Utshovঅধ্যায় 57
57.1
বৈশংপায়ন উবাচ
রাজোপরিচরো নাম ধর্মনিত্যো মহীপতিঃ
বভূব মৃগয়াং গন্তুং স কদাচিদ্ধৃতব্রতঃ
57.2
স চেদিবিষয়ং রম্যং বসুঃ পৌরবনন্দনঃ
ইন্দ্রোপদেশাজ্জগ্রাহ গ্রহণীয়ং মহীপতিঃ
57.3
তমাশ্রমে ন্যস্তশস্ত্রং নিবসন্তং তপোরতিম্
দেবঃ সাক্ষাত্স্বয়ং বজ্রী সমুপায়ান্মহীপতিম্
57.4
ইন্দ্রত্বমর্হো রাজায়ং তপসেত্যনুচিন্ত্য বৈ
তং সান্ত্বেন নৃপং সাক্ষাত্তপসঃ সংন্যবর্তয়ৎ
57.5
ইন্দ্র উবাচ
ন সংকীর্যেত ধর্মোঽয়ং পৃথিব্যাং পৃথিবীপতে
তং পাহি ধর্মো হি ধৃতঃ কৃত্স্নং ধারয়তে জগৎ
57.6
লোক্যং ধর্মং পালয় ত্বং নিত্যয়ুক্তঃ সমাহিতঃ
ধর্ময়ুক্তস্ততো লোকান্পুণ্যানাপ্স্যসি শাশ্বতান্
57.7
দিবিষ্ঠস্য ভুবিষ্ঠস্ত্বং সখা ভূত্বা মম প্রিয়ঃ
ঊধঃ পৃথিব্যা যো দেশস্তমাবস নরাধিপ
57.8
পশব্যশ্চৈব পুণ্যশ্চ সুস্থিরো ধনধান্যবান্
স্বারক্ষ্যশ্চৈব সৌম্যশ্চ ভোগ্যৈর্ভূমিগুণৈর্যুতঃ
57.9
অত্যন্যানেষ দেশো হি ধনরত্নাদিভির্যুতঃ
বসুপূর্ণা চ বসুধা বস চেদিষু চেদিপ
57.10
ধর্মশীলা জনপদাঃ সুসংতোষাশ্চ সাধবঃ
ন চ মিথ্যাপ্রলাপোঽত্র স্বৈরেষ্বপি কুতোঽন্যথা
57.11
ন চ পিত্রা বিভজ্যন্তে নরা গুরুহিতে রতাঃ
যুঞ্জতে ধুরি নো গাশ্চ কৃশাঃ সংধুক্ষয়ন্তি চ
57.12
সর্বে বর্ণাঃ স্বধর্মস্থাঃ সদা চেদিষু মানদ
ন তেঽস্ত্যবিদিতং কিংচিত্ত্রিষু লোকেষু যদ্ভবেৎ
57.13
দেবোপভোগ্যং দিব্যং চ আকাশে স্ফাটিকং মহৎ
আকাশগং ত্বাং মদ্দত্তং বিমানমুপপত্স্যতে
57.14
ত্বমেকঃ সর্বমর্ত্যেষু বিমানবরমাস্থিতঃ
চরিষ্যস্যুপরিস্থো বৈ দেবো বিগ্রহবানিব
57.15
দদামি তে বৈজয়ন্তীং মালামম্লানপঙ্কজাম্
ধারয়িষ্যতি সংগ্রামে যা ত্বাং শস্ত্রৈরবিক্ষতম্
57.16
লক্ষণং চৈতদেবেহ ভবিতা তে নরাধিপ
ইন্দ্রমালেতি বিখ্যাতং ধন্যমপ্রতিমং মহৎ
57.17
বৈশংপায়ন উবাচ
যষ্টিং চ বৈণবীং তস্মৈ দদৌ বৃত্রনিষূদনঃ
ইষ্টপ্রদানমুদ্দিশ্য শিষ্টানাং পরিপালিনীম্
57.18
তস্যাঃ শক্রস্য পূজার্থং ভূমৌ ভূমিপতিস্তদা
প্রবেশং কারয়ামাস গতে সংবত্সরে তদা
57.19
ততঃ প্রভৃতি চাদ্যাপি যষ্ট্যাঃ ক্ষিতিপসত্তমৈঃ
