ্যতে
কিং তেন ন কৃতং পাপং চোরেণাত্মাপহারিণা
68.27
একোঽহমস্মীতি চ মন্যসে ত্বং; ন হৃচ্ছয়ং বেত্সি মুনিং পুরাণম্
যো বেদিতা কর্মণঃ পাপকস্য; তস্যান্তিকে ত্বং বৃজিনং করোষি
68.28
মন্যতে পাপকং কৃত্বা ন কশ্চিদ্বেত্তি মামিতি
বিদন্তি চৈনং দেবাশ্চ স্বশ্চৈবান্তরপূরুষঃ
68.29
আদিত্যচন্দ্রাবনিলানলৌ চ; দ্যৌর্ভূমিরাপো হৃদয়ং যমশ্চ
অহশ্চ রাত্রিশ্চ উভে চ সংধ্যে; ধর্মশ্চ জানাতি নরস্য বৃত্তম্
68.30
যমো বৈবস্বতস্তস্য নির্যাতয়তি দুষ্কৃতম্
হৃদি স্থিতঃ কর্মসাক্ষী ক্ষেত্রজ্ঞো যস্য তুষ্যতি
68.31
ন তু তুষ্যতি যস্যৈষ পুরুষস্য দুরাত্মনঃ
তং যমঃ পাপকর্মাণং নির্যাতয়তি দুষ্কৃতম্
68.32
অবমন্যাত্মনাত্মানমন্যথা প্রতিপদ্যতে
দেবা ন তস্য শ্রেয়াংসো যস্যাত্মাপি ন কারণম্
68.33
স্বয়ং প্রাপ্তেতি মামেবং মাবমংস্থাঃ পতিব্রতাম্
অর্ঘ্যার্হাং নার্চয়সি মাং স্বয়ং ভার্যামুপস্থিতাম্
68.34
কিমর্থং মাং প্রাকৃতবদুপপ্রেক্ষসি সংসদি
ন খল্বহমিদং শূন্যে রৌমি কিং ন শৃণোষি মে
68.35
যদি মে যাচমানায়া বচনং ন করিষ্যসি
দুঃষন্ত শতধা মূর্ধা ততস্তেঽদ্য ফলিষ্যতি
68.36
ভার্যাং পতিঃ সংপ্রবিশ্য স যস্মাজ্জায়তে পুনঃ
জায়ায়া ইতি জায়াত্বং পুরাণাঃ কবয়ো বিদুঃ
68.37
যদাগমবতঃ পুংসস্তদপত্যং প্রজায়তে
তত্তারয়তি সংতত্যা পূর্বপ্রেতান্পিতামহান্
68.38
পুন্নাম্নো নরকাদ্যস্মাত্পিতরং ত্রায়তে সুতঃ
তস্মাত্পুত্র ইতি প্রোক্তঃ স্বয়মেব স্বয়ম্ভুবা
68.39
সা ভার্যা যা গৃহে দক্ষা সা ভার্যা যা প্রজাবতী
সা ভার্যা যা পতিপ্রাণা সা ভার্যা যা পতিব্রতা
68.40
অর্ধং ভার্যা মনুষ্যস্য ভার্যা শ্রেষ্ঠতমঃ সখা
ভার্যা মূলং ত্রিবর্গস্য ভার্যা মিত্রং মরিষ্যতঃ
68.41
ভার্যাবন্তঃ ক্রিয়াবন্তঃ সভার্যা গৃহমেধিনঃ
ভার্যাবন্তঃ প্রমোদন্তে ভার্যাবন্তঃ শ্রিয়ান্বিতাঃ
68.42
সখায়ঃ প্রবিবিক্তেষু ভবন্ত্যেতাঃ প্রিয়ংবদাঃ
পিতরো ধর্মকার্যেষু ভবন্ত্যার্তস্য মাতরঃ
68.43
কান্তারেষ্বপি বিশ্রামো নরস্যাধ্বনিকস্য বৈ
যঃ সদারঃ স বিশ্বাস্যস্তস্মাদ্দারাঃ পরা গতিঃ
