Utshovঅধ্যায় 33
33.1
সূত উবাচ
মাতুঃ সকাশাত্তং শাপং শ্রুত্বা পন্নগসত্তমঃ
বাসুকিশ্চিন্তয়ামাস শাপোঽয়ং ন ভবেত্কথম্
33.2
ততঃ স মন্ত্রয়ামাস ভ্রাতৃভিঃ সহ সর্বশঃ
ঐরাবতপ্রভৃতিভির্যে স্ম ধর্মপরায়ণাঃ
33.3
বাসুকিরুবাচ
অয়ং শাপো যথোদ্দিষ্টো বিদিতং বস্তথানঘাঃ
তস্য শাপস্য মোক্ষার্থং মন্ত্রয়িত্বা যতামহে
33.4
সর্বেষামেব শাপানাং প্রতিঘাতো হি বিদ্যতে
ন তু মাত্রাভিশপ্তানাং মোক্ষো বিদ্যেত পন্নগাঃ
33.5
অব্যয়স্যাপ্রমেয়স্য সত্যস্য চ তথাগ্রতঃ
শপ্তা ইত্যেব মে শ্রুত্বা জায়তে হৃদি বেপথুঃ
33.6
নূনং সর্ববিনাশোঽয়মস্মাকং সমুদাহৃতঃ
ন হ্যেনাং সোঽব্যয়ো দেবঃ শপন্তীং প্রত্যষেধয়ৎ
33.7
তস্মাত্সংমন্ত্রয়ামোঽত্র ভুজগানামনাময়ম্
যথা ভবেত সর্বেষাং মা নঃ কালোঽত্যগাদয়ম্
33.8
অপি মন্ত্রয়মাণা হি হেতুং পশ্যাম মোক্ষণে
যথা নষ্টং পুরা দেবা গূঢমগ্নিং গুহাগতম্
33.9
যথা স যজ্ঞো ন ভবেদ্যথা বাপি পরাভবেৎ
জনমেজয়স্য সর্পাণাং বিনাশকরণায় হি
33.10
সূত উবাচ
তথেত্যুক্ত্বা তু তে সর্বে কাদ্রবেয়াঃ সমাগতাঃ
সময়ং চক্রিরে তত্র মন্ত্রবুদ্ধিবিশারদাঃ
33.11
একে তত্রাব্রুবন্নাগা বয়ং ভূত্বা দ্বিজর্ষভাঃ
জনমেজয়ং তং ভিক্ষামো যজ্ঞস্তে ন ভবেদিতি
33.12
অপরে ত্বব্রুবন্নাগাস্তত্র পণ্ডিতমানিনঃ
মন্ত্রিণোঽস্য বয়ং সর্বে ভবিষ্যামঃ সুসংমতাঃ
33.13
স নঃ প্রক্ষ্যতি সর্বেষু কার্যেষ্বর্থবিনিশ্চয়ম্
তত্র বুদ্ধিং প্রবক্ষ্যামো যথা যজ্ঞো নিবর্ততে
33.14
স নো বহুমতান্রাজা বুদ্ধ্বা বুদ্ধিমতাং বরঃ
যজ্ঞার্থং প্রক্ষ্যতি ব্যক্তং নেতি বক্ষ্যামহে বয়ম্
33.15
দর্শয়ন্তো বহূন্দোষান্প্রেত্য চেহ চ দারুণান্
হেতুভিঃ কারণৈশ্চৈব যথা যজ্ঞো ভবেন্ন সঃ
33.16
অথ বা য উপাধ্যায়ঃ ক্রতৌ তস্মিন্ভবিষ্যতি
সর্পসত্রবিধানজ্ঞো রাজকার্যহিতে রতঃ
33.17
তং গত্বা দশতাং কশ্চিদ্ভুজগঃ স মরিষ্যতি
তস্মিন্হতে যজ্ঞকরে ক্রতুঃ স ন ভবিষ্যতি
33.18
যে চান্যে সর্পসত্রজ্ঞা ভবিষ্যন্ত্যস্য ঋত্বিজঃ
তাংশ্চ সর্বান্দশিষ্যামঃ কৃতমেবং ভবিষ্যতি
33.19
তত্রাপরেঽমন্ত্রয়ন্ত ধর্মাত্মানো ভুজংগমাঃ
অবুদ্ধিরেষা যুষ্মাকং ব্রহ্মহত্যা ন শোভনা
33.20
সম্যক্সদ্ধর্মমূলা হি ব্যসনে শান্তিরুত্তমা
অধর্মোত্তরতা নাম কৃত্স্নং ব্যাপাদয়েজ্জগৎ
33.21
অপরে ত্বব্রুবন্নাগাঃ সমিদ্ধং জাতবেদসম্
বর্ষৈর্নির্বাপয়িষ্যামো মেঘা ভূত্বা সবিদ্যুতঃ
33.22
স্রুগ্ভাণ্ডং নিশি গত্বা বা অপরে ভুজগোত্তমাঃ
প্রমত্তানাং হরন্ত্বাশু বিঘ্ন এবং ভবিষ্যতি
33.23
যজ্ঞে বা ভুজগাস্তস্মিঞ্শতশোঽথ সহস্রশঃ
জনং দশন্তু বৈ সর্বমেবং ত্রাসো ভবিষ্যতি
33.24
অথ বা সংস্কৃতং ভোজ্যং দূষয়ন্তু ভুজংগমাঃ
স্বেন মূত্রপুরীষেণ সর্বভোজ্যবিনাশিনা
33.25
অপরে ত্বব্রুবংস্তত্র ঋত্বিজোঽস্য ভবামহে
যজ্ঞবিঘ্নং করিষ্যামো দীয়তাং দক্ষিণা ইতি
বশ্যতাং চ গতোঽসৌ নঃ করিষ্যতি যথেপ্ষিতম্
33.26
অপরে ত্বব্রুবংস্তত্র জলে প্রক্রীডিতং নৃপম্
গৃহমানীয় বধ্নীমঃ ক্রতুরেবং ভবেন্ন সঃ
33.27
অপরে ত্বব্রুবংস্তত্র নাগাঃ সুকৃতকারিণঃ
দশামৈনং প্রগৃহ্যাশু কৃতমেবং ভবিষ্যতি
ছিন্নং মূলমনর্থানাং মৃতে তস্মিন্ভবিষ্যতি
33.28
এষা বৈ নৈষ্ঠিকী বুদ্ধিঃ সর্বেষামেব সংমতা
যথা বা মন্যসে রাজংস্তত্ক্ষিপ্রং সংবিধীয়তাম্
33.29
ইত্যুক্ত্বা সমুদৈক্ষন্ত বাসুকিং পন্নগেশ্বরম্
বাসুকিশ্চাপি সংচিন্ত্য তানুবাচ ভুজংগমান্
33.30
নৈষা বো নৈষ্ঠিকী বুদ্ধির্মতা কর্তুং ভুজংগমাঃ
সর্বেষামেব মে বুদ্ধিঃ পন্নগানাং ন রোচতে
33.31
কিং ত্বত্র সংবিধাতব্যং ভবতাং যদ্ভবেদ্ধিতম্
অনেনাহং ভৃশং তপ্যে গুণদোষৌ মদাশ্রয়ৌ