অধ্যায় 45

45.1

শৌনক উবাচ
যদপৃচ্ছত্তদা রাজা মন্ত্রিণো জনমেজয়ঃ
পিতুঃ স্বর্গগতিং তন্মে বিস্তরেণ পুনর্বদ

45.2

সূত উবাচ
শৃণু ব্রহ্মন্যথা পৃষ্টা মন্ত্রিণো নৃপতেস্তদা
আখ্যাতবন্তস্তে সর্বে নিধনং তত্পরিক্ষিতঃ

45.3

জনমেজয় উবাচ
জানন্তি তু ভবন্তস্তদ্যথাবৃত্তঃ পিতা মম
আসীদ্যথা চ নিধনং গতঃ কালে মহায়শাঃ

45.4

শ্রুত্বা ভবত্সকাশাদ্ধি পিতুর্বৃত্তমশেষতঃ
কল্যাণং প্রতিপত্স্যামি বিপরীতং ন জাতু চিৎ

45.5

সূত উবাচ
মন্ত্রিণোঽথাব্রুবন্বাক্যং পৃষ্টাস্তেন মহাত্মনা
সর্বধর্মবিদঃ প্রাজ্ঞা রাজানং জনমেজয়ম্

45.6

ধর্মাত্মা চ মহাত্মা চ প্রজাপালঃ পিতা তব
আসীদিহ যথাবৃত্তঃ স মহাত্মা শৃণুষ্ব তৎ

45.7

চাতুর্বর্ণ্যং স্বধর্মস্থং স কৃত্বা পর্যরক্ষত
ধর্মতো ধর্মবিদ্রাজা ধর্মো বিগ্রহবানিব

45.8

ররক্ষ পৃথিবীং দেবীং শ্রীমানতুলবিক্রমঃ
দ্বেষ্টারস্তস্য নৈবাসন্স চ ন দ্বেষ্টি কংচন
সমঃ সর্বেষু ভূতেষু প্রজাপতিরিবাভবৎ

45.9

ব্রাহ্মণাঃ ক্ষত্রিয়া বৈশ্যাঃ শূদ্রাশ্চৈব স্বকর্মসু
স্থিতাঃ সুমনসো রাজংস্তেন রাজ্ঞা স্বনুষ্ঠিতাঃ

45.10

বিধবানাথকৃপণান্বিকলাংশ্চ বভার সঃ
সুদর্শঃ সর্বভূতানামাসীত্সোম ইবাপরঃ

45.11

তুষ্টপুষ্টজনঃ শ্রীমান্সত্যবাগ্দৃঢবিক্রমঃ
ধনুর্বেদে চ শিষ্যোঽভূন্নৃপঃ শারদ্বতস্য সঃ

45.12

গোবিন্দস্য প্রিয়শ্চাসীত্পিতা তে জনমেজয়
লোকস্য চৈব সর্বস্য প্রিয় আসীন্মহায়শাঃ

45.13

পরিক্ষীণেষু কুরুষু উত্তরায়ামজায়ত
পরিক্ষিদভবত্তেন সৌভদ্রস্যাত্মজো বলী

45.14

রাজধর্মার্থকুশলো যুক্তঃ সর্বগুণৈর্নৃপঃ
জিতেন্দ্রিয়শ্চাত্মবাংশ্চ মেধাবী বৃদ্ধসেবিতঃ

45.15

ষড্বর্গবিন্মহাবুদ্ধির্নীতিধর্মবিদুত্তমঃ
প্রজা ইমাস্তব পিতা ষষ্টিং বর্ষাণ্যপালয়ৎ
ততো দিষ্টান্তমাপন্নঃ সর্পেণানতিবর্তিতম্

45.16

ততস্ত্বং পুরুষশ্রেষ্ঠ ধর্মেণ প্রতিপেদিবান্
ইদং বর্ষসহস্রায় রাজ্যং কুরুকুলাগতম্
বাল এবাভিজাতোঽসি সর্বভূতানুপালকঃ

45.17

জনমেজয় উবাচ
নাস্মিন্কুলে জাতু বভূব রাজা; যো ন প্রজানাং হিতকৃত্প্রিয়শ্চ
বিশেষতঃ প্রেক্ষ্য পিতামহানাং; বৃত্তং মহদ্বৃত্তপরায়ণানাম্

45.18

কথং নিধনমাপন্নঃ পিতা মম তথাবিধঃ
আচক্ষধ্বং যথাবন্মে শ্রোতুমিচ্ছামি তত্ত্বতঃ

45.19

সূত উবাচ
এবং সংচোদিতা রাজ্ঞা মন্ত্রিণস্তে নরাধিপম্
ঊচুঃ সর্বে যথাবৃত্তং রাজ্ঞঃ প্রিয়হিতে রতাঃ

45.20

বভূব মৃগয়াশীলস্তব রাজন্পিতা সদা
যথা পাণ্ডুর্মহাভাগো ধনুর্ধরবরো যুধি
অস্মাস্বাসজ্য সর্বাণি রাজকার্যাণ্যশেষতঃ

45.21

স কদাচিদ্বনচরো মৃগং বিব্যাধ পত্রিণা
বিদ্ধ্বা চান্বসরত্তূর্ণং তং মৃগং গহনে বনে

45.22

পদাতির্বদ্ধনিস্ত্রিংশস্ততায়ুধকলাপবান্
ন চাসসাদ গহনে মৃগং নষ্টং পিতা তব

45.23

পরিশ্রান্তো বয়ঃস্থশ্চ ষষ্টিবর্ষো জরান্বিতঃ
ক্ষুধিতঃ স মহারণ্যে দদর্শ মুনিমন্তিকে

45.24

স তং পপ্রচ্ছ রাজেন্দ্রো মুনিং মৌনব্রতান্বিতম্
ন চ কিংচিদুবাচৈনং স মুনিঃ পৃচ্ছতোঽপি সন্

45.25

ততো রাজা ক্ষুচ্ছ্রমার্তস্তং মুনিং স্থাণুবত্স্থিতম্
মৌনব্রতধরং শান্তং সদ্যো মন্যুবশং যয়ৌ

45.26

ন বুবোধ হি তং রাজা মৌনব্রতধরং মুনিম্
স তং মন্যুসমাবিষ্টো ধর্ষয়ামাস তে পিতা

45.27

মৃতং সর্পং ধনুষ্কোট্যা সমুত্ক্ষিপ্য ধরাতলাৎ
তস্য শুদ্ধাত্মনঃ প্রাদাত্স্কন্ধে ভরতসত্তম

45.28

ন চোবাচ স মেধাবী তমথো সাধ্বসাধু বা
তস্থৌ তথৈব চাক্রুধ্যন্সর্পং স্কন্ধেন ধারয়ন্

Contains text from DharmicData, made available under the Open Database License (ODbL). Simple meanings are written by AI and can contain mistakes.