Utshovঅধ্যায় 61
61.1
জনমেজয় উবাচ
দেবানাং দানবানাং চ যক্ষাণামথ রক্ষসাম্
অন্যেষাং চৈব ভূতানাং সর্বেষাং ভগবন্নহম্
61.2
শ্রোতুমিচ্ছামি তত্ত্বেন মানুষেষু মহাত্মনাম্
জন্ম কর্ম চ ভূতানামেতেষামনুপূর্বশঃ
61.3
বৈশংপায়ন উবাচ
মানুষেষু মনুষ্যেন্দ্র সংভূতা যে দিবৌকসঃ
প্রথমং দানবাংশ্চৈব তাংস্তে বক্ষ্যামি সর্বশঃ
61.4
বিপ্রচিত্তিরিতি খ্যাতো য আসীদ্দানবর্ষভঃ
জরাসংধ ইতি খ্যাতঃ স আসীন্মনুজর্ষভঃ
61.5
দিতেঃ পুত্রস্তু যো রাজন্হিরণ্যকশিপুঃ স্মৃতঃ
স জজ্ঞে মানুষে লোকে শিশুপালো নরর্ষভঃ
61.6
সংহ্রাদ ইতি বিখ্যাতঃ প্রহ্রাদস্যানুজস্তু যঃ
স শল্য ইতি বিখ্যাতো জজ্ঞে বাহ্লীকপুংগবঃ
61.7
অনুহ্রাদস্তু তেজস্বী যোঽভূত্খ্যাতো জঘন্যজঃ
ধৃষ্টকেতুরিতি খ্যাতঃ স আসীন্মনুজেশ্বরঃ
61.8
যস্তু রাজঞ্শিবির্নাম দৈতেয়ঃ পরিকীর্তিতঃ
দ্রুম ইত্যভিবিখ্যাতঃ স আসীদ্ভুবি পার্থিবঃ
61.9
বাষ্কলো নাম যস্তেষামাসীদসুরসত্তমঃ
ভগদত্ত ইতি খ্যাতঃ স আসীন্মনুজেশ্বরঃ
61.10
অয়ঃশিরা অশ্বশিরা অয়ঃশঙ্কুশ্চ বীর্যবান্
তথা গগনমূর্ধা চ বেগবাংশ্চাত্র পঞ্চমঃ
61.11
পঞ্চৈতে জজ্ঞিরে রাজন্বীর্যবন্তো মহাসুরাঃ
কেকয়েষু মহাত্মানঃ পার্থিবর্ষভসত্তমাঃ
61.12
কেতুমানিতি বিখ্যাতো যস্ততোঽন্যঃ প্রতাপবান্
অমিতৌজা ইতি খ্যাতঃ পৃথিব্যাং সোঽভবন্নৃপঃ
61.13
স্বর্ভানুরিতি বিখ্যাতঃ শ্রীমান্যস্তু মহাসুরঃ
উগ্রসেন ইতি খ্যাত উগ্রকর্মা নরাধিপঃ
61.14
যস্ত্বশ্ব ইতি বিখ্যাতঃ শ্রীমানাসীন্মহাসুরঃ
অশোকো নাম রাজাসীন্মহাবীর্যপরাক্রমঃ
61.15
তস্মাদবরজো যস্তু রাজন্নশ্বপতিঃ স্মৃতঃ
দৈতেয়ঃ সোঽভবদ্রাজা হার্দিক্যো মনুজর্ষভঃ
61.16
বৃষপর্বেতি বিখ্যাতঃ শ্রীমান্যস্তু মহাসুরঃ
দীর্ঘপ্রজ্ঞ ইতি খ্যাতঃ পৃথিব্যাং সোঽভবন্নৃপঃ
61.17
অজকস্ত্বনুজো রাজন্য আসীদ্বৃষপর্বণঃ
স মল্ল ইতি বিখ্যাতঃ পৃথিব্যামভবন্নৃপঃ
61.18
অশ্বগ্রীব ইতি খ্যাতঃ সত্ত্ববান্যো মহাসুরঃ
রোচমান ইতি খ্যাতঃ পৃথিব্যাং সোঽভবন্নৃপঃ
61.19
সূক্ষ্মস্তু মতিমান্রাজন্কীর্তিমান্যঃ প্রকীর্তিতঃ
বৃহন্ত ইতি বিখ্যাতঃ ক্ষিতাবাসীত্স পার্থিবঃ
61.20
তুহুণ্ড ইতি বিখ্যাতো য আসীদসুরোত্তমঃ
সেনাবিন্দুরিতি খ্যাতঃ স বভূব নরাধিপঃ
