Utshovঅধ্যায় 36
36.1
শৌনক উবাচ
জরত্কারুরিতি প্রোক্তং যত্ত্বয়া সূতনন্দন
ইচ্ছাম্যেতদহং তস্য ঋষেঃ শ্রোতুং মহাত্মনঃ
36.2
কিং কারণং জরত্কারোর্নামৈতত্প্রথিতং ভুবি
জরত্কারুনিরুক্তং ত্বং যথাবদ্বক্তুমর্হসি
36.3
সূত উবাচ
জরেতি ক্ষয়মাহুর্বৈ দারুণং কারুসংজ্ঞিতম্
শরীরং কারু তস্যাসীত্তত্স ধীমাঞ্শনৈঃ শনৈঃ
36.4
ক্ষপয়ামাস তীব্রেণ তপসেত্যত উচ্যতে
জরত্কারুরিতি ব্রহ্মন্বাসুকের্ভগিনী তথা
36.5
এবমুক্তস্তু ধর্মাত্মা শৌনকঃ প্রাহসত্তদা
উগ্রশ্রবসমামন্ত্র্য উপপন্নমিতি ব্রুবন্
36.6
সূত উবাচ
অথ কালস্য মহতঃ স মুনিঃ সংশিতব্রতঃ
তপস্যভিরতো ধীমান্ন দারানভ্যকাঙ্ক্ষত
36.7
স ঊর্ধ্বরেতাস্তপসি প্রসক্তঃ; স্বাধ্যায়বান্বীতভয়ক্লমঃ সন্
চচার সর্বাং পৃথিবীং মহাত্মা; ন চাপি দারান্মনসাপ্যকাঙ্ক্ষৎ
36.8
ততোঽপরস্মিন্সংপ্রাপ্তে কালে কস্মিংশ্চিদেব তু
পরিক্ষিদিতি বিখ্যাতো রাজা কৌরববংশভৃৎ
36.9
যথা পাণ্ডুর্মহাবাহুর্ধনুর্ধরবরো ভুবি
বভূব মৃগয়াশীলঃ পুরাস্য প্রপিতামহঃ
36.10
মৃগান্বিধ্যন্বরাহাংশ্চ তরক্ষূন্মহিষাংস্তথা
অন্যাংশ্চ বিবিধান্বন্যাংশ্চচার পৃথিবীপতিঃ
36.11
স কদাচিন্মৃগং বিদ্ধ্বা বাণেন নতপর্বণা
পৃষ্ঠতো ধনুরাদায় সসার গহনে বনে
36.12
যথা হি ভগবান্রুদ্রো বিদ্ধ্বা যজ্ঞমৃগং দিবি
অন্বগচ্ছদ্ধনুষ্পাণিঃ পর্যন্বেষংস্ততস্ততঃ
36.13
ন হি তেন মৃগো বিদ্ধো জীবন্গচ্ছতি বৈ বনম্
পূর্বরূপং তু তন্নূনমাসীত্স্বর্গগতিং প্রতি
পরিক্ষিতস্তস্য রাজ্ঞো বিদ্ধো যন্নষ্টবান্মৃগঃ
36.14
দূরং চাপহৃতস্তেন মৃগেণ স মহীপতিঃ
পরিশ্রান্তঃ পিপাসার্ত আসসাদ মুনিং বনে
36.15
গবাং প্রচারেষ্বাসীনং বত্সানাং মুখনিঃসৃতম্
ভূয়িষ্ঠমুপয়ুঞ্জানং ফেনমাপিবতাং পয়ঃ
36.16
তমভিদ্রুত্য বেগেন স রাজা সংশিতব্রতম্
অপৃচ্ছদ্ধনুরুদ্যম্য তং মুনিং ক্ষুচ্ছ্রমান্বিতঃ
36.17
ভো ভো ব্রহ্মন্নহং রাজা পরিক্ষিদভিমন্যুজঃ
ময়া বিদ্ধো মৃগো নষ্টঃ কচ্চিত্ত্বং দৃষ্টবানসি
36.18
স মুনিস্তস্য নোবাচ কিংচিন্মৌনব্রতে স্থিতঃ
তস্য স্কন্ধে মৃতং সর্পং ক্রুদ্ধো রাজা সমাসজৎ
36.19
ধনুষ্কোট্যা সমুত্ক্ষিপ্য স চৈনং সমুদৈক্ষত
ন চ কিংচিদুবাচৈনং শুভং বা যদি বাশুভম্
36.20
স রাজা ক্রোধমুত্সৃজ্য ব্যথিতস্তং তথাগতম্
দৃষ্ট্বা জগাম নগরমৃষিস্ত্বাস্তে তথৈব সঃ
36.21
তরুণস্তস্য পুত্রোঽভূত্তিগ্মতেজা মহাতপাঃ
শৃঙ্গী নাম মহাক্রোধো দুষ্প্রসাদো মহাব্রতঃ
36.22
স দেবং পরমীশানং সর্বভূতহিতে রতম্
ব্রহ্মাণমুপতস্থে বৈ কালে কালে সুসংয়তঃ
স তেন সমনুজ্ঞাতো ব্রহ্মণা গৃহমেয়িবান্
36.23
সখ্যোক্তঃ ক্রীডমানেন স তত্র হসতা কিল
সংরম্ভী কোপনোঽতীব বিষকল্প ঋষেঃ সুতঃ
ঋষিপুত্রেণ নর্মার্থং কৃশেন দ্বিজসত্তম
36.24
তেজস্বিনস্তব পিতা তথৈব চ তপস্বিনঃ
শবং স্কন্ধেন বহতি মা শৃঙ্গিন্গর্বিতো ভব
36.25
ব্যাহরত্স্বৃষিপুত্রেষু মা স্ম কিংচিদ্বচো বদীঃ
অস্মদ্বিধেষু সিদ্ধেষু ব্রহ্মবিত্সু তপস্বিষু
36.26
ক্ব তে পুরুষমানিত্বং ক্ব তে বাচস্তথাবিধাঃ
দর্পজাঃ পিতরং যস্ত্বং দ্রষ্টা শবধরং তথা