Utshovঅধ্যায় 55
55.1
বৈশংপায়ন উবাচ
গুরবে প্রাঙ্নমস্কৃত্য মনোবুদ্ধিসমাধিভিঃ
সংপূজ্য চ দ্বিজান্সর্বাংস্তথান্যান্বিদুষো জনান্
55.2
মহর্ষেঃ সর্বলোকেষু বিশ্রুতস্যাস্য ধীমতঃ
প্রবক্ষ্যামি মতং কৃত্স্নং ব্যাসস্যামিততেজসঃ
55.3
শ্রোতুং পাত্রং চ রাজংস্ত্বং প্রাপ্যেমাং ভারতীং কথাম্
গুরোর্বক্তুং পরিস্পন্দো মুদা প্রোত্সাহতীব মাম্
55.4
শৃণু রাজন্যথা ভেদঃ কুরুপাণ্ডবয়োরভূৎ
রাজ্যার্থে দ্যূতসংভূতো বনবাসস্তথৈব চ
55.5
যথা চ যুদ্ধমভবত্পৃথিবীক্ষয়কারকম্
তত্তেঽহং সংপ্রবক্ষ্যামি পৃচ্ছতে ভরতর্ষভ
55.6
মৃতে পিতরি তে বীরা বনাদেত্য স্বমন্দিরম্
নচিরাদিব বিদ্বাংসো বেদে ধনুষি চাভবন্
55.7
তাংস্তথা রূপবীর্যৌজঃসংপন্নান্পৌরসংমতান্
নামৃষ্যন্কুরবো দৃষ্ট্বা পাণ্ডবাঞ্শ্রীয়শোভৃতঃ
55.8
ততো দুর্যোধনঃ ক্রূরঃ কর্ণশ্চ সহসৌবলঃ
তেষাং নিগ্রহনির্বাসান্বিবিধাংস্তে সমাচরন্
55.9
দদাবথ বিষং পাপো ভীমায় ধৃতরাষ্ট্রজঃ
জরয়ামাস তদ্বীরঃ সহান্নেন বৃকোদরঃ
55.10
প্রমাণকোট্যাং সংসুপ্তং পুনর্বদ্ধ্বা বৃকোদরম্
তোয়েষু ভীমং গঙ্গায়াঃ প্রক্ষিপ্য পুরমাব্রজৎ
55.11
যদা প্রবুদ্ধঃ কৌন্তেয়স্তদা সংছিদ্য বন্ধনম্
উদতিষ্ঠন্মহারাজ ভীমসেনো গতব্যথঃ
55.12
আশীবিষৈঃ কৃষ্ণসর্পৈঃ সুপ্তং চৈনমদংশয়ৎ
সর্বেষ্বেবাঙ্গদেশেষু ন মমার চ শত্রুহা
55.13
তেষাং তু বিপ্রকারেষু তেষু তেষু মহামতিঃ
মোক্ষণে প্রতিঘাতে চ বিদুরোঽবহিতোঽভবৎ
55.14
স্বর্গস্থো জীবলোকস্য যথা শক্রঃ সুখাবহঃ
পাণ্ডবানাং তথা নিত্যং বিদুরোঽপি সুখাবহঃ
55.15
যদা তু বিবিধোপায়ৈঃ সংবৃতৈর্বিবৃতৈরপি
নাশক্নোদ্বিনিহন্তুং তান্দৈবভাব্যর্থরক্ষিতান্
55.16
ততঃ সংমন্ত্র্য সচিবৈর্বৃষদুঃশাসনাদিভিঃ
ধৃতরাষ্ট্রমনুজ্ঞাপ্য জাতুষং গৃহমাদিশৎ
55.17
তত্র তান্বাসয়ামাস পাণ্ডবানমিতৌজসঃ
অদাহয়চ্চ বিস্রব্ধান্পাবকেন পুনস্তদা
55.18
বিদুরস্যৈব বচনাত্খনিত্রী বিহিতা ততঃ
মোক্ষয়ামাস যোগেন তে মুক্তাঃ প্রাদ্রবন্ভয়াৎ
55.19
ততো মহাবনে ঘোরে হিডিম্বং নাম রাক্ষসম্
ভীমসেনোঽবধীত্ক্রুদ্ধো ভুবি ভীমপরাক্রমঃ
55.20
অথ সংধায় তে বীরা একচক্রাং ব্রজংস্তদা
ব্রহ্মরূপধরা ভূত্বা মাত্রা সহ পরংতপাঃ
55.21
তত্র তে ব্রাহ্মণার্থায় বকং হত্বা মহাবলম্
ব্রাহ্মণৈঃ সহিতা জগ্মুঃ পাঞ্চালানাং পুরং ততঃ
55.22
তে তত্র দ্রৌপদীং লব্ধ্বা পরিসংবত্সরোষিতাঃ