61.21
ইসৃপা নাম যস্তেষামসুরাণাং বলাধিকঃ
পাপজিন্নাম রাজাসীদ্ভুবি বিখ্যাতবিক্রমঃ
61.22
একচক্র ইতি খ্যাত আসীদ্যস্তু মহাসুরঃ
প্রতিবিন্ধ্য ইতি খ্যাতো বভূব প্রথিতঃ ক্ষিতৌ
61.23
বিরূপাক্ষস্তু দৈতেয়শ্চিত্রয়োধী মহাসুরঃ
চিত্রবর্মেতি বিখ্যাতঃ ক্ষিতাবাসীত্স পার্থিবঃ
61.24
হরস্ত্বরিহরো বীর আসীদ্যো দানবোত্তমঃ
সুবাস্তুরিতি বিখ্যাতঃ স জজ্ঞে মনুজর্ষভঃ
61.25
অহরস্তু মহাতেজাঃ শত্রুপক্ষক্ষয়ংকরঃ
বাহ্লীকো নাম রাজা স বভূব প্রথিতঃ ক্ষিতৌ
61.26
নিচন্দ্রশ্চন্দ্রবক্ত্রশ্চ য আসীদসুরোত্তমঃ
মুঞ্জকেশ ইতি খ্যাতঃ শ্রীমানাসীত্স পার্থিবঃ
61.27
নিকুম্ভস্ত্বজিতঃ সংখ্যে মহামতিরজায়ত
ভূমৌ ভূমিপতিঃ শ্রেষ্ঠো দেবাধিপ ইতি স্মৃতঃ
61.28
শরভো নাম যস্তেষাং দৈতেয়ানাং মহাসুরঃ
পৌরবো নাম রাজর্ষিঃ স বভূব নরেষ্বিহ
61.29
দ্বিতীয়ঃ শলভস্তেষামসুরাণাং বভূব যঃ
প্রহ্রাদো নাম বাহ্লীকঃ স বভূব নরাধিপঃ
61.30
চন্দ্রস্তু দিতিজশ্রেষ্ঠো লোকে তারাধিপোপমঃ
ঋষিকো নাম রাজর্ষির্বভূব নৃপসত্তমঃ
61.31
মৃতপা ইতি বিখ্যাতো য আসীদসুরোত্তমঃ
পশ্চিমানূপকং বিদ্ধি তং নৃপং নৃপসত্তম
61.32
গবিষ্ঠস্তু মহাতেজা যঃ প্রখ্যাতো মহাসুরঃ
দ্রুমসেন ইতি খ্যাতঃ পৃথিব্যাং সোঽভবন্নৃপঃ
61.33
ময়ূর ইতি বিখ্যাতঃ শ্রীমান্যস্তু মহাসুরঃ
স বিশ্ব ইতি বিখ্যাতো বভূব পৃথিবীপতিঃ
61.34
সুপর্ণ ইতি বিখ্যাতস্তস্মাদবরজস্তু যঃ
কালকীর্তিরিতি খ্যাতঃ পৃথিব্যাং সোঽভবন্নৃপঃ
61.35
চন্দ্রহন্তেতি যস্তেষাং কীর্তিতঃ প্রবরোঽসুরঃ
শুনকো নাম রাজর্ষিঃ স বভূব নরাধিপঃ
61.36
বিনাশনস্তু চন্দ্রস্য য আখ্যাতো মহাসুরঃ
জানকির্নাম রাজর্ষিঃ স বভূব নরাধিপঃ
61.37
দীর্ঘজিহ্বস্তু কৌরব্য য উক্তো দানবর্ষভঃ
কাশিরাজ ইতি খ্যাতঃ পৃথিব্যাং পৃথিবীপতিঃ
61.38
গ্রহং তু সুষুবে যং তং সিংহী চন্দ্রার্কমর্দনম্
ক্রাথ ইত্যভিবিখ্যাতঃ সোঽভবন্মনুজাধিপঃ
61.39
অনায়ুষস্তু পুত্রাণাং চতুর্ণাং প্রবরোঽসুরঃ
বিক্ষরো নাম তেজস্বী বসুমিত্রোঽভবন্নৃপঃ
61.40
দ্বিতীয়ো বিক্ষরাদ্যস্তু নরাধিপ মহাসুরঃ
পাংসুরাষ্ট্রাধিপ ইতি বিশ্রুতঃ সোঽভবন্নৃপঃ
61.41
বলবীর ইতি খ্যাতো যস্ত্বাসীদসুরোত্তমঃ
