Utshovঅধ্যায় 38
38.1
শৃঙ্গ্যুবাচ
যদ্যেতত্সাহসং তাত যদি বা দুষ্কৃতং কৃতম্
প্রিয়ং বাপ্যপ্রিয়ং বা তে বাগুক্তা ন মৃষা ময়া
38.2
নৈবান্যথেদং ভবিতা পিতরেষ ব্রবীমি তে
নাহং মৃষা প্রব্রবীমি স্বৈরেষ্বপি কুতঃ শপন্
38.3
শমীক উবাচ
জানাম্যুগ্রপ্রভাবং ত্বাং পুত্র সত্যগিরং তথা
নানৃতং হ্যুক্তপূর্বং তে নৈতন্মিথ্যা ভবিষ্যতি
38.4
পিত্রা পুত্রো বয়ঃস্থোঽপি সততং বাচ্য এব তু
যথা স্যাদ্গুণসংয়ুক্তঃ প্রাপ্নুয়াচ্চ মহদ্যশঃ
38.5
কিং পুনর্বাল এব ত্বং তপসা ভাবিতঃ প্রভো
বর্ধতে চ প্রভবতাং কোপোঽতীব মহাত্মনাম্
38.6
সোঽহং পশ্যামি বক্তব্যং ত্বয়ি ধর্মভৃতাং বর
পুত্রত্বং বালতাং চৈব তবাবেক্ষ্য চ সাহসম্
38.7
স ত্বং শময়ুতো ভূত্বা বন্যমাহারমাহরন্
চর ক্রোধমিমং ত্যক্ত্বা নৈবং ধর্মং প্রহাস্যসি
38.8
ক্রোধো হি ধর্মং হরতি যতীনাং দুঃখসংচিতম্
ততো ধর্মবিহীনানাং গতিরিষ্টা ন বিদ্যতে
38.9
শম এব যতীনাং হি ক্ষমিণাং সিদ্ধিকারকঃ
ক্ষমাবতাময়ং লোকঃ পরশ্চৈব ক্ষমাবতাম্
38.10
তস্মাচ্চরেথাঃ সততং ক্ষমাশীলো জিতেন্দ্রিয়ঃ
ক্ষময়া প্রাপ্স্যসে লোকান্ব্রহ্মণঃ সমনন্তরান্
38.11
ময়া তু শমমাস্থায় যচ্ছক্যং কর্তুমদ্য বৈ
তত্করিষ্যেঽদ্য তাতাহং প্রেষয়িষ্যে নৃপায় বৈ
38.12
মম পুত্রেণ শপ্তোঽসি বালেনাকৃতবুদ্ধিনা
মমেমাং ধর্ষণাং ত্বত্তঃ প্রেক্ষ্য রাজন্নমর্ষিণা
38.13
সূত উবাচ
এবমাদিশ্য শিষ্যং স প্রেষয়ামাস সুব্রতঃ
পরিক্ষিতে নৃপতয়ে দয়াপন্নো মহাতপাঃ
38.14
সংদিশ্য কুশলপ্রশ্নং কার্যবৃত্তান্তমেব চ
শিষ্যং গৌরমুখং নাম শীলবন্তং সমাহিতম্
38.15
সোঽভিগম্য ততঃ শীঘ্রং নরেন্দ্রং কুরুবর্ধনম্
বিবেশ ভবনং রাজ্ঞঃ পূর্বং দ্বাঃস্থৈর্নিবেদিতঃ
38.16
পূজিতশ্চ নরেন্দ্রেণ দ্বিজো গৌরমুখস্ততঃ
আচখ্যৌ পরিবিশ্রান্তো রাজ্ঞে সর্বমশেষতঃ
শমীকবচনং ঘোরং যথোক্তং মন্ত্রিসংনিধৌ
38.17
শমীকো নাম রাজেন্দ্র বিষয়ে বর্ততে তব
ঋষিঃ পরমধর্মাত্মা দান্তঃ শান্তো মহাতপাঃ
38.18
তস্য ত্বয়া নরব্যাঘ্র সর্পঃ প্রাণৈর্বিয়োজিতঃ
অবসক্তো ধনুষ্কোট্যা স্কন্ধে ভরতসত্তম
ক্ষান্তবাংস্তব তত্কর্ম পুত্রস্তস্য ন চক্ষমে
38.19
তেন শপ্তোঽসি রাজেন্দ্র পিতুরজ্ঞাতমদ্য বৈ
তক্ষকঃ সপ্তরাত্রেণ মৃত্যুস্তে বৈ ভবিষ্যতি
38.20
