Utshovঅধ্যায় 32
32.1
শৌনক উবাচ
জাতা বৈ ভুজগাস্তাত বীর্যবন্তো দুরাসদাঃ
শাপং তং ত্বথ বিজ্ঞায় কৃতবন্তো নু কিং পরম্
32.2
সূত উবাচ
তেষাং তু ভগবাঞ্শেষস্ত্যক্ত্বা কদ্রূং মহায়শাঃ
তপো বিপুলমাতস্থে বায়ুভক্ষো যতব্রতঃ
32.3
গন্ধমাদনমাসাদ্য বদর্যাং চ তপোরতঃ
গোকর্ণে পুষ্করারণ্যে তথা হিমবতস্তটে
32.4
তেষু তেষু চ পুণ্যেষু তীর্থেষ্বায়তনেষু চ
একান্তশীলী নিয়তঃ সততং বিজিতেন্দ্রিয়ঃ
32.5
তপ্যমানং তপো ঘোরং তং দদর্শ পিতামহঃ
পরিশুষ্কমাংসত্বক্স্নায়ুং জটাচীরধরং প্রভুম্
32.6
তমব্রবীত্সত্যধৃতিং তপ্যমানং পিতামহঃ
কিমিদং কুরুষে শেষ প্রজানাং স্বস্তি বৈ কুরু
32.7
ত্বং হি তীব্রেণ তপসা প্রজাস্তাপয়সেঽনঘ
ব্রূহি কামং চ মে শেষ যত্তে হৃদি চিরং স্থিতম্
32.8
শেষ উবাচ
সোদর্যা মম সর্বে হি ভ্রাতরো মন্দচেতসঃ
সহ তৈর্নোত্সহে বস্তুং তদ্ভবাননুমন্যতাম্
32.9
অভ্যসূয়ন্তি সততং পরস্পরমমিত্রবৎ
ততোঽহং তপ আতিষ্ঠে নৈতান্পশ্যেয়মিত্যুত
32.10
ন মর্ষয়ন্তি সততং বিনতাং সসুতাং চ তে
অস্মাকং চাপরো ভ্রাতা বৈনতেয়ঃ পিতামহ
32.11
তং চ দ্বিষন্তি তেঽত্যর্থং স চাপি সুমহাবলঃ
বরপ্রদানাত্স পিতুঃ কশ্যপস্য মহাত্মনঃ
32.12
সোঽহং তপঃ সমাস্থায় মোক্ষ্যামীদং কলেবরম্
কথং মে প্রেত্যভাবেঽপি ন তৈঃ স্যাত্সহ সংগমঃ
32.13
ব্রহ্মোবাচ
জানামি শেষ সর্বেষাং ভ্রাতৄণাং তে বিচেষ্টিতম্
মাতুশ্চাপ্যপরাধাদ্বৈ ভ্রাতৄণাং তে মহদ্ভয়ম্
32.14
কৃতোঽত্র পরিহারশ্চ পূর্বমেব ভুজংগম
ভ্রাতৄণাং তব সর্বেষাং ন শোকং কর্তুমর্হসি
32.15
বৃণীষ্ব চ বরং মত্তঃ শেষ যত্তেঽভিকাঙ্ক্ষিতম্
দিত্সামি হি বরং তেঽদ্য প্রীতির্মে পরমা ত্বয়ি
32.16
দিষ্ট্যা চ বুদ্ধির্ধর্মে তে নিবিষ্টা পন্নগোত্তম
অতো ভূয়শ্চ তে বুদ্ধির্ধর্মে ভবতু সুস্থিরা
32.17
শেষ উবাচ
এষ এব বরো মেঽদ্য কাঙ্ক্ষিতঃ প্রপিতামহ
ধর্মে মে রমতাং বুদ্ধিঃ শমে তপসি চেশ্বর
32.18
ব্রহ্মোবাচ
প্রীতোঽস্ম্যনেন তে শেষ দমেন প্রশমেন চ
ত্বয়া ত্বিদং বচঃ কার্যং মন্নিয়োগাত্প্রজাহিতম্
32.19
ইমাং মহীং শৈলবনোপপন্নাং; সসাগরাং সাকরপত্তনাং চ
ত্বং শেষ সম্যক্চলিতাং যথাব;ত্সংগৃহ্য তিষ্ঠস্ব যথাচলা স্যাৎ
32.20
শেষ উবাচ
যথাহ দেবো বরদঃ প্রজাপতি;র্মহীপতির্ভূতপতির্জগত্পতিঃ
তথা মহীং ধারয়িতাস্মি নিশ্চলাং; প্রয়চ্ছ তাং মে শিরসি প্রজাপতে
32.21
ব্রহ্মোবাচ
অধো মহীং গচ্ছ ভুজংগমোত্তম; স্বয়ং তবৈষা বিবরং প্রদাস্যতি
ইমাং ধরাং ধারয়তা ত্বয়া হি মে; মহত্প্রিয়ং শেষ কৃতং ভবিষ্যতি
32.22
সূত উবাচ
তথেতি কৃত্বা বিবরং প্রবিশ্য স; প্রভুর্ভুবো ভুজগবরাগ্রজঃ স্থিতঃ
বিভর্তি দেবীং শিরসা মহীমিমাং; সমুদ্রনেমিং পরিগৃহ্য সর্বতঃ
32.23
ব্রহ্মোবাচ
শেষোঽসি নাগোত্তম ধর্মদেবো; মহীমিমাং ধারয়সে যদেকঃ
অনন্তভোগঃ পরিগৃহ্য সর্বাং; যথাহমেবং বলভিদ্যথা বা
32.24
সূত উবাচ
অধো ভূমের্বসত্যেবং নাগোঽনন্তঃ প্রতাপবান্
ধারয়ন্বসুধামেকঃ শাসনাদ্ব্রহ্মণো বিভুঃ
32.25
সুপর্ণং চ সখায়ং বৈ ভগবানমরোত্তমঃ
প্রাদাদনন্তায় তদা বৈনতেয়ং পিতামহঃ