68.44
সংসরন্তমপি প্রেতং বিষমেষ্বেকপাতিনম্
ভার্যৈবান্বেতি ভর্তারং সততং যা পতিব্রতা
68.45
প্রথমং সংস্থিতা ভার্যা পতিং প্রেত্য প্রতীক্ষতে
পূর্বং মৃতং চ ভর্তারং পশ্চাত্সাধ্ব্যনুগচ্ছতি
68.46
এতস্মাত্কারণাদ্রাজন্পাণিগ্রহণমিষ্যতে
যদাপ্নোতি পতির্ভার্যামিহ লোকে পরত্র চ
68.47
আত্মাত্মনৈব জনিতঃ পুত্র ইত্যুচ্যতে বুধৈঃ
তস্মাদ্ভার্যাং নরঃ পশ্যেন্মাতৃবত্পুত্রমাতরম্
68.48
ভার্যায়াং জনিতং পুত্রমাদর্শে স্বমিবাননম্
হ্লাদতে জনিতা প্রেষ্ক্য স্বর্গং প্রাপ্যেব পুণ্যকৃৎ
68.49
দহ্যমানা মনোদুঃখৈর্ব্যাধিভিশ্চাতুরা নরাঃ
হ্লাদন্তে স্বেষু দারেষু ঘর্মার্তাঃ সলিলেষ্বিব
68.50
সুসংরব্ধোঽপি রামাণাং ন ব্রূয়াদপ্রিয়ং বুধঃ
রতিং প্রীতিং চ ধর্মং চ তাস্বায়ত্তমবেক্ষ্য চ
68.51
আত্মনো জন্মনঃ ক্ষেত্রং পুণ্যং রামাঃ সনাতনম্
ঋষীণামপি কা শক্তিঃ স্রষ্টুং রামামৃতে প্রজাঃ
68.52
পরিপত্য যদা সূনুর্ধরণীরেণুগুণ্ঠিতঃ
পিতুরাশ্লিষ্যতেঽঙ্গানি কিমিবাস্ত্যধিকং ততঃ
68.53
স ত্বং স্বয়মনুপ্রাপ্তং সাভিলাষমিমং সুতম্
প্রেক্ষমাণং চ কাক্ষেণ কিমর্থমবমন্যসে
68.54
অণ্ডানি বিভ্রতি স্বানি ন ভিন্দন্তি পিপীলিকাঃ
ন ভরেথাঃ কথং নু ত্বং ধর্মজ্ঞঃ সন্স্বমাত্মজম্
68.55
ন বাসসাং ন রামাণাং নাপাং স্পর্শস্তথা সুখঃ
শিশোরালিঙ্গ্যমানস্য স্পর্শঃ সূনোর্যথা সুখঃ
68.56
ব্রাহ্মণো দ্বিপদাং শ্রেষ্ঠো গৌর্বরিষ্ঠা চতুষ্পদাম্
গুরুর্গরীয়সাং শ্রেষ্ঠঃ পুত্রঃ স্পর্শবতাং বরঃ
68.57
স্পৃশতু ত্বাং সমাশ্লিষ্য পুত্রোঽয়ং প্রিয়দর্শনঃ
পুত্রস্পর্শাত্সুখতরঃ স্পর্শো লোকে ন বিদ্যতে
68.58
ত্রিষু বর্ষেষু পূর্ণেষু প্রজাতাহমরিংদম
ইমং কুমারং রাজেন্দ্র তব শোকপ্রণাশনম্
68.59
আহর্তা বাজিমেধস্য শতসংখ্যস্য পৌরব
ইতি বাগন্তরিক্ষে মাং সূতকেঽভ্যবদত্পুরা
68.60
ননু নামাঙ্কমারোপ্য স্নেহাদ্গ্রামান্তরং গতাঃ
মূর্ধ্নি পুত্রানুপাঘ্রায় প্রতিনন্দন্তি মানবাঃ
68.61
বেদেষ্বপি বদন্তীমং মন্ত্রবাদং দ্বিজাতয়ঃ
জাতকর্মণি পুত্রাণাং তবাপি বিদিতং তথা