তত্র রক্ষাং কুরুষ্বেতি পুনঃ পুনরথাব্রবীৎ
তদন্যথা ন শক্যং চ কর্তুং কেনচিদপ্যুত
38.21
ন হি শক্নোতি সংয়ন্তুং পুত্রং কোপসমন্বিতম্
ততোঽহং প্রেষিতস্তেন তব রাজন্হিতার্থিনা
38.22
ইতি শ্রুত্বা বচো ঘোরং স রাজা কুরুনন্দনঃ
পর্যতপ্যত তত্পাপং কৃত্বা রাজা মহাতপাঃ
38.23
তং চ মৌনব্রতধরং শ্রুত্বা মুনিবরং তদা
ভূয় এবাভবদ্রাজা শোকসংতপ্তমানসঃ
38.24
অনুক্রোশাত্মতাং তস্য শমীকস্যাবধার্য তু
পর্যতপ্যত ভূয়োঽপি কৃত্বা তত্কিল্বিষং মুনেঃ
38.25
ন হি মৃত্যুং তথা রাজা শ্রুত্বা বৈ সোঽন্বতপ্যত
অশোচদমরপ্রখ্যো যথা কৃত্বেহ কর্ম তৎ
38.26
ততস্তং প্রেষয়ামাস রাজা গৌরমুখং তদা
ভূয়ঃ প্রসাদং ভগবান্করোত্বিতি মমেতি বৈ
38.27
তস্মিংশ্চ গতমাত্রে বৈ রাজা গৌরমুখে তদা
মন্ত্রিভির্মন্ত্রয়ামাস সহ সংবিগ্নমানসঃ
38.28
নিশ্চিত্য মন্ত্রিভিশ্চৈব সহিতো মন্ত্রতত্ত্ববিৎ
প্রাসাদং কারয়ামাস একস্তম্ভং সুরক্ষিতম্
38.29
রক্ষাং চ বিদধে তত্র ভিষজশ্চৌষধানি চ
ব্রাহ্মণান্সিদ্ধমন্ত্রাংশ্চ সর্বতো বৈ ন্যবেশয়ৎ
38.30
রাজকার্যাণি তত্রস্থঃ সর্বাণ্যেবাকরোচ্চ সঃ
মন্ত্রিভিঃ সহ ধর্মজ্ঞঃ সমন্তাত্পরিরক্ষিতঃ
38.31
প্রাপ্তে তু দিবসে তস্মিন্সপ্তমে দ্বিজসত্তম
কাশ্যপোঽভ্যাগমদ্বিদ্বাংস্তং রাজানং চিকিত্সিতুম্
38.32
শ্রুতং হি তেন তদভূদদ্য তং রাজসত্তমম্
তক্ষকঃ পন্নগশ্রেষ্ঠো নেষ্যতে যমসাদনম্
38.33
তং দষ্টং পন্নগেন্দ্রেণ করিষ্যেঽহমপজ্বরম্
তত্র মেঽর্থশ্চ ধর্মশ্চ ভবিতেতি বিচিন্তয়ন্
38.34
তং দদর্শ স নাগেন্দ্রস্তক্ষকঃ কাশ্যপং পথি
গচ্ছন্তমেকমনসং দ্বিজো ভূত্বা বয়োতিগঃ
38.35
তমব্রবীত্পন্নগেন্দ্রঃ কাশ্যপং মুনিপুংগবম্
ক্ব ভবাংস্ত্বরিতো যাতি কিং চ কার্যং চিকীর্ষতি
38.36
কাশ্যপ উবাচ
নৃপং কুরুকুলোত্পন্নং পরিক্ষিতমরিংদমম্
তক্ষকঃ পন্নগশ্রেষ্ঠস্তেজসাদ্য প্রধক্ষ্যতি
38.37
তং দষ্টং পন্নগেন্দ্রেণ তেনাগ্নিসমতেজসা
পাণ্ডবানাং কুলকরং রাজানমমিতৌজসম্
গচ্ছামি সৌম্য ত্বরিতং সদ্যঃ কর্তুমপজ্বরম্
38.38
তক্ষক উবাচ
অহং স তক্ষকো ব্রহ্মংস্তং ধক্ষ্যামি মহীপতিম্
নিবর্তস্ব ন শক্তস্ত্বং ময়া দষ্টং চিকিত্সিতুম্
38.39
কাশ্যপ উবাচ
অহং তং নৃপতিং নাগ ত্বয়া দষ্টমপজ্বরম্
করিষ্য ইতি মে বুদ্ধির্বিদ্যাবলমুপাশ্রিতঃ