Utshovঅধ্যায় 64
64.1
বৈশংপায়ন উবাচ
ততো মৃগসহস্রাণি হত্বা বিপুলবাহনঃ
রাজা মৃগপ্রসঙ্গেন বনমন্যদ্বিবেশ হ
64.2
এক এবোত্তমবলঃ ক্ষুত্পিপাসাসমন্বিতঃ
স বনস্যান্তমাসাদ্য মহদীরিণমাসদৎ
64.3
তচ্চাপ্যতীত্য নৃপতিরুত্তমাশ্রমসংয়ুতম্
মনঃপ্রহ্লাদজননং দৃষ্টিকান্তমতীব চ
শীতমারুতসংয়ুক্তং জগামান্যন্মহদ্বনম্
64.4
পুষ্পিতৈঃ পাদপৈঃ কীর্ণমতীব সুখশাদ্বলম্
বিপুলং মধুরারাবৈর্নাদিতং বিহগৈস্তথা
64.5
প্রবৃদ্ধবিটপৈর্বৃক্ষৈঃ সুখচ্ছায়ৈঃ সমাবৃতম্
ষট্পদাঘূর্ণিতলতং লক্ষ্ম্যা পরময়া যুতম্
64.6
নাপুষ্পঃ পাদপঃ কশ্চিন্নাফলো নাপি কণ্টকী
ষট্পদৈর্বাপ্যনাকীর্ণস্তস্মিন্বৈ কাননেঽভবৎ
64.7
বিহগৈর্নাদিতং পুষ্পৈরলংকৃতমতীব চ
সর্বর্তুকুসুমৈর্বৃক্ষৈরতীব সুখশাদ্বলম্
মনোরমং মহেষ্বাসো বিবেশ বনমুত্তমম্
64.8
মারুতাগলিতাস্তত্র দ্রুমাঃ কুসুমশালিনঃ
পুষ্পবৃষ্টিং বিচিত্রাং স্ম ব্যসৃজংস্তে পুনঃ পুনঃ
64.9
দিবস্পৃশোঽথ সংঘুষ্টাঃ পক্ষিভির্মধুরস্বরৈঃ
বিরেজুঃ পাদপাস্তত্র বিচিত্রকুসুমাম্বরাঃ
64.10
তেষাং তত্র প্রবালেষু পুষ্পভারাবনামিষু
রুবন্তি রাবং বিহগাঃ ষট্পদৈঃ সহিতা মৃদু
64.11
তত্র প্রদেশাংশ্চ বহূন্কুসুমোত্করমণ্ডিতান্
লতাগৃহপরিক্ষিপ্তান্মনসঃ প্রীতিবর্ধনান্
সংপশ্যন্স মহাতেজা বভূব মুদিতস্তদা
64.12
পরস্পরাশ্লিষ্টশাখৈঃ পাদপৈঃ কুসুমাচিতৈঃ
অশোভত বনং তত্তৈর্মহেন্দ্রধ্বজসংনিভৈঃ
64.13
সুখশীতঃ সুগন্ধী চ পুষ্পরেণুবহোঽনিলঃ
পরিক্রামন্বনে বৃক্ষানুপৈতীব রিরংসয়া
64.14
এবংগুণসমায়ুক্তং দদর্শ স বনং নৃপঃ
নদীকচ্ছোদ্ভবং কান্তমুচ্ছ্রিতধ্বজসংনিভম্
64.15
প্রেক্ষমাণো বনং তত্তু সুপ্রহৃষ্টবিহংগমম্
আশ্রমপ্রবরং রম্যং দদর্শ চ মনোরমম্
64.16
নানাবৃক্ষসমাকীর্ণং সংপ্রজ্বলিতপাবকম্
যতিভির্বালখিল্যৈশ্চ বৃতং মুনিগণান্বিতম্
64.17
অগ্ন্যাগারৈশ্চ বহুভিঃ পুষ্পসংস্তরসংস্তৃতম্
মহাকচ্ছৈর্বৃহদ্ভিশ্চ বিভ্রাজিতমতীব চ
64.18
মালিনীমভিতো রাজন্নদীং পুণ্যাং সুখোদকাম্
নৈকপক্ষিগণাকীর্ণাং তপোবনমনোরমাম্
তত্র ব্যালমৃগান্সৌম্যান্পশ্যন্প্রীতিমবাপ সঃ
64.19
তং চাপ্যতিরথঃ শ্রীমানাশ্রমং প্রত্যপদ্যত
দেবলোকপ্রতীকাশং সর্বতঃ সুমনোহরম্
64.20
নদীমাশ্রমসংশ্লিষ্টাং পুণ্যতোয়াং দদর্শ সঃ
সর্বপ্রাণভৃতাং তত্র জননীমিব বিষ্ঠিতাম্
64.21
সচক্রবাকপুলিনাং পুষ্পফেনপ্রবাহিনীম্
সকিংনরগণাবাসাং বানরর্ক্ষনিষেবিতাম্
