অধ্যায় 62

62.1

জনমেজয় উবাচ
ত্বত্তঃ শ্রুতমিদং ব্রহ্মন্দেবদানবরক্ষসাম্
অংশাবতরণং সম্যগ্গন্ধর্বাপ্সরসাং তথা

ইমং তু ভূয় ইচ্ছামি কুরূণাং বংশমাদিতঃ
কথ্যমানং ত্বয়া বিপ্র বিপ্রর্ষিগণসংনিধৌ

বৈশংপায়ন উবাচ
পৌরবাণাং বংশকরো দুঃষন্তো নাম বীর্যবান্
পৃথিব্যাশ্চতুরন্তায়া গোপ্তা ভরতসত্তম

চতুর্ভাগং ভুবঃ কৃত্স্নং স ভুঙ্ক্তে মনুজেশ্বরঃ
সমুদ্রাবরণাংশ্চাপি দেশান্স সমিতিংজয়ঃ

আম্লেচ্ছাটবিকান্সর্বান্স ভুঙ্ক্তে রিপুমর্দনঃ
রত্নাকরসমুদ্রান্তাংশ্চাতুর্বর্ণ্যজনাবৃতান্

ন বর্ণসংকরকরো নাকৃষ্যকরকৃজ্জনঃ
ন পাপকৃত্কশ্চিদাসীত্তস্মিন্রাজনি শাসতি

ধর্ম্যাং রতিং সেবমানা ধর্মার্থাবভিপেদিরে
তদা নরা নরব্যাঘ্র তস্মিঞ্জনপদেশ্বরে

নাসীচ্চোরভয়ং তাত ন ক্ষুধাভয়মণ্বপি
নাসীদ্ব্যাধিভয়ং চাপি তস্মিঞ্জনপদেশ্বরে

স্বৈর্ধর্মৈ রেমিরে বর্ণা দৈবে কর্মণি নিঃস্পৃহাঃ
তমাশ্রিত্য মহীপালমাসংশ্চৈবাকুতোভয়াঃ

কালবর্ষী চ পর্জন্যঃ সস্যানি ফলবন্তি চ
সর্বরত্নসমৃদ্ধা চ মহী বসুমতী তদা

স চাদ্ভুতমহাবীর্যো বজ্রসংহননো যুবা
উদ্যম্য মন্দরং দোর্ভ্যাং হরেত্সবনকাননম্

ধনুষ্যথ গদায়ুদ্ধে ত্সরুপ্রহরণেষু চ
নাগপৃষ্ঠেঽশ্বপৃষ্ঠে চ বভূব পরিনিষ্ঠিতঃ

বলে বিষ্ণুসমশ্চাসীত্তেজসা ভাস্করোপমঃ
অক্ষুব্ধত্বেঽর্ণবসমঃ সহিষ্ণুত্বে ধরাসমঃ

সংমতঃ স মহীপালঃ প্রসন্নপুররাষ্ট্রবান্
ভূয়ো ধর্মপরৈর্ভাবৈর্বিদিতং জনমাবসৎ