অধ্যায় 52

52.1

শৌনক উবাচ
যে সর্পাঃ সর্পসত্রেঽস্মিন্পতিতা হব্যবাহনে
তেষাং নামানি সর্বেষাং শ্রোতুমিচ্ছামি সূতজ

সূত উবাচ
সহস্রাণি বহূন্যস্মিন্প্রয়ুতান্যর্বুদানি চ
ন শক্যং পরিসংখ্যাতুং বহুত্বাদ্বেদবিত্তম

যথাস্মৃতি তু নামানি পন্নগানাং নিবোধ মে
উচ্যমানানি মুখ্যানাং হুতানাং জাতবেদসি

বাসুকেঃ কুলজাংস্তাবত্প্রাধান্যেন নিবোধ মে
নীলরক্তান্সিতান্ঘোরান্মহাকায়ান্বিষোল্বণান্

কোটিকো মানসঃ পূর্ণঃ সহঃ পৈলো হলীসকঃ
পিচ্ছিলঃ কোণপশ্চক্রঃ কোণবেগঃ প্রকালনঃ

হিরণ্যবাহঃ শরণঃ কক্ষকঃ কালদন্তকঃ
এতে বাসুকিজা নাগাঃ প্রবিষ্টা হব্যবাহনম্

তক্ষকস্য কুলে জাতান্প্রবক্ষ্যামি নিবোধ তান্
পুচ্ছণ্ডকো মণ্ডলকঃ পিণ্ডভেত্তা রভেণকঃ

উচ্ছিখঃ সুরসো দ্রঙ্গো বলহেডো বিরোহণঃ
শিলীশলকরো মূকঃ সুকুমারঃ প্রবেপনঃ

মুদ্গরঃ শশরোমা চ সুমনা বেগবাহনঃ
এতে তক্ষকজা নাগাঃ প্রবিষ্টা হব্যবাহনম্

পারাবতঃ পারিয়াত্রঃ পাণ্ডরো হরিণঃ কৃশঃ
বিহংগঃ শরভো মোদঃ প্রমোদঃ সংহতাঙ্গদঃ

ঐরাবতকুলাদেতে প্রবিষ্টা হব্যবাহনম্
কৌরব্যকুলজান্নাগাঞ্শৃণু মে দ্বিজসত্তম

ঐণ্ডিলঃ কুণ্ডলো মুণ্ডো বেণিস্কন্ধঃ কুমারকঃ
বাহুকঃ শৃঙ্গবেগশ্চ ধূর্তকঃ পাতপাতরৌ

ধৃতরাষ্ট্রকুলে জাতাঞ্শৃণু নাগান্যথাতথম্
কীর্ত্যমানান্ময়া ব্রহ্মন্বাতবেগান্বিষোল্বণান্

শঙ্কুকর্ণঃ পিঙ্গলকঃ কুঠারমুখমেচকৌ
পূর্ণাঙ্গদঃ পূর্ণমুখঃ প্রহসঃ শকুনির্হরিঃ

আমাহঠঃ কোমঠকঃ শ্বসনো মানবো বটঃ
ভৈরবো মুণ্ডবেদাঙ্গঃ পিশঙ্গশ্চোদ্রপারগঃ

ঋষভো বেগবান্নাম পিণ্ডারকমহাহনূ
রক্তাঙ্গঃ সর্বসারঙ্গঃ সমৃদ্ধঃ পাটরাক্ষসৌ

বরাহকো বারণকঃ সুমিত্রশ্চিত্রবেদিকঃ
পরাশরস্তরুণকো মণিস্কন্ধস্তথারুণিঃ

ইতি নাগা ময়া ব্রহ্মন্কীর্তিতাঃ কীর্তিবর্ধনাঃ
প্রাধান্যেন বহুত্বাত্তু ন সর্বে পরিকীর্তিতাঃ

এতেষাং পুত্রপৌত্রাস্তু প্রসবস্য চ সংততিঃ
ন শক্যাঃ পরিসংখ্যাতুং যে দীপ্তং পাবকং গতাঃ

সপ্তশীর্ষা দ্বিশীর্ষাশ্চ পঞ্চশীর্ষাস্তথাপরে
কালানলবিষা ঘোরা হুতাঃ শতসহস্রশঃ

মহাকায়া মহাবীর্যাঃ শৈলশৃঙ্গসমুচ্ছ্রয়াঃ
যোজনায়ামবিস্তারা দ্বিয়োজনসমায়তাঃ

কামরূপাঃ কামগমা দীপ্তানলবিষোল্বণাঃ
দগ্ধাস্তত্র মহাসত্রে ব্রহ্মদণ্ডনিপীডিতাঃ