Utshovঅধ্যায় 43
43.1
সূত উবাচ
বাসুকিস্ত্বব্রবীদ্বাক্যং জরত্কারুমৃষিং তদা
সনামা তব কন্যেয়ং স্বসা মে তপসান্বিতা
43.2
ভরিষ্যামি চ তে ভার্যাং প্রতীচ্ছেমাং দ্বিজোত্তম
রক্ষণং চ করিষ্যেঽস্যাঃ সর্বশক্ত্যা তপোধন
43.3
প্রতিশ্রুতে তু নাগেন ভরিষ্যে ভগিনীমিতি
জরত্কারুস্তদা বেশ্ম ভুজগস্য জগাম হ
43.4
তত্র মন্ত্রবিদাং শ্রেষ্ঠস্তপোবৃদ্ধো মহাব্রতঃ
জগ্রাহ পাণিং ধর্মাত্মা বিধিমন্ত্রপুরস্কৃতম্
43.5
ততো বাসগৃহং শুভ্রং পন্নগেন্দ্রস্য সংমতম্
জগাম ভার্যামাদায় স্তূয়মানো মহর্ষিভিঃ
43.6
শয়নং তত্র বৈ কৢপ্তং স্পর্ধ্যাস্তরণসংবৃতম্
তত্র ভার্যাসহায়ঃ স জরত্কারুরুবাস হ
43.7
স তত্র সময়ং চক্রে ভার্যয়া সহ সত্তমঃ
বিপ্রিয়ং মে ন কর্তব্যং ন চ বাচ্যং কদাচন
43.8
ত্যজেয়মপ্রিয়ে হি ত্বাং কৃতে বাসং চ তে গৃহে
এতদ্গৃহাণ বচনং ময়া যত্সমুদীরিতম্
43.9
ততঃ পরমসংবিগ্না স্বসা নাগপতেস্তু সা
অতিদুঃখান্বিতা বাচং তমুবাচৈবমস্ত্বিতি
43.10
তথৈব সা চ ভর্তারং দুঃখশীলমুপাচরৎ
উপায়ৈঃ শ্বেতকাকীয়ৈঃ প্রিয়কামা যশস্বিনী
43.11
ঋতুকালে ততঃ স্নাতা কদাচিদ্বাসুকেঃ স্বসা
ভর্তারং তং যথান্যায়মুপতস্থে মহামুনিম্
43.12
তত্র তস্যাঃ সমভবদ্গর্ভো জ্বলনসংনিভঃ
অতীব তপসা যুক্তো বৈশ্বানরসমদ্যুতিঃ
শুক্লপক্ষে যথা সোমো ব্যবর্ধত তথৈব সঃ
43.13
ততঃ কতিপয়াহস্য জরত্কারুর্মহাতপাঃ
উত্সঙ্গেঽস্যাঃ শিরঃ কৃত্বা সুষ্বাপ পরিখিন্নবৎ
43.14
তস্মিংশ্চ সুপ্তে বিপ্রেন্দ্রে সবিতাস্তমিয়াদ্গিরিম্
অহ্নঃ পরিক্ষয়ে ব্রহ্মংস্ততঃ সাচিন্তয়ত্তদা
বাসুকের্ভগিনী ভীতা ধর্মলোপান্মনস্বিনী
43.15
কিং নু মে সুকৃতং ভূয়াদ্ভর্তুরুত্থাপনং ন বা
দুঃখশীলো হি ধর্মাত্মা কথং নাস্যাপরাধ্নুয়াম্
43.16
কোপো বা ধর্মশীলস্য ধর্মলোপোঽথ বা পুনঃ
ধর্মলোপো গরীয়ান্বৈ স্যাদত্রেত্যকরোন্মনঃ
43.17
উত্থাপয়িষ্যে যদ্যেনং ধ্রুবং কোপং করিষ্যতি
ধর্মলোপো ভবেদস্য সংধ্যাতিক্রমণে ধ্রুবম্
43.18
ইতি নিশ্চিত্য মনসা জরত্কারুর্ভুজংগমা
তমৃষিং দীপ্ততপসং শয়ানমনলোপমম্
উবাচেদং বচঃ শ্লক্ষ্ণং ততো মধুরভাষিণী
43.19
উত্তিষ্ঠ ত্বং মহাভাগ সূর্যোঽস্তমুপগচ্ছতি
সংধ্যামুপাস্স্ব ভগবন্নপঃ স্পৃষ্ট্বা যতব্রতঃ
43.20
প্রাদুষ্কৃতাগ্নিহোত্রোঽয়ং মুহূর্তো রম্যদারুণঃ
