Utshovঅধ্যায় 67
67.1
দুঃষন্ত উবাচ
সুব্যক্তং রাজপুত্রী ত্বং যথা কল্যাণি ভাষসে
ভার্যা মে ভব সুশ্রোণি ব্রূহি কিং করবাণি তে
67.2
সুবর্ণমালা বাসাংসি কুণ্ডলে পরিহাটকে
নানাপত্তনজে শুভ্রে মণিরত্নে চ শোভনে
67.3
আহরামি তবাদ্যাহং নিষ্কাদীন্যজিনানি চ
সর্বং রাজ্যং তবাদ্যাস্তু ভার্যা মে ভব শোভনে
67.4
গান্ধর্বেণ চ মাং ভীরু বিবাহেনৈহি সুন্দরি
বিবাহানাং হি রম্ভোরু গান্ধর্বঃ শ্রেষ্ঠ উচ্যতে
67.5
শকুন্তলোবাচ
ফলাহারো গতো রাজন্পিতা মে ইত আশ্রমাৎ
তং মুহূর্তং প্রতীক্ষস্ব স মাং তুভ্যং প্রদাস্যতি
67.6
দুঃষন্ত উবাচ
ইচ্ছামি ত্বাং বরারোহে ভজমানামনিন্দিতে
ত্বদর্থং মাং স্থিতং বিদ্ধি ত্বদ্গতং হি মনো মম
67.7
আত্মনো বন্ধুরাত্মৈব গতিরাত্মৈব চাত্মনঃ
আত্মনৈবাত্মনো দানং কর্তুমর্হসি ধর্মতঃ
67.8
অষ্টাবেব সমাসেন বিবাহা ধর্মতঃ স্মৃতাঃ
ব্রাহ্মো দৈবস্তথৈবার্ষঃ প্রাজাপত্যস্তথাসুরঃ
67.9
গান্ধর্বো রাক্ষসশ্চৈব পৈশাচশ্চাষ্টমঃ স্মৃতঃ
তেষাং ধর্মান্যথাপূর্বং মনুঃ স্বায়ংভুবোঽব্রবীৎ
67.10
প্রশস্তাংশ্চতুরঃ পূর্বান্ব্রাহ্মণস্যোপধারয়
ষডানুপূর্ব্যা ক্ষত্রস্য বিদ্ধি ধর্ম্যাননিন্দিতে
67.11
রাজ্ঞাং তু রাক্ষসোঽপ্যুক্তো বিট্শূদ্রেষ্বাসুরঃ স্মৃতঃ
পঞ্চানাং তু ত্রয়ো ধর্ম্যা দ্বাবধর্ম্যৌ স্মৃতাবিহ
67.12
পৈশাচশ্চাসুরশ্চৈব ন কর্তব্যৌ কথংচন
অনেন বিধিনা কার্যো ধর্মস্যৈষা গতিঃ স্মৃতা
67.13
গান্ধর্বরাক্ষসৌ ক্ষত্রে ধর্ম্যৌ তৌ মা বিশঙ্কিথাঃ
পৃথগ্বা যদি বা মিশ্রৌ কর্তব্যৌ নাত্র সংশয়ঃ
67.14
সা ত্বং মম সকামস্য সকামা বরবর্ণিনি
গান্ধর্বেণ বিবাহেন ভার্যা ভবিতুমর্হসি
67.15
শকুন্তলোবাচ
যদি ধর্মপথস্ত্বেষ যদি চাত্মা প্রভুর্মম
প্রদানে পৌরবশ্রেষ্ঠ শৃণু মে সময়ং প্রভো
67.16
সত্যং মে প্রতিজানীহি যত্ত্বাং বক্ষ্যাম্যহং রহঃ
মম জায়েত যঃ পুত্রঃ স ভবেত্ত্বদনন্তরম্
67.17
যুবরাজো মহারাজ সত্যমেতদ্ব্রবীহি মে