পৌণ্ড্রমত্স্যক ইত্যেব স বভূব নরাধিপঃ
61.42
বৃত্র ইত্যভিবিখ্যাতো যস্তু রাজন্মহাসুরঃ
মণিমান্নাম রাজর্ষিঃ স বভূব নরাধিপঃ
61.43
ক্রোধহন্তেতি যস্তস্য বভূবাবরজোঽসুরঃ
দণ্ড ইত্যভিবিখ্যাতঃ স আসীন্নৃপতিঃ ক্ষিতৌ
61.44
ক্রোধবর্ধন ইত্যেব যস্ত্বন্যঃ পরিকীর্তিতঃ
দণ্ডধার ইতি খ্যাতঃ সোঽভবন্মনুজেশ্বরঃ
61.45
কালকায়াস্তু যে পুত্রাস্তেষামষ্টৌ নরাধিপাঃ
জজ্ঞিরে রাজশার্দূল শার্দূলসমবিক্রমাঃ
61.46
মগধেষু জয়ত্সেনঃ শ্রীমানাসীত্স পার্থিবঃ
অষ্টানাং প্রবরস্তেষাং কালেয়ানাং মহাসুরঃ
61.47
দ্বিতীয়স্তু ততস্তেষাং শ্রীমান্হরিহয়োপমঃ
অপরাজিত ইত্যেব স বভূব নরাধিপঃ
61.48
তৃতীয়স্তু মহারাজ মহাবাহুর্মহাসুরঃ
নিষাদাধিপতির্জজ্ঞে ভুবি ভীমপরাক্রমঃ
61.49
তেষামন্যতমো যস্তু চতুর্থঃ পরিকীর্তিতঃ
শ্রেণিমানিতি বিখ্যাতঃ ক্ষিতৌ রাজর্ষিসত্তমঃ
61.50
পঞ্চমস্তু বভূবৈষাং প্রবরো যো মহাসুরঃ
মহৌজা ইতি বিখ্যাতো বভূবেহ পরংতপঃ
61.51
ষষ্ঠস্তু মতিমান্যো বৈ তেষামাসীন্মহাসুরঃ
অভীরুরিতি বিখ্যাতঃ ক্ষিতৌ রাজর্ষিসত্তমঃ
61.52
সমুদ্রসেনশ্চ নৃপস্তেষামেবাভবদ্গণাৎ
বিশ্রুতঃ সাগরান্তায়াং ক্ষিতৌ ধর্মার্থতত্ত্ববিৎ
61.53
বৃহন্নামাষ্টমস্তেষাং কালেয়ানাং পরংতপঃ
বভূব রাজন্ধর্মাত্মা সর্বভূতহিতে রতঃ
61.54
গণঃ ক্রোধবশো নাম যস্তে রাজন্প্রকীর্তিতঃ
ততঃ সংজজ্ঞিরে বীরাঃ ক্ষিতাবিহ নরাধিপাঃ
61.55
নন্দিকঃ কর্ণবেষ্টশ্চ সিদ্ধার্থঃ কীটকস্তথা
সুবীরশ্চ সুবাহুশ্চ মহাবীরোঽথ বাহ্লিকঃ
61.56
ক্রোধো বিচিত্যঃ সুরসঃ শ্রীমান্নীলশ্চ ভূমিপঃ
বীরধামা চ কৌরব্য ভূমিপালশ্চ নামতঃ
61.57
দন্তবক্ত্রশ্চ নামাসীদ্দুর্জয়শ্চৈব নামতঃ
রুক্মী চ নৃপশার্দূলো রাজা চ জনমেজয়ঃ
61.58
আষাঢো বায়ুবেগশ্চ ভূরিতেজাস্তথৈব চ
একলব্যঃ সুমিত্রশ্চ বাটধানোঽথ গোমুখঃ
61.59
কারূষকাশ্চ রাজানঃ ক্ষেমধূর্তিস্তথৈব চ
শ্রুতায়ুরুদ্ধবশ্চৈব বৃহত্সেনস্তথৈব চ
61.60
ক্ষেমোগ্রতীর্থঃ কুহরঃ কলিঙ্গেষু নরাধিপঃ
মতিমাংশ্চ মনুষ্যেন্দ্র ঈশ্বরশ্চেতি বিশ্রুতঃ
61.61
গণাত্ক্রোধবশাদেবং রাজপূগোঽভবত্ক্ষিতৌ
জাতঃ পুরা মহারাজ মহাকীর্তির্মহাবলঃ
61.62
যস্ত্বাসীদ্দেবকো নাম দেবরাজসমদ্যুতিঃ
স গন্ধর্বপতির্মুখ্যঃ ক্ষিতৌ জজ্ঞে নরাধিপঃ
