Utshovঅধ্যায় 53
53.1
সূত উবাচ
ইদমত্যদ্ভুতং চান্যদাস্তীকস্যানুশুশ্রুমঃ
তথা বরৈশ্ছন্দ্যমানে রাজ্ঞা পারিক্ষিতেন হ
53.2
ইন্দ্রহস্তাচ্চ্যুতো নাগঃ খ এব যদতিষ্ঠত
ততশ্চিন্তাপরো রাজা বভূব জনমেজয়ঃ
53.3
হূয়মানে ভৃশং দীপ্তে বিধিবত্পাবকে তদা
ন স্ম স প্রাপতদ্বহ্নৌ তক্ষকো ভয়পীডিতঃ
53.4
শৌনক উবাচ
কিং সূত তেষাং বিপ্রাণাং মন্ত্রগ্রামো মনীষিণাম্
ন প্রত্যভাত্তদাগ্নৌ যন্ন পপাত স তক্ষকঃ
53.5
সূত উবাচ
তমিন্দ্রহস্তাদ্বিস্রস্তং বিসংজ্ঞং পন্নগোত্তমম্
আস্তীকস্তিষ্ঠ তিষ্ঠেতি বাচস্তিস্রোঽভ্যুদৈরয়ৎ
53.6
বিতস্থে সোঽন্তরিক্ষেঽথ হৃদয়েন বিদূয়তা
যথা তিষ্ঠেত বৈ কশ্চিদ্গোচক্রস্যান্তরা নরঃ
53.7
ততো রাজাব্রবীদ্বাক্যং সদস্যৈশ্চোদিতো ভৃশম্
কামমেতদ্ভবত্বেবং যথাস্তীকস্য ভাষিতম্
53.8
সমাপ্যতামিদং কর্ম পন্নগাঃ সন্ত্বনাময়াঃ
প্রীয়তাময়মাস্তীকঃ সত্যং সূতবচোঽস্তু তৎ
53.9
ততো হলহলাশব্দঃ প্রীতিজঃ সমবর্তত
আস্তীকস্য বরে দত্তে তথৈবোপররাম চ
53.10
স যজ্ঞঃ পাণ্ডবেয়স্য রাজ্ঞঃ পারিক্ষিতস্য হ
প্রীতিমাংশ্চাভবদ্রাজা ভারতো জনমেজয়ঃ
53.11
ঋত্বিগ্ভ্যঃ সসদস্যেভ্যো যে তত্রাসন্সমাগতাঃ
তেভ্যশ্চ প্রদদৌ বিত্তং শতশোঽথ সহস্রশঃ
53.12
লোহিতাক্ষায় সূতায় তথা স্থপতয়ে বিভুঃ
যেনোক্তং তত্র সত্রাগ্রে যজ্ঞস্য বিনিবর্তনম্
53.13
নিমিত্তং ব্রাহ্মণ ইতি তস্মৈ বিত্তং দদৌ বহু
ততশ্চকারাবভৃথং বিধিদৃষ্টেন কর্মণা
53.14
আস্তীকং প্রেষয়ামাস গৃহানেব সুসত্কৃতম্
রাজা প্রীতমনাঃ প্রীতং কৃতকৃত্যং মনীষিণম্
53.15
পুনরাগমনং কার্যমিতি চৈনং বচোঽব্রবীৎ
ভবিষ্যসি সদস্যো মে বাজিমেধে মহাক্রতৌ
53.16
তথেত্যুক্ত্বা প্রদুদ্রাব স চাস্তীকো মুদা যুতঃ
কৃত্বা স্বকার্যমতুলং তোষয়িত্বা চ পার্থিবম্
53.17
স গত্বা পরমপ্রীতো মাতরং মাতুলং চ তম্
অভিগম্যোপসংগৃহ্য যথাবৃত্তং ন্যবেদয়ৎ
53.18
এতচ্ছ্রুত্বা প্রীয়মাণাঃ সমেতা; যে তত্রাসন্পন্নগা বীতমোহাঃ
তেঽঽস্তীকে বৈ প্রীতিমন্তো বভূবু;রূচুশ্চৈনং বরমিষ্টং বৃণীষ্ব
53.19
ভূয়ো ভূয়ঃ সর্বশস্তেঽব্রুবংস্তং; কিং তে প্রিয়ং করবামোঽদ্য বিদ্বন্
