অধ্যায় 35

35.1

সূত উবাচ
এলাপত্রস্য তু বচঃ শ্রুত্বা নাগা দ্বিজোত্তম
সর্বে প্রহৃষ্টমনসঃ সাধু সাধ্বিত্যপূজয়ন্

ততঃ প্রভৃতি তাং কন্যাং বাসুকিঃ পর্যরক্ষত
জরত্কারুং স্বসারং বৈ পরং হর্ষমবাপ চ

ততো নাতিমহান্কালঃ সমতীত ইবাভবৎ
অথ দেবাসুরাঃ সর্বে মমন্থুর্বরুণালয়ম্

তত্র নেত্রমভূন্নাগো বাসুকির্বলিনাং বরঃ
সমাপ্যৈব চ তত্কর্ম পিতামহমুপাগমন্

দেবা বাসুকিনা সার্ধং পিতামহমথাব্রুবন্
ভগবঞ্শাপভীতোঽয়ং বাসুকিস্তপ্যতে ভৃশম্

তস্যেদং মানসং শল্যং সমুদ্ধর্তুং ত্বমর্হসি
জনন্যাঃ শাপজং দেব জ্ঞাতীনাং হিতকাঙ্ক্ষিণঃ

হিতো হ্যয়ং সদাস্মাকং প্রিয়কারী চ নাগরাট্
কুরু প্রসাদং দেবেশ শময়াস্য মনোজ্বরম্

ব্রহ্মোবাচ
ময়ৈবৈতদ্বিতীর্ণং বৈ বচনং মনসামরাঃ
এলাপত্রেণ নাগেন যদস্যাভিহিতং পুরা

তত্করোত্বেষ নাগেন্দ্রঃ প্রাপ্তকালং বচস্তথা
বিনশিষ্যন্তি যে পাপা ন তু যে ধর্মচারিণঃ

উত্পন্নঃ স জরত্কারুস্তপস্যুগ্রে রতো দ্বিজঃ
তস্যৈষ ভগিনীং কালে জরত্কারুং প্রয়চ্ছতু

যদেলাপত্রেণ বচস্তদোক্তং ভুজগেন হ
পন্নগানাং হিতং দেবাস্তত্তথা ন তদন্যথা

সূত উবাচ
এতচ্ছ্রুত্বা স নাগেন্দ্রঃ পিতামহবচস্তদা
সর্পান্বহূঞ্জরত্কারৌ নিত্যয়ুক্তান্সমাদধৎ

জরত্কারুর্যদা ভার্যামিচ্ছেদ্বরয়িতুং প্রভুঃ
শীঘ্রমেত্য মমাখ্যেয়ং তন্নঃ শ্রেয়ো ভবিষ্যতি