Utshovঅধ্যায় 47
47.1
সূত উবাচ
এবমুক্ত্বা ততঃ শ্রীমান্মন্ত্রিভিশ্চানুমোদিতঃ
আরুরোহ প্রতিজ্ঞাং স সর্পসত্রায় পার্থিবঃ
ব্রহ্মন্ভরতশার্দূলো রাজা পারিক্ষিতস্তদা
47.2
পুরোহিতমথাহূয় ঋত্বিজং বসুধাধিপঃ
অব্রবীদ্বাক্যসংপন্নঃ সংপদর্থকরং বচঃ
47.3
যো মে হিংসিতবাংস্তাতং তক্ষকঃ স দুরাত্মবান্
প্রতিকুর্যাং যথা তস্য তদ্ভবন্তো ব্রুবন্তু মে
47.4
অপি তত্কর্ম বিদিতং ভবতাং যেন পন্নগম্
তক্ষকং সংপ্রদীপ্তেঽগ্নৌ প্রাপ্স্যেঽহং সহবান্ধবম্
47.5
যথা তেন পিতা মহ্যং পূর্বং দগ্ধো বিষাগ্নিনা
তথাহমপি তং পাপং দগ্ধুমিচ্ছামি পন্নগম্
47.6
ঋত্বিজ ঊচুঃ
অস্তি রাজন্মহত্সত্রং ত্বদর্থং দেবনির্মিতম্
সর্পসত্রমিতি খ্যাতং পুরাণে কথ্যতে নৃপ
47.7
আহর্তা তস্য সত্রস্য ত্বন্নান্যোঽস্তি নরাধিপ
ইতি পৌরাণিকাঃ প্রাহুরস্মাকং চাস্তি স ক্রতুঃ
47.8
সূত উবাচ
এবমুক্তঃ স রাজর্ষির্মেনে সর্পং হি তক্ষকম্
হুতাশনমুখং দীপ্তং প্রবিষ্টমিতি সত্তম
47.9
ততোঽব্রবীন্মন্ত্রবিদস্তান্রাজা ব্রাহ্মণাংস্তদা
আহরিষ্যামি তত্সত্রং সংভারাঃ সংভ্রিয়ন্তু মে
47.10
ততস্তে ঋত্বিজস্তস্য শাস্ত্রতো দ্বিজসত্তম
দেশং তং মাপয়ামাসুর্যজ্ঞায়তনকারণাৎ
যথাবজ্জ্ঞানবিদুষঃ সর্বে বুদ্ধ্যা পরং গতাঃ
47.11
ঋদ্ধ্যা পরময়া যুক্তমিষ্টং দ্বিজগণায়ুতম্
প্রভূতধনধান্যাঢ্যমৃত্বিগ্ভিঃ সুনিবেশিতম্
47.12
নির্মায় চাপি বিধিবদ্যজ্ঞায়তনমীপ্সিতম্
রাজানং দীক্ষয়ামাসুঃ সর্পসত্রাপ্তয়ে তদা
47.13
ইদং চাসীত্তত্র পূর্বং সর্পসত্রে ভবিষ্যতি
নিমিত্তং মহদুত্পন্নং যজ্ঞবিঘ্নকরং তদা
47.14
যজ্ঞস্যায়তনে তস্মিন্ক্রিয়মাণে বচোঽব্রবীৎ
স্থপতির্বুদ্ধিসংপন্নো বাস্তুবিদ্যাবিশারদঃ
47.15
ইত্যব্রবীত্সূত্রধারঃ সূতঃ পৌরাণিকস্তদা
যস্মিন্দেশে চ কালে চ মাপনেয়ং প্রবর্তিতা
ব্রাহ্মণং কারণং কৃত্বা নায়ং সংস্থাস্যতে ক্রতুঃ
47.16
এতচ্ছ্রুত্বা তু রাজা স প্রাগ্দীক্ষাকালমব্রবীৎ
ক্ষত্তারং নেহ মে কশ্চিদজ্ঞাতঃ প্রবিশেদিতি
47.17
ততঃ কর্ম প্রববৃতে সর্পসত্রে বিধানতঃ
পর্যক্রামংশ্চ বিধিবত্স্বে স্বে কর্মণি যাজকাঃ
47.18
পরিধায় কৃষ্ণবাসাংসি ধূমসংরক্তলোচনাঃ
জুহুবুর্মন্ত্রবচ্চৈব সমিদ্ধং জাতবেদসম্
47.19
কম্পয়ন্তশ্চ সর্বেষামুরগাণাং মনাংসি তে
সর্পানাজুহুবুস্তত্র সর্বানগ্নিমুখে তদা
47.20
ততঃ সর্পাঃ সমাপেতুঃ প্রদীপ্তে হব্যবাহনে
বিবেষ্টমানাঃ কৃপণা আহ্বয়ন্তঃ পরস্পরম্
47.21
বিস্ফুরন্তঃ শ্বসন্তশ্চ বেষ্টয়ন্তস্তথা পরে
পুচ্ছৈঃ শিরোভিশ্চ ভৃশং চিত্রভানুং প্রপেদিরে
47.22
শ্বেতাঃ কৃষ্ণাশ্চ নীলাশ্চ স্থবিরাঃ শিশবস্তথা
রুবন্তো ভৈরবান্নাদান্পেতুর্দীপ্তে বিভাবসৌ
47.23
এবং শতসহস্রাণি প্রয়ুতান্যর্বুদানি চ
অবশানি বিনষ্টানি পন্নগানাং দ্বিজোত্তম
47.24
ইন্দুরা ইব তত্রান্যে হস্তিহস্তা ইবাপরে
মত্তা ইব চ মাতঙ্গা মহাকায়া মহাবলাঃ
47.25
উচ্চাবচাশ্চ বহবো নানাবর্ণা বিষোল্বণাঃ
ঘোরাশ্চ পরিঘপ্রখ্যা দন্দশূকা মহাবলাঃ
প্রপেতুরগ্নাবুরগা মাতৃবাগ্দণ্ডপীডিতাঃ