প্রবেশঃ ক্রিয়তে রাজন্যথা তেন প্রবর্তিতঃ
57.20
অপরেদ্যুস্তথা চাস্যাঃ ক্রিয়তে উচ্ছ্রয়ো নৃপৈঃ
অলংকৃতায়াঃ পিটকৈর্গন্ধৈর্মাল্যৈশ্চ ভূষণৈঃ
মাল্যদামপরিক্ষিপ্তা বিধিবত্ক্রিয়তেঽপি চ
57.21
ভগবান্পূজ্যতে চাত্র হাস্যরূপেণ শংকরঃ
স্বয়মেব গৃহীতেন বসোঃ প্রীত্যা মহাত্মনঃ
57.22
এতাং পূজাং মহেন্দ্রস্তু দৃষ্ট্বা দেব কৃতাং শুভাম্
বসুনা রাজমুখ্যেন প্রীতিমানব্রবীদ্বিভুঃ
57.23
যে পূজয়িষ্যন্তি নরা রাজানশ্চ মহং মম
কারয়িষ্যন্তি চ মুদা যথা চেদিপতির্নৃপঃ
57.24
তেষাং শ্রীর্বিজয়শ্চৈব সরাষ্ট্রাণাং ভবিষ্যতি
তথা স্ফীতো জনপদো মুদিতশ্চ ভবিষ্যতি
57.25
এবং মহাত্মনা তেন মহেন্দ্রেণ নরাধিপ
বসুঃ প্রীত্যা মঘবতা মহারাজোঽভিসত্কৃতঃ
57.26
উত্সবং কারয়িষ্যন্তি সদা শক্রস্য যে নরাঃ
ভূমিদানাদিভির্দানৈর্যথা পূতা ভবন্তি বৈ
বরদানমহায়জ্ঞৈস্তথা শক্রোত্সবেন তে
57.27
সংপূজিতো মঘবতা বসুশ্চেদিপতিস্তদা
পালয়ামাস ধর্মেণ চেদিস্থঃ পৃথিবীমিমাম্
ইন্দ্রপ্রীত্যা ভূমিপতিশ্চকারেন্দ্রমহং বসুঃ
57.28
পুত্রাশ্চাস্য মহাবীর্যাঃ পঞ্চাসন্নমিতৌজসঃ
নানারাজ্যেষু চ সুতান্স সম্রাডভ্যষেচয়ৎ
57.29
মহারথো মগধরাড্বিশ্রুতো যো বৃহদ্রথঃ
প্রত্যগ্রহঃ কুশাম্বশ্চ যমাহুর্মণিবাহনম্
মচ্ছিল্লশ্চ যদুশ্চৈব রাজন্যশ্চাপরাজিতঃ
57.30
এতে তস্য সুতা রাজন্রাজর্ষের্ভূরিতেজসঃ
ন্যবেশয়ন্নামভিঃ স্বৈস্তে দেশাংশ্চ পুরাণি চ
বাসবাঃ পঞ্চ রাজানঃ পৃথগ্বংশাশ্চ শাশ্বতাঃ
57.31
বসন্তমিন্দ্রপ্রাসাদে আকাশে স্ফাটিকে চ তম্
উপতস্থুর্মহাত্মানং গন্ধর্বাপ্সরসো নৃপম্
রাজোপরিচরেত্যেবং নাম তস্যাথ বিশ্রুতম্
57.32
পুরোপবাহিনীং তস্য নদীং শুক্তিমতীং গিরিঃ
অরৌত্সীচ্চেতনায়ুক্তঃ কামাত্কোলাহলঃ কিল
57.33
গিরিং কোলাহলং তং তু পদা বসুরতাডয়ৎ
নিশ্চক্রাম নদী তেন প্রহারবিবরেণ সা
57.34
তস্যাং নদ্যামজনয়ন্মিথুনং পর্বতঃ স্বয়ম্
তস্মাদ্বিমোক্ষণাত্প্রীতা নদী রাজ্ঞে ন্যবেদয়ৎ
57.35
যঃ পুমানভবত্তত্র তং স রাজর্ষিসত্তমঃ
বসুর্বসুপ্রদশ্চক্রে সেনাপতিমরিংদমম্
চকার পত্নীং কন্যাং তু দয়িতাং গিরিকাং নৃপঃ
57.36
