Utshovঅধ্যায় 39
39.1
তক্ষক উবাচ
দষ্টং যদি ময়েহ ত্বং শক্তঃ কিংচিচ্চিকিত্সিতুম্
ততো বৃক্ষং ময়া দষ্টমিমং জীবয় কাশ্যপ
39.2
পরং মন্ত্রবলং যত্তে তদ্দর্শয় যতস্ব চ
ন্যগ্রোধমেনং ধক্ষ্যামি পশ্যতস্তে দ্বিজোত্তম
39.3
কাশ্যপ উবাচ
দশ নাগেন্দ্র বৃক্ষং ত্বং যমেনমভিমন্যসে
অহমেনং ত্বয়া দষ্টং জীবয়িষ্যে ভুজংগম
39.4
সূত উবাচ
এবমুক্তঃ স নাগেন্দ্রঃ কাশ্যপেন মহাত্মনা
অদশদ্বৃক্ষমভ্যেত্য ন্যগ্রোধং পন্নগোত্তমঃ
39.5
স বৃক্ষস্তেন দষ্টঃ সন্সদ্য এব মহাদ্যুতে
আশীবিষবিষোপেতঃ প্রজজ্বাল সমন্ততঃ
39.6
তং দগ্ধ্বা স নগং নাগঃ কাশ্যপং পুনরব্রবীৎ
কুরু যত্নং দ্বিজশ্রেষ্ঠ জীবয়ৈনং বনস্পতিম্
39.7
ভস্মীভূতং ততো বৃক্ষং পন্নগেন্দ্রস্য তেজসা
ভস্ম সর্বং সমাহৃত্য কাশ্যপো বাক্যমব্রবীৎ
39.8
বিদ্যাবলং পন্নগেন্দ্র পশ্য মেঽস্মিন্বনস্পতৌ
অহং সংজীবয়াম্যেনং পশ্যতস্তে ভুজংগম
39.9
ততঃ স ভগবান্বিদ্বান্কাশ্যপো দ্বিজসত্তমঃ
ভস্মরাশীকৃতং বৃক্ষং বিদ্যয়া সমজীবয়ৎ
39.10
অঙ্কুরং তং স কৃতবাংস্ততঃ পর্ণদ্বয়ান্বিতম্
পলাশিনং শাখিনং চ তথা বিটপিনং পুনঃ
39.11
তং দৃষ্ট্বা জীবিতং বৃক্ষং কাশ্যপেন মহাত্মনা
উবাচ তক্ষকো ব্রহ্মন্নেতদত্যদ্ভুতং ত্বয়ি
39.12
বিপ্রেন্দ্র যদ্বিষং হন্যা মম বা মদ্বিধস্য বা
কং ত্বমর্থমভিপ্রেপ্সুর্যাসি তত্র তপোধন
39.13
যত্তেঽভিলষিতং প্রাপ্তুং ফলং তস্মান্নৃপোত্তমাৎ
অহমেব প্রদাস্যামি তত্তে যদ্যপি দুর্লভম্
39.14
বিপ্রশাপাভিভূতে চ ক্ষীণায়ুষি নরাধিপে
ঘটমানস্য তে বিপ্র সিদ্ধিঃ সংশয়িতা ভবেৎ
39.15
ততো যশঃ প্রদীপ্তং তে ত্রিষু লোকেষু বিশ্রুতম্
বিরশ্মিরিব ঘর্মাংশুরন্তর্ধানমিতো ব্রজেৎ
39.16
কাশ্যপ উবাচ
ধনার্থী যাম্যহং তত্র তন্মে দিত্স ভুজংগম
ততোঽহং বিনিবর্তিষ্যে গৃহায়োরগসত্তম
39.17
তক্ষক উবাচ
যাবদ্ধনং প্রার্থয়সে তস্মাদ্রাজ্ঞস্ততোঽধিকম্
অহং তেঽদ্য প্রদাস্যামি নিবর্তস্ব দ্বিজোত্তম
