UtshovChapter 43
43.1
सूत उवाच
वासुकिस्त्वब्रवीद्वाक्यं जरत्कारुमृषिं तदा
सनामा तव कन्येयं स्वसा मे तपसान्विता
Suta uvacha
Vasukistvabravidvakyam jaratkarumrishim tada
Sanama tava kanyeyam svasa me tapasanvita
43.2
भरिष्यामि च ते भार्यां प्रतीच्छेमां द्विजोत्तम
रक्षणं च करिष्येऽस्याः सर्वशक्त्या तपोधन
Bharishyami cha te bharyam pratichchhemam dvijottama
Rakshanam cha karishyesyah sarvashaktya tapodhana
43.3
प्रतिश्रुते तु नागेन भरिष्ये भगिनीमिति
जरत्कारुस्तदा वेश्म भुजगस्य जगाम ह
Pratishrute tu nagena bharishye bhaginimiti
Jaratkarustada veshma bhujagasya jagama ha
43.4
तत्र मन्त्रविदां श्रेष्ठस्तपोवृद्धो महाव्रतः
जग्राह पाणिं धर्मात्मा विधिमन्त्रपुरस्कृतम्
Tatra mantravidam shreshthastapovriddho mahavratah
Jagraha panim dharmatma vidhimantrapuraskritam
43.5
ततो वासगृहं शुभ्रं पन्नगेन्द्रस्य संमतम्
जगाम भार्यामादाय स्तूयमानो महर्षिभिः
Tato vasagriham shubhram pannagendrasya sammatam
Jagama bharyamadaya stuyamano maharshibhih
43.6
शयनं तत्र वै कॢप्तं स्पर्ध्यास्तरणसंवृतम्
तत्र भार्यासहायः स जरत्कारुरुवास ह
Shayanam tatra vai kliptam spardhyastaranasanvritam
Tatra bharyasahayah sa jaratkaruruvasa ha
43.7
स तत्र समयं चक्रे भार्यया सह सत्तमः
विप्रियं मे न कर्तव्यं न च वाच्यं कदाचन
Sa tatra samayam chakre bharyaya saha sattamah
Vipriyam me na kartavyam na cha vachyam kadachana
43.8
त्यजेयमप्रिये हि त्वां कृते वासं च ते गृहे
एतद्गृहाण वचनं मया यत्समुदीरितम्
Tyajeyamapriye hi tvam krite vasam cha te grihe
Etadgrihana vachanam maya yatsamudiritam
43.9
ततः परमसंविग्ना स्वसा नागपतेस्तु सा
अतिदुःखान्विता वाचं तमुवाचैवमस्त्विति
Tatah paramasanvigna svasa nagapatestu sa
Atiduhkhanvita vacham tamuvachaivamastviti
43.10
तथैव सा च भर्तारं दुःखशीलमुपाचरत्
उपायैः श्वेतकाकीयैः प्रियकामा यशस्विनी
Tathaiva sa cha bhartaram duhkhashilamupacharat
Upayaih shvetakakiyaih priyakama yashasvini
43.11
ऋतुकाले ततः स्नाता कदाचिद्वासुकेः स्वसा
भर्तारं तं यथान्यायमुपतस्थे महामुनिम्
Ritukale tatah snata kadachidvasukeh svasa
Bhartaram tam yathanyayamupatasthe mahamunim
43.12
तत्र तस्याः समभवद्गर्भो ज्वलनसंनिभः
अतीव तपसा युक्तो वैश्वानरसमद्युतिः
शुक्लपक्षे यथा सोमो व्यवर्धत तथैव सः
Tatra tasyah samabhavadgarbho jvalanasannibhah
Ativa tapasa yukto vaishvanarasamadyutih
Shuklapakshe yatha somo vyavardhata tathaiva sah
43.13
ततः कतिपयाहस्य जरत्कारुर्महातपाः
उत्सङ्गेऽस्याः शिरः कृत्वा सुष्वाप परिखिन्नवत्
Tatah katipayahasya jaratkarurmahatapah
Utsangesyah shirah kritva sushvapa parikhinnavat
43.14
तस्मिंश्च सुप्ते विप्रेन्द्रे सवितास्तमियाद्गिरिम्