বসোঃ পত্নী তু গিরিকা কামাত্কালে ন্যবেদয়ৎ
ঋতুকালমনুপ্রাপ্তং স্নাতা পুংসবনে শুচিঃ
57.37
তদহঃ পিতরশ্চৈনমূচুর্জহি মৃগানিতি
তং রাজসত্তমং প্রীতাস্তদা মতিমতাং বরম্
57.38
স পিতৄণাং নিয়োগং তমব্যতিক্রম্য পার্থিবঃ
চচার মৃগয়াং কামী গিরিকামেব সংস্মরন্
অতীব রূপসংপন্নাং সাক্ষাচ্ছ্রিয়মিবাপরাম্
57.39
তস্য রেতঃ প্রচস্কন্দ চরতো রুচিরে বনে
স্কন্নমাত্রং চ তদ্রেতো বৃক্ষপত্রেণ ভূমিপঃ
57.40
প্রতিজগ্রাহ মিথ্যা মে ন স্কন্দেদ্রেত ইত্যুত
ঋতুশ্চ তস্যাঃ পত্ন্যা মে ন মোঘঃ স্যাদিতি প্রভুঃ
57.41
সংচিন্ত্যৈবং তদা রাজা বিচার্য চ পুনঃ পুনঃ
অমোঘত্বং চ বিজ্ঞায় রেতসো রাজসত্তমঃ
57.42
শুক্রপ্রস্থাপনে কালং মহিষ্যাঃ প্রসমীক্ষ্য সঃ
অভিমন্ত্র্যাথ তচ্ছুক্রমারাত্তিষ্ঠন্তমাশুগম্
সূক্ষ্মধর্মার্থতত্ত্বজ্ঞো জ্ঞাত্বা শ্যেনং ততোঽব্রবীৎ
57.43
মত্প্রিয়ার্থমিদং সৌম্য শুক্রং মম গৃহং নয়
গিরিকায়াঃ প্রয়চ্ছাশু তস্যা হ্যার্তবমদ্য বৈ
57.44
গৃহীত্বা তত্তদা শ্যেনস্তূর্ণমুত্পত্য বেগবান্
জবং পরমমাস্থায় প্রদুদ্রাব বিহংগমঃ
57.45
তমপশ্যদথায়ান্তং শ্যেনং শ্যেনস্তথাপরঃ
অভ্যদ্রবচ্চ তং সদ্যো দৃষ্ট্বৈবামিষশঙ্কয়া
57.46
তুণ্ডয়ুদ্ধমথাকাশে তাবুভৌ সংপ্রচক্রতুঃ
যুধ্যতোরপতদ্রেতস্তচ্চাপি যমুনাম্ভসি
57.47
তত্রাদ্রিকেতি বিখ্যাতা ব্রহ্মশাপাদ্বরাপ্সরাঃ
মীনভাবমনুপ্রাপ্তা বভূব যমুনাচরী
57.48
শ্যেনপাদপরিভ্রষ্টং তদ্বীর্যমথ বাসবম্
জগ্রাহ তরসোপেত্য সাদ্রিকা মত্স্যরূপিণী
57.49
কদাচিদথ মত্সীং তাং ববন্ধুর্মত্স্যজীবিনঃ
মাসে চ দশমে প্রাপ্তে তদা ভরতসত্তম
উজ্জহ্রুরুদরাত্তস্যাঃ স্ত্রীপুমাংসং চ মানুষম্
57.50
আশ্চর্যভূতং মত্বা তদ্রাজ্ঞস্তে প্রত্যবেদয়ন্
কায়ে মত্স্যা ইমৌ রাজন্সংভূতৌ মানুষাবিতি
57.51
তয়োঃ পুমাংসং জগ্রাহ রাজোপরিচরস্তদা
স মত্স্যো নাম রাজাসীদ্ধার্মিকঃ সত্যসংগরঃ
57.52
সাপ্সরা মুক্তশাপা চ ক্ষণেন সমপদ্যত
পুরোক্তা যা ভগবতা তির্যগ্যোনিগতা শুভে
মানুষৌ জনয়িত্বা ত্বং শাপমোক্ষমবাপ্স্যসি
57.53
ততঃ সা জনয়িত্বা তৌ বিশস্তা মত্স্যঘাতিনা
