UtshovChapter 62
62.1
जनमेजय उवाच
त्वत्तः श्रुतमिदं ब्रह्मन्देवदानवरक्षसाम्
अंशावतरणं सम्यग्गन्धर्वाप्सरसां तथा
Janamejaya uvacha
Tvattah shrutamidam brahmandevadanavarakshasam
Anshavataranam samyaggandharvapsarasam tatha
62.2
इमं तु भूय इच्छामि कुरूणां वंशमादितः
कथ्यमानं त्वया विप्र विप्रर्षिगणसंनिधौ
Imam tu bhuya ichchhami kurunam vanshamaditah
Kathyamanam tvaya vipra viprarshiganasannidhau
62.3
वैशंपायन उवाच
पौरवाणां वंशकरो दुःषन्तो नाम वीर्यवान्
पृथिव्याश्चतुरन्ताया गोप्ता भरतसत्तम
Vaishampayana uvacha
Pauravanam vanshakaro duhshanto nama viryavan
Prithivyashchaturantaya gopta bharatasattama
62.4
चतुर्भागं भुवः कृत्स्नं स भुङ्क्ते मनुजेश्वरः
समुद्रावरणांश्चापि देशान्स समितिंजयः
Chaturbhagam bhuvah kritsnam sa bhunkte manujeshvarah
Samudravarananshchapi deshansa samitinjayah
62.5
आम्लेच्छाटविकान्सर्वान्स भुङ्क्ते रिपुमर्दनः
रत्नाकरसमुद्रान्तांश्चातुर्वर्ण्यजनावृतान्
Amlechchhatavikansarvansa bhunkte ripumardanah
Ratnakarasamudrantanshchaturvarnyajanavritan
62.6
न वर्णसंकरकरो नाकृष्यकरकृज्जनः
न पापकृत्कश्चिदासीत्तस्मिन्राजनि शासति
Na varnasankarakaro nakrishyakarakrijjanah
Na papakritkashchidasittasminrajani shasati
62.7
धर्म्यां रतिं सेवमाना धर्मार्थावभिपेदिरे
तदा नरा नरव्याघ्र तस्मिञ्जनपदेश्वरे
Dharmyam ratim sevamana dharmarthavabhipedire
Tada nara naravyaghra tasminjanapadeshvare
62.8
नासीच्चोरभयं तात न क्षुधाभयमण्वपि
नासीद्व्याधिभयं चापि तस्मिञ्जनपदेश्वरे
Nasichchorabhayam tata na kshudhabhayamanvapi
Nasidvyadhibhayam chapi tasminjanapadeshvare
62.9
स्वैर्धर्मै रेमिरे वर्णा दैवे कर्मणि निःस्पृहाः
तमाश्रित्य महीपालमासंश्चैवाकुतोभयाः
Svairdharmai remire varna daive karmani nihsprihah
Tamashritya mahipalamasanshchaivakutobhayah
62.10
कालवर्षी च पर्जन्यः सस्यानि फलवन्ति च
सर्वरत्नसमृद्धा च मही वसुमती तदा
Kalavarshi cha parjanyah sasyani phalavanti cha
Sarvaratnasamriddha cha mahi vasumati tada
62.11
स चाद्भुतमहावीर्यो वज्रसंहननो युवा
उद्यम्य मन्दरं दोर्भ्यां हरेत्सवनकाननम्
Sa chadbhutamahaviryo vajrasanhanano yuva
Udyamya mandaram dorbhyam haretsavanakananam
62.12
धनुष्यथ गदायुद्धे त्सरुप्रहरणेषु च
नागपृष्ठेऽश्वपृष्ठे च बभूव परिनिष्ठितः
Dhanushyatha gadayuddhe tsarupraharaneshu cha
Nagaprishtheshvaprishthe cha babhuva parinishthitah
62.13
बले विष्णुसमश्चासीत्तेजसा भास्करोपमः
अक्षुब्धत्वेऽर्णवसमः सहिष्णुत्वे धरासमः
Bale vishnusamashchasittejasa bhaskaropamah
Akshubdhatvernavasamah sahishnutve dharasamah
62.14
संमतः स महीपालः प्रसन्नपुरराष्ट्रवान्
भूयो धर्मपरैर्भावैर्विदितं जनमावसत्
Sammatah sa mahipalah prasannapurarashtravan
Bhuyo dharmaparairbhavairviditam janamavasat