Utshovঅধ্যায় 60
60.1
বৈশংপায়ন উবাচ
ব্রহ্মণো মানসাঃ পুত্রা বিদিতাঃ ষণ্মহর্ষয়ঃ
একাদশ সুতাঃ স্থাণোঃ খ্যাতাঃ পরমমানসাঃ
60.2
মৃগব্যাধশ্চ শর্বশ্চ নিরৃতিশ্চ মহায়শাঃ
অজৈকপাদহির্বুধ্ন্যঃ পিনাকী চ পরংতপঃ
60.3
দহনোঽথেশ্বরশ্চৈব কপালী চ মহাদ্যুতিঃ
স্থাণুর্ভবশ্চ ভগবান্রুদ্রা একাদশ স্মৃতাঃ
60.4
মরীচিরঙ্গিরা অত্রিঃ পুলস্ত্যঃ পুলহঃ ক্রতুঃ
ষডেতে ব্রহ্মণঃ পুত্রা বীর্যবন্তো মহর্ষয়ঃ
60.5
ত্রয়স্ত্বঙ্গিরসঃ পুত্রা লোকে সর্বত্র বিশ্রুতাঃ
বৃহস্পতিরুতথ্যশ্চ সংবর্তশ্চ ধৃতব্রতাঃ
60.6
অত্রেস্তু বহবঃ পুত্রাঃ শ্রূয়ন্তে মনুজাধিপ
সর্বে বেদবিদঃ সিদ্ধাঃ শান্তাত্মানো মহর্ষয়ঃ
60.7
রাক্ষসাস্তু পুলস্ত্যস্য বানরাঃ কিংনরাস্তথা
পুলহস্য মৃগাঃ সিংহা ব্যাঘ্রাঃ কিংপুরুষাস্তথা
60.8
ক্রতোঃ ক্রতুসমাঃ পুত্রাঃ পতংগসহচারিণঃ
বিশ্রুতাস্ত্রিষু লোকেষু সত্যব্রতপরায়ণাঃ
60.9
দক্ষস্ত্বজায়তাঙ্গুষ্ঠাদ্দক্ষিণাদ্ভগবানৃষিঃ
ব্রহ্মণঃ পৃথিবীপাল পুত্রঃ পুত্রবতাং বরঃ
60.10
বামাদজায়তাঙ্গুষ্ঠাদ্ভার্যা তস্য মহাত্মনঃ
তস্যাং পঞ্চাশতং কন্যাঃ স এবাজনয়ন্মুনিঃ
60.11
তাঃ সর্বাস্ত্বনবদ্যাঙ্গ্যঃ কন্যাঃ কমললোচনাঃ
পুত্রিকাঃ স্থাপয়ামাস নষ্টপুত্রঃ প্রজাপতিঃ
60.12
দদৌ স দশ ধর্মায় সপ্তবিংশতিমিন্দবে
দিব্যেন বিধিনা রাজন্কশ্যপায় ত্রয়োদশ
60.13
নামতো ধর্মপত্ন্যস্তাঃ কীর্ত্যমানা নিবোধ মে
কীর্তির্লক্ষ্মীর্ধৃতির্মেধা পুষ্টিঃ শ্রদ্ধা ক্রিয়া তথা
60.14
বুদ্ধির্লজ্জা মতিশ্চৈব পত্ন্যো ধর্মস্য তা দশ
দ্বারাণ্যেতানি ধর্মস্য বিহিতানি স্বয়ংভুবা
60.15
সপ্তবিংশতি সোমস্য পত্ন্যো লোকে পরিশ্রুতাঃ
কালস্য নয়নে যুক্তাঃ সোমপত্ন্যঃ শুভব্রতাঃ
সর্বা নক্ষত্রয়োগিন্যো লোকয়াত্রাবিধৌ স্থিতাঃ
60.16
পিতামহো মুনির্দেবস্তস্য পুত্রঃ প্রজাপতিঃ
তস্যাষ্টৌ বসবঃ পুত্রাস্তেষাং বক্ষ্যামি বিস্তরম্
60.17
ধরো ধ্রুবশ্চ সোমশ্চ অহশ্চৈবানিলোঽনলঃ
প্রত্যূষশ্চ প্রভাসশ্চ বসবোঽষ্টাবিতি স্মৃতাঃ
60.18