अह्नः परिक्षये ब्रह्मंस्ततः साचिन्तयत्तदा
वासुकेर्भगिनी भीता धर्मलोपान्मनस्विनी
Tasminshcha supte viprendre savitastamiyadgirim
Ahnah parikshaye brahmanstatah sachintayattada
Vasukerbhagini bhita dharmalopanmanasvini
43.15
किं नु मे सुकृतं भूयाद्भर्तुरुत्थापनं न वा
दुःखशीलो हि धर्मात्मा कथं नास्यापराध्नुयाम्
Kim nu me sukritam bhuyadbharturutthapanam na va
Duhkhashilo hi dharmatma katham nasyaparadhnuyam
43.16
कोपो वा धर्मशीलस्य धर्मलोपोऽथ वा पुनः
धर्मलोपो गरीयान्वै स्यादत्रेत्यकरोन्मनः
Kopo va dharmashilasya dharmalopotha va punah
Dharmalopo gariyanvai syadatretyakaronmanah
43.17
उत्थापयिष्ये यद्येनं ध्रुवं कोपं करिष्यति
धर्मलोपो भवेदस्य संध्यातिक्रमणे ध्रुवम्
Utthapayishye yadyenam dhruvam kopam karishyati
Dharmalopo bhavedasya sandhyatikramane dhruvam
43.18
इति निश्चित्य मनसा जरत्कारुर्भुजंगमा
तमृषिं दीप्ततपसं शयानमनलोपमम्
उवाचेदं वचः श्लक्ष्णं ततो मधुरभाषिणी
Iti nishchitya manasa jaratkarurbhujangama
Tamrishim diptatapasam shayanamanalopamam
Uvachedam vachah shlakshnam tato madhurabhashini
43.19
उत्तिष्ठ त्वं महाभाग सूर्योऽस्तमुपगच्छति
संध्यामुपास्स्व भगवन्नपः स्पृष्ट्वा यतव्रतः
Uttishtha tvam mahabhaga suryostamupagachchhati
Sandhyamupassva bhagavannapah sprishtva yatavratah
43.20
प्रादुष्कृताग्निहोत्रोऽयं मुहूर्तो रम्यदारुणः
संध्या प्रवर्तते चेयं पश्चिमायां दिशि प्रभो
Pradushkritagnihotroyam muhurto ramyadarunah
Sandhya pravartate cheyam pashchimayam dishi prabho
43.21
एवमुक्तः स भगवाञ्जरत्कारुर्महातपाः
भार्यां प्रस्फुरमाणोष्ठ इदं वचनमब्रवीत्
Evamuktah sa bhagavanjaratkarurmahatapah
Bharyam prasphuramanoshtha idam vachanamabravit
43.22
अवमानः प्रयुक्तोऽयं त्वया मम भुजंगमे
समीपे ते न वत्स्यामि गमिष्यामि यथागतम्
Avamanah prayuktoyam tvaya mama bhujangame
Samipe te na vatsyami gamishyami yathagatam
43.23
न हि तेजोऽस्ति वामोरु मयि सुप्ते विभावसोः
अस्तं गन्तुं यथाकालमिति मे हृदि वर्तते
Na hi tejosti vamoru mayi supte vibhavasoh
Astam gantum yathakalamiti me hridi vartate
43.24
न चाप्यवमतस्येह वस्तुं रोचेत कस्यचित्
किं पुनर्धर्मशीलस्य मम वा मद्विधस्य वा
Na chapyavamatasyeha vastum rocheta kasyachit
Kim punardharmashilasya mama va madvidhasya va
43.25
एवमुक्ता जरत्कारुर्भर्त्रा हृदयकम्पनम्
अब्रवीद्भगिनी तत्र वासुकेः संनिवेशने
Evamukta jaratkarurbhartra hridayakampanam
Abravidbhagini tatra vasukeh sanniveshane
43.26
नावमानात्कृतवती तवाहं प्रतिबोधनम्
धर्मलोपो न ते विप्र स्यादित्येतत्कृतं मया
Navamanatkritavati tavaham pratibodhanam
Dharmalopo na te vipra syadityetatkritam maya
43.27
उवाच भार्यामित्युक्तो जरत्कारुर्महातपाः
ऋषिः कोपसमाविष्टस्त्यक्तुकामो भुजंगमाम्
