Utshovঅধ্যায় 58
58.1
জনমেজয় উবাচ
য এতে কীর্তিতা ব্রহ্মন্যে চান্যে নানুকীর্তিতাঃ
সম্যক্তাঞ্শ্রোতুমিচ্ছামি রাজ্ঞশ্চান্যান্সুবর্চসঃ
58.2
যদর্থমিহ সংভূতা দেবকল্পা মহারথাঃ
ভুবি তন্মে মহাভাগ সম্যগাখ্যাতুমর্হসি
58.3
বৈশংপায়ন উবাচ
রহস্যং খল্বিদং রাজন্দেবানামিতি নঃ শ্রুতম্
তত্তু তে কথয়িষ্যামি নমস্কৃত্বা স্বয়ংভুবে
58.4
ত্রিঃসপ্তকৃত্বঃ পৃথিবীং কৃত্বা নিঃক্ষত্রিয়াং পুরা
জামদগ্ন্যস্তপস্তেপে মহেন্দ্রে পর্বতোত্তমে
58.5
তদা নিঃক্ষত্রিয়ে লোকে ভার্গবেণ কৃতে সতি
ব্রাহ্মণান্ক্ষত্রিয়া রাজন্গর্ভার্থিন্যোঽভিচক্রমুঃ
58.6
তাভিঃ সহ সমাপেতুর্ব্রাহ্মণাঃ সংশিতব্রতাঃ
ঋতাবৃতৌ নরব্যাঘ্র ন কামান্নানৃতৌ তথা
58.7
তেভ্যস্তু লেভিরে গর্ভান্ক্ষত্রিয়াস্তাঃ সহস্রশঃ
ততঃ সুষুবিরে রাজন্ক্ষত্রিয়ান্বীর্যসংমতান্
কুমারাংশ্চ কুমারীশ্চ পুনঃ ক্ষত্রাভিবৃদ্ধয়ে
58.8
এবং তদ্ব্রাহ্মণৈঃ ক্ষত্রং ক্ষত্রিয়াসু তপস্বিভিঃ
জাতমৃধ্যত ধর্মেণ সুদীর্ঘেণায়ুষান্বিতম্
চত্বারোঽপি তদা বর্ণা বভূবুর্ব্রাহ্মণোত্তরাঃ
58.9
অভ্যগচ্ছন্নৃতৌ নারীং ন কামান্নানৃতৌ তথা
তথৈবান্যানি ভূতানি তির্যগ্যোনিগতান্যপি
ঋতৌ দারাংশ্চ গচ্ছন্তি তদা স্ম ভরতর্ষভ
58.10
ততোঽবর্ধন্ত ধর্মেণ সহস্রশতজীবিনঃ
তাঃ প্রজাঃ পৃথিবীপাল ধর্মব্রতপরায়ণাঃ
আধিভির্ব্যাধিভিশ্চৈব বিমুক্তাঃ সর্বশো নরাঃ
58.11
অথেমাং সাগরাপাঙ্গাং গাং গজেন্দ্রগতাখিলাম্
অধ্যতিষ্ঠত্পুনঃ ক্ষত্রং সশৈলবনকাননাম্
58.12
প্রশাসতি পুনঃ ক্ষত্রে ধর্মেণেমাং বসুংধরাম্
ব্রাহ্মণাদ্যাস্তদা বর্ণা লেভিরে মুদমুত্তমাম্
58.13
কামক্রোধোদ্ভবান্দোষান্নিরস্য চ নরাধিপাঃ
দণ্ডং দণ্ড্যেষু ধর্মেণ প্রণয়ন্তোঽন্বপালয়ন্
58.14
তথা ধর্মপরে ক্ষত্রে সহস্রাক্ষঃ শতক্রতুঃ
স্বাদু দেশে চ কালে চ ববর্ষাপ্যায়য়ন্প্রজাঃ
58.15
ন বাল এব ম্রিয়তে তদা কশ্চিন্নরাধিপ
ন চ স্ত্রিয়ং প্রজানাতি কশ্চিদপ্রাপ্তয়ৌবনঃ