ধূম্রায়াশ্চ ধরঃ পুত্রো ব্রহ্মবিদ্যো ধ্রুবস্তথা
চন্দ্রমাস্তু মনস্বিন্যাঃ শ্বসায়াঃ শ্বসনস্তথা
60.19
রতায়াশ্চাপ্যহঃ পুত্রঃ শাণ্ডিল্যাশ্চ হুতাশনঃ
প্রত্যূষশ্চ প্রভাসশ্চ প্রভাতায়াঃ সুতৌ স্মৃতৌ
60.20
ধরস্য পুত্রো দ্রবিণো হুতহব্যবহস্তথা
ধ্রুবস্য পুত্রো ভগবান্কালো লোকপ্রকালনঃ
60.21
সোমস্য তু সুতো বর্চা বর্চস্বী যেন জায়তে
মনোহরায়াঃ শিশিরঃ প্রাণোঽথ রমণস্তথা
60.22
অহ্নঃ সুতঃ স্মৃতো জ্যোতিঃ শ্রমঃ শান্তস্তথা মুনিঃ
অগ্নেঃ পুত্রঃ কুমারস্তু শ্রীমাঞ্শরবণালয়ঃ
60.23
তস্য শাখো বিশাখশ্চ নৈগমেশশ্চ পৃষ্ঠজঃ
কৃত্তিকাভ্যুপপত্তেশ্চ কার্ত্তিকেয় ইতি স্মৃতঃ
60.24
অনিলস্য শিবা ভার্যা তস্যাঃ পুত্রঃ পুরোজবঃ
অবিজ্ঞাতগতিশ্চৈব দ্বৌ পুত্রাবনিলস্য তু
60.25
প্রত্যূষস্য বিদুঃ পুত্রমৃষিং নাম্নাথ দেবলম্
দ্বৌ পুত্রৌ দেবলস্যাপি ক্ষমাবন্তৌ মনীষিণৌ
60.26
বৃহস্পতেস্তু ভগিনী বরস্ত্রী ব্রহ্মচারিণী
যোগসিদ্ধা জগত্সর্বমসক্তং বিচরত্যুত
প্রভাসস্য তু ভার্যা সা বসূনামষ্টমস্য হ
60.27
বিশ্বকর্মা মহাভাগো জজ্ঞে শিল্পপ্রজাপতিঃ
কর্তা শিল্পসহস্রাণাং ত্রিদশানাং চ বর্ধকিঃ
60.28
ভূষণানাং চ সর্বেষাং কর্তা শিল্পবতাং বরঃ
যো দিব্যানি বিমানানি দেবতানাং চকার হ
60.29
মনুষ্যাশ্চোপজীবন্তি যস্য শিল্পং মহাত্মনঃ
পূজয়ন্তি চ যং নিত্যং বিশ্বকর্মাণমব্যয়ম্
60.30
স্তনং তু দক্ষিণং ভিত্ত্বা ব্রহ্মণো নরবিগ্রহঃ
নিঃসৃতো ভগবান্ধর্মঃ সর্বলোকসুখাবহঃ
60.31
ত্রয়স্তস্য বরাঃ পুত্রাঃ সর্বভূতমনোহরাঃ
শমঃ কামশ্চ হর্ষশ্চ তেজসা লোকধারিণঃ
60.32
কামস্য তু রতির্ভার্যা শমস্য প্রাপ্তিরঙ্গনা
নন্দী তু ভার্যা হর্ষস্য যত্র লোকাঃ প্রতিষ্ঠিতাঃ
60.33
মরীচেঃ কশ্যপঃ পুত্রঃ কশ্যপস্য সুরাসুরাঃ
জজ্ঞিরে নৃপশার্দূল লোকানাং প্রভবস্তু সঃ
60.34
ত্বাষ্ট্রী তু সবিতুর্ভার্যা বডবারূপধারিণী
অসূয়ত মহাভাগা সান্তরিক্ষেঽশ্বিনাবুভৌ
60.35
দ্বাদশৈবাদিতেঃ পুত্রাঃ শক্রমুখ্যা নরাধিপ
তেষামবরজো বিষ্ণুর্যত্র লোকাঃ প্রতিষ্ঠিতাঃ