যদ্যেতদেবং দুঃষন্ত অস্তু মে সংগমস্ত্বয়া
67.18
বৈশংপায়ন উবাচ
এবমস্ত্বিতি তাং রাজা প্রত্যুবাচাবিচারয়ন্
অপি চ ত্বাং নয়িষ্যামি নগরং স্বং শুচিস্মিতে
যথা ত্বমর্হা সুশ্রোণি সত্যমেতদ্ব্রবীমি তে
67.19
এবমুক্ত্বা স রাজর্ষিস্তামনিন্দিতগামিনীম্
জগ্রাহ বিধিবত্পাণাবুবাস চ তয়া সহ
67.20
বিশ্বাস্য চৈনাং স প্রায়াদব্রবীচ্চ পুনঃ পুনঃ
প্রেষয়িষ্যে তবার্থায় বাহিনীং চতুরঙ্গিণীম্
তয়া ত্বামানয়িষ্যামি নিবাসং স্বং শুচিস্মিতে
67.21
ইতি তস্যাঃ প্রতিশ্রুত্য স নৃপো জনমেজয়
মনসা চিন্তয়ন্প্রায়াত্কাশ্যপং প্রতি পার্থিবঃ
67.22
ভগবাংস্তপসা যুক্তঃ শ্রুত্বা কিং নু করিষ্যতি
এবং সংচিন্তয়ন্নেব প্রবিবেশ স্বকং পুরম্
67.23
মুহূর্তয়াতে তস্মিংস্তু কণ্বোঽপ্যাশ্রমমাগমৎ
শকুন্তলা চ পিতরং হ্রিয়া নোপজগাম তম্
67.24
বিজ্ঞায়াথ চ তাং কণ্বো দিব্যজ্ঞানো মহাতপাঃ
উবাচ ভগবান্প্রীতঃ পশ্যন্দিব্যেন চক্ষুষা
67.25
ত্বয়াদ্য রাজান্বয়য়া মামনাদৃত্য যত্কৃতঃ
পুংসা সহ সমায়োগো ন স ধর্মোপঘাতকঃ
67.26
ক্ষত্রিয়স্য হি গান্ধর্বো বিবাহঃ শ্রেষ্ঠ উচ্যতে
সকামায়াঃ সকামেন নির্মন্ত্রো রহসি স্মৃতঃ
67.27
ধর্মাত্মা চ মহাত্মা চ দুঃষন্তঃ পুরুষোত্তমঃ
অভ্যগচ্ছঃ পতিং যং ত্বং ভজমানং শকুন্তলে
67.28
মহাত্মা জনিতা লোকে পুত্রস্তব মহাবলঃ
য ইমাং সাগরাপাঙ্গাং কৃত্স্নাং ভোক্ষ্যতি মেদিনীম্
67.29
পরং চাভিপ্রয়াতস্য চক্রং তস্য মহাত্মনঃ
ভবিষ্যত্যপ্রতিহতং সততং চক্রবর্তিনঃ
67.30
ততঃ প্রক্ষাল্য পাদৌ সা বিশ্রান্তং মুনিমব্রবীৎ
বিনিধায় ততো ভারং সংনিধায় ফলানি চ
67.31
ময়া পতির্বৃতো যোঽসৌ দুঃষন্তঃ পুরুষোত্তমঃ
তস্মৈ সসচিবায় ত্বং প্রসাদং কর্তুমর্হসি
67.32
কণ্ব উবাচ
প্রসন্ন এব তস্যাহং ত্বত্কৃতে বরবর্ণিনি
গৃহাণ চ বরং মত্তস্তত্কৃতে যদভীপ্সিতম্
67.33
বৈশংপায়ন উবাচ
ততো ধর্মিষ্ঠতাং বব্রে রাজ্যাচ্চাস্খলনং তথা
শকুন্তলা পৌরবাণাং দুঃষন্তহিতকাম্যয়া