Utshovঅধ্যায় 65
65.1
বৈশংপায়ন উবাচ
ততো গচ্ছন্মহাবাহুরেকোঽমাত্যান্বিসৃজ্য তান্
নাপশ্যদাশ্রমে তস্মিংস্তমৃষিং সংশিতব্রতম্
65.2
সোঽপশ্যমানস্তমৃষিং শূন্যং দৃষ্ট্বা তমাশ্রমম্
উবাচ ক ইহেত্যুচ্চৈর্বনং সংনাদয়ন্নিব
65.3
শ্রুত্বাথ তস্য তং শব্দং কন্যা শ্রীরিব রূপিণী
নিশ্চক্রামাশ্রমাত্তস্মাত্তাপসীবেষধারিণী
65.4
সা তং দৃষ্ট্বৈব রাজানং দুঃষন্তমসিতেক্ষণা
স্বাগতং ত ইতি ক্ষিপ্রমুবাচ প্রতিপূজ্য চ
65.5
আসনেনার্চয়িত্বা চ পাদ্যেনার্ঘ্যেণ চৈব হি
পপ্রচ্ছানাময়ং রাজন্কুশলং চ নরাধিপম্
65.6
যথাবদর্চয়িত্বা সা পৃষ্ট্বা চানাময়ং তদা
উবাচ স্ময়মানেব কিং কার্যং ক্রিয়তামিতি
65.7
তামব্রবীত্ততো রাজা কন্যাং মধুরভাষিণীম্
দৃষ্ট্বা সর্বানবদ্যাঙ্গীং যথাবত্প্রতিপূজিতঃ
65.8
আগতোঽহং মহাভাগমৃষিং কণ্বমুপাসিতুম্
ক্ব গতো ভগবান্ভদ্রে তন্মমাচক্ষ্ব শোভনে
65.9
শকুন্তলোবাচ
গতঃ পিতা মে ভগবান্ফলান্যাহর্তুমাশ্রমাৎ
মুহূর্তং সংপ্রতীক্ষস্ব দ্রক্ষ্যস্যেনমিহাগতম্
65.10
বৈশংপায়ন উবাচ
অপশ্যমানস্তমৃষিং তয়া চোক্তস্তথা নৃপঃ
তাং চ দৃষ্ট্বা বরারোহাং শ্রীমতীং চারুহাসিনীম্
65.11
বিভ্রাজমানাং বপুষা তপসা চ দমেন চ
রূপয়ৌবনসংপন্নামিত্যুবাচ মহীপতিঃ
65.12
কাসি কস্যাসি সুশ্রোণি কিমর্থং চাগতা বনম্
এবংরূপগুণোপেতা কুতস্ত্বমসি শোভনে
65.13
দর্শনাদেব হি শুভে ত্বয়া মেঽপহৃতং মনঃ
ইচ্ছামি ত্বামহং জ্ঞাতুং তন্মমাচক্ষ্ব শোভনে
65.14
এবমুক্তা তদা কন্যা তেন রাজ্ঞা তদাশ্রমে
উবাচ হসতী বাক্যমিদং সুমধুরাক্ষরম্
65.15
কণ্বষ্যাহং ভগবতো দুঃষন্ত দুহিতা মতা
তপস্বিনো ধৃতিমতো ধর্মজ্ঞস্য যশস্বিনঃ
65.16
দুঃষন্ত উবাচ
ঊর্ধ্বরেতা মহাভাগো ভগবাঁল্লোকপূজিতঃ
চলেদ্ধি বৃত্তাদ্ধর্মোঽপি ন চলেত্সংশিতব্রতঃ
65.17
কথং ত্বং তস্য দুহিতা সংভূতা বরবর্ণিনী
সংশয়ো মে মহানত্র তং মে ছেত্তুমিহার্হসি
65.18
শকুন্তলোবাচ
যথায়মাগমো মহ্যং যথা চেদমভূত্পুরা
শৃণু রাজন্যথাতত্ত্বং যথাস্মি দুহিতা মুনেঃ
65.19
ঋষিঃ কশ্চিদিহাগম্য মম জন্মাভ্যচোদয়ৎ
তস্মৈ প্রোবাচ ভগবান্যথা তচ্ছৃণু পার্থিব
65.20
তপ্যমানঃ কিল পুরা বিশ্বামিত্রো মহত্তপঃ
সুভৃশং তাপয়ামাস শক্রং সুরগণেশ্বরম্
65.21
তপসা দীপ্তবীর্যোঽয়ং স্থানান্মাং চ্যাবয়েদিতি
ভীতঃ পুরংদরস্তস্মান্মেনকামিদমব্রবীৎ
65.22
গুণৈর্দিব্যৈরপ্সরসাং মেনকে ত্বং বিশিষ্যসে
