Utshovঅধ্যায় 59
59.1
বৈশংপায়ন উবাচ
অথ নারায়ণেনেন্দ্রশ্চকার সহ সংবিদম্
অবতর্তুং মহীং স্বর্গাদংশতঃ সহিতঃ সুরৈঃ
59.2
আদিশ্য চ স্বয়ং শক্রঃ সর্বানেব দিবৌকসঃ
নির্জগাম পুনস্তস্মাত্ক্ষয়ান্নারায়ণস্য হ
59.3
তেঽমরারিবিনাশায় সর্বলোকহিতায় চ
অবতেরুঃ ক্রমেণেমাং মহীং স্বর্গাদ্দিবৌকসঃ
59.4
ততো ব্রহ্মর্ষিবংশেষু পার্থিবর্ষিকুলেষু চ
জজ্ঞিরে রাজশার্দূল যথাকামং দিবৌকসঃ
59.5
দানবান্রাক্ষসাংশ্চৈব গন্ধর্বান্পন্নগাংস্তথা
পুরুষাদানি চান্যানি জঘ্নুঃ সত্ত্বান্যনেকশঃ
59.6
দানবা রাক্ষসাশ্চৈব গন্ধর্বাঃ পন্নগাস্তথা
ন তান্বলস্থান্বাল্যেঽপি জঘ্নুর্ভরতসত্তম
59.7
জনমেজয় উবাচ
দেবদানবসংঘানাং গন্ধর্বাপ্সরসাং তথা
মানবানাং চ সর্বেষাং তথা বৈ যক্ষরক্ষসাম্
59.8
শ্রোতুমিচ্ছামি তত্ত্বেন সংভবং কৃত্স্নমাদিতঃ
প্রাণিনাং চৈব সর্বেষাং সর্বশঃ সর্ববিদ্ধ্যসি
59.9
বৈশংপায়ন উবাচ
হন্ত তে কথয়িষ্যামি নমস্কৃত্বা স্বয়ংভুবে
সুরাদীনামহং সম্যগ্লোকানাং প্রভবাপ্যয়ম্
59.10
ব্রহ্মণো মানসাঃ পুত্রা বিদিতাঃ ষণ্মহর্ষয়ঃ
মরীচিরত্র্যঙ্গিরসৌ পুলস্ত্যঃ পুলহঃ ক্রতুঃ
59.11
মরীচেঃ কশ্যপঃ পুত্রঃ কশ্যপাত্তু ইমাঃ প্রজাঃ
প্রজজ্ঞিরে মহাভাগা দক্ষকন্যাস্ত্রয়োদশ
59.12
অদিতির্দিতির্দনুঃ কালা অনায়ুঃ সিংহিকা মুনিঃ
ক্রোধা প্রাবা অরিষ্টা চ বিনতা কপিলা তথা
59.13
কদ্রূশ্চ মনুজব্যাঘ্র দক্ষকন্যৈব ভারত
এতাসাং বীর্যসংপন্নং পুত্রপৌত্রমনন্তকম্
59.14
অদিত্যাং দ্বাদশাদিত্যাঃ সংভূতা ভুবনেশ্বরাঃ
যে রাজন্নামতস্তাংস্তে কীর্তয়িষ্যামি ভারত
59.15
ধাতা মিত্রোঽর্যমা শক্রো বরুণশ্চাংশ এব চ
ভগো বিবস্বান্পূষা চ সবিতা দশমস্তথা
59.16
একাদশস্তথা ত্বষ্টা বিষ্ণুর্দ্বাদশ উচ্যতে
জঘন্যজঃ স সর্বেষামাদিত্যানাং গুণাধিকঃ
59.17
এক এব দিতেঃ পুত্রো হিরণ্যকশিপুঃ স্মৃতঃ
নাম্না খ্যাতাস্তু তস্যেমে পুত্রাঃ পঞ্চ মহাত্মনঃ
59.18
প্রহ্রাদঃ পূর্বজস্তেষাং সংহ্রাদস্তদনন্তরম্
অনুহ্রাদস্তৃতীয়োঽভূত্তস্মাচ্চ শিবিবাষ্কলৌ
59.19
