অধ্যায় 34

34.1

সূত উবাচ
শ্রুত্বা তু বচনং তেষাং সর্বেষামিতি চেতি চ
বাসুকেশ্চ বচঃ শ্রুত্বা এলাপত্রোঽব্রবীদিদম্

ন স যজ্ঞো ন ভবিতা ন স রাজা তথাবিধঃ
জনমেজয়ঃ পাণ্ডবেয়ো যতোঽস্মাকং মহাভয়ম্

দৈবেনোপহতো রাজন্যো ভবেদিহ পূরুষঃ
স দৈবমেবাশ্রয়তে নান্যত্তত্র পরায়ণম্

তদিদং দৈবমস্মাকং ভয়ং পন্নগসত্তমাঃ
দৈবমেবাশ্রয়ামোঽত্র শৃণুধ্বং চ বচো মম

অহং শাপে সমুত্সৃষ্টে সমশ্রৌষং বচস্তদা
মাতুরুত্সঙ্গমারূঢো ভয়াত্পন্নগসত্তমাঃ

দেবানাং পন্নগশ্রেষ্ঠাস্তীক্ষ্ণাস্তীক্ষ্ণা ইতি প্রভো
পিতামহমুপাগম্য দুঃখার্তানাং মহাদ্যুতে

দেবা ঊচুঃ
কা হি লব্ধ্বা প্রিয়ান্পুত্রাঞ্শপেদেবং পিতামহ
ঋতে কদ্রূং তীক্ষ্ণরূপাং দেবদেব তবাগ্রতঃ

তথেতি চ বচস্তস্যাস্ত্বয়াপ্যুক্তং পিতামহ
এতদিচ্ছাম বিজ্ঞাতুং কারণং যন্ন বারিতা

ব্রহ্মোবাচ
বহবঃ পন্নগাস্তীক্ষ্ণা ভীমবীর্যা বিষোল্বণাঃ
প্রজানাং হিতকামোঽহং ন নিবারিতবাংস্তদা

যে দন্দশূকাঃ ক্ষুদ্রাশ্চ পাপচারা বিষোল্বণাঃ
তেষাং বিনাশো ভবিতা ন তু যে ধর্মচারিণঃ

যন্নিমিত্তং চ ভবিতা মোক্ষস্তেষাং মহাভয়াৎ
পন্নগানাং নিবোধধ্বং তস্মিন্কালে তথাগতে

যায়াবরকুলে ধীমান্ভবিষ্যতি মহানৃষিঃ
জরত্কারুরিতি খ্যাতস্তেজস্বী নিয়তেন্দ্রিয়ঃ

তস্য পুত্রো জরত্কারোরুত্পত্স্যতি মহাতপাঃ
আস্তীকো নাম যজ্ঞং স প্রতিষেত্স্যতি তং তদা
তত্র মোক্ষ্যন্তি ভুজগা যে ভবিষ্যন্তি ধার্মিকাঃ

দেবা ঊচুঃ
স মুনিপ্রবরো দেব জরত্কারুর্মহাতপাঃ
কস্যাং পুত্রং মহাত্মানং জনয়িষ্যতি বীর্যবান্

ব্রহ্মোবাচ
সনামায়াং সনামা স কন্যায়াং দ্বিজসত্তমঃ
অপত্যং বীর্যবান্দেবা বীর্যবজ্জনয়িষ্যতি

এলাপত্র উবাচ
এবমস্ত্বিতি তং দেবাঃ পিতামহমথাব্রুবন্
উক্ত্বা চৈবং গতা দেবাঃ স চ দেবঃ পিতামহঃ

সোঽহমেবং প্রপশ্যামি বাসুকে ভগিনীং তব
জরত্কারুরিতি খ্যাতাং তাং তস্মৈ প্রতিপাদয়

ভৈক্ষবদ্ভিক্ষমাণায় নাগানাং ভয়শান্তয়ে
ঋষয়ে সুব্রতায় ত্বমেষ মোক্ষঃ শ্রুতো ময়া