শ্রেয়ো মে কুরু কল্যাণি যত্ত্বাং বক্ষ্যামি তচ্ছৃণু
65.23
অসাবাদিত্যসংকাশো বিশ্বামিত্রো মহাতপাঃ
তপ্যমানস্তপো ঘোরং মম কম্পয়তে মনঃ
65.24
মেনকে তব ভারোঽয়ং বিশ্বামিত্রঃ সুমধ্যমে
সংশিতাত্মা সুদুর্ধর্ষ উগ্রে তপসি বর্ততে
65.25
স মাং ন চ্যাবয়েত্স্থানাত্তং বৈ গত্বা প্রলোভয়
চর তস্য তপোবিঘ্নং কুরু মে প্রিয়মুত্তমম্
65.26
রূপয়ৌবনমাধুর্যচেষ্টিতস্মিতভাষিতৈঃ
লোভয়িত্বা বরারোহে তপসঃ সংনিবর্তয়
65.27
মেনকোবাচ
মহাতেজাঃ স ভগবান্সদৈব চ মহাতপাঃ
কোপনশ্চ তথা হ্যেনং জানাতি ভগবানপি
65.28
তেজসস্তপসশ্চৈব কোপস্য চ মহাত্মনঃ
ত্বমপ্যুদ্বিজসে যস্য নোদ্বিজেয়মহং কথম্
65.29
মহাভাগং বসিষ্ঠং যঃ পুত্রৈরিষ্টৈর্ব্যয়োজয়ৎ
ক্ষত্রে জাতশ্চ যঃ পূর্বমভবদ্ব্রাহ্মণো বলাৎ
65.30
শৌচার্থং যো নদীং চক্রে দুর্গমাং বহুভির্জলৈঃ
যাং তাং পুণ্যতমাং লোকে কৌশিকীতি বিদুর্জনাঃ
65.31
বভার যত্রাস্য পুরা কালে দুর্গে মহাত্মনঃ
দারান্মতঙ্গো ধর্মাত্মা রাজর্ষির্ব্যাধতাং গতঃ
65.32
অতীতকালে দুর্ভিক্ষে যত্রৈত্য পুনরাশ্রমম্
মুনিঃ পারেতি নদ্যা বৈ নাম চক্রে তদা প্রভুঃ
65.33
মতঙ্গং যাজয়াং চক্রে যত্র প্রীতমনাঃ স্বয়ম্
ত্বং চ সোমং ভয়াদ্যস্য গতঃ পাতুং শুরেশ্বর
65.34
অতি নক্ষত্রবংশাংশ্চ ক্রুদ্ধো নক্ষত্রসংপদা
প্রতি শ্রবণপূর্বাণি নক্ষত্রাণি সসর্জ যঃ
65.35
এতানি যস্য কর্মাণি তস্যাহং ভৃশমুদ্বিজে
যথা মাং ন দহেত্ক্রুদ্ধস্তথাজ্ঞাপয় মাং বিভো
65.36
তেজসা নির্দহেল্লোকান্কম্পয়েদ্ধরণীং পদা
সংক্ষিপেচ্চ মহামেরুং তূর্ণমাবর্তয়েত্তথা
65.37
তাদৃশং তপসা যুক্তং প্রদীপ্তমিব পাবকম্
কথমস্মদ্বিধা বালা জিতেন্দ্রিয়মভিস্পৃশেৎ
65.38
হুতাশনমুখং দীপ্তং সূর্যচন্দ্রাক্ষিতারকম্
কালজিহ্বং সুরশ্রেষ্ঠ কথমস্মদ্বিধা স্পৃশেৎ
65.39
যমশ্চ সোমশ্চ মহর্ষয়শ্চ; সাধ্যা বিশ্বে বালখিল্যাশ্চ সর্বে
এতেঽপি যস্যোদ্বিজন্তে প্রভাবা;ত্কস্মাত্তস্মান্মাদৃশী নোদ্বিজেত
65.40
ত্বয়ৈবমুক্তা চ কথং সমীপ;মৃষের্ন গচ্ছেয়মহং সুরেন্দ্র
রক্ষাং তু মে চিন্তয় দেবরাজ; যথা ত্বদর্থং রক্ষিতাহং চরেয়ম্
65.41
কামং তু মে মারুতস্তত্র বাসঃ; প্রক্রীডিতায়া বিবৃণোতু দেব
ভবেচ্চ মে মন্মথস্তত্র কার্যে; সহায়ভূতস্তব দেবপ্রসাদাৎ
65.42
বনাচ্চ বায়ুঃ সুরভিঃ প্রবায়ে;ত্তস্মিন্কালে তমৃষিং লোভয়ন্ত্যাঃ
তথেত্যুক্ত্বা বিহিতে চৈব তস্মিং;স্ততো যয়ৌ সাশ্রমং কৌশিকস্য