সংত্যজ্য মত্স্যরূপং সা দিব্যং রূপমবাপ্য চ
সিদ্ধর্ষিচারণপথং জগামাথ বরাপ্সরাঃ
57.54
যা কন্যা দুহিতা তস্যা মত্স্যা মত্স্যসগন্ধিনী
রাজ্ঞা দত্তাথ দাশায় ইয়ং তব ভবত্বিতি
রূপসত্ত্বসমায়ুক্তা সর্বৈঃ সমুদিতা গুণৈঃ
57.55
সা তু সত্যবতী নাম মত্স্যঘাত্যভিসংশ্রয়াৎ
আসীন্মত্স্যসগন্ধৈব কংচিত্কালং শুচিস্মিতা
57.56
শুশ্রূষার্থং পিতুর্নাবং তাং তু বাহয়তীং জলে
তীর্থয়াত্রাং পরিক্রামন্নপশ্যদ্বৈ পরাশরঃ
57.57
অতীব রূপসংপন্নাং সিদ্ধানামপি কাঙ্ক্ষিতাম্
দৃষ্ট্বৈব চ স তাং ধীমাংশ্চকমে চারুদর্শনাম্
বিদ্বাংস্তাং বাসবীং কন্যাং কার্যবান্মুনিপুংগবঃ
57.58
সাব্রবীত্পশ্য ভগবন্পারাবারে ঋষীন্স্থিতান্
আবয়োর্দৃশ্যতোরেভিঃ কথং নু স্যাত্সমাগমঃ
57.59
এবং তয়োক্তো ভগবান্নীহারমসৃজত্প্রভুঃ
যেন দেশঃ স সর্বস্তু তমোভূত ইবাভবৎ
57.60
দৃষ্ট্বা সৃষ্টং তু নীহারং ততস্তং পরমর্ষিণা
বিস্মিতা চাব্রবীত্কন্যা ব্রীডিতা চ মনস্বিনী
57.61
বিদ্ধি মাং ভগবন্কন্যাং সদা পিতৃবশানুগাম্
ত্বত্সংয়োগাচ্চ দুষ্যেত কন্যাভাবো মমানঘ
57.62
কন্যাত্বে দূষিতে চাপি কথং শক্ষ্যে দ্বিজোত্তম
গন্তুং গৃহং গৃহে চাহং ধীমন্ন স্থাতুমুত্সহে
এতত্সংচিন্ত্য ভগবন্বিধত্স্ব যদনন্তরম্
57.63
এবমুক্তবতীং তাং তু প্রীতিমানৃষিসত্তমঃ
উবাচ মত্প্রিয়ং কৃত্বা কন্যৈব ত্বং ভবিষ্যসি
57.64
বৃণীষ্ব চ বরং ভীরু যং ত্বমিচ্ছসি ভামিনি
বৃথা হি ন প্রসাদো মে ভূতপূর্বঃ শুচিস্মিতে
57.65
এবমুক্তা বরং বব্রে গাত্রসৌগন্ধ্যমুত্তমম্
স চাস্যৈ ভগবান্প্রাদান্মনসঃ কাঙ্ক্ষিতং প্রভুঃ
57.66
ততো লব্ধবরা প্রীতা স্ত্রীভাবগুণভূষিতা
জগাম সহ সংসর্গমৃষিণাদ্ভুতকর্মণা
57.67
তেন গন্ধবতীত্যেব নামাস্যাঃ প্রথিতং ভুবি
তস্যাস্তু যোজনাদ্গন্ধমাজিঘ্রন্তি নরা ভুবি
57.68
ততো যোজনগন্ধেতি তস্যা নাম পরিশ্রুতম্
পরাশরোঽপি ভগবাঞ্জগাম স্বং নিবেশনম্
57.69
ইতি সত্যবতী হৃষ্টা লব্ধ্বা বরমনুত্তমম্
পরাশরেণ সংয়ুক্তা সদ্যো গর্ভং সুষাব সা
জজ্ঞে চ যমুনাদ্বীপে পারাশর্যঃ স বীর্যবান্
57.70
স মাতরমুপস্থায় তপস্যেব মনো দধে