Uvacha bharyamityukto jaratkarurmahatapah
Rishih kopasamavishtastyaktukamo bhujangamam
43.28
न मे वागनृतं प्राह गमिष्येऽहं भुजंगमे
समयो ह्येष मे पूर्वं त्वया सह मिथः कृतः
Na me vaganritam praha gamishyeham bhujangame
Samayo hyesha me purvam tvaya saha mithah kritah
43.29
सुखमस्म्युषितो भद्रे ब्रूयास्त्वं भ्रातरं शुभे
इतो मयि गते भीरु गतः स भगवानिति
त्वं चापि मयि निष्क्रान्ते न शोकं कर्तुमर्हसि
Sukhamasmyushito bhadre bruyastvam bhrataram shubhe
Ito mayi gate bhiru gatah sa bhagavaniti
Tvam chapi mayi nishkrante na shokam kartumarhasi
43.30
इत्युक्ता सानवद्याङ्गी प्रत्युवाच पतिं तदा
जरत्कारुं जरत्कारुश्चिन्ताशोकपरायणा
Ityukta sanavadyangi pratyuvacha patim tada
Jaratkarum jaratkarushchintashokaparayana
43.31
बाष्पगद्गदया वाचा मुखेन परिशुष्यता
कृताञ्जलिर्वरारोहा पर्यश्रुनयना ततः
धैर्यमालम्ब्य वामोरूर्हृदयेन प्रवेपता
Bashpagadgadaya vacha mukhena parishushyata
Kritanjalirvararoha paryashrunayana tatah
Dhairyamalambya vamorurhridayena pravepata
43.32
न मामर्हसि धर्मज्ञ परित्यक्तुमनागसम्
धर्मे स्थितां स्थितो धर्मे सदा प्रियहिते रताम्
Na mamarhasi dharmagya parityaktumanagasam
Dharme sthitam sthito dharme sada priyahite ratam
43.33
प्रदाने कारणं यच्च मम तुभ्यं द्विजोत्तम
तदलब्धवतीं मन्दां किं मां वक्ष्यति वासुकिः
Pradane karanam yachcha mama tubhyam dvijottama
Tadalabdhavatim mandam kim mam vakshyati vasukih
43.34
मातृशापाभिभूतानां ज्ञातीनां मम सत्तम
अपत्यमीप्षितं त्वत्तस्तच्च तावन्न दृश्यते
Matrishapabhibhutanam gyatinam mama sattama
Apatyamipshitam tvattastachcha tavanna drishyate
43.35
त्वत्तो ह्यपत्यलाभेन ज्ञातीनां मे शिवं भवेत्
संप्रयोगो भवेन्नायं मम मोघस्त्वया द्विज
Tvatto hyapatyalabhena gyatinam me shivam bhavet
Samprayogo bhavennayam mama moghastvaya dvija
43.36
ज्ञातीनां हितमिच्छन्ती भगवंस्त्वां प्रसादये
इममव्यक्तरूपं मे गर्भमाधाय सत्तम
कथं त्यक्त्वा महात्मा सन्गन्तुमिच्छस्यनागसम्
Gyatinam hitamichchhanti bhagavanstvam prasadaye
Imamavyaktarupam me garbhamadhaya sattama
Katham tyaktva mahatma sangantumichchhasyanagasam
43.37
एवमुक्तस्तु स मुनिर्भार्यां वचनमब्रवीत्
यद्युक्तमनुरूपं च जरत्कारुस्तपोधनः
Evamuktastu sa munirbharyam vachanamabravit
Yadyuktamanurupam cha jaratkarustapodhanah
43.38
अस्त्येष गर्भः सुभगे तव वैश्वानरोपमः
ऋषिः परमधर्मात्मा वेदवेदाङ्गपारगः
Astyesha garbhah subhage tava vaishvanaropamah
Rishih paramadharmatma vedavedangaparagah
43.39
एवमुक्त्वा स धर्मात्मा जरत्कारुर्महानृषिः
उग्राय तपसे भूयो जगाम कृतनिश्चयः
Evamuktva sa dharmatma jaratkarurmahanrishih
Ugraya tapase bhuyo jagama kritanishchayah