61.63
বৃহস্পতের্বৃহত্কীর্তের্দেবর্ষের্বিদ্ধি ভারত
অংশাদ্দ্রোণং সমুত্পন্নং ভারদ্বাজময়োনিজম্
61.64
ধন্বিনাং নৃপশার্দূল যঃ স সর্বাস্ত্রবিত্তমঃ
বৃহত্কীর্তির্মহাতেজাঃ সংজজ্ঞে মনুজেষ্বিহ
61.65
ধনুর্বেদে চ বেদে চ যং তং বেদবিদো বিদুঃ
বরিষ্ঠমিন্দ্রকর্মাণং দ্রোণং স্বকুলবর্ধনম্
61.66
মহাদেবান্তকাভ্যাং চ কামাত্ক্রোধাচ্চ ভারত
একত্বমুপপন্নানাং জজ্ঞে শূরঃ পরংতপঃ
61.67
অশ্বত্থামা মহাবীর্যঃ শত্রুপক্ষক্ষয়ংকরঃ
বীরঃ কমলপত্রাক্ষঃ ক্ষিতাবাসীন্নরাধিপ
61.68
জজ্ঞিরে বসবস্ত্বষ্টৌ গঙ্গায়াং শংতনোঃ সুতাঃ
বসিষ্ঠস্য চ শাপেন নিয়োগাদ্বাসবস্য চ
61.69
তেষামবরজো ভীষ্মঃ কুরূণামভয়ংকরঃ
মতিমান্বেদবিদ্বাগ্মী শত্রুপক্ষক্ষয়ংকরঃ
61.70
জামদগ্ন্যেন রামেণ যঃ স সর্ববিদাং বরঃ
অয়ুধ্যত মহাতেজা ভার্গবেণ মহাত্মনা
61.71
যস্তু রাজন্কৃপো নাম ব্রহ্মর্ষিরভবত্ক্ষিতৌ
রুদ্রাণাং তং গণাদ্বিদ্ধি সংভূতমতিপৌরুষম্
61.72
শকুনির্নাম যস্ত্বাসীদ্রাজা লোকে মহারথঃ
দ্বাপরং বিদ্ধি তং রাজন্সংভূতমরিমর্দনম্
61.73
সাত্যকিঃ সত্যসংধস্তু যোঽসৌ বৃষ্ণিকুলোদ্বহঃ
পক্ষাত্স জজ্ঞে মরুতাং দেবানামরিমর্দনঃ
61.74
দ্রুপদশ্চাপি রাজর্ষিস্তত এবাভবদ্গণাৎ
মানুষে নৃপ লোকেঽস্মিন্সর্বশস্ত্রভৃতাং বরঃ
61.75
ততশ্চ কৃতবর্মাণং বিদ্ধি রাজঞ্জনাধিপম্
জাতমপ্রতিকর্মাণং ক্ষত্রিয়র্ষভসত্তমম্
61.76
মরুতাং তু গণাদ্বিদ্ধি সংজাতমরিমর্দনম্
বিরাটং নাম রাজর্ষিং পররাষ্ট্রপ্রতাপনম্
61.77
অরিষ্টায়াস্তু যঃ পুত্রো হংস ইত্যভিবিশ্রুতঃ
স গন্ধর্বপতির্জজ্ঞে কুরুবংশবিবর্ধনঃ
61.78
ধৃতরাষ্ট্র ইতি খ্যাতঃ কৃষ্ণদ্বৈপায়নাদপি
দীর্ঘবাহুর্মহাতেজাঃ প্রজ্ঞাচক্ষুর্নরাধিপঃ
মাতুর্দোষাদৃষেঃ কোপাদন্ধ এব ব্যজায়ত
61.79
অত্রেস্তু সুমহাভাগং পুত্রং পুত্রবতাং বরম্
বিদুরং বিদ্ধি লোকেঽস্মিঞ্জাতং বুদ্ধিমতাং বরম্
61.80
কলেরংশাত্তু সংজজ্ঞে ভুবি দুর্যোধনো নৃপঃ
দুর্বুদ্ধির্দুর্মতিশ্চৈব কুরূণাময়শস্করঃ
61.81
জগতো যঃ স সর্বস্য বিদ্বিষ্টঃ কলিপূরুষঃ
যঃ সর্বাং ঘাতয়ামাস পৃথিবীং পুরুষাধমঃ
যেন বৈরং সমুদ্দীপ্তং ভূতান্তকরণং মহৎ
61.82
পৌলস্ত্যা ভ্রাতরঃ সর্বে জজ্ঞিরে মনুজেষ্বিহ
