Utshovঅধ্যায় 46
46.1
মন্ত্রিণ ঊচুঃ
ততঃ স রাজা রাজেন্দ্র স্কন্ধে তস্য ভুজংগমম্
মুনেঃ ক্ষুত্ক্ষাম আসজ্য স্বপুরং পুনরায়য়ৌ
46.2
ঋষেস্তস্য তু পুত্রোঽভূদ্গবি জাতো মহায়শাঃ
শৃঙ্গী নাম মহাতেজাস্তিগ্মবীর্যোঽতিকোপনঃ
46.3
ব্রহ্মাণং সোঽভ্যুপাগম্য মুনিঃ পূজাং চকার হ
অনুজ্ঞাতো গতস্তত্র শৃঙ্গী শুশ্রাব তং তদা
সখ্যুঃ সকাশাত্পিতরং পিত্রা তে ধর্ষিতং তথা
46.4
মৃতং সর্পং সমাসক্তং পিত্রা তে জনমেজয়
বহন্তং কুরুশার্দূল স্কন্ধেনানপকারিণম্
46.5
তপস্বিনমতীবাথ তং মুনিপ্রবরং নৃপ
জিতেন্দ্রিয়ং বিশুদ্ধং চ স্থিতং কর্মণ্যথাদ্ভুতে
46.6
তপসা দ্যোতিতাত্মানং স্বেষ্বঙ্গেষু যতং তথা
শুভাচারং শুভকথং সুস্থিরং তমলোলুপম্
46.7
অক্ষুদ্রমনসূয়ং চ বৃদ্ধং মৌনব্রতে স্থিতম্
শরণ্যং সর্বভূতানাং পিত্রা বিপ্রকৃতং তব
46.8
শশাপাথ স তচ্ছ্রুত্বা পিতরং তে রুষান্বিতঃ
ঋষেঃ পুত্রো মহাতেজা বালোঽপি স্থবিরৈর্বরঃ
46.9
স ক্ষিপ্রমুদকং স্পৃষ্ট্বা রোষাদিদমুবাচ হ
পিতরং তেঽভিসংধায় তেজসা প্রজ্বলন্নিব
46.10
অনাগসি গুরৌ যো মে মৃতং সর্পমবাসৃজৎ
তং নাগস্তক্ষকঃ ক্রুদ্ধস্তেজসা সাদয়িষ্যতি
সপ্তরাত্রাদিতঃ পাপং পশ্য মে তপসো বলম্
46.11
ইত্যুক্ত্বা প্রয়য়ৌ তত্র পিতা যত্রাস্য সোঽভবৎ
দৃষ্ট্বা চ পিতরং তস্মৈ শাপং তং প্রত্যবেদয়ৎ
46.12
স চাপি মুনিশার্দূলঃ প্রেষয়ামাস তে পিতুঃ
শপ্তোঽসি মম পুত্রেণ যত্তো ভব মহীপতে
তক্ষকস্ত্বাং মহারাজ তেজসা সাদয়িষ্যতি
46.13
শ্রুত্বা তু তদ্বচো ঘোরং পিতা তে জনমেজয়
যত্তোঽভবত্পরিত্রস্তস্তক্ষকাত্পন্নগোত্তমাৎ
46.14
ততস্তস্মিংস্তু দিবসে সপ্তমে সমুপস্থিতে
রাজ্ঞঃ সমীপং ব্রহ্মর্ষিঃ কাশ্যপো গন্তুমৈচ্ছত
46.15
তং দদর্শাথ নাগেন্দ্রঃ কাশ্যপং তক্ষকস্তদা
তমব্রবীত্পন্নগেন্দ্রঃ কাশ্যপং ত্বরিতং ব্রজন্
ক্ব ভবাংস্ত্বরিতো যাতি কিং চ কার্যং চিকীর্ষতি
46.16
কাশ্যপ উবাচ
যত্র রাজা কুরুশ্রেষ্ঠঃ পরিক্ষিন্নাম বৈ দ্বিজ
তক্ষকেণ ভুজংগেন ধক্ষ্যতে কিল তত্র বৈ
46.17
গচ্ছাম্যহং তং ত্বরিতঃ সদ্যঃ কর্তুমপজ্বরম্
ময়াভিপন্নং তং চাপি ন সর্পো ধর্ষয়িষ্যতি
46.18
তক্ষক উবাচ
কিমর্থং তং ময়া দষ্টং সংজীবয়িতুমিচ্ছসি
ব্রূহি কামমহং তেঽদ্য দদ্মি স্বং বেশ্ম গম্যতাম্
46.19
মন্ত্রিণ ঊচুঃ
ধনলিপ্সুরহং তত্র যামীত্যুক্তশ্চ তেন সঃ
তমুবাচ মহাত্মানং মানয়ঞ্শ্লক্ষ্ণয়া গিরা
46.20
যাবদ্ধনং প্রার্থয়সে তস্মাদ্রাজ্ঞস্ততোঽধিকম্
গৃহাণ মত্ত এব ত্বং সংনিবর্তস্ব চানঘ
