UtshovChapter 34
34.1
सूत उवाच
श्रुत्वा तु वचनं तेषां सर्वेषामिति चेति च
वासुकेश्च वचः श्रुत्वा एलापत्रोऽब्रवीदिदम्
Suta uvacha
Shrutva tu vachanam tesham sarveshamiti cheti cha
Vasukeshcha vachah shrutva elapatrobravididam
34.2
न स यज्ञो न भविता न स राजा तथाविधः
जनमेजयः पाण्डवेयो यतोऽस्माकं महाभयम्
Na sa yagyo na bhavita na sa raja tathavidhah
Janamejayah pandaveyo yatosmakam mahabhayam
34.3
दैवेनोपहतो राजन्यो भवेदिह पूरुषः
स दैवमेवाश्रयते नान्यत्तत्र परायणम्
Daivenopahato rajanyo bhavediha purushah
Sa daivamevashrayate nanyattatra parayanam
34.4
तदिदं दैवमस्माकं भयं पन्नगसत्तमाः
दैवमेवाश्रयामोऽत्र शृणुध्वं च वचो मम
Tadidam daivamasmakam bhayam pannagasattamah
Daivamevashrayamotra shrinudhvam cha vacho mama
34.5
अहं शापे समुत्सृष्टे समश्रौषं वचस्तदा
मातुरुत्सङ्गमारूढो भयात्पन्नगसत्तमाः
Aham shape samutsrishte samashrausham vachastada
Maturutsangamarudho bhayatpannagasattamah
34.6
देवानां पन्नगश्रेष्ठास्तीक्ष्णास्तीक्ष्णा इति प्रभो
पितामहमुपागम्य दुःखार्तानां महाद्युते
Devanam pannagashreshthastikshnastikshna iti prabho
Pitamahamupagamya duhkhartanam mahadyute
34.7
देवा ऊचुः
का हि लब्ध्वा प्रियान्पुत्राञ्शपेदेवं पितामह
ऋते कद्रूं तीक्ष्णरूपां देवदेव तवाग्रतः
Deva uchuh
Ka hi labdhva priyanputranshapedevam pitamaha
Rite kadrum tikshnarupam devadeva tavagratah
34.8
तथेति च वचस्तस्यास्त्वयाप्युक्तं पितामह
एतदिच्छाम विज्ञातुं कारणं यन्न वारिता
Tatheti cha vachastasyastvayapyuktam pitamaha
Etadichchhama vigyatum karanam yanna varita
34.9
ब्रह्मोवाच
बहवः पन्नगास्तीक्ष्णा भीमवीर्या विषोल्बणाः
प्रजानां हितकामोऽहं न निवारितवांस्तदा
Brahmovacha
Bahavah pannagastikshna bhimavirya visholbanah
Prajanam hitakamoham na nivaritavanstada
34.10
ये दन्दशूकाः क्षुद्राश्च पापचारा विषोल्बणाः
तेषां विनाशो भविता न तु ये धर्मचारिणः
Ye dandashukah kshudrashcha papachara visholbanah
Tesham vinasho bhavita na tu ye dharmacharinah
34.11
यन्निमित्तं च भविता मोक्षस्तेषां महाभयात्
पन्नगानां निबोधध्वं तस्मिन्काले तथागते
Yannimittam cha bhavita mokshastesham mahabhayat
Pannaganam nibodhadhvam tasminkale tathagate
34.12
यायावरकुले धीमान्भविष्यति महानृषिः
जरत्कारुरिति ख्यातस्तेजस्वी नियतेन्द्रियः
Yayavarakule dhimanbhavishyati mahanrishih
Jaratkaruriti khyatastejasvi niyatendriyah
34.13
तस्य पुत्रो जरत्कारोरुत्पत्स्यति महातपाः
आस्तीको नाम यज्ञं स प्रतिषेत्स्यति तं तदा
तत्र मोक्ष्यन्ति भुजगा ये भविष्यन्ति धार्मिकाः
Tasya putro jaratkarorutpatsyati mahatapah
Astiko nama yagyam sa pratishetsyati tam tada
Tatra mokshyanti bhujaga ye bhavishyanti dharmikah
34.14
देवा ऊचुः
स मुनिप्रवरो देव जरत्कारुर्महातपाः
कस्यां पुत्रं महात्मानं जनयिष्यति वीर्यवान्
Deva uchuh
Sa munipravaro deva jaratkarurmahatapah
Kasyam putram mahatmanam janayishyati viryavan
34.15
ब्रह्मोवाच
सनामायां सनामा स कन्यायां द्विजसत्तमः
अपत्यं वीर्यवान्देवा वीर्यवज्जनयिष्यति
Brahmovacha
Sanamayam sanama sa kanyayam dvijasattamah
Apatyam viryavandeva viryavajjanayishyati
34.16
एलापत्र उवाच
एवमस्त्विति तं देवाः पितामहमथाब्रुवन्
उक्त्वा चैवं गता देवाः स च देवः पितामहः
Elapatra uvacha
Evamastviti tam devah pitamahamathabruvan
Uktva chaivam gata devah sa cha devah pitamahah
34.17
सोऽहमेवं प्रपश्यामि वासुके भगिनीं तव
जरत्कारुरिति ख्यातां तां तस्मै प्रतिपादय
Sohamevam prapashyami vasuke bhaginim tava
Jaratkaruriti khyatam tam tasmai pratipadaya
34.18
भैक्षवद्भिक्षमाणाय नागानां भयशान्तये
ऋषये सुव्रताय त्वमेष मोक्षः श्रुतो मया
Bhaikshavadbhikshamanaya naganam bhayashantaye
Rishaye suvrataya tvamesha mokshah shruto maya