বিদিতা হাস্তিনপুরং প্রত্যাজগ্মুররিংদমাঃ
55.23
ত উক্তা ধৃতরাষ্ট্রেণ রাজ্ঞা শাংতনবেন চ
ভ্রাতৃভির্বিগ্রহস্তাত কথং বো ন ভবেদিতি
অস্মাভিঃ খাণ্ডবপ্রস্থে যুষ্মদ্বাসোঽনুচিন্তিতঃ
55.24
তস্মাজ্জনপদোপেতং সুবিভক্তমহাপথম্
বাসায় খাণ্ডবপ্রস্থং ব্রজধ্বং গতমন্যবঃ
55.25
তয়োস্তে বচনাজ্জগ্মুঃ সহ সর্বৈঃ সুহৃজ্জনৈঃ
নগরং খাণ্ডবপ্রস্থং রত্নান্যাদায় সর্বশঃ
55.26
তত্র তে ন্যবসন্রাজন্সংবত্সরগণান্বহূন্
বশে শস্ত্রপ্রতাপেন কুর্বন্তোঽন্যান্মহীক্ষিতঃ
55.27
এবং ধর্মপ্রধানাস্তে সত্যব্রতপরায়ণাঃ
অপ্রমত্তোত্থিতাঃ ক্ষান্তাঃ প্রতপন্তোঽহিতাংস্তদা
55.28
অজয়দ্ভীমসেনস্তু দিশং প্রাচীং মহাবলঃ
উদীচীমর্জুনো বীরঃ প্রতীচীং নকুলস্তথা
55.29
দক্ষিণাং সহদেবস্তু বিজিগ্যে পরবীরহা
এবং চক্রুরিমাং সর্বে বশে কৃত্স্নাং বসুংধরাম্
55.30
পঞ্চভিঃ সূর্যসংকাশৈঃ সূর্যেণ চ বিরাজতা
ষট্সূর্যেবাবভৌ পৃথ্বী পাণ্ডবৈঃ সত্যবিক্রমৈঃ
55.31
ততো নিমিত্তে কস্মিংশ্চিদ্ধর্মরাজো যুধিষ্ঠিরঃ
বনং প্রস্থাপয়ামাস ভ্রাতরং বৈ ধনংজয়ম্
55.32
স বৈ সংবত্সরং পূর্ণং মাসং চৈকং বনেঽবসৎ
ততোঽগচ্ছদ্ধৃষীকেশং দ্বারবত্যাং কদাচন
55.33
লব্ধবাংস্তত্র বীভত্সুর্ভার্যাং রাজীবলোচনাম্
অনুজাং বাসুদেবস্য সুভদ্রাং ভদ্রভাষিণীম্
55.34
সা শচীব মহেন্দ্রেণ শ্রীঃ কৃষ্ণেনেব সংগতা
সুভদ্রা যুয়ুজে প্রীতা পাণ্ডবেনার্জুনেন হ
55.35
অতর্পয়চ্চ কৌন্তেয়ঃ খাণ্ডবে হব্যবাহনম্
বীভত্সুর্বাসুদেবেন সহিতো নৃপসত্তম
55.36
নাতিভারো হি পার্থস্য কেশবেনাভবত্সহ
ব্যবসায়সহায়স্য বিষ্ণোঃ শত্রুবধেষ্বিব
55.37
পার্থায়াগ্নির্দদৌ চাপি গাণ্ডীবং ধনুরুত্তমম্
ইষুধী চাক্ষয়ৈর্বাণৈ রথং চ কপিলক্ষণম্
55.38
মোক্ষয়ামাস বীভত্সুর্ময়ং তত্র মহাসুরম্
স চকার সভাং দিব্যাং সর্বরত্নসমাচিতাম্
55.39
তস্যাং দুর্যোধনো মন্দো লোভং চক্রে সুদুর্মতিঃ
ততোঽক্ষৈর্বঞ্চয়িত্বা চ সৌবলেন যুধিষ্ঠিরম্
55.40
বনং প্রস্থাপয়ামাস সপ্ত বর্ষাণি পঞ্চ চ
অজ্ঞাতমেকং রাষ্ট্রে চ তথা বর্ষং ত্রয়োদশম্
55.41
ততশ্চতুর্দশে বর্ষে যাচমানাঃ স্বকং বসু
নালভন্ত মহারাজ ততো যুদ্ধমবর্তত
55.42
ততস্তে সর্বমুত্সাদ্য হত্বা দুর্যোধনং নৃপম্
রাজ্যং বিদ্রুতভূয়িষ্ঠং প্রত্যপদ্যন্ত পাণ্ডবাঃ
55.43
এবমেতত্পুরাবৃত্তং তেষামক্লিষ্টকর্মণাম্
ভেদো রাজ্যবিনাশশ্চ জয়শ্চ জয়তাং বর