60.36
ত্রয়স্ত্রিংশত ইত্যেতে দেবাস্তেষামহং তব
অন্বয়ং সংপ্রবক্ষ্যামি পক্ষৈশ্চ কুলতো গণান্
60.37
রুদ্রাণামপরঃ পক্ষঃ সাধ্যানাং মরুতাং তথা
বসূনাং ভার্গবং বিদ্যাদ্বিশ্বেদেবাংস্তথৈব চ
60.38
বৈনতেয়স্তু গরুডো বলবানরুণস্তথা
বৃহস্পতিশ্চ ভগবানাদিত্যেষ্বেব গণ্যতে
60.39
অশ্বিভ্যাং গুহ্যকান্বিদ্ধি সর্বৌষধ্যস্তথা পশূন্
এষ দেবগণো রাজন্কীর্তিতস্তেঽনুপূর্বশঃ
যং কীর্তয়িত্বা মনুজঃ সর্বপাপৈঃ প্রমুচ্যতে
60.40
ব্রহ্মণো হৃদয়ং ভিত্ত্বা নিঃসৃতো ভগবান্ভৃগুঃ
ভৃগোঃ পুত্রঃ কবির্বিদ্বাঞ্শুক্রঃ কবিসুতো গ্রহঃ
60.41
ত্রৈলোক্যপ্রাণয়াত্রার্থে বর্ষাবর্ষে ভয়াভয়ে
স্বয়ংভুবা নিয়ুক্তঃ সন্ভুবনং পরিধাবতি
60.42
যোগাচার্যো মহাবুদ্ধির্দৈত্যানামভবদ্গুরুঃ
সুরাণাং চাপি মেধাবী ব্রহ্মচারী যতব্রতঃ
60.43
তস্মিন্নিয়ুক্তে বিভুনা যোগক্ষেমায় ভার্গবে
অন্যমুত্পাদয়ামাস পুত্রং ভৃগুরনিন্দিতম্
60.44
চ্যবনং দীপ্ততপসং ধর্মাত্মানং মনীষিণম্
যঃ স রোষাচ্চ্যুতো গর্ভান্মাতুর্মোক্ষায় ভারত
60.45
আরুষী তু মনোঃ কন্যা তস্য পত্নী মনীষিণঃ
ঔর্বস্তস্যাং সমভবদূরুং ভিত্ত্বা মহায়শাঃ
মহাতপা মহাতেজা বাল এব গুণৈর্যুতঃ
60.46
ঋচীকস্তস্য পুত্রস্তু জমদগ্নিস্ততোঽভবৎ
জমদগ্নেস্তু চত্বার আসন্পুত্রা মহাত্মনঃ
60.47
রামস্তেষাং জঘন্যোঽভূদজঘন্যৈর্গুণৈর্যুতঃ
সর্বশস্ত্রাস্ত্রকুশলঃ ক্ষত্রিয়ান্তকরো বশী
60.48
ঔর্বস্যাসীত্পুত্রশতং জমদগ্নিপুরোগমম্
তেষাং পুত্রসহস্রাণি বভূবুর্ভৃগুবিস্তরঃ
60.49
দ্বৌ পুত্রৌ ব্রহ্মণস্ত্বন্যৌ যয়োস্তিষ্ঠতি লক্ষণম্
লোকে ধাতা বিধাতা চ যৌ স্থিতৌ মনুনা সহ
60.50
তয়োরেব স্বসা দেবী লক্ষ্মীঃ পদ্মগৃহা শুভা
তস্যাস্তু মানসাঃ পুত্রাস্তুরগা ব্যোমচারিণঃ
60.51
বরুণস্য ভার্যা জ্যেষ্ঠা তু শুক্রাদ্দেবী ব্যজায়ত
তস্যাঃ পুত্রং বলং বিদ্ধি সুরাং চ সুরনন্দিনীম্
60.52
প্রজানামন্নকামানামন্যোন্যপরিভক্ষণাৎ
অধর্মস্তত্র সংজাতঃ সর্বভূতবিনাশনঃ
60.53