68.62
অঙ্গাদঙ্গাত্সংভবসি হৃদয়াদভিজায়সে
আত্মা বৈ পুত্রনামাসি স জীব শরদঃ শতম্
68.63
পোষো হি ত্বদধীনো মে সংতানমপি চাক্ষয়ম্
তস্মাত্ত্বং জীব মে বত্স সুসুখী শরদাং শতম্
68.64
ত্বদঙ্গেভ্যঃ প্রসূতোঽয়ং পুরুষাত্পুরুষোঽপরঃ
সরসীবামলেঽঽত্মানং দ্বিতীয়ং পশ্য মে সুতম্
68.65
যথা হ্যাহবনীয়োঽগ্নির্গার্হপত্যাত্প্রণীয়তে
তথা ত্বত্তঃ প্রসূতোঽয়ং ত্বমেকঃ সন্দ্বিধা কৃতঃ
68.66
মৃগাপকৃষ্টেন হি তে মৃগয়াং পরিধাবতা
অহমাসাদিতা রাজন্কুমারী পিতুরাশ্রমে
68.67
উর্বশী পূর্বচিত্তিশ্চ সহজন্যা চ মেনকা
বিশ্বাচী চ ঘৃতাচী চ ষডেবাপ্সরসাং বরাঃ
68.68
তাসাং মাং মেনকা নাম ব্রহ্ময়োনির্বরাপ্সরাঃ
দিবঃ সংপ্রাপ্য জগতীং বিশ্বামিত্রাদজীজনৎ
68.69
সা মাং হিমবতঃ পৃষ্ঠে সুষুবে মেনকাপ্সরাঃ
অবকীর্য চ মাং যাতা পরাত্মজমিবাসতী
68.70
কিং নু কর্মাশুভং পূর্বং কৃতবত্যস্মি জন্মনি
যদহং বান্ধবৈস্ত্যক্তা বাল্যে সংপ্রতি চ ত্বয়া
68.71
কামং ত্বয়া পরিত্যক্তা গমিষ্যাম্যহমাশ্রমম্
ইমং তু বালং সংত্যক্তুং নার্হস্যাত্মজমাত্মনা
68.72
দুঃষন্ত উবাচ
ন পুত্রমভিজানামি ত্বয়ি জাতং শকুন্তলে
অসত্যবচনা নার্যঃ কস্তে শ্রদ্ধাস্যতে বচঃ
68.73
মেনকা নিরনুক্রোশা বন্ধকী জননী তব
যয়া হিমবতঃ পৃষ্ঠে নির্মাল্যেব প্রবেরিতা
68.74
স চাপি নিরনুক্রোশঃ ক্ষত্রয়োনিঃ পিতা তব
বিশ্বামিত্রো ব্রাহ্মণত্বে লুব্ধঃ কামপরায়ণঃ
68.75
মেনকাপ্সরসাং শ্রেষ্ঠা মহর্ষীণাং চ তে পিতা
তয়োরপত্যং কস্মাত্ত্বং পুংশ্চলীবাভিধাস্যসি
68.76
অশ্রদ্ধেয়মিদং বাক্যং কথয়ন্তী ন লজ্জসে
বিশেষতো মত্সকাশে দুষ্টতাপসি গম্যতাম্
68.77
ক্ব মহর্ষিঃ সদৈবোগ্রঃ সাপ্সরা ক্ব চ মেনকা
ক্ব চ ত্বমেবং কৃপণা তাপসীবেষধারিণী
68.78
অতিকায়শ্চ পুত্রস্তে বালোঽপি বলবানয়ম্
কথমল্পেন কালেন শালস্কন্ধ ইবোদ্গতঃ
68.79
সুনিকৃষ্টা চ যোনিস্তে পুংশ্চলী প্রতিভাসি মে
যদৃচ্ছয়া কামরাগাজ্জাতা মেনকয়া হ্যসি
68.80
সর্বমেতত্পরোক্ষং মে যত্ত্বং বদসি তাপসি
নাহং ত্বামভিজানামি যথেষ্টং গম্যতাং ত্বয়া