অধ্যায় 40

40.1

সূত উবাচ
তং তথা মন্ত্রিণো দৃষ্ট্বা ভোগেন পরিবেষ্টিতম্
বিবর্ণবদনাঃ সর্বে রুরুদুর্ভৃশদুঃখিতাঃ

তং তু নাদং ততঃ শ্রুত্বা মন্ত্রিণস্তে প্রদুদ্রুবুঃ
অপশ্যংশ্চৈব তে যান্তমাকাশে নাগমদ্ভুতম্

সীমন্তমিব কুর্বাণং নভসঃ পদ্মবর্চসম্
তক্ষকং পন্নগশ্রেষ্ঠং ভৃশং শোকপরায়ণাঃ

ততস্তু তে তদ্গৃহমগ্নিনা বৃতং; প্রদীপ্যমানং বিষজেন ভোগিনঃ
ভয়াত্পরিত্যজ্য দিশঃ প্রপেদিরে; পপাত তচ্চাশনিতাডিতং যথা

ততো নৃপে তক্ষকতেজসা হতে; প্রয়ুজ্য সর্বাঃ পরলোকসত্ক্রিয়াঃ
শুচির্দ্বিজো রাজপুরোহিতস্তদা; তথৈব তে তস্য নৃপস্য মন্ত্রিণঃ

নৃপং শিশুং তস্য সুতং প্রচক্রিরে; সমেত্য সর্বে পুরবাসিনো জনাঃ
নৃপং যমাহুস্তমমিত্রঘাতিনং; কুরুপ্রবীরং জনমেজয়ং জনাঃ

স বাল এবার্যমতির্নৃপোত্তমঃ; সহৈব তৈর্মন্ত্রিপুরোহিতৈস্তদা
শশাস রাজ্যং কুরুপুংগবাগ্রজো; যথাস্য বীরঃ প্রপিতামহস্তথা

ততস্তু রাজানমমিত্রতাপনং; সমীক্ষ্য তে তস্য নৃপস্য মন্ত্রিণঃ
সুবর্ণবর্মাণমুপেত্য কাশিপং; বপুষ্টমার্থং বরয়াং প্রচক্রমুঃ

ততঃ স রাজা প্রদদৌ বপুষ্টমাং; কুরুপ্রবীরায় পরীক্ষ্য ধর্মতঃ
স চাপি তাং প্রাপ্য মুদা যুতোঽভব;ন্ন চান্যনারীষু মনো দধে ক্বচিৎ

সরঃসু ফুল্লেষু বনেষু চৈব হ; প্রসন্নচেতা বিজহার বীর্যবান্
তথা স রাজন্যবরো বিজহ্রিবা;ন্যথোর্বশীং প্রাপ্য পুরা পুরূরবাঃ

বপুষ্টমা চাপি বরং পতিং তদা; প্রতীতরূপং সমবাপ্য ভূমিপম্
ভাবেন রামা রময়াং বভূব বৈ; বিহারকালেষ্ববরোধসুন্দরী