অধ্যায় 37

37.1

সূত উবাচ
এবমুক্তঃ স তেজস্বী শৃঙ্গী কোপসমন্বিতঃ
মৃতধারং গুরুং শ্রুত্বা পর্যতপ্যত মন্যুনা

37.2

স তং কৃশমভিপ্রেষ্ক্য সূনৃতাং বাচমুত্সৃজন্
অপৃচ্ছত কথং তাতঃ স মেঽদ্য মৃতধারকঃ

37.3

কৃশ উবাচ
রাজ্ঞা পরিক্ষিতা তাত মৃগয়াং পরিধাবতা
অবসক্তঃ পিতুস্তেঽদ্য মৃতঃ স্কন্ধে ভুজংগমঃ

37.4

শৃঙ্গ্যুবাচ
কিং মে পিত্রা কৃতং তস্য রাজ্ঞোঽনিষ্টং দুরাত্মনঃ
ব্রূহি ত্বং কৃশ তত্ত্বেন পশ্য মে তপসো বলম্

37.5

কৃশ উবাচ
স রাজা মৃগয়াং যাতঃ পরিক্ষিদভিমন্যুজঃ
সসার মৃগমেকাকী বিদ্ধ্বা বাণেন পত্রিণা

37.6

ন চাপশ্যন্মৃগং রাজা চরংস্তস্মিন্মহাবনে
পিতরং তে স দৃষ্ট্বৈব পপ্রচ্ছানভিভাষিণম্

37.7

তং স্থাণুভূতং তিষ্ঠন্তং ক্ষুত্পিপাসাশ্রমাতুরঃ
পুনঃ পুনর্মৃগং নষ্টং পপ্রচ্ছ পিতরং তব

37.8

স চ মৌনব্রতোপেতো নৈব তং প্রত্যভাষত
তস্য রাজা ধনুষ্কোট্যা সর্পং স্কন্ধে সমাসৃজৎ

37.9

শৃঙ্গিংস্তব পিতাদ্যাসৌ তথৈবাস্তে যতব্রতঃ
সোঽপি রাজা স্বনগরং প্রতিয়াতো গজাহ্বয়ম্

37.10

সূত উবাচ
শ্রুত্বৈবমৃষিপুত্রস্তু দিবং স্তব্ধ্বেব বিষ্ঠিতঃ
কোপসংরক্তনয়নঃ প্রজ্বলন্নিব মন্যুনা

37.11

আবিষ্টঃ স তু কোপেন শশাপ নৃপতিং তদা
বার্যুপস্পৃশ্য তেজস্বী ক্রোধবেগবলাত্কৃতঃ

37.12

শৃঙ্গ্যুবাচ
যোঽসৌ বৃদ্ধস্য তাতস্য তথা কৃচ্ছ্রগতস্য চ
স্কন্ধে মৃতমবাস্রাক্ষীত্পন্নগং রাজকিল্বিষী

37.13

তং পাপমতিসংক্রুদ্ধস্তক্ষকঃ পন্নগোত্তমঃ
আশীবিষস্তিগ্মতেজা মদ্বাক্যবলচোদিতঃ

37.14

সপ্তরাত্রাদিতো নেতা যমস্য সদনং প্রতি
দ্বিজানামবমন্তারং কুরূণাময়শস্করম্

37.15

সূত উবাচ
ইতি শপ্ত্বা নৃপং ক্রুদ্ধঃ শৃঙ্গী পিতরমভ্যয়াৎ
আসীনং গোচরে তস্মিন্বহন্তং শবপন্নগম্

37.16

স তমালক্ষ্য পিতরং শৃঙ্গী স্কন্ধগতেন বৈ
শবেন ভুজগেনাসীদ্ভূয়ঃ ক্রোধসমন্বিতঃ

37.17

দুঃখাচ্চাশ্রূণি মুমুচে পিতরং চেদমব্রবীৎ
শ্রুত্বেমাং ধর্ষণাং তাত তব তেন দুরাত্মনা

37.18

রাজ্ঞা পরিক্ষিতা কোপাদশপং তমহং নৃপম্
যথার্হতি স এবোগ্রং শাপং কুরুকুলাধমঃ

37.19

সপ্তমেঽহনি তং পাপং তক্ষকঃ পন্নগোত্তমঃ
বৈবস্বতস্য ভবনং নেতা পরমদারুণম্

37.20

তমব্রবীত্পিতা ব্রহ্মংস্তথা কোপসমন্বিতম্
ন মে প্রিয়ং কৃতং তাত নৈষ ধর্মস্তপস্বিনাম্

37.21

বয়ং তস্য নরেন্দ্রস্য বিষয়ে নিবসামহে
ন্যায়তো রক্ষিতাস্তেন তস্য পাপং ন রোচয়ে

37.22

সর্বথা বর্তমানস্য রাজ্ঞো হ্যস্মদ্বিধৈঃ সদা
ক্ষন্তব্যং পুত্র ধর্মো হি হতো হন্তি ন সংশয়ঃ

37.23

যদি রাজা ন রক্ষেত পীডা বৈ নঃ পরা ভবেৎ
ন শক্নুয়াম চরিতুং ধর্মং পুত্র যথাসুখম্

37.24

রক্ষ্যমাণা বয়ং তাত রাজভিঃ শাস্ত্রদৃষ্টিভিঃ
চরামো বিপুলং ধর্মং তেষাং চাংশোঽস্তি ধর্মতঃ

37.25

পরিক্ষিত্তু বিশেষেণ যথাস্য প্রপিতামহঃ
রক্ষত্যস্মান্যথা রাজ্ঞা রক্ষিতব্যাঃ প্রজাস্তথা

37.26

তেনেহ ক্ষুধিতেনাদ্য শ্রান্তেন চ তপস্বিনা
অজানতা ব্রতমিদং কৃতমেতদসংশয়ম্

37.27

তস্মাদিদং ত্বয়া বাল্যাত্সহসা দুষ্কৃতং কৃতম্
ন হ্যর্হতি নৃপঃ শাপমস্মত্তঃ পুত্র সর্বথা

Contains text from DharmicData, made available under the Open Database License (ODbL). Simple meanings are written by AI and can contain mistakes.