Utshovঅধ্যায় 56
56.1
জনমেজয় উবাচ
কথিতং বৈ সমাসেন ত্বয়া সর্বং দ্বিজোত্তম
মহাভারতমাখ্যানং কুরূণাং চরিতং মহৎ
56.2
কথাং ত্বনঘ চিত্রার্থামিমাং কথয়তি ত্বয়ি
বিস্তরশ্রবণে জাতং কৌতূহলমতীব মে
56.3
স ভবান্বিস্তরেণেমাং পুনরাখ্যাতুমর্হতি
ন হি তৃপ্যামি পূর্বেষাং শৃণ্বানশ্চরিতং মহৎ
56.4
ন তত্কারণমল্পং হি ধর্মজ্ঞা যত্র পাণ্ডবাঃ
অবধ্যান্সর্বশো জঘ্নুঃ প্রশস্যন্তে চ মানবৈঃ
56.5
কিমর্থং তে নরব্যাঘ্রাঃ শক্তাঃ সন্তো হ্যনাগসঃ
প্রয়ুজ্যমানান্সংক্লেশান্ক্ষান্তবন্তো দুরাত্মনাম্
56.6
কথং নাগায়ুতপ্রাণো বাহুশালী বৃকোদরঃ
পরিক্লিশ্যন্নপি ক্রোধং ধৃতবান্বৈ দ্বিজোত্তম
56.7
কথং সা দ্রৌপদী কৃষ্ণা ক্লিশ্যমানা দুরাত্মভিঃ
শক্তা সতী ধার্তরাষ্ট্রান্নাদহদ্ঘোরচক্ষুষা
56.8
কথং ব্যতিক্রমন্দ্যূতে পার্থৌ মাদ্রীসুতৌ তথা
অনুব্রজন্নরব্যাঘ্রং বঞ্চ্যমানং দুরাত্মভিঃ
56.9
কথং ধর্মভৃতাং শ্রেষ্ঠঃ সুতো ধর্মস্য ধর্মবিৎ
অনর্হঃ পরমং ক্লেশং সোঢবান্স যুধিষ্ঠিরঃ
56.10
কথং চ বহুলাঃ সেনাঃ পাণ্ডবঃ কৃষ্ণসারথিঃ
অস্যন্নেকোঽনয়ত্সর্বাঃ পিতৃলোকং ধনংজয়ঃ
56.11
এতদাচক্ষ্ব মে সর্বং যথাবৃত্তং তপোধন
যদ্যচ্চ কৃতবন্তস্তে তত্র তত্র মহারথাঃ
56.12
বৈশংপায়ন উবাচ
মহর্ষেঃ সর্বলোকেষু পূজিতস্য মহাত্মনঃ
প্রবক্ষ্যামি মতং কৃত্স্নং ব্যাসস্যামিততেজসঃ
56.13
ইদং শতসহস্রং হি শ্লোকানাং পুণ্যকর্মণাম্
সত্যবত্যাত্মজেনেহ ব্যাখ্যাতমমিতৌজসা
56.14
য ইদং শ্রাবয়েদ্বিদ্বান্যশ্চেদং শৃণুয়ান্নরঃ
তে ব্রহ্মণঃ স্থানমেত্য প্রাপ্নুয়ুর্দেবতুল্যতাম্
56.15
ইদং হি বেদৈঃ সমিতং পবিত্রমপি চোত্তমম্
শ্রাব্যাণামুত্তমং চেদং পুরাণমৃষিসংস্তুতম্
56.16
অস্মিন্নর্থশ্চ ধর্মশ্চ নিখিলেনোপদিশ্যতে
ইতিহাসে মহাপুণ্যে বুদ্ধিশ্চ পরিনৈষ্ঠিকী
56.17
অক্ষুদ্রান্দানশীলাংশ্চ সত্যশীলাননাস্তিকান্
কার্ষ্ণং বেদমিমং বিদ্বাঞ্শ্রাবয়িত্বার্থমশ্নুতে
56.18
ভ্রূণহত্যাকৃতং চাপি পাপং জহ্যাদসংশয়ম্
ইতিহাসমিমং শ্রুত্বা পুরুষোঽপি সুদারুণঃ
56.19
জয়ো নামেতিহাসোঽয়ং শ্রোতব্যো বিজিগীষুণা
মহীং বিজয়তে সর্বাং শত্রূংশ্চাপি পরাজয়েৎ
56.20
ইদং পুংসবনং শ্রেষ্ঠমিদং স্বস্ত্যয়নং মহৎ
মহিষীয়ুবরাজাভ্যাং শ্রোতব্যং বহুশস্তথা
56.21
অর্থশাস্ত্রমিদং পুণ্যং ধর্মশাস্ত্রমিদং পরম্
মোক্ষশাস্ত্রমিদং প্রোক্তং ব্যাসেনামিতবুদ্ধিনা
56.22
সংপ্রত্যাচক্ষতে চৈব আখ্যাস্যন্তি তথাপরে
পুত্রাঃ শুশ্রূষবঃ সন্তি প্রেষ্যাশ্চ প্রিয়কারিণঃ
56.23
শরীরেণ কৃতং পাপং বাচা চ মনসৈব চ
সর্বং তত্ত্যজতি ক্ষিপ্রমিদং শৃণ্বন্নরঃ সদা
56.24
ভারতানাং মহজ্জন্ম শৃণ্বতামনসূয়তাম্
নাস্তি ব্যাধিভয়ং তেষাং পরলোকভয়ং কুতঃ
56.25
ধন্যং যশস্যমায়ুষ্যং স্বর্গ্যং পুণ্যং তথৈব চ
কৃষ্ণদ্বৈপায়নেনেদং কৃতং পুণ্যচিকীর্ষুণা
56.26
কীর্তিং প্রথয়তা লোকে পাণ্ডবানাং মহাত্মনাম্
অন্যেষাং ক্ষত্রিয়াণাং চ ভূরিদ্রবিণতেজসাম্
56.27
যথা সমুদ্রো ভগবান্যথা চ হিমবান্গিরিঃ
খ্যাতাবুভৌ রত্ননিধী তথা ভারতমুচ্যতে
56.28
য ইদং শ্রাবয়েদ্বিদ্বান্ব্রাহ্মণানিহ পর্বসু
ধূতপাপ্মা জিতস্বর্গো ব্রহ্মভূয়ং স গচ্ছতি
56.29
যশ্চেদং শ্রাবয়েচ্ছ্রাদ্ধে ব্রাহ্মণান্পাদমন্ততঃ
অক্ষয্যং তস্য তচ্ছ্রাদ্ধমুপতিষ্ঠেত্পিতৄনপি
56.30
অহ্না যদেনশ্চাজ্ঞানাত্প্রকরোতি নরশ্চরন্
তন্মহাভারতাখ্যানং শ্রুত্বৈব প্রবিলীয়তে
56.31
ভারতানাং মহজ্জন্ম মহাভারতমুচ্যতে
নিরুক্তমস্য যো বেদ সর্বপাপৈঃ প্রমুচ্যতে
56.32
ত্রিভির্বর্ষৈঃ সদোত্থায়ী কৃষ্ণদ্বৈপায়নো মুনিঃ
মহাভারতমাখ্যানং কৃতবানিদমুত্তমম্
56.33
ধর্মে চার্থে চ কামে চ মোক্ষে চ ভরতর্ষভ
যদিহাস্তি তদন্যত্র যন্নেহাস্তি ন তত্ক্বচিৎ