Utshovঅধ্যায় 48
48.1
শৌনক উবাচ
সর্পসত্রে তদা রাজ্ঞঃ পাণ্ডবেয়স্য ধীমতঃ
জনমেজয়স্য কে ত্বাসন্নৃত্বিজঃ পরমর্ষয়ঃ
48.2
কে সদস্যা বভূবুশ্চ সর্পসত্রে সুদারুণে
বিষাদজননেঽত্যর্থং পন্নগানাং মহাভয়ে
48.3
সর্বং বিস্তরতস্তাত ভবাঞ্শংসিতুমর্হতি
সর্পসত্রবিধানজ্ঞা বিজ্ঞেয়াস্তে হি সূতজ
48.4
সূত উবাচ
হন্ত তে কথয়িষ্যামি নামানীহ মনীষিণাম্
যে ঋত্বিজঃ সদস্যাশ্চ তস্যাসন্নৃপতেস্তদা
48.5
তত্র হোতা বভূবাথ ব্রাহ্মণশ্চণ্ডভার্গবঃ
চ্যবনস্যান্বয়ে জাতঃ খ্যাতো বেদবিদাং বরঃ
48.6
উদ্গাতা ব্রাহ্মণো বৃদ্ধো বিদ্বান্কৌত্সার্যজৈমিনিঃ
ব্রহ্মাভবচ্ছার্ঙ্গরবো অধ্বর্যুর্বোধপিঙ্গলঃ
48.7
সদস্যশ্চাভবদ্ব্যাসঃ পুত্রশিষ্যসহায়বান্
উদ্দালকঃ শমঠকঃ শ্বেতকেতুশ্চ পঞ্চমঃ
48.8
অসিতো দেবলশ্চৈব নারদঃ পর্বতস্তথা
আত্রেয়ঃ কুণ্ডজঠরো দ্বিজঃ কুটিঘটস্তথা
48.9
বাত্স্যঃ শ্রুতশ্রবা বৃদ্ধস্তপঃস্বাধ্যায়শীলবান্
কহোডো দেবশর্মা চ মৌদ্গল্যঃ শমসৌভরঃ
48.10
এতে চান্যে চ বহবো ব্রাহ্মণাঃ সংশিতব্রতাঃ
সদস্যা অভবংস্তত্র সত্রে পারিক্ষিতস্য হ
48.11
জুহ্বত্স্বৃত্বিক্ষ্বথ তদা সর্পসত্রে মহাক্রতৌ
অহয়ঃ প্রাপতংস্তত্র ঘোরাঃ প্রাণিভয়াবহাঃ
48.12
বসামেদোবহাঃ কুল্যা নাগানাং সংপ্রবর্তিতাঃ
ববৌ গন্ধশ্চ তুমুলো দহ্যতামনিশং তদা
48.13
পততাং চৈব নাগানাং ধিষ্ঠিতানাং তথাম্বরে
অশ্রূয়তানিশং শব্দঃ পচ্যতাং চাগ্নিনা ভৃশম্
48.14
তক্ষকস্তু স নাগেন্দ্রঃ পুরংদরনিবেশনম্
গতঃ শ্রুত্বৈব রাজানং দীক্ষিতং জনমেজয়ম্
48.15
ততঃ সর্বং যথাবৃত্তমাখ্যায় ভুজগোত্তমঃ
অগচ্ছচ্ছরণং ভীত আগস্কৃত্বা পুরংদরম্
48.16
তমিন্দ্রঃ প্রাহ সুপ্রীতো ন তবাস্তীহ তক্ষক
ভয়ং নাগেন্দ্র তস্মাদ্বৈ সর্পসত্রাত্কথংচন
48.17
প্রসাদিতো ময়া পূর্বং তবার্থায় পিতামহঃ
তস্মাত্তব ভয়ং নাস্তি ব্যেতু তে মানসো জ্বরঃ
48.18
এবমাশ্বাসিতস্তেন ততঃ স ভুজগোত্তমঃ
উবাস ভবনে তত্র শক্রস্য মুদিতঃ সুখী
48.19
অজস্রং নিপতত্স্বগ্নৌ নাগেষু ভৃশদুঃখিতঃ
অল্পশেষপরীবারো বাসুকিঃ পর্যতপ্যত
48.20
কশ্মলং চাবিশদ্ঘোরং বাসুকিং পন্নগেশ্বরম্
স ঘূর্ণমানহৃদয়ো ভগিনীমিদমব্রবীৎ
48.21
দহ্যন্তেঽঙ্গানি মে ভদ্রে দিশো ন প্রতিভান্তি চ
সীদামীব চ সংমোহাদ্ঘূর্ণতীব চ মে মনঃ
48.22
দৃষ্টির্ভ্রমতি মেঽতীব হৃদয়ং দীর্যতীব চ
পতিষ্যাম্যবশোঽদ্যাহং তস্মিন্দীপ্তে বিভাবসৌ
48.23
পারিক্ষিতস্য যজ্ঞোঽসৌ বর্ততেঽস্মজ্জিঘাংসয়া
ব্যক্তং ময়াপি গন্তব্যং পিতৃরাজনিবেশনম্
48.24
অয়ং স কালঃ সংপ্রাপ্তো যদর্থমসি মে স্বসঃ
জরত্কারোঃ পুরা দত্তা সা ত্রাহ্যস্মান্সবান্ধবান্
48.25
আস্তীকঃ কিল যজ্ঞং তং বর্তন্তং ভুজগোত্তমে
প্রতিষেত্স্যতি মাং পূর্বং স্বয়মাহ পিতামহঃ
48.26
তদ্বত্সে ব্রূহি বত্সং স্বং কুমারং বৃদ্ধসংমতম্
মমাদ্য ত্বং সভৃত্যস্য মোক্ষার্থং বেদবিত্তমম্