64.22
পুণ্যস্বাধ্যায়সংঘুষ্টাং পুলিনৈরুপশোভিতাম্
মত্তবারণশার্দূলভুজগেন্দ্রনিষেবিতাম্
64.23
নদীমাশ্রমসংবদ্ধাং দৃষ্ট্বাশ্রমপদং তথা
চকারাভিপ্রবেশায় মতিং স নৃপতিস্তদা
64.24
অলংকৃতং দ্বীপবত্যা মালিন্যা রম্যতীরয়া
নরনারায়ণস্থানং গঙ্গয়েবোপশোভিতম্
মত্তবর্হিণসংঘুষ্টং প্রবিবেশ মহদ্বনম্
64.25
তত্স চৈত্ররথপ্রখ্যং সমুপেত্য নরেশ্বরঃ
অতীব গুণসংপন্নমনির্দেশ্যং চ বর্চসা
মহর্ষিং কাশ্যপং দ্রষ্টুমথ কণ্বং তপোধনম্
64.26
রথিনীমশ্বসংবাধাং পদাতিগণসংকুলাম্
অবস্থাপ্য বনদ্বারি সেনামিদমুবাচ সঃ
64.27
মুনিং বিরজসং দ্রষ্টুং গমিষ্যামি তপোধনম্
কাশ্যপং স্থীয়তামত্র যাবদাগমনং মম
64.28
তদ্বনং নন্দনপ্রখ্যমাসাদ্য মনুজেশ্বরঃ
ক্ষুত্পিপাসে জহৌ রাজা হর্ষং চাবাপ পুষ্কলম্
64.29
সামাত্যো রাজলিঙ্গানি সোঽপনীয় নরাধিপঃ
পুরোহিতসহায়শ্চ জগামাশ্রমমুত্তমম্
দিদৃক্ষুস্তত্র তমৃষিং তপোরাশিমথাব্যয়ম্
64.30
ব্রহ্মলোকপ্রতীকাশমাশ্রমং সোঽভিবীক্ষ্য চ
ষট্পদোদ্গীতসংঘুষ্টং নানাদ্বিজগণায়ুতম্
64.31
ঋচো বহ্বৃচমুখ্যৈশ্চ প্রের্যমাণাঃ পদক্রমৈঃ
শুশ্রাব মনুজব্যাঘ্রো বিততেষ্বিহ কর্মসু
64.32
যজ্ঞবিদ্যাঙ্গবিদ্ভিশ্চ ক্রমদ্ভিশ্চ ক্রমানপি
অমিতাত্মভিঃ সুনিয়তৈঃ শুশুভে স তদাশ্রমঃ
64.33
অথর্ববেদপ্রবরাঃ পূগয়াজ্ঞিক সংমতাঃ
সংহিতামীরয়ন্তি স্ম পদক্রময়ুতাং তু তে
64.34
শব্দসংস্কারসংয়ুক্তং ব্রুবদ্ভিশ্চাপরৈর্দ্বিজৈঃ
নাদিতঃ স বভৌ শ্রীমান্ব্রহ্মলোক ইবাশ্রমঃ
64.35
যজ্ঞসংস্কারবিদ্ভিশ্চ ক্রমশিক্ষা বিশারদৈঃ
ন্যায়তত্ত্বার্থবিজ্ঞানসংপন্নৈর্বেদপারগৈঃ
64.36
নানাবাক্যসমাহারসমবায়বিশারদৈঃ
বিশেষকার্যবিদ্ভিশ্চ মোক্ষধর্মপরায়ণৈঃ
64.37
স্থাপনাক্ষেপসিদ্ধান্তপরমার্থজ্ঞতাং গতৈঃ
লোকায়তিকমুখ্যৈশ্চ সমন্তাদনুনাদিতম্
64.38
তত্র তত্র চ বিপ্রেন্দ্রান্নিয়তান্সংশিতব্রতান্
জপহোমপরান্সিদ্ধান্দদর্শ পরবীরহা
64.39
আসনানি বিচিত্রাণি পুষ্পবন্তি মহীপতিঃ
প্রয়ত্নোপহিতানি স্ম দৃষ্ট্বা বিস্ময়মাগমৎ
64.40
দেবতায়তনানাং চ পূজাং প্রেক্ষ্য কৃতাং দ্বিজৈঃ
ব্রহ্মলোকস্থমাত্মানং মেনে স নৃপসত্তমঃ
64.41
স কাশ্যপতপোগুপ্তমাশ্রমপ্রবরং শুভম্
নাতৃপ্যত্প্রেক্ষমাণো বৈ তপোধনগণৈর্যুতম্
64.42
স কাশ্যপস্যায়তনং মহাব্রতৈ;র্বৃতং সমন্তাদৃষিভিস্তপোধনৈঃ
বিবেশ সামাত্যপুরোহিতোঽরিহা; বিবিক্তমত্যর্থমনোহরং শিবম্