অধ্যায় 51

51.1

জনমেজয় উবাচ
বালো বাক্যং স্থবির ইব প্রভাষতে; নায়ং বালঃ স্থবিরোঽয়ং মতো মে
ইচ্ছাম্যহং বরমস্মৈ প্রদাতুং; তন্মে বিপ্রা বিতরধ্বং সমেতাঃ

সদস্যা ঊচুঃ
বালোঽপি বিপ্রো মান্য এবেহ রাজ্ঞাং; যশ্চাবিদ্বান্যশ্চ বিদ্বান্যথাবৎ
সর্বান্কামাংস্ত্বত্ত এষোঽর্হতেঽদ্য; যথা চ নস্তক্ষক এতি শীঘ্রম্

সূত উবাচ
ব্যাহর্তুকামে বরদে নৃপে দ্বিজং; বরং বৃণীষ্বেতি ততোঽভ্যুবাচ
হোতা বাক্যং নাতিহৃষ্টান্তরাত্মা; কর্মণ্যস্মিংস্তক্ষকো নৈতি তাবৎ

জনমেজয় উবাচ
যথা চেদং কর্ম সমাপ্যতে মে; যথা চ নস্তক্ষক এতি শীঘ্রম্
তথা ভবন্তঃ প্রয়তন্তু সর্বে; পরং শক্ত্যা স হি মে বিদ্বিষাণঃ

ঋত্বিজ ঊচুঃ
যথা শাস্ত্রাণি নঃ প্রাহুর্যথা শংসতি পাবকঃ
ইন্দ্রস্য ভবনে রাজংস্তক্ষকো ভয়পীডিতঃ

সূত উবাচ
যথা সূতো লোহিতাক্ষো মহাত্মা; পৌরাণিকো বেদিতবান্পুরস্তাৎ
স রাজানং প্রাহ পৃষ্টস্তদানীং; যথাহুর্বিপ্রাস্তদ্বদেতন্নৃদেব

পুরাণমাগম্য ততো ব্রবীম্যহং; দত্তং তস্মৈ বরমিন্দ্রেণ রাজন্
বসেহ ত্বং মত্সকাশে সুগুপ্তো; ন পাবকস্ত্বাং প্রদহিষ্যতীতি

এতচ্ছ্রুত্বা দীক্ষিতস্তপ্যমান; আস্তে হোতারং চোদয়ন্কর্মকালে
হোতা চ যত্তঃ স জুহাব মন্ত্রৈ;রথো ইন্দ্রঃ স্বয়মেবাজগাম

বিমানমারুহ্য মহানুভাবঃ; সর্বৈর্দেবৈঃ পরিসংস্তূয়মানঃ
বলাহকৈশ্চাপ্যনুগম্যমানো; বিদ্যাধরৈরপ্সরসাং গণৈশ্চ

তস্যোত্তরীয়ে নিহিতঃ স নাগো; ভয়োদ্বিগ্নঃ শর্ম নৈবাভ্যগচ্ছৎ
ততো রাজা মন্ত্রবিদোঽব্রবীত্পুনঃ; ক্রুদ্ধো বাক্যং তক্ষকস্যান্তমিচ্ছন্

ইন্দ্রস্য ভবনে বিপ্রা যদি নাগঃ স তক্ষকঃ
তমিন্দ্রেণৈব সহিতং পাতয়ধ্বং বিভাবসৌ

ঋত্বিজ ঊচুঃ
অয়মায়াতি বৈ তূর্ণং তক্ষকস্তে বশং নৃপ
শ্রূয়তেঽস্য মহান্নাদো রুবতো ভৈরবং ভয়াৎ

নূনং মুক্তো বজ্রভৃতা স নাগো; ভ্রষ্টশ্চাঙ্কান্মন্ত্রবিস্রস্তকায়ঃ
ঘূর্ণন্নাকাশে নষ্টসংজ্ঞোঽভ্যুপৈতি; তীব্রান্নিঃশ্বাসান্নিঃশ্বসন্পন্নগেন্দ্রঃ

বর্ততে তব রাজেন্দ্র কর্মৈতদ্বিধিবত্প্রভো
অস্মৈ তু দ্বিজমুখ্যায় বরং ত্বং দাতুমর্হসি

জনমেজয় উবাচ
বালাভিরূপস্য তবাপ্রমেয়; বরং প্রয়চ্ছামি যথানুরূপম্
বৃণীষ্ব যত্তেঽভিমতং হৃদি স্থিতং; তত্তে প্রদাস্যাম্যপি চেদদেয়ম্

সূত উবাচ
পতিষ্যমাণে নাগেন্দ্রে তক্ষকে জাতবেদসি
ইদমন্তরমিত্যেবং তদাস্তীকোঽভ্যচোদয়ৎ

বরং দদাসি চেন্মহ্যং বৃণোমি জনমেজয়
সত্রং তে বিরমত্বেতন্ন পতেয়ুরিহোরগাঃ

এবমুক্তস্ততো রাজা ব্রহ্মন্পারিক্ষিতস্তদা
নাতিহৃষ্টমনা বাক্যমাস্তীকমিদমব্রবীৎ

সুবর্ণং রজতং গাশ্চ যচ্চান্যন্মন্যসে বিভো
তত্তে দদ্যাং বরং বিপ্র ন নিবর্তেত্ক্রতুর্মম

আস্তীক উবাচ
সুবর্ণং রজতং গাশ্চ ন ত্বাং রাজন্বৃণোম্যহম্
সত্রং তে বিরমত্বেতত্স্বস্তি মাতৃকুলস্য নঃ

সূত উবাচ
আস্তীকেনৈবমুক্তস্তু রাজা পারিক্ষিতস্তদা
পুনঃ পুনরুবাচেদমাস্তীকং বদতাং বরম্

অন্যং বরয় ভদ্রং তে বরং দ্বিজবরোত্তম
অয়াচত ন চাপ্যন্যং বরং স ভৃগুনন্দন

ততো বেদবিদস্তত্র সদস্যাঃ সর্ব এব তম্
রাজানমূচুঃ সহিতা লভতাং ব্রাহ্মণো বরম্