তস্যাপি নিরৃতির্ভার্যা নৈরৃতা যেন রাক্ষসাঃ
ঘোরাস্তস্যাস্ত্রয়ঃ পুত্রাঃ পাপকর্মরতাঃ সদা
ভয়ো মহাভয়শ্চৈব মৃত্যুর্ভূতান্তকস্তথা
60.54
কাকীং শ্যেনীং চ ভাসীং চ ধৃতরাষ্ট্রীং তথা শুকীম্
তাম্রা তু সুষুবে দেবী পঞ্চৈতা লোকবিশ্রুতাঃ
60.55
উলূকান্সুষুবে কাকী শ্যেনী শ্যেনান্ব্যজায়ত
ভাসী ভাসানজনয়দ্গৃধ্রাংশ্চৈব জনাধিপ
60.56
ধৃতরাষ্ট্রী তু হংসাংশ্চ কলহংসাংশ্চ সর্বশঃ
চক্রবাকাংশ্চ ভদ্রং তে প্রজজ্ঞে সা তু ভামিনী
60.57
শুকী বিজজ্ঞে ধর্মজ্ঞ শুকানেব মনস্বিনী
কল্যাণগুণসংপন্না সর্বলক্ষণপূজিতা
60.58
নব ক্রোধবশা নারীঃ প্রজজ্ঞেঽপ্যাত্মসংভবাঃ
মৃগীং চ মৃগমন্দাং চ হরিং ভদ্রমনামপি
60.59
মাতঙ্গীমথ শার্দূলীং শ্বেতাং সুরভিমেব চ
সর্বলক্ষণসংপন্নাং সুরসাং চ যশস্বিনীম্
60.60
অপত্যং তু মৃগাঃ সর্বে মৃগ্যা নরবরাত্মজ
ঋক্ষাশ্চ মৃগমন্দায়াঃ সৃমরাশ্চমরা অপি
60.61
ততস্ত্বৈরাবতং নাগং জজ্ঞে ভদ্রমনা সুতম্
ঐরাবতঃ সুতস্তস্যা দেবনাগো মহাগজঃ
60.62
হর্যাশ্চ হরয়োঽপত্যং বানরাশ্চ তরস্বিনঃ
গোলাঙ্গূলাংশ্চ ভদ্রং তে হর্যাঃ পুত্রান্প্রচক্ষতে
60.63
প্রজজ্ঞে ত্বথ শার্দূলী সিংহান্ব্যাঘ্রাংশ্চ ভারত
দ্বীপিনশ্চ মহাভাগ সর্বানেব ন সংশয়ঃ
60.64
মাতঙ্গ্যাস্ত্বথ মাতঙ্গা অপত্যানি নরাধিপ
দিশাগজং তু শ্বেতাখ্যং শ্বেতাজনয়দাশুগম্
60.65
তথা দুহিতরৌ রাজন্সুরভির্বৈ ব্যজায়ত
রোহিণীং চৈব ভদ্রং তে গন্ধর্বীং চ যশস্বিনীম্
রোহিণ্যাং জজ্ঞিরে গাবো গন্ধর্ব্যাং বাজিনঃ সুতাঃ
60.66
সুরসাজনয়ন্নাগান্রাজন্কদ্রূশ্চ পন্নগান্
সপ্ত পিণ্ডফলান্বৃক্ষাননলাপি ব্যজায়ত
অনলায়াঃ শুকী পুত্রী কদ্র্বাস্তু সুরসা সুতা
60.67
অরুণস্য ভার্যা শ্যেনী তু বীর্যবন্তৌ মহাবলৌ
সংপাতিং জনয়ামাস তথৈব চ জটায়ুষম্
দ্বৌ পুত্রৌ বিনতায়াস্তু বিখ্যাতৌ গরুডারুণৌ
60.68
ইত্যেষ সর্বভূতানাং মহতাং মনুজাধিপ
প্রভবঃ কীর্তিতঃ সম্যঙ্ময়া মতিমতাং বর
60.69
যং শ্রুত্বা পুরুষঃ সম্যক্পূতো ভবতি পাপ্মনঃ
সর্বজ্ঞতাং চ লভতে গতিমগ্র্যাং চ বিন্দতি