অধ্যায় 44

44.1

সূত উবাচ
গতমাত্রং তু ভর্তারং জরত্কারুরবেদয়ৎ
ভ্রাতুস্ত্বরিতমাগম্য যথাতথ্যং তপোধন

ততঃ স ভুজগশ্রেষ্ঠঃ শ্রুত্বা সুমহদপ্রিয়ম্
উবাচ ভগিনীং দীনাং তদা দীনতরঃ স্বয়ম্

জানাসি ভদ্রে যত্কার্যং প্রদানে কারণং চ যৎ
পন্নগানাং হিতার্থায় পুত্রস্তে স্যাত্ততো যদি

স সর্পসত্রাত্কিল নো মোক্ষয়িষ্যতি বীর্যবান্
এবং পিতামহঃ পূর্বমুক্তবান্মাং সুরৈঃ সহ

অপ্যস্তি গর্ভঃ সুভগে তস্মাত্তে মুনিসত্তমাৎ
ন চেচ্ছাম্যফলং তস্য দারকর্ম মনীষিণঃ

কামং চ মম ন ন্যায্যং প্রষ্টুং ত্বাং কার্যমীদৃশম্
কিং তু কার্যগরীয়স্ত্বাত্ততস্ত্বাহমচূচুদম্

দুর্বাসতাং বিদিত্বা চ ভর্তুস্তেঽতিতপস্বিনঃ
নৈনমন্বাগমিষ্যামি কদাচিদ্ধি শপেত্স মাম্

আচক্ষ্ব ভদ্রে ভর্তুস্ত্বং সর্বমেব বিচেষ্টিতম্
শল্যমুদ্ধর মে ঘোরং ভদ্রে হৃদি চিরস্থিতম্

জরত্কারুস্ততো বাক্যমিত্যুক্তা প্রত্যভাষত
আশ্বাসয়ন্তী সংতপ্তং বাসুকিং পন্নগেশ্বরম্

পৃষ্টো ময়াপত্যহেতোঃ স মহাত্মা মহাতপাঃ
অস্তীত্যুদরমুদ্দিশ্য মমেদং গতবাংশ্চ সঃ

স্বৈরেষ্বপি ন তেনাহং স্মরামি বিতথং ক্বচিৎ
উক্তপূর্বং কুতো রাজন্সাংপরায়ে স বক্ষ্যতি

ন সংতাপস্ত্বয়া কার্যঃ কার্যং প্রতি ভুজংগমে
উত্পত্স্যতি হি তে পুত্রো জ্বলনার্কসমদ্যুতিঃ

ইত্যুক্ত্বা হি স মাং ভ্রাতর্গতো ভর্তা তপোবনম্
তস্মাদ্ব্যেতু পরং দুঃখং তবেদং মনসি স্থিতম্

এতচ্ছ্রুত্বা স নাগেন্দ্রো বাসুকিঃ পরয়া মুদা
এবমস্ত্বিতি তদ্বাক্যং ভগিন্যাঃ প্রত্যগৃহ্ণত

সান্ত্বমানার্থদানৈশ্চ পূজয়া চানুরূপয়া
সোদর্যাং পূজয়ামাস স্বসারং পন্নগোত্তমঃ

ততঃ স ববৃধে গর্ভো মহাতেজা রবিপ্রভঃ
যথা সোমো দ্বিজশ্রেষ্ঠ শুক্লপক্ষোদিতো দিবি

যথাকালং তু সা ব্রহ্মন্প্রজজ্ঞে ভুজগস্বসা
কুমারং দেবগর্ভাভং পিতৃমাতৃভয়াপহম্

ববৃধে স চ তত্রৈব নাগরাজনিবেশনে
বেদাংশ্চাধিজগে সাঙ্গান্ভার্গবাচ্চ্যবনাত্মজাৎ

চরিতব্রতো বাল এব বুদ্ধিসত্ত্বগুণান্বিতঃ
নাম চাস্যাভবত্খ্যাতং লোকেষ্বাস্তীক ইত্যুত

অস্তীত্যুক্ত্বা গতো যস্মাত্পিতা গর্ভস্থমেব তম্
বনং তস্মাদিদং তস্য নামাস্তীকেতি বিশ্রুতম্

স বাল এব তত্রস্থশ্চরন্নমিতবুদ্ধিমান্
গৃহে পন্নগরাজস্য প্রয়ত্নাত্পর্যরক্ষ্যত

ভগবানিব দেবেশঃ শূলপাণির্হিরণ্যদঃ
বিবর্ধমানঃ সর্বাংস্তান্পন্নগানভ্যহর্ষয়ৎ