শতং দুঃশাসনাদীনাং সর্বেষাং ক্রূরকর্মণাম্
61.83
দুর্মুখো দুঃসহশ্চৈব যে চান্যে নানুশব্দিতাঃ
দুর্যোধনসহায়াস্তে পৌলস্ত্যা ভরতর্ষভ
61.84
ধর্মস্যাংশং তু রাজানং বিদ্ধি রাজন্যুধিষ্ঠিরম্
ভীমসেনং তু বাতস্য দেবরাজস্য চার্জুনম্
61.85
অশ্বিনোস্তু তথৈবাংশৌ রূপেণাপ্রতিমৌ ভুবি
নকুলঃ সহদেবশ্চ সর্বলোকমনোহরৌ
61.86
যঃ সুবর্চা ইতি খ্যাতঃ সোমপুত্রঃ প্রতাপবান্
অভিমন্যুর্বৃহত্কীর্তিরর্জুনস্য সুতোঽভবৎ
61.87
অগ্নেরংশং তু বিদ্ধি ত্বং ধৃষ্টদ্যুম্নং মহারথম্
শিখণ্ডিনমথো রাজন্স্ত্রীপুংসং বিদ্ধি রাক্ষসম্
61.88
দ্রৌপদেয়াশ্চ যে পঞ্চ বভূবুর্ভরতর্ষভ
বিশ্বেদেবগণান্রাজংস্তান্বিদ্ধি ভরতর্ষভ
61.89
আমুক্তকবচঃ কর্ণো যস্তু জজ্ঞে মহারথঃ
দিবাকরস্য তং বিদ্ধি দেবস্যাংশমনুত্তমম্
61.90
যস্তু নারায়ণো নাম দেবদেবঃ সনাতনঃ
তস্যাংশো মানুষেষ্বাসীদ্বাসুদেবঃ প্রতাপবান্
61.91
শেষস্যাংশস্তু নাগস্য বলদেবো মহাবলঃ
সনত্কুমারং প্রদ্যুম্নং বিদ্ধি রাজন্মহৌজসম্
61.92
এবমন্যে মনুষ্যেন্দ্র বহবোংঽশা দিবৌকসাম্
জজ্ঞিরে বসুদেবস্য কুলে কুলবিবর্ধনাঃ
61.93
গণস্ত্বপ্সরসাং যো বৈ ময়া রাজন্প্রকীর্তিতঃ
তস্য ভাগঃ ক্ষিতৌ জজ্ঞে নিয়োগাদ্বাসবস্য চ
61.94
তানি ষোডশ দেবীনাং সহস্রাণি নরাধিপ
বভূবুর্মানুষে লোকে নারায়ণপরিগ্রহঃ
61.95
শ্রিয়স্তু ভাগঃ সংজজ্ঞে রত্যর্থং পৃথিবীতলে
দ্রুপদস্য কুলে কন্যা বেদিমধ্যাদনিন্দিতা
61.96
নাতিহ্রস্বা ন মহতী নীলোত্পলসুগন্ধিনী
পদ্মায়তাক্ষী সুশ্রোণী অসিতায়তমূর্ধজা
61.97
সর্বলক্ষণসংপন্না বৈডূর্যমণিসংনিভা
পঞ্চানাং পুরুষেন্দ্রাণাং চিত্তপ্রমথিনী রহঃ
61.98
সিদ্ধির্ধৃতিশ্চ যে দেব্যৌ পঞ্চানাং মাতরৌ তু তে
কুন্তী মাদ্রী চ জজ্ঞাতে মতিস্তু সুবলাত্মজা
61.99
ইতি দেবাসুরাণাং তে গন্ধর্বাপ্সরসাং তথা
অংশাবতরণং রাজন্রাক্ষসানাং চ কীর্তিতম্
61.100
যে পৃথিব্যাং সমুদ্ভূতা রাজানো যুদ্ধদুর্মদাঃ
মহাত্মানো যদূনাং চ যে জাতা বিপুলে কুলে
61.101
ধন্যং যশস্যং পুত্রীয়মায়ুষ্যং বিজয়াবহম্
ইদমংশাবতরণং শ্রোতব্যমনসূয়তা
61.102
অংশাবতরণং শ্রুত্বা দেবগন্ধর্বরক্ষসাম্
প্রভবাপ্যয়বিত্প্রাজ্ঞো ন কৃচ্ছ্রেষ্ববসীদতি