Utshovঅধ্যায় 49
49.1
সূত উবাচ
তত আহূয় পুত্রং স্বং জরত্কারুর্ভুজংগমা
বাসুকের্নাগরাজস্য বচনাদিদমব্রবীৎ
49.2
অহং তব পিতুঃ পুত্র ভ্রাত্রা দত্তা নিমিত্ততঃ
কালঃ স চায়ং সংপ্রাপ্তস্তত্কুরুষ্ব যথাতথম্
49.3
আস্তীক উবাচ
কিংনিমিত্তং মম পিতুর্দত্তা ত্বং মাতুলেন মে
তন্মমাচক্ষ্ব তত্ত্বেন শ্রুত্বা কর্তাস্মি তত্তথা
49.4
সূত উবাচ
তত আচষ্ট সা তস্মৈ বান্ধবানাং হিতৈষিণী
ভগিনী নাগরাজস্য জরত্কারুরবিক্লবা
49.5
ভুজগানামশেষাণাং মাতা কদ্রূরিতি শ্রুতিঃ
তয়া শপ্তা রুষিতয়া সুতা যস্মান্নিবোধ তৎ
49.6
উচ্চৈঃশ্রবাঃ সোঽশ্বরাজো যন্মিথ্যা ন কৃতো মম
বিনতানিমিত্তং পণিতে দাসভাবায় পুত্রকাঃ
49.7
জনমেজয়স্য বো যজ্ঞে ধক্ষ্যত্যনিলসারথিঃ
তত্র পঞ্চত্বমাপন্নাঃ প্রেতলোকং গমিষ্যথ
49.8
তাং চ শপ্তবতীমেবং সাক্ষাল্লোকপিতামহঃ
এবমস্ত্বিতি তদ্বাক্যং প্রোবাচানুমুমোদ চ
49.9
বাসুকিশ্চাপি তচ্ছ্রুত্বা পিতামহবচস্তদা
অমৃতে মথিতে তাত দেবাঞ্শরণমীয়িবান্
49.10
সিদ্ধার্থাশ্চ সুরাঃ সর্বে প্রাপ্যামৃতমনুত্তমম্
ভ্রাতরং মে পুরস্কৃত্য প্রজাপতিমুপাগমন্
49.11
তে তং প্রসাদয়ামাসুর্দেবাঃ সর্বে পিতামহম্
রাজ্ঞা বাসুকিনা সার্ধং স শাপো ন ভবেদিতি
49.12
বাসুকির্নাগরাজোঽয়ং দুঃখিতো জ্ঞাতিকারণাৎ
অভিশাপঃ স মাত্রাস্য ভগবন্ন ভবেদিতি
49.13
ব্রহ্মোবাচ
জরত্কারুর্জরত্কারুং যাং ভার্যাং সমবাপ্স্যতি
তত্র জাতো দ্বিজঃ শাপাদ্ভুজগান্মোক্ষয়িষ্যতি
49.14
জরত্কারুরুবাচ
এতচ্ছ্রুত্বা তু বচনং বাসুকিঃ পন্নগেশ্বরঃ
প্রাদান্মামমরপ্রখ্য তব পিত্রে মহাত্মনে
প্রাগেবানাগতে কালে তত্র ত্বং ময্যজায়থাঃ
49.15
অয়ং স কালঃ সংপ্রাপ্তো ভয়ান্নস্ত্রাতুমর্হসি
ভ্রাতরং চৈব মে তস্মাত্ত্রাতুমর্হসি পাবকাৎ
49.16
অমোঘং নঃ কৃতং তত্স্যাদ্যদহং তব ধীমতে
পিত্রে দত্তা বিমোক্ষার্থং কথং বা পুত্র মন্যসে
49.17
সূত উবাচ
এবমুক্তস্তথেত্যুক্ত্বা সোঽস্তীকো মাতরং তদা
অব্রবীদ্দুঃখসংতপ্তং বাসুকিং জীবয়ন্নিব
49.18
অহং ত্বাং মোক্ষয়িষ্যামি বাসুকে পন্নগোত্তম
তস্মাচ্ছাপান্মহাসত্ত্ব সত্যমেতদ্ব্রবীমি তে
49.19
ভব স্বস্থমনা নাগ ন হি তে বিদ্যতে ভয়ম্
প্রয়তিষ্যে তথা সৌম্য যথা শ্রেয়ো ভবিষ্যতি
ন মে বাগনৃতং প্রাহ স্বৈরেষ্বপি কুতোঽন্যথা
49.20
তং বৈ নৃপবরং গত্বা দীক্ষিতং জনমেজয়ম্
বাগ্ভির্মঙ্গলয়ুক্তাভিস্তোষয়িষ্যেঽদ্য মাতুল
যথা স যজ্ঞো নৃপতের্নির্বর্তিষ্যতি সত্তম
49.21
স সংভাবয় নাগেন্দ্র ময়ি সর্বং মহামতে
ন তে ময়ি মনো জাতু মিথ্যা ভবিতুমর্হতি
49.22
বাসুকিরুবাচ
আস্তীক পরিঘূর্ণামি হৃদয়ং মে বিদীর্যতে
দিশশ্চ ন প্রজানামি ব্রহ্মদণ্ডনিপীডিতঃ
49.23
আস্তীক উবাচ
ন সংতাপস্ত্বয়া কার্যঃ কথংচিত্পন্নগোত্তম
দীপ্তাদগ্নেঃ সমুত্পন্নং নাশয়িষ্যামি তে ভয়ম্
49.24
ব্রহ্মদণ্ডং মহাঘোরং কালাগ্নিসমতেজসম্
নাশয়িষ্যামি মাত্র ত্বং ভয়ং কার্ষীঃ কথংচন
49.25
সূত উবাচ
ততঃ স বাসুকের্ঘোরমপনীয় মনোজ্বরম্
আধায় চাত্মনোঽঙ্গেষু জগাম ত্বরিতো ভৃশম্
49.26
জনমেজয়স্য তং যজ্ঞং সর্বৈঃ সমুদিতং গুণৈঃ
মোক্ষায় ভুজগেন্দ্রাণামাস্তীকো দ্বিজসত্তমঃ
49.27
স গত্বাপশ্যদাস্তীকো যজ্ঞায়তনমুত্তমম্
বৃতং সদস্যৈর্বহুভিঃ সূর্যবহ্নিসমপ্রভৈঃ
49.28
স তত্র বারিতো দ্বাঃস্থৈঃ প্রবিশন্দ্বিজসত্তমঃ
অভিতুষ্টাব তং যজ্ঞং প্রবেশার্থী দ্বিজোত্তমঃ