অধ্যায় 54

54.1

সূত উবাচ
শ্রুত্বা তু সর্পসত্রায় দীক্ষিতং জনমেজয়ম্
অভ্যাগচ্ছদৃষির্বিদ্বান্কৃষ্ণদ্বৈপায়নস্তদা

54.2

জনয়ামাস যং কালী শক্তেঃ পুত্রাত্পরাশরাৎ
কন্যৈব যমুনাদ্বীপে পাণ্ডবানাং পিতামহম্

54.3

জাতমাত্রশ্চ যঃ সদ্য ইষ্ট্যা দেহমবীবৃধৎ
বেদাংশ্চাধিজগে সাঙ্গান্সেতিহাসান্মহায়শাঃ

54.4

যং নাতিতপসা কশ্চিন্ন বেদাধ্যয়নেন চ
ন ব্রতৈর্নোপবাসৈশ্চ ন প্রসূত্যা ন মন্যুনা

54.5

বিব্যাসৈকং চতুর্ধা যো বেদং বেদবিদাং বরঃ
পরাবরজ্ঞো ব্রহ্মর্ষিঃ কবিঃ সত্যব্রতঃ শুচিঃ

54.6

যঃ পাণ্ডুং ধৃতরাষ্ট্রং চ বিদুরং চাপ্যজীজনৎ
শংতনোঃ সংততিং তন্বন্পুণ্যকীর্তির্মহায়শাঃ

54.7

জনমেজয়স্য রাজর্ষেঃ স তদ্যজ্ঞসদস্তদা
বিবেশ শিষ্যৈঃ সহিতো বেদবেদাঙ্গপারগৈঃ

54.8

তত্র রাজানমাসীনং দদর্শ জনমেজয়ম্
বৃতং সদস্যৈর্বহুভির্দেবৈরিব পুরংদরম্

54.9

তথা মূর্ধাবসিক্তৈশ্চ নানাজনপদেশ্বরৈঃ
ঋত্বিগ্ভির্দেবকল্পৈশ্চ কুশলৈর্যজ্ঞসংস্তরে

54.10

জনমেজয়স্তু রাজর্ষির্দৃষ্ট্বা তমৃষিমাগতম্
সগণোঽভ্যুদ্যয়ৌ তূর্ণং প্রীত্যা ভরতসত্তমঃ

54.11

কাঞ্চনং বিষ্টরং তস্মৈ সদস্যানুমতে প্রভুঃ
আসনং কল্পয়ামাস যথা শক্রো বৃহস্পতেঃ

54.12

তত্রোপবিষ্টং বরদং দেবর্ষিগণপূজিতম্
পূজয়ামাস রাজেন্দ্রঃ শাস্ত্রদৃষ্টেন কর্মণা

54.13

পাদ্যমাচমনীয়ং চ অর্ঘ্যং গাং চ বিধানতঃ
পিতামহায় কৃষ্ণায় তদর্হায় ন্যবেদয়ৎ

54.14

প্রতিগৃহ্য চ তাং পূজাং পাণ্ডবাজ্জনমেজয়াৎ
গাং চৈব সমনুজ্ঞায় ব্যাসঃ প্রীতোঽভবত্তদা

54.15

তথা সংপূজয়িত্বা তং যত্নেন প্রপিতামহম্
উপোপবিশ্য প্রীতাত্মা পর্যপৃচ্ছদনাময়ম্

54.16

ভগবানপি তং দৃষ্ট্বা কুশলং প্রতিবেদ্য চ
সদস্যৈঃ পূজিতঃ সর্বৈঃ সদস্যানভ্যপূজয়ৎ

54.17

ততস্তং সত্কৃতং সর্বৈঃ সদস্যৈর্জনমেজয়ঃ
ইদং পশ্চাদ্দ্বিজশ্রেষ্ঠং পর্যপৃচ্ছত্কৃতাঞ্জলিঃ

54.18

কুরূণাং পাণ্ডবানাং চ ভবান্প্রত্যক্ষদর্শিবান্
তেষাং চরিতমিচ্ছামি কথ্যমানং ত্বয়া দ্বিজ

54.19

কথং সমভবদ্ভেদস্তেষামক্লিষ্টকর্মণাম্
তচ্চ যুদ্ধং কথং বৃত্তং ভূতান্তকরণং মহৎ

54.20

পিতামহানাং সর্বেষাং দৈবেনাবিষ্টচেতসাম্
কার্ত্স্ন্যেনৈতত্সমাচক্ষ্ব ভগবন্কুশলো হ্যসি

54.21

তস্য তদ্বচনং শ্রুত্বা কৃষ্ণদ্বৈপায়নস্তদা
শশাস শিষ্যমাসীনং বৈশংপায়নমন্তিকে

54.22

কুরূণাং পাণ্ডবানাং চ যথা ভেদোঽভবত্পুরা
তদস্মৈ সর্বমাচক্ষ্ব যন্মত্তঃ শ্রুতবানসি

54.23

গুরোর্বচনমাজ্ঞায় স তু বিপ্রর্ষভস্তদা
আচচক্ষে ততঃ সর্বমিতিহাসং পুরাতনম্

54.24

তস্মৈ রাজ্ঞে সদস্যেভ্যঃ ক্ষত্রিয়েভ্যশ্চ সর্বশঃ
ভেদং রাজ্যবিনাশং চ কুরুপাণ্ডবয়োস্তদা

Contains text from DharmicData, made available under the Open Database License (ODbL). Simple meanings are written by AI and can contain mistakes.