Utshovঅধ্যায় 41
41.1
সূত উবাচ
এতস্মিন্নেব কালে তু জরত্কারুর্মহাতপাঃ
চচার পৃথিবীং কৃত্স্নাং যত্রসায়ংগৃহো মুনিঃ
41.2
চরন্দীক্ষাং মহাতেজা দুশ্চরামকৃতাত্মভিঃ
তীর্থেষ্বাপ্লবনং কুর্বন্পুণ্যেষু বিচচার হ
41.3
বায়ুভক্ষো নিরাহারঃ শুষ্যন্নহরহর্মুনিঃ
স দদর্শ পিতৄন্গর্তে লম্বমানানধোমুখান্
41.4
একতন্ত্ববশিষ্টং বৈ বীরণস্তম্বমাশ্রিতান্
তং চ তন্তুং শনৈরাখুমাদদানং বিলাশ্রয়ম্
41.5
নিরাহারান্কৃশান্দীনান্গর্তেঽঽর্তাংস্ত্রাণমিচ্ছতঃ
উপসৃত্য স তান্দীনান্দীনরূপোঽভ্যভাষত
41.6
কে ভবন্তোঽবলম্বন্তে বীরণস্তম্বমাশ্রিতাঃ
দুর্বলং খাদিতৈর্মূলৈরাখুনা বিলবাসিনা
41.7
বীরণস্তম্বকে মূলং যদপ্যেকমিহ স্থিতম্
তদপ্যয়ং শনৈরাখুরাদত্তে দশনৈঃ শিতৈঃ
41.8
ছেত্স্যতেঽল্পাবশিষ্টত্বাদেতদপ্যচিরাদিব
ততঃ স্থ পতিতারোঽত্র গর্তে অস্মিন্নধোমুখাঃ
41.9
ততো মে দুঃখমুত্পন্নং দৃষ্ট্বা যুষ্মানধোমুখান্
কৃচ্ছ্রামাপদমাপন্নান্প্রিয়ং কিং করবাণি বঃ
41.10
তপসোঽস্য চতুর্থেন তৃতীয়েনাপি বা পুনঃ
অর্ধেন বাপি নিস্তর্তুমাপদং ব্রূত মাচিরম্
41.11
অথ বাপি সমগ্রেণ তরন্তু তপসা মম
ভবন্তঃ সর্ব এবাস্মাত্কামমেবং বিধীয়তাম্
41.12
পিতর ঊচুঃ
ঋদ্ধো ভবান্ব্রহ্মচারী যো নস্ত্রাতুমিহেচ্ছতি
ন তু বিপ্রাগ্র্য তপসা শক্যমেতদ্ব্যপোহিতুম্
41.13
অস্তি নস্তাত তপসঃ ফলং প্রবদতাং বর
সংতানপ্রক্ষয়াদ্ব্রহ্মন্পতামো নিরয়েঽশুচৌ
41.14
লম্বতামিহ নস্তাত ন জ্ঞানং প্রতিভাতি বৈ
যেন ত্বাং নাভিজানীমো লোকে বিখ্যাতপৌরুষম্
41.15
ঋদ্ধো ভবান্মহাভাগো যো নঃ শোচ্যান্সুদুঃখিতান্
শোচস্যুপেত্য কারুণ্যাচ্ছৃণু যে বৈ বয়ং দ্বিজ
41.16
যায়াবরা নাম বয়মৃষয়ঃ সংশিতব্রতাঃ
লোকাত্পুণ্যাদিহ ভ্রষ্টাঃ সংতানপ্রক্ষয়াদ্বিভো
41.17
প্রনষ্টং নস্তপঃ পুণ্যং ন হি নস্তন্তুরস্তি বৈ
অস্তি ত্বেকোঽদ্য নস্তন্তুঃ সোঽপি নাস্তি যথা তথা
41.18
মন্দভাগ্যোঽল্পভাগ্যানাং বন্ধুঃ স কিল নঃ কুলে
জরত্কারুরিতি খ্যাতো বেদবেদাঙ্গপারগঃ
নিয়তাত্মা মহাত্মা চ সুব্রতঃ সুমহাতপাঃ
41.19
তেন স্ম তপসো লোভাত্কৃচ্ছ্রমাপাদিতা বয়ম্
ন তস্য ভার্যা পুত্রো বা বান্ধবো বাস্তি কশ্চন
41.20
তস্মাল্লম্বামহে গর্তে নষ্টসংজ্ঞা হ্যনাথবৎ
স বক্তব্যস্ত্বয়া দৃষ্ট্বা অস্মাকং নাথবত্তয়া
41.21
পিতরস্তেঽবলম্বন্তে গর্তে দীনা অধোমুখাঃ
সাধু দারান্কুরুষ্বেতি প্রজায়স্বেতি চাভিভো
কুলতন্তুর্হি নঃ শিষ্টস্ত্বমেবৈকস্তপোধন
41.22
যং তু পশ্যসি নো ব্রহ্মন্বীরণস্তম্বমাশ্রিতান্
এষোঽস্মাকং কুলস্তম্ব আসীত্স্বকুলবর্ধনঃ
41.23
যানি পশ্যসি বৈ ব্রহ্মন্মূলানীহাস্য বীরুধঃ
এতে নস্তন্তবস্তাত কালেন পরিভক্ষিতাঃ
41.24
যত্ত্বেতত্পশ্যসি ব্রহ্মন্মূলমস্যার্ধভক্ষিতম্
তত্র লম্বামহে সর্বে সোঽপ্যেকস্তপ আস্থিতঃ
41.25
যমাখুং পশ্যসি ব্রহ্মন্কাল এষ মহাবলঃ
স তং তপোরতং মন্দং শনৈঃ ক্ষপয়তে তুদন্
জরত্কারুং তপোলুব্ধং মন্দাত্মানমচেতসম্
41.26
ন হি নস্তত্তপস্তস্য তারয়িষ্যতি সত্তম
ছিন্নমূলান্পরিভ্রষ্টান্কালোপহতচেতসঃ
নরকপ্রতিষ্ঠান্পশ্যাস্মান্যথা দুষ্কৃতিনস্তথা
41.27
অস্মাসু পতিতেষ্বত্র সহ পূর্বৈঃ পিতামহৈঃ
ছিন্নঃ কালেন সোঽপ্যত্র গন্তা বৈ নরকং ততঃ
41.28
তপো বাপ্যথ বা যজ্ঞো যচ্চান্যত্পাবনং মহৎ
তত্সর্বং ন সমং তাত সংতত্যেতি সতাং মতম্
41.29
স তাত দৃষ্ট্বা ব্রূয়াস্ত্বং জরত্কারুং তপস্বিনম্
যথাদৃষ্টমিদং চাস্মৈ ত্বয়াখ্যেয়মশেষতঃ
41.30
যথা দারান্প্রকুর্যাত্স পুত্রাংশ্চোত্পাদয়েদ্যথা
তথা ব্রহ্মংস্ত্বয়া বাচ্যঃ সোঽস্মাকং নাথবত্তয়া