Utshovঅধ্যায় 50
50.1
আস্তীক উবাচ
সোমস্য যজ্ঞো বরুণস্য যজ্ঞঃ; প্রজাপতের্যজ্ঞ আসীত্প্রয়াগে
তথা যজ্ঞোঽয়ং তব ভারতাগ্র্য; পারিক্ষিত স্বস্তি নোঽস্তু প্রিয়েভ্যঃ
50.2
শক্রস্য যজ্ঞঃ শতসংখ্য উক্ত;স্তথাপরস্তুল্যসংখ্যঃ শতং বৈ
তথা যজ্ঞোঽয়ং তব ভারতাগ্র্য; পারিক্ষিত স্বস্তি নোঽস্তু প্রিয়েভ্যঃ
50.3
যমস্য যজ্ঞো হরিমেধসশ্চ; যথা যজ্ঞো রন্তিদেবস্য রাজ্ঞঃ
তথা যজ্ঞোঽয়ং তব ভারতাগ্র্য; পারিক্ষিত স্বস্তি নোঽস্তু প্রিয়েভ্যঃ
50.4
গয়স্য যজ্ঞঃ শশবিন্দোশ্চ রাজ্ঞো; যজ্ঞস্তথা বৈশ্রবণস্য রাজ্ঞঃ
তথা যজ্ঞোঽয়ং তব ভারতাগ্র্য; পারিক্ষিত স্বস্তি নোঽস্তু প্রিয়েভ্যঃ
50.5
নৃগস্য যজ্ঞস্ত্বজমীঢস্য চাসী;দ্যথা যজ্ঞো দাশরথেশ্চ রাজ্ঞঃ
তথা যজ্ঞোঽয়ং তব ভারতাগ্র্য; পারিক্ষিত স্বস্তি নোঽস্তু প্রিয়েভ্যঃ
50.6
যজ্ঞঃ শ্রুতো নো দিবি দেবসূনো;র্যুধিষ্ঠিরস্যাজমীঢস্য রাজ্ঞঃ
তথা যজ্ঞোঽয়ং তব ভারতাগ্র্য; পারিক্ষিত স্বস্তি নোঽস্তু প্রিয়েভ্যঃ
50.7
কৃষ্ণস্য যজ্ঞঃ সত্যবত্যাঃ সুতস্য; স্বয়ং চ কর্ম প্রচকার যত্র
তথা যজ্ঞোঽয়ং তব ভারতাগ্র্য; পারিক্ষিত স্বস্তি নোঽস্তু প্রিয়েভ্যঃ
50.8
ইমে হি তে সূর্যহুতাশবর্চসঃ; সমাসতে বৃত্রহণঃ ক্রতুং যথা
নৈষাং জ্ঞানং বিদ্যতে জ্ঞাতুমদ্য; দত্তং যেভ্যো ন প্রণশ্যেত্কথংচিৎ
50.9
ঋত্বিক্সমো নাস্তি লোকেষু চৈব; দ্বৈপায়নেনেতি বিনিশ্চিতং মে
এতস্য শিষ্যা হি ক্ষিতিং চরন্তি; সর্বর্ত্বিজঃ কর্মসু স্বেষু দক্ষাঃ
50.10
বিভাবসুশ্চিত্রভানুর্মহাত্মা; হিরণ্যরেতা বিশ্বভুক্কৃষ্ণবর্ত্মা
প্রদক্ষিণাবর্তশিখঃ প্রদীপ্তো; হব্যং তবেদং হুতভুগ্বষ্টি দেবঃ
50.11
নেহ ত্বদন্যো বিদ্যতে জীবলোকে; সমো নৃপঃ পালয়িতা প্রজানাম্
ধৃত্যা চ তে প্রীতমনাঃ সদাহং; ত্বং বা রাজা ধর্মরাজো যমো বা
50.12
শক্রঃ সাক্ষাদ্বজ্রপাণির্যথেহ; ত্রাতা লোকেঽস্মিংস্ত্বং তথেহ প্রজানাম্
মতস্ত্বং নঃ পুরুষেন্দ্রেহ লোকে; ন চ ত্বদন্যো গৃহপতিরস্তি যজ্ঞে
50.13
খট্বাঙ্গনাভাগদিলীপকল্পো; যয়াতিমান্ধাতৃসমপ্রভাবঃ
আদিত্যতেজঃপ্রতিমানতেজা; ভীষ্মো যথা ভ্রাজসি সুব্রতস্ত্বম্
50.14
বাল্মীকিবত্তে নিভৃতং সুধৈর্যং; বসিষ্ঠবত্তে নিয়তশ্চ কোপঃ
প্রভুত্বমিন্দ্রেণ সমং মতং মে; দ্যুতিশ্চ নারায়ণবদ্বিভাতি
50.15
যমো যথা ধর্মবিনিশ্চয়জ্ঞঃ; কৃষ্ণো যথা সর্বগুণোপপন্নঃ
শ্রিয়াং নিবাসোঽসি যথা বসূনাং; নিধানভূতোঽসি তথা ক্রতূনাম্
50.16
দম্ভোদ্ভবেনাসি সমো বলেন; রামো যথা শস্ত্রবিদস্ত্রবিচ্চ
ঔর্বত্রিতাভ্যামসি তুল্যতেজা; দুষ্প্রেক্ষণীয়োঽসি ভগীরথো বা
50.17
সূত উবাচ
এবং স্তুতাঃ সর্ব এব প্রসন্না; রাজা সদস্যা ঋত্বিজো হব্যবাহঃ
তেষাং দৃষ্ট্বা ভাবিতানীঙ্গিতানি; প্রোবাচ রাজা জনমেজয়োঽথ