অধ্যায় 66

66.1

শকুন্তলোবাচ
এবমুক্তস্তয়া শক্রঃ সংদিদেশ সদাগতিম্
প্রাতিষ্ঠত তদা কালে মেনকা বায়ুনা সহ

অথাপশ্যদ্বরারোহা তপসা দগ্ধকিল্বিষম্
বিশ্বামিত্রং তপস্যন্তং মেনকা ভীরুরাশ্রমে

অভিবাদ্য ততঃ সা তং প্রাক্রীডদৃষিসংনিধৌ
অপোবাহ চ বাসোঽস্যা মারুতঃ শশিসংনিভম্

সাগচ্ছত্ত্বরিতা ভূমিং বাসস্তদভিলিঙ্গতী
উত্স্ময়ন্তীব সব্রীডং মারুতং বরবর্ণিনী

গৃদ্ধাং বাসসি সংভ্রান্তাং মেনকাং মুনিসত্তমঃ
অনির্দেশ্যবয়োরূপামপশ্যদ্বিবৃতাং তদা

তস্যা রূপগুণং দৃষ্ট্বা স তু বিপ্রর্ষভস্তদা
চকার ভাবং সংসর্গে তয়া কামবশং গতঃ

ন্যমন্ত্রয়ত চাপ্যেনাং সা চাপ্যৈচ্ছদনিন্দিতা
তৌ তত্র সুচিরং কালং বনে ব্যহরতামুভৌ
রমমাণৌ যথাকামং যথৈকদিবসং তথা

জনয়ামাস স মুনির্মেনকায়াং শকুন্তলাম্
প্রস্থে হিমবতো রম্যে মালিনীমভিতো নদীম্

জাতমুত্সৃজ্য তং গর্ভং মেনকা মালিনীমনু
কৃতকার্যা ততস্তূর্ণমগচ্ছচ্ছক্রসংসদম্

তং বনে বিজনে গর্ভং সিংহব্যাঘ্রসমাকুলে
দৃষ্ট্বা শয়ানং শকুনাঃ সমন্তাত্পর্যবারয়ন্

নেমাং হিংস্যুর্বনে বালাং ক্রব্যাদা মাংসগৃদ্ধিনঃ
পর্যরক্ষন্ত তাং তত্র শকুন্তা মেনকাত্মজাম্

উপস্প্রষ্টুং গতশ্চাহমপশ্যং শয়িতামিমাম্
নির্জনে বিপিনেঽরণ্যে শকুন্তৈঃ পরিবারিতাম্
আনয়িত্বা ততশ্চৈনাং দুহিতৃত্বে ন্যয়োজয়ম্

শরীরকৃত্প্রাণদাতা যস্য চান্নানি ভুঞ্জতে
ক্রমেণ তে ত্রয়োঽপ্যুক্তাঃ পিতরো ধর্মনিশ্চয়ে

নির্জনে চ বনে যস্মাচ্ছকুন্তৈঃ পরিরক্ষিতা
শকুন্তলেতি নামাস্যাঃ কৃতং চাপি ততো ময়া

এবং দুহিতরং বিদ্ধি মম সৌম্য শকুন্তলাম্
শকুন্তলা চ পিতরং মন্যতে মামনিন্দিতা

এতদাচষ্ট পৃষ্টঃ সন্মম জন্ম মহর্ষয়ে
সুতাং কণ্বস্য মামেবং বিদ্ধি ত্বং মনুজাধিপ

কণ্বং হি পিতরং মন্যে পিতরং স্বমজানতী
ইতি তে কথিতং রাজন্যথাবৃত্তং শ্রুতং ময়া