39.18
সূত উবাচ
তক্ষকস্য বচঃ শ্রুত্বা কাশ্যপো দ্বিজসত্তমঃ
প্রদধ্যৌ সুমহাতেজা রাজানং প্রতি বুদ্ধিমান্
39.19
দিব্যজ্ঞানঃ স তেজস্বী জ্ঞাত্বা তং নৃপতিং তদা
ক্ষীণায়ুষং পাণ্ডবেয়মপাবর্তত কাশ্যপঃ
লব্ধ্বা বিত্তং মুনিবরস্তক্ষকাদ্যাবদীপ্সিতম্
39.20
নিবৃত্তে কাশ্যপে তস্মিন্সময়েন মহাত্মনি
জগাম তক্ষকস্তূর্ণং নগরং নাগসাহ্বয়ম্
39.21
অথ শুশ্রাব গচ্ছন্স তক্ষকো জগতীপতিম্
মন্ত্রাগদৈর্বিষহরৈ রক্ষ্যমাণং প্রয়ত্নতঃ
39.22
স চিন্তয়ামাস তদা মায়ায়োগেন পার্থিবঃ
ময়া বঞ্চয়িতব্যোঽসৌ ক উপায়ো ভবেদিতি
39.23
ততস্তাপসরূপেণ প্রাহিণোত্স ভুজংগমান্
ফলপত্রোদকং গৃহ্য রাজ্ঞে নাগোঽথ তক্ষকঃ
39.24
তক্ষক উবাচ
গচ্ছধ্বং যূয়মব্যগ্রা রাজানং কার্যবত্তয়া
ফলপত্রোদকং নাম প্রতিগ্রাহয়িতুং নৃপম্
39.25
সূত উবাচ
তে তক্ষকসমাদিষ্টাস্তথা চক্রুর্ভুজংগমাঃ
উপনিন্যুস্তথা রাজ্ঞে দর্ভানাপঃ ফলানি চ
39.26
তচ্চ সর্বং স রাজেন্দ্রঃ প্রতিজগ্রাহ বীর্যবান্
কৃত্বা চ তেষাং কার্যাণি গম্যতামিত্যুবাচ তান্
39.27
গতেষু তেষু নাগেষু তাপসচ্ছদ্মরূপিষু
অমাত্যান্সুহৃদশ্চৈব প্রোবাচ স নরাধিপঃ
39.28
ভক্ষয়ন্তু ভবন্তো বৈ স্বাদূনীমানি সর্বশঃ
তাপসৈরুপনীতানি ফলানি সহিতা ময়া
39.29
ততো রাজা সসচিবঃ ফলান্যাদাতুমৈচ্ছত
যদ্গৃহীতং ফলং রাজ্ঞা তত্র কৃমিরভূদণুঃ
হ্রস্বকঃ কৃষ্ণনয়নস্তাম্রো বর্ণেন শৌনক
39.30
স তং গৃহ্য নৃপশ্রেষ্ঠঃ সচিবানিদমব্রবীৎ
অস্তমভ্যেতি সবিতা বিষাদদ্য ন মে ভয়ম্
39.31
সত্যবাগস্তু স মুনিঃ কৃমিকো মাং দশত্বয়ম্
তক্ষকো নাম ভূত্বা বৈ তথা পরিহৃতং ভবেৎ
39.32
তে চৈনমন্ববর্তন্ত মন্ত্রিণঃ কালচোদিতাঃ
এবমুক্ত্বা স রাজেন্দ্রো গ্রীবায়াং সংনিবেশ্য হ
কৃমিকং প্রাহসত্তূর্ণং মুমূর্ষুর্নষ্টচেতনঃ
39.33
হসন্নেব চ ভোগেন তক্ষকেণাভিবেষ্টিতঃ
তস্মাত্ফলাদ্বিনিষ্ক্রম্য যত্তদ্রাজ্ঞে নিবেদিতম্