স্মৃতোঽহং দর্শয়িষ্যামি কৃত্যেষ্বিতি চ সোঽব্রবীৎ
57.71
এবং দ্বৈপায়নো জজ্ঞে সত্যবত্যাং পরাশরাৎ
দ্বীপে ন্যস্তঃ স যদ্বালস্তস্মাদ্দ্বৈপায়নোঽভবৎ
57.72
পাদাপসারিণং ধর্মং বিদ্বান্স তু যুগে যুগে
আয়ুঃ শক্তিং চ মর্ত্যানাং যুগানুগমবেক্ষ্য চ
57.73
ব্রহ্মণো ব্রাহ্মণানাং চ তথানুগ্রহকাম্যয়া
বিব্যাস বেদান্যস্মাচ্চ তস্মাদ্ব্যাস ইতি স্মৃতঃ
57.74
বেদানধ্যাপয়ামাস মহাভারতপঞ্চমান্
সুমন্তুং জৈমিনিং পৈলং শুকং চৈব স্বমাত্মজম্
57.75
প্রভুর্বরিষ্ঠো বরদো বৈশংপায়নমেব চ
সংহিতাস্তৈঃ পৃথক্ত্বেন ভারতস্য প্রকাশিতাঃ
57.76
তথা ভীষ্মঃ শাংতনবো গঙ্গায়ামমিতদ্যুতিঃ
বসুবীর্যাত্সমভবন্মহাবীর্যো মহায়শাঃ
57.77
শূলে প্রোতঃ পুরাণর্ষিরচোরশ্চোরশঙ্কয়া
অণীমাণ্ডব্য ইতি বৈ বিখ্যাতঃ সুমহায়শাঃ
57.78
স ধর্মমাহূয় পুরা মহর্ষিরিদমুক্তবান্
ইষীকয়া ময়া বাল্যাদেকা বিদ্ধা শকুন্তিকা
57.79
তত্কিল্বিষং স্মরে ধর্ম নান্যত্পাপমহং স্মরে
তন্মে সহস্রসমিতং কস্মান্নেহাজয়ত্তপঃ
57.80
গরীয়ান্ব্রাহ্মণবধঃ সর্বভূতবধাদ্যতঃ
তস্মাত্ত্বং কিল্বিষাদস্মাচ্ছূদ্রয়োনৌ জনিষ্যসি
57.81
তেন শাপেন ধর্মোঽপি শূদ্রয়োনাবজায়ত
বিদ্বান্বিদুররূপেণ ধার্মী তনুরকিল্বিষী
57.82
সংজয়ো মুনিকল্পস্তু জজ্ঞে সূতো গবল্গণাৎ
সূর্যাচ্চ কুন্তিকন্যায়াং জজ্ঞে কর্ণো মহারথঃ
সহজং কবচং বিভ্রত্কুণ্ডলোদ্দ্যোতিতাননঃ
57.83
অনুগ্রহার্থং লোকানাং বিষ্ণুর্লোকনমস্কৃতঃ
বসুদেবাত্তু দেবক্যাং প্রাদুর্ভূতো মহায়শাঃ
57.84
অনাদিনিধনো দেবঃ স কর্তা জগতঃ প্রভুঃ
অব্যক্তমক্ষরং ব্রহ্ম প্রধানং নির্গুণাত্মকম্
57.85
আত্মানমব্যয়ং চৈব প্রকৃতিং প্রভবং পরম্
পুরুষং বিশ্বকর্মাণং সত্ত্বয়োগং ধ্রুবাক্ষরম্
57.86
অনন্তমচলং দেবং হংসং নারায়ণং প্রভুম্
ধাতারমজরং নিত্যং তমাহুঃ পরমব্যয়ম্
57.87
পুরুষঃ স বিভুঃ কর্তা সর্বভূতপিতামহঃ
ধর্মসংবর্ধনার্থায় প্রজজ্ঞেঽন্ধকবৃষ্ণিষু
57.88
অস্ত্রজ্ঞৌ তু মহাবীর্যৌ সর্বশস্ত্রবিশারদৌ
সাত্যকিঃ কৃতবর্মা চ নারায়ণমনুব্রতৌ
সত্যকাদ্ধৃদিকাচ্চৈব জজ্ঞাতেঽস্ত্রবিশারদৌ
57.89