প্রীতা বয়ং মোক্ষিতাশ্চৈব সর্বে; কামং কিং তে করবামোঽদ্য বত্স
53.20
আস্তীক উবাচ
সায়ং প্রাতঃ সুপ্রসন্নাত্মরূপা; লোকে বিপ্রা মানবাশ্চেতরেঽপি
ধর্মাখ্যানং যে বদেয়ুর্মমেদং; তেষাং যুষ্মদ্ভ্যো নৈব কিংচিদ্ভয়ং স্যাৎ
53.21
সূত উবাচ
তৈশ্চাপ্যুক্তো ভাগিনেয়ঃ প্রসন্নৈ;রেতত্সত্যং কামমেবং চরন্তঃ
প্রীত্যা যুক্তা ঈপ্সিতং সর্বশস্তে; কর্তারঃ স্ম প্রবণা ভাগিনেয়
53.22
জরত্কারোর্জরত্কার্বাং সমুত্পন্নো মহায়শাঃ
আস্তীকঃ সত্যসংধো মাং পন্নগেভ্যোঽভিরক্ষতু
53.23
অসিতং চার্তিমন্তং চ সুনীথং চাপি যঃ স্মরেৎ
দিবা বা যদি বা রাত্রৌ নাস্য সর্পভয়ং ভবেৎ
53.24
সূত উবাচ
মোক্ষয়িত্বা স ভুজগান্সর্পসত্রাদ্দ্বিজোত্তমঃ
জগাম কালে ধর্মাত্মা দিষ্টান্তং পুত্রপৌত্রবান্
53.25
ইত্যাখ্যানং ময়াস্তীকং যথাবত্কীর্তিতং তব
যত্কীর্তয়িত্বা সর্পেভ্যো ন ভয়ং বিদ্যতে ক্বচিৎ
53.26
শ্রুত্বা ধর্মিষ্ঠমাখ্যানমাস্তীকং পুণ্যবর্ধনম্
আস্তীকস্য কবের্বিপ্র শ্রীমচ্চরিতমাদিতঃ
53.27
শৌনক উবাচ
ভৃগুবংশাত্প্রভৃত্যেব ত্বয়া মে কথিতং মহৎ
আখ্যানমখিলং তাত সৌতে প্রীতোঽস্মি তেন তে
53.28
প্রক্ষ্যামি চৈব ভূয়স্ত্বাং যথাবত্সূতনন্দন
যাং কথাং ব্যাসসংপন্নাং তাং চ ভূয়ঃ প্রচক্ষ্ব মে
53.29
তস্মিন্পরমদুষ্প্রাপে সর্পসত্রে মহাত্মনাম্
কর্মান্তরেষু বিধিবত্সদস্যানাং মহাকবে
53.30
যা বভূবুঃ কথাশ্চিত্রা যেষ্বর্থেষু যথাতথম্
ত্বত্ত ইচ্ছামহে শ্রোতুং সৌতে ত্বং বৈ বিচক্ষণঃ
53.31
সূত উবাচ
কর্মান্তরেষ্বকথয়ন্দ্বিজা বেদাশ্রয়াঃ কথাঃ
ব্যাসস্ত্বকথয়ন্নিত্যমাখ্যানং ভারতং মহৎ
53.32
শৌনক উবাচ
মহাভারতমাখ্যানং পাণ্ডবানাং যশস্করম্
জনমেজয়েন যত্পৃষ্টঃ কৃষ্ণদ্বৈপায়নস্তদা
53.33
শ্রাবয়ামাস বিধিবত্তদা কর্মান্তরেষু সঃ
তামহং বিধিবত্পুণ্যাং শ্রোতুমিচ্ছামি বৈ কথাম্
53.34
মনঃসাগরসংভূতাং মহর্ষেঃ পুণ্যকর্মণঃ
কথয়স্ব সতাং শ্রেষ্ঠ ন হি তৃপ্যামি সূতজ
53.35
সূত উবাচ
হন্ত তে কথয়িষ্যামি মহদাখ্যানমুত্তমম্
কৃষ্ণদ্বৈপায়নমতং মহাভারতমাদিতঃ
53.36
তজ্জুষস্বোত্তমমতে কথ্যমানং ময়া দ্বিজ
শংসিতুং তন্মনোহর্ষো মমাপীহ প্রবর্ততে