প্রহ্রাদস্য ত্রয়ঃ পুত্রাঃ খ্যাতাঃ সর্বত্র ভারত
বিরোচনশ্চ কুম্ভশ্চ নিকুম্ভশ্চেতি বিশ্রুতাঃ
59.20
বিরোচনস্য পুত্রোঽভূদ্বলিরেকঃ প্রতাপবান্
বলেশ্চ প্রথিতঃ পুত্রো বাণো নাম মহাসুরঃ
59.21
চত্বারিংশদ্দনোঃ পুত্রাঃ খ্যাতাঃ সর্বত্র ভারত
তেষাং প্রথমজো রাজা বিপ্রচিত্তির্মহায়শাঃ
59.22
শম্বরো নমুচিশ্চৈব পুলোমা চেতি বিশ্রুতঃ
অসিলোমা চ কেশী চ দুর্জয়শ্চৈব দানবঃ
59.23
অয়ঃশিরা অশ্বশিরা অয়ঃশঙ্কুশ্চ বীর্যবান্
তথা গগনমূর্ধা চ বেগবান্কেতুমাংশ্চ যঃ
59.24
স্বর্ভানুরশ্বোঽশ্বপতির্বৃষপর্বাজকস্তথা
অশ্বগ্রীবশ্চ সূক্ষ্মশ্চ তুহুণ্ডশ্চ মহাসুরঃ
59.25
ইসৃপা একচক্রশ্চ বিরূপাক্ষো হরাহরৌ
নিচন্দ্রশ্চ নিকুম্ভশ্চ কুপথঃ কাপথস্তথা
59.26
শরভঃ শলভশ্চৈব সূর্যাচন্দ্রমসৌ তথা
ইতি খ্যাতা দনোর্বংশে দানবাঃ পরিকীর্তিতাঃ
অন্যৌ তু খলু দেবানাং সূর্যাচন্দ্রমসৌ স্মৃতৌ
59.27
ইমে চ বংশে প্রথিতাঃ সত্ত্ববন্তো মহাবলাঃ
দনুপুত্রা মহারাজ দশ দানবপুঙ্গবাঃ
59.28
একাক্ষো মৃতপা বীরঃ প্রলম্বনরকাবপি
বাতাপিঃ শত্রুতপনঃ শঠশ্চৈব মহাসুরঃ
59.29
গবিষ্ঠশ্চ দনায়ুশ্চ দীর্ঘজিহ্বশ্চ দানবঃ
অসংখ্যেয়াঃ স্মৃতাস্তেষাং পুত্রাঃ পৌত্রাশ্চ ভারত
59.30
সিংহিকা সুষুবে পুত্রং রাহুং চন্দ্রার্কমর্দনম্
সুচন্দ্রং চন্দ্রহন্তারং তথা চন্দ্রবিমর্দনম্
59.31
ক্রূরস্বভাবং ক্রূরায়াঃ পুত্রপৌত্রমনন্তকম্
গণঃ ক্রোধবশো নাম ক্রূরকর্মারিমর্দনঃ
59.32
অনায়ুষঃ পুনঃ পুত্রাশ্চত্বারোঽসুরপুংগবাঃ
বিক্ষরো বলবীরৌ চ বৃত্রশ্চৈব মহাসুরঃ
59.33
কালায়াঃ প্রথিতাঃ পুত্রাঃ কালকল্পাঃ প্রহারিণঃ
ভুবি খ্যাতা মহাবীর্যা দানবেষু পরংতপাঃ
59.34
বিনাশনশ্চ ক্রোধশ্চ হন্তা ক্রোধস্য চাপরঃ
ক্রোধশত্রুস্তথৈবান্যঃ কালেয়া ইতি বিশ্রুতাঃ
59.35
অসুরাণামুপাধ্যায়ঃ শুক্রস্ত্বৃষিসুতোঽভবৎ
খ্যাতাশ্চোশনসঃ পুত্রাশ্চত্বারোঽসুরয়াজকাঃ
59.36
ত্বষ্টাবরস্তথাত্রিশ্চ দ্বাবন্যৌ মন্ত্রকর্মিণৌ
তেজসা সূর্যসংকাশা ব্রহ্মলোকপ্রভাবনাঃ
59.37
ইত্যেষ বংশপ্রভবঃ কথিতস্তে তরস্বিনাম্