ভরদ্বাজস্য চ স্কন্নং দ্রোণ্যাং শুক্রমবর্ধত
মহর্ষেরুগ্রতপসস্তস্মাদ্দ্রোণো ব্যজায়ত
57.90
গৌতমান্মিথুনং জজ্ঞে শরস্তম্বাচ্ছরদ্বতঃ
অশ্বত্থাম্নশ্চ জননী কৃপশ্চৈব মহাবলঃ
অশ্বত্থামা ততো জজ্ঞে দ্রোণাদস্ত্রভৃতাং বরঃ
57.91
তথৈব ধৃষ্টদ্যুম্নোঽপি সাক্ষাদগ্নিসমদ্যুতিঃ
বৈতানে কর্মণি ততে পাবকাত্সমজায়ত
বীরো দ্রোণবিনাশায় ধনুষা সহ বীর্যবান্
57.92
তথৈব বেদ্যাং কৃষ্ণাপি জজ্ঞে তেজস্বিনী শুভা
বিভ্রাজমানা বপুষা বিভ্রতী রূপমুত্তমম্
57.93
প্রহ্রাদশিষ্যো নগ্নজিত্সুবলশ্চাভবত্ততঃ
তস্য প্রজা ধর্মহন্ত্রী জজ্ঞে দেবপ্রকোপনাৎ
57.94
গান্ধাররাজপুত্রোঽভূচ্ছকুনিঃ সৌবলস্তথা
দুর্যোধনস্য মাতা চ জজ্ঞাতেঽর্থবিদাবুভৌ
57.95
কৃষ্ণদ্বৈপায়নাজ্জজ্ঞে ধৃতরাষ্ট্রো জনেশ্বরঃ
ক্ষেত্রে বিচিত্রবীর্যস্য পাণ্ডুশ্চৈব মহাবলঃ
57.96
পাণ্ডোস্তু জজ্ঞিরে পঞ্চ পুত্রা দেবসমাঃ পৃথক্
দ্বয়োঃ স্ত্রিয়োর্গুণজ্যেষ্ঠস্তেষামাসীদ্যুধিষ্ঠিরঃ
57.97
ধর্মাদ্যুধিষ্ঠিরো জজ্ঞে মারুতাত্তু বৃকোদরঃ
ইন্দ্রাদ্ধনংজয়ঃ শ্রীমান্সর্বশস্ত্রভৃতাং বরঃ
57.98
জজ্ঞাতে রূপসংপন্নাবশ্বিভ্যাং তু যমাবুভৌ
নকুলঃ সহদেবশ্চ গুরুশুশ্রূষণে রতৌ
57.99
তথা পুত্রশতং জজ্ঞে ধৃতরাষ্ট্রস্য ধীমতঃ
দুর্যোধনপ্রভৃতয়ো যুয়ুত্সুঃ করণস্তথা
57.100
অভিমন্যুঃ সুভদ্রায়ামর্জুনাদভ্যজায়ত
স্বস্রীয়ো বাসুদেবস্য পৌত্রঃ পাণ্ডোর্মহাত্মনঃ
57.101
পাণ্ডবেভ্যোঽপি পঞ্চভ্যঃ কৃষ্ণায়াং পঞ্চ জজ্ঞিরে
কুমারা রূপসংপন্নাঃ সর্বশস্ত্রবিশারদাঃ
57.102
প্রতিবিন্ধ্যো যুধিষ্ঠিরাত্সুতসোমো বৃকোদরাৎ
অর্জুনাচ্ছ্রুতকীর্তিস্তু শতানীকস্তু নাকুলিঃ
57.103
তথৈব সহদেবাচ্চ শ্রুতসেনঃ প্রতাপবান্
হিডিম্বায়াং চ ভীমেন বনে জজ্ঞে ঘটোত্কচঃ
57.104
শিখণ্ডী দ্রুপদাজ্জজ্ঞে কন্যা পুত্রত্বমাগতা
যাং যক্ষঃ পুরুষং চক্রে স্থূণঃ প্রিয়চিকীর্ষয়া
57.105
কুরূণাং বিগ্রহে তস্মিন্সমাগচ্ছন্বহূন্যথ
রাজ্ঞাং শতসহস্রাণি যোত্স্যমানানি সংয়ুগে
57.106
তেষামপরিমেয়ানি নামধেয়ানি সর্বশঃ
ন শক্যং পরিসংখ্যাতুং বর্ষাণাময়ুতৈরপি
এতে তু কীর্তিতা মুখ্যা যৈরাখ্যানমিদং ততম্