সংধ্যা প্রবর্ততে চেয়ং পশ্চিমায়াং দিশি প্রভো
43.21
এবমুক্তঃ স ভগবাঞ্জরত্কারুর্মহাতপাঃ
ভার্যাং প্রস্ফুরমাণোষ্ঠ ইদং বচনমব্রবীৎ
43.22
অবমানঃ প্রয়ুক্তোঽয়ং ত্বয়া মম ভুজংগমে
সমীপে তে ন বত্স্যামি গমিষ্যামি যথাগতম্
43.23
ন হি তেজোঽস্তি বামোরু ময়ি সুপ্তে বিভাবসোঃ
অস্তং গন্তুং যথাকালমিতি মে হৃদি বর্ততে
43.24
ন চাপ্যবমতস্যেহ বস্তুং রোচেত কস্যচিৎ
কিং পুনর্ধর্মশীলস্য মম বা মদ্বিধস্য বা
43.25
এবমুক্তা জরত্কারুর্ভর্ত্রা হৃদয়কম্পনম্
অব্রবীদ্ভগিনী তত্র বাসুকেঃ সংনিবেশনে
43.26
নাবমানাত্কৃতবতী তবাহং প্রতিবোধনম্
ধর্মলোপো ন তে বিপ্র স্যাদিত্যেতত্কৃতং ময়া
43.27
উবাচ ভার্যামিত্যুক্তো জরত্কারুর্মহাতপাঃ
ঋষিঃ কোপসমাবিষ্টস্ত্যক্তুকামো ভুজংগমাম্
43.28
ন মে বাগনৃতং প্রাহ গমিষ্যেঽহং ভুজংগমে
সময়ো হ্যেষ মে পূর্বং ত্বয়া সহ মিথঃ কৃতঃ
43.29
সুখমস্ম্যুষিতো ভদ্রে ব্রূয়াস্ত্বং ভ্রাতরং শুভে
ইতো ময়ি গতে ভীরু গতঃ স ভগবানিতি
ত্বং চাপি ময়ি নিষ্ক্রান্তে ন শোকং কর্তুমর্হসি
43.30
ইত্যুক্তা সানবদ্যাঙ্গী প্রত্যুবাচ পতিং তদা
জরত্কারুং জরত্কারুশ্চিন্তাশোকপরায়ণা
43.31
বাষ্পগদ্গদয়া বাচা মুখেন পরিশুষ্যতা
কৃতাঞ্জলির্বরারোহা পর্যশ্রুনয়না ততঃ
ধৈর্যমালম্ব্য বামোরূর্হৃদয়েন প্রবেপতা
43.32
ন মামর্হসি ধর্মজ্ঞ পরিত্যক্তুমনাগসম্
ধর্মে স্থিতাং স্থিতো ধর্মে সদা প্রিয়হিতে রতাম্
43.33
প্রদানে কারণং যচ্চ মম তুভ্যং দ্বিজোত্তম
তদলব্ধবতীং মন্দাং কিং মাং বক্ষ্যতি বাসুকিঃ
43.34
মাতৃশাপাভিভূতানাং জ্ঞাতীনাং মম সত্তম
অপত্যমীপ্ষিতং ত্বত্তস্তচ্চ তাবন্ন দৃশ্যতে
43.35
ত্বত্তো হ্যপত্যলাভেন জ্ঞাতীনাং মে শিবং ভবেৎ
সংপ্রয়োগো ভবেন্নায়ং মম মোঘস্ত্বয়া দ্বিজ
43.36
জ্ঞাতীনাং হিতমিচ্ছন্তী ভগবংস্ত্বাং প্রসাদয়ে
ইমমব্যক্তরূপং মে গর্ভমাধায় সত্তম
কথং ত্যক্ত্বা মহাত্মা সন্গন্তুমিচ্ছস্যনাগসম্
43.37
এবমুক্তস্তু স মুনির্ভার্যাং বচনমব্রবীৎ
যদ্যুক্তমনুরূপং চ জরত্কারুস্তপোধনঃ
43.38
অস্ত্যেষ গর্ভঃ সুভগে তব বৈশ্বানরোপমঃ
ঋষিঃ পরমধর্মাত্মা বেদবেদাঙ্গপারগঃ
43.39
এবমুক্ত্বা স ধর্মাত্মা জরত্কারুর্মহানৃষিঃ
উগ্রায় তপসে ভূয়ো জগাম কৃতনিশ্চয়ঃ