58.16
এবমায়ুষ্মতীভিস্তু প্রজাভির্ভরতর্ষভ
ইয়ং সাগরপর্যন্তা সমাপূর্যত মেদিনী
58.17
ঈজিরে চ মহায়জ্ঞৈঃ ক্ষত্রিয়া বহুদক্ষিণৈঃ
সাঙ্গোপনিষদান্বেদান্বিপ্রাশ্চাধীয়তে তদা
58.18
ন চ বিক্রীণতে ব্রহ্ম ব্রাহ্মণাঃ স্ম তদা নৃপ
ন চ শূদ্রসমাভ্যাশে বেদানুচ্চারয়ন্ত্যুত
58.19
কারয়ন্তঃ কৃষিং গোভিস্তথা বৈশ্যাঃ ক্ষিতাবিহ
ন গাময়ুঞ্জন্ত ধুরি কৃশাঙ্গাশ্চাপ্যজীবয়ন্
58.20
ফেনপাংশ্চ তথা বত্সান্ন দুহন্তি স্ম মানবাঃ
ন কূটমানৈর্বণিজঃ পণ্যং বিক্রীণতে তদা
58.21
কর্মাণি চ নরব্যাঘ্র ধর্মোপেতানি মানবাঃ
ধর্মমেবানুপশ্যন্তশ্চক্রুর্ধর্মপরায়ণাঃ
58.22
স্বকর্মনিরতাশ্চাসন্সর্বে বর্ণা নরাধিপ
এবং তদা নরব্যাঘ্র ধর্মো ন হ্রসতে ক্বচিৎ
58.23
কালে গাবঃ প্রসূয়ন্তে নার্যশ্চ ভরতর্ষভ
ফলন্ত্যৃতুষু বৃক্ষাশ্চ পুষ্পাণি চ ফলানি চ
58.24
এবং কৃতয়ুগে সম্যগ্বর্তমানে তদা নৃপ
আপূর্যত মহী কৃত্স্না প্রাণিভির্বহুভির্ভৃশম্
58.25
ততঃ সমুদিতে লোকে মানুষে ভরতর্ষভ
অসুরা জজ্ঞিরে ক্ষেত্রে রাজ্ঞাং মনুজপুংগব
58.26
আদিত্যৈর্হি তদা দৈত্যা বহুশো নির্জিতা যুধি
ঐশ্বর্যাদ্ভ্রংশিতাশ্চাপি সংবভূবুঃ ক্ষিতাবিহ
58.27
ইহ দেবত্বমিচ্ছন্তো মানুষেষু মনস্বিনঃ
জজ্ঞিরে ভুবি ভূতেষু তেষু তেষ্বসুরা বিভো
58.28
গোষ্বশ্বেষু চ রাজেন্দ্র খরোষ্ট্রমহিষেষু চ
ক্রব্যাদেষু চ ভূতেষু গজেষু চ মৃগেষু চ
58.29
জাতৈরিহ মহীপাল জায়মানৈশ্চ তৈর্মহী
ন শশাকাত্মনাত্মানমিয়ং ধারয়িতুং ধরা
58.30
অথ জাতা মহীপালাঃ কেচিদ্বলসমন্বিতাঃ
দিতেঃ পুত্রা দনোশ্চৈব তস্মাল্লোকাদিহ চ্যুতাঃ
58.31
বীর্যবন্তোঽবলিপ্তাস্তে নানারূপধরা মহীম্
ইমাং সাগরপর্যন্তাং পরীয়ুররিমর্দনাঃ
58.32
ব্রাহ্মণান্ক্ষত্রিয়ান্বৈশ্যাঞ্শূদ্রাংশ্চৈবাপ্যপীডয়ন্
অন্যানি চৈব ভূতানি পীডয়ামাসুরোজসা
58.33
ত্রাসয়ন্তো বিনিঘ্নন্তস্তাংস্তান্ভূতগণাংশ্চ তে
বিচেরুঃ সর্বতো রাজন্মহীং শতসহস্রশঃ
