অধ্যায় 63

63.1

বৈশংপায়ন উবাচ
স কদাচিন্মহাবাহুঃ প্রভূতবলবাহনঃ
বনং জগাম গহনং হয়নাগশতৈর্বৃতঃ

63.2

খড্গশক্তিধরৈর্বীরৈর্গদামুসলপাণিভিঃ
প্রাসতোমরহস্তৈশ্চ যয়ৌ যোধশতৈর্বৃতঃ

63.3

সিংহনাদৈশ্চ যোধানাং শঙ্খদুন্দুভিনিস্বনৈঃ
রথনেমিস্বনৈশ্চাপি সনাগবরবৃংহিতৈঃ

63.4

হেষিতস্বনমিশ্রৈশ্চ ক্ষ্বেডিতাস্ফোটিতস্বনৈঃ
আসীত্কিলকিলাশব্দস্তস্মিন্গচ্ছতি পার্থিবে

63.5

প্রাসাদবরশৃঙ্গস্থাঃ পরয়া নৃপশোভয়া
দদৃশুস্তং স্ত্রিয়স্তত্র শূরমাত্ময়শস্করম্

63.6

শক্রোপমমমিত্রঘ্নং পরবারণবারণম্
পশ্যন্তঃ স্ত্রীগণাস্তত্র শস্ত্রপাণিং স্ম মেনিরে

63.7

অয়ং স পুরুষব্যাঘ্রো রণেঽদ্ভুতপরাক্রমঃ
যস্য বাহুবলং প্রাপ্য ন ভবন্ত্যসুহৃদ্গণাঃ

63.8

ইতি বাচো ব্রুবন্ত্যস্তাঃ স্ত্রিয়ঃ প্রেম্ণা নরাধিপম্
তুষ্টুবুঃ পুষ্পবৃষ্টীশ্চ সসৃজুস্তস্য মূর্ধনি

63.9

তত্র তত্র চ বিপ্রেন্দ্রৈঃ স্তূয়মানঃ সমন্ততঃ
নির্যয়ৌ পরয়া প্রীত্যা বনং মৃগজিঘাংসয়া

63.10

সুদূরমনুজগ্মুস্তং পৌরজানপদাস্তদা
ন্যবর্তন্ত ততঃ পশ্চাদনুজ্ঞাতা নৃপেণ হ

63.11

সুপর্ণপ্রতিমেনাথ রথেন বসুধাধিপঃ
মহীমাপূরয়ামাস ঘোষেণ ত্রিদিবং তথা

63.12

স গচ্ছন্দদৃশে ধীমান্নন্দনপ্রতিমং বনম্
বিল্বার্কখদিরাকীর্ণং কপিত্থধবসংকুলম্

63.13

বিষমং পর্বতপ্রস্থৈরশ্মভিশ্চ সমাবৃতম্
নির্জলং নির্মনুষ্যং চ বহুয়োজনমায়তম্
মৃগসংঘৈর্বৃতং ঘোরৈরন্যৈশ্চাপি বনেচরৈঃ

63.14

তদ্বনং মনুজব্যাঘ্রঃ সভৃত্যবলবাহনঃ
লোডয়ামাস দুঃষন্তঃ সূদয়ন্বিবিধান্মৃগান্

63.15

বাণগোচরসংপ্রাপ্তাংস্তত্র ব্যাঘ্রগণান্বহূন্
পাতয়ামাস দুঃষন্তো নির্বিভেদ চ সায়কৈঃ

63.16

দূরস্থান্সায়কৈঃ কাংশ্চিদভিনত্স নরর্ষভঃ
অভ্যাশমাগতাংশ্চান্যান্খড্গেন নিরকৃন্তত

63.17

কাংশ্চিদেণান্স নির্জঘ্নে শক্ত্যা শক্তিমতাং বরঃ
গদামণ্ডলতত্ত্বজ্ঞশ্চচারামিতবিক্রমঃ

63.18

তোমরৈরসিভিশ্চাপি গদামুসলকর্পণৈঃ
চচার স বিনিঘ্নন্বৈ বন্যাংস্তত্র মৃগদ্বিজান্

63.19

রাজ্ঞা চাদ্ভুতবীর্যেণ যোধৈশ্চ সমরপ্রিয়ৈঃ
লোড্যমানং মহারণ্যং তত্যজুশ্চ মহামৃগাঃ

63.20

তত্র বিদ্রুতসংঘানি হতয়ূথপতীনি চ
মৃগয়ূথান্যথৌত্সুক্যাচ্ছব্দং চক্রুস্ততস্ততঃ

63.21

শুষ্কাং চাপি নদীং গত্বা জলনৈরাশ্যকর্শিতাঃ
ব্যায়ামক্লান্তহৃদয়াঃ পতন্তি স্ম বিচেতসঃ

63.22

ক্ষুত্পিপাসাপরীতাশ্চ শ্রান্তাশ্চ পতিতা ভুবি
কেচিত্তত্র নরব্যাঘ্রৈরভক্ষ্যন্ত বুভুক্ষিতৈঃ

63.23

কেচিদগ্নিমথোত্পাদ্য সমিধ্য চ বনেচরাঃ
ভক্ষয়ন্তি স্ম মাংসানি প্রকুট্য বিধিবত্তদা

63.24

তত্র কেচিদ্গজা মত্তা বলিনঃ শস্ত্রবিক্ষতাঃ
সংকোচ্যাগ্রকরান্ভীতাঃ প্রদ্রবন্তি স্ম বেগিতাঃ

63.25

শকৃন্মূত্রং সৃজন্তশ্চ ক্ষরন্তঃ শোণিতং বহু
বন্যা গজবরাস্তত্র মমৃদুর্মনুজান্বহূন্

63.26

তদ্বনং বলমেঘেন শরধারেণ সংবৃতম্
ব্যরোচন্মহিষাকীর্ণং রাজ্ঞা হতমহামৃগম্

Contains text from DharmicData, made available under the Open Database License (ODbL). Simple meanings are written by AI and can contain mistakes.