অসুরাণাং সুরাণাং চ পুরাণে সংশ্রুতো ময়া
59.38
এতেষাং যদপত্যং তু ন শক্যং তদশেষতঃ
প্রসংখ্যাতুং মহীপাল গুণভূতমনন্তকম্
59.39
তার্ক্ষ্যশ্চারিষ্টনেমিশ্চ তথৈব গরুডারুণৌ
আরুণির্বারুণিশ্চৈব বৈনতেয়া ইতি স্মৃতাঃ
59.40
শেষোঽনন্তো বাসুকিশ্চ তক্ষকশ্চ ভুজংগমঃ
কূর্মশ্চ কুলিকশ্চৈব কাদ্রবেয়া মহাবলাঃ
59.41
ভীমসেনোগ্রসেনৌ চ সুপর্ণো বরুণস্তথা
গোপতির্ধৃতরাষ্ট্রশ্চ সূর্যবর্চাশ্চ সপ্তমঃ
59.42
পত্রবানর্কপর্ণশ্চ প্রয়ুতশ্চৈব বিশ্রুতঃ
ভীমশ্চিত্ররথশ্চৈব বিখ্যাতঃ সর্ববিদ্বশী
59.43
তথা শালিশিরা রাজন্প্রদ্যুম্নশ্চ চতুর্দশঃ
কলিঃ পঞ্চদশশ্চৈব নারদশ্চৈব ষোডশঃ
ইত্যেতে দেবগন্ধর্বা মৌনেয়াঃ পরিকীর্তিতাঃ
59.44
অতস্তু ভূতান্যন্যানি কীর্তয়িষ্যামি ভারত
অনবদ্যামনুবশামনূনামরুণাং প্রিয়াম্
অনূপাং সুভগাং ভাসীমিতি প্রাবা ব্যজায়ত
59.45
সিদ্ধঃ পূর্ণশ্চ বর্হী চ পূর্ণাশশ্চ মহায়শাঃ
ব্রহ্মচারী রতিগুণঃ সুপর্ণশ্চৈব সপ্তমঃ
59.46
বিশ্বাবসুশ্চ ভানুশ্চ সুচন্দ্রো দশমস্তথা
ইত্যেতে দেবগন্ধর্বাঃ প্রাবেয়াঃ পরিকীর্তিতাঃ
59.47
ইমং ত্বপ্সরসাং বংশং বিদিতং পুণ্যলক্ষণম্
প্রাবাসূত মহাভাগা দেবী দেবর্ষিতঃ পুরা
59.48
অলম্বুসা মিশ্রকেষী বিদ্যুত্পর্ণা তুলানঘা
অরুণা রক্ষিতা চৈব রম্ভা তদ্বন্মনোরমা
59.49
অসিতা চ সুবাহুশ্চ সুব্রতা সুভুজা তথা
সুপ্রিয়া চাতিবাহুশ্চ বিখ্যাতৌ চ হহাহুহূ
তুম্বুরুশ্চেতি চত্বারঃ স্মৃতা গন্ধর্বসত্তমাঃ
59.50
অমৃতং ব্রাহ্মণা গাবো গন্ধর্বাপ্সরসস্তথা
অপত্যং কপিলায়াস্তু পুরাণে পরিকীর্তিতম্
59.51
ইতি তে সর্বভূতানাং সংভবঃ কথিতো ময়া
যথাবত্পরিসংখ্যাতো গন্ধর্বাপ্সরসাং তথা
59.52
ভুজগানাং সুপর্ণানাং রুদ্রাণাং মরুতাং তথা
গবাং চ ব্রাহ্মণানাং চ শ্রীমতাং পুণ্যকর্মণাম্
59.53
আয়ুষ্যশ্চৈব পুণ্যশ্চ ধন্যঃ শ্রুতিসুখাবহঃ
শ্রোতব্যশ্চৈব সততং শ্রাব্যশ্চৈবানসূয়তা
59.54
ইমং তু বংশং নিয়মেন যঃ পঠে;ন্মহাত্মনাং ব্রাহ্মণদেবসংনিধৌ
অপত্যলাভং লভতে স পুষ্কলং; শ্রিয়ং যশঃ প্রেত্য চ শোভনাং গতিম্