46.21
স এবমুক্তো নাগেন কাশ্যপো দ্বিপদাং বরঃ
লব্ধ্বা বিত্তং নিববৃতে তক্ষকাদ্যাবদীপ্সিতম্
46.22
তস্মিন্প্রতিগতে বিপ্রে ছদ্মনোপেত্য তক্ষকঃ
তং নৃপং নৃপতিশ্রেষ্ঠ পিতরং ধার্মিকং তব
46.23
প্রাসাদস্থং যত্তমপি দগ্ধবান্বিষবহ্নিনা
ততস্ত্বং পুরুষব্যাঘ্র বিজয়ায়াভিষেচিতঃ
46.24
এতদ্দৃষ্টং শ্রুতং চাপি যথাবন্নৃপসত্তম
অস্মাভির্নিখিলং সর্বং কথিতং তে সুদারুণম্
46.25
শ্রুত্বা চৈতং নৃপশ্রেষ্ঠ পার্থিবস্য পরাভবম্
অস্য চর্ষেরুত্তঙ্কস্য বিধত্স্ব যদনন্তরম্
46.26
জনমেজয় উবাচ
এতত্তু শ্রোতুমিচ্ছামি অটব্যাং নির্জনে বনে
সংবাদং পন্নগেন্দ্রস্য কাশ্যপস্য চ যত্তদা
46.27
কেন দৃষ্টং শ্রুতং চাপি ভবতাং শ্রোত্রমাগতম্
শ্রুত্বা চাথ বিধাস্যামি পন্নগান্তকরীং মতিম্
46.28
মন্ত্রিণ ঊচুঃ
শৃণু রাজন্যথাস্মাকং যেনৈতত্কথিতং পুরা
সমাগমং দ্বিজেন্দ্রস্য পন্নগেন্দ্রস্য চাধ্বনি
46.29
তস্মিন্বৃক্ষে নরঃ কশ্চিদিন্ধনার্থায় পার্থিব
বিচিন্বন্পূর্বমারূঢঃ শুষ্কশাখং বনস্পতিম্
অবুধ্যমানৌ তং তত্র বৃক্ষস্থং পন্নগদ্বিজৌ
46.30
স তু তেনৈব বৃক্ষেণ ভস্মীভূতোঽভবত্তদা
দ্বিজপ্রভাবাদ্রাজেন্দ্র জীবিতঃ সবনস্পতিঃ
46.31
তেন গত্বা নৃপশ্রেষ্ঠ নগরেঽস্মিন্নিবেদিতম্
যথাবৃত্তং তু তত্সর্বং তক্ষকস্য দ্বিজস্য চ
46.32
এতত্তে কথিতং রাজন্যথাবৃত্তং যথাশ্রুতম্
শ্রুত্বা তু নৃপশার্দূল প্রকুরুষ্ব যথেপ্সিতম্
46.33
সূত উবাচ
মন্ত্রিণাং তু বচঃ শ্রুত্বা স রাজা জনমেজয়ঃ
পর্যতপ্যত দুঃখার্তঃ প্রত্যপিংষত্করে করম্
46.34
নিঃশ্বাসমুষ্ণমসকৃদ্দীর্ঘং রাজীবলোচনঃ
মুমোচাশ্রূণি চ তদা নেত্রাভ্যাং প্রততং নৃপঃ
উবাচ চ মহীপালো দুঃখশোকসমন্বিতঃ
46.35
শ্রুত্বৈতদ্ভবতাং বাক্যং পিতুর্মে স্বর্গতিং প্রতি
নিশ্চিতেয়ং মম মতির্যা বৈ তাং মে নিবোধত
46.36
অনন্তরমহং মন্যে তক্ষকায় দুরাত্মনে
প্রতিকর্তব্যমিত্যেব যেন মে হিংসিতঃ পিতা
46.37
ঋষের্হি শৃঙ্গের্বচনং কৃত্বা দগ্ধ্বা চ পার্থিবম্
যদি গচ্ছেদসৌ পাপো ননু জীবেত্পিতা মম
46.38
পরিহীয়েত কিং তস্য যদি জীবেত্স পার্থিবঃ
কাশ্যপস্য প্রসাদেন মন্ত্রিণাং সুনয়েন চ
46.39
স তু বারিতবান্মোহাত্কাশ্যপং দ্বিজসত্তমম্
সংজিজীবয়িষুং প্রাপ্তং রাজানমপরাজিতম্
46.40
মহানতিক্রমো হ্যেষ তক্ষকস্য দুরাত্মনঃ
দ্বিজস্য যোঽদদদ্দ্রব্যং মা নৃপং জীবয়েদিতি
46.41
উত্তঙ্কস্য প্রিয়ং কুর্বন্নাত্মনশ্চ মহত্প্রিয়ম্
ভবতাং চৈব সর্বেষাং যাস্যাম্যপচিতিং পিতুঃ