58.34
আশ্রমস্থান্মহর্ষীংশ্চ ধর্ষয়ন্তস্ততস্ততঃ
অব্রহ্মণ্যা বীর্যমদা মত্তা মদবলেন চ
58.35
এবং বীর্যবলোত্সিক্তৈর্ভূরিয়ং তৈর্মহাসুরৈঃ
পীড্যমানা মহীপাল ব্রহ্মাণমুপচক্রমে
58.36
ন হীমাং পবনো রাজন্ন নাগা ন নগা মহীম্
তদা ধারয়িতুং শেকুরাক্রান্তাং দানবৈর্বলাৎ
58.37
ততো মহী মহীপাল ভারার্তা ভয়পীডিতা
জগাম শরণং দেবং সর্বভূতপিতামহম্
58.38
সা সংবৃতং মহাভাগৈর্দেবদ্বিজমহর্ষিভিঃ
দদর্শ দেবং ব্রহ্মাণং লোককর্তারমব্যয়ম্
58.39
গন্ধর্বৈরপ্সরোভিশ্চ বন্দিকর্মসু নিষ্ঠিতৈঃ
বন্দ্যমানং মুদোপেতৈর্ববন্দে চৈনমেত্য সা
58.40
অথ বিজ্ঞাপয়ামাস ভূমিস্তং শরণার্থিনী
সংনিধৌ লোকপালানাং সর্বেষামেব ভারত
58.41
তত্প্রধানাত্মনস্তস্য ভূমেঃ কৃত্যং স্বয়ংভুবঃ
পূর্বমেবাভবদ্রাজন্বিদিতং পরমেষ্ঠিনঃ
58.42
স্রষ্টা হি জগতঃ কস্মান্ন সংবুধ্যেত ভারত
সুরাসুরাণাং লোকানামশেষেণ মনোগতম্
58.43
তামুবাচ মহারাজ ভূমিং ভূমিপতির্বিভুঃ
প্রভবঃ সর্বভূতানামীশঃ শংভুঃ প্রজাপতিঃ
58.44
যদর্থমসি সংপ্রাপ্তা মত্সকাশং বসুংধরে
তদর্থং সংনিয়োক্ষ্যামি সর্বানেব দিবৌকসঃ
58.45
ইত্যুক্ত্বা স মহীং দেবো ব্রহ্মা রাজন্বিসৃজ্য চ
আদিদেশ তদা সর্বান্বিবুধান্ভূতকৃত্স্বয়ম্
58.46
অস্যা ভূমের্নিরসিতুং ভারং ভাগৈঃ পৃথক্পৃথক্
অস্যামেব প্রসূয়ধ্বং বিরোধায়েতি চাব্রবীৎ
58.47
তথৈব চ সমানীয় গন্ধর্বাপ্সরসাং গণান্
উবাচ ভগবান্সর্বানিদং বচনমুত্তমম্
স্বৈরংশৈঃ সংপ্রসূয়ধ্বং যথেষ্টং মানুষেষ্বিতি
58.48
অথ শক্রাদয়ঃ সর্বে শ্রুত্বা সুরগুরোর্বচঃ
তথ্যমর্থ্যং চ পথ্যং চ তস্য তে জগৃহুস্তদা
58.49
অথ তে সর্বশোংঽশৈঃ স্বৈর্গন্তুং ভূমিং কৃতক্ষণাঃ
নারায়ণমমিত্রঘ্নং বৈকুণ্ঠমুপচক্রমুঃ
58.50
যঃ স চক্রগদাপাণিঃ পীতবাসাসিতপ্রভঃ
পদ্মনাভঃ সুরারিঘ্নঃ পৃথুচার্বঞ্চিতেক্ষণঃ
58.51
তং ভুবঃ শোধনায়েন্দ্র উবাচ পুরুষোত্তমম্
অংশেনাবতরস্বেতি তথেত্যাহ চ তং হরিঃ