Utshovঅধ্যায় 42
42.1
সূত উবাচ
এতচ্ছ্রুত্বা জরত্কারুর্দুঃখশোকপরায়ণঃ
উবাচ স্বান্পিতৄন্দুঃখাদ্বাষ্পসংদিগ্ধয়া গিরা
42.2
অহমেব জরত্কারুঃ কিল্বিষী ভবতাং সুতঃ
তদ্দণ্ডং ধারয়ত মে দুষ্কৃতেরকৃতাত্মনঃ
42.3
পিতর ঊচুঃ
পুত্র দিষ্ট্যাসি সংপ্রাপ্ত ইমং দেশং যদৃচ্ছয়া
কিমর্থং চ ত্বয়া ব্রহ্মন্ন কৃতো দারসংগ্রহঃ
42.4
জরত্কারুরুবাচ
মমায়ং পিতরো নিত্যং হৃদ্যর্থঃ পরিবর্ততে
ঊর্ধ্বরেতাঃ শরীরং বৈ প্রাপয়েয়মমুত্র বৈ
42.5
এবং দৃষ্ট্বা তু ভবতঃ শকুন্তানিব লম্বতঃ
ময়া নিবর্তিতা বুদ্ধির্ব্রহ্মচর্যাত্পিতামহাঃ
42.6
করিষ্যে বঃ প্রিয়ং কামং নিবেক্ষ্যে নাত্র সংশয়ঃ
সনাম্নীং যদ্যহং কন্যামুপলপ্স্যে কদাচন
42.7
ভবিষ্যতি চ যা কাচিদ্ভৈক্ষবত্স্বয়মুদ্যতা
প্রতিগ্রহীতা তামস্মি ন ভরেয়ং চ যামহম্
42.8
এবংবিধমহং কুর্যাং নিবেশং প্রাপ্নুয়াং যদি
অন্যথা ন করিষ্যে তু সত্যমেতত্পিতামহাঃ
42.9
সূত উবাচ
এবমুক্ত্বা তু স পিতৄংশ্চচার পৃথিবীং মুনিঃ
ন চ স্ম লভতে ভার্যাং বৃদ্ধোঽয়মিতি শৌনক
42.10
যদা নির্বেদমাপন্নঃ পিতৃভিশ্চোদিতস্তথা
তদারণ্যং স গত্বোচ্চৈশ্চুক্রোশ ভৃশদুঃখিতঃ
42.11
যানি ভূতানি সন্তীহ স্থাবরাণি চরাণি চ
অন্তর্হিতানি বা যানি তানি শৃণ্বন্তু মে বচঃ
42.12
উগ্রে তপসি বর্তন্তং পিতরশ্চোদয়ন্তি মাম্
নিবিশস্বেতি দুঃখার্তাস্তেষাং প্রিয়চিকীর্ষয়া
42.13
নিবেশার্থ্যখিলাং ভূমিং কন্যাভৈক্ষং চরামি ভোঃ
দরিদ্রো দুঃখশীলশ্চ পিতৃভিঃ সংনিয়োজিতঃ
42.14
যস্য কন্যাস্তি ভূতস্য যে ময়েহ প্রকীর্তিতাঃ
তে মে কন্যাং প্রয়চ্ছন্তু চরতঃ সর্বতোদিশম্
42.15
মম কন্যা সনাম্নী যা ভৈক্ষবচ্চোদ্যতা ভবেৎ
ভরেয়ং চৈব যাং নাহং তাং মে কন্যাং প্রয়চ্ছত
42.16
ততস্তে পন্নগা যে বৈ জরত্কারৌ সমাহিতাঃ
তামাদায় প্রবৃত্তিং তে বাসুকেঃ প্রত্যবেদয়ন্
42.17
তেষাং শ্রুত্বা স নাগেন্দ্রঃ কন্যাং তাং সমলংকৃতাম্
প্রগৃহ্যারণ্যমগমত্সমীপং তস্য পন্নগঃ
42.18
তত্র তাং ভৈক্ষবত্কন্যাং প্রাদাত্তস্মৈ মহাত্মনে
নাগেন্দ্রো বাসুকির্ব্রহ্মন্ন স তাং প্রত্যগৃহ্ণত
42.19
অসনামেতি বৈ মত্বা ভরণে চাবিচারিতে
মোক্ষভাবে স্থিতশ্চাপি দ্বন্দ্বীভূতঃ পরিগ্রহে
42.20
ততো নাম স কন্যায়াঃ পপ্রচ্ছ ভৃগুনন্দন
বাসুকে ভরণং চাস্যা ন কুর্যামিত্যুবাচ হ