UtshovChapter 57
57.1
वैशंपायन उवाच
राजोपरिचरो नाम धर्मनित्यो महीपतिः
बभूव मृगयां गन्तुं स कदाचिद्धृतव्रतः
Vaishampayana uvacha
Rajoparicharo nama dharmanityo mahipatih
Babhuva mrigayam gantum sa kadachiddhritavratah
57.2
स चेदिविषयं रम्यं वसुः पौरवनन्दनः
इन्द्रोपदेशाज्जग्राह ग्रहणीयं महीपतिः
Sa chedivishayam ramyam vasuh pauravanandanah
Indropadeshajjagraha grahaniyam mahipatih
57.3
तमाश्रमे न्यस्तशस्त्रं निवसन्तं तपोरतिम्
देवः साक्षात्स्वयं वज्री समुपायान्महीपतिम्
Tamashrame nyastashastram nivasantam taporatim
Devah sakshatsvayam vajri samupayanmahipatim
57.4
इन्द्रत्वमर्हो राजायं तपसेत्यनुचिन्त्य वै
तं सान्त्वेन नृपं साक्षात्तपसः संन्यवर्तयत्
Indratvamarho rajayam tapasetyanuchintya vai
Tam santvena nripam sakshattapasah sannyavartayat
57.5
इन्द्र उवाच
न संकीर्येत धर्मोऽयं पृथिव्यां पृथिवीपते
तं पाहि धर्मो हि धृतः कृत्स्नं धारयते जगत्
Indra uvacha
Na sankiryeta dharmoyam prithivyam prithivipate
Tam pahi dharmo hi dhritah kritsnam dharayate jagat
57.6
लोक्यं धर्मं पालय त्वं नित्ययुक्तः समाहितः
धर्मयुक्तस्ततो लोकान्पुण्यानाप्स्यसि शाश्वतान्
Lokyam dharmam palaya tvam nityayuktah samahitah
Dharmayuktastato lokanpunyanapsyasi shashvatan
57.7
दिविष्ठस्य भुविष्ठस्त्वं सखा भूत्वा मम प्रियः
ऊधः पृथिव्या यो देशस्तमावस नराधिप
Divishthasya bhuvishthastvam sakha bhutva mama priyah
Udhah prithivya yo deshastamavasa naradhipa
57.8
पशव्यश्चैव पुण्यश्च सुस्थिरो धनधान्यवान्
स्वारक्ष्यश्चैव सौम्यश्च भोग्यैर्भूमिगुणैर्युतः
Pashavyashchaiva punyashcha susthiro dhanadhanyavan
Svarakshyashchaiva saumyashcha bhogyairbhumigunairyutah
57.9
अत्यन्यानेष देशो हि धनरत्नादिभिर्युतः
वसुपूर्णा च वसुधा वस चेदिषु चेदिप
Atyanyanesha desho hi dhanaratnadibhiryutah
Vasupurna cha vasudha vasa chedishu chedipa
57.10
धर्मशीला जनपदाः सुसंतोषाश्च साधवः
न च मिथ्याप्रलापोऽत्र स्वैरेष्वपि कुतोऽन्यथा
Dharmashila janapadah susantoshashcha sadhavah
Na cha mithyapralapotra svaireshvapi kutonyatha
57.11
न च पित्रा विभज्यन्ते नरा गुरुहिते रताः
युञ्जते धुरि नो गाश्च कृशाः संधुक्षयन्ति च
Na cha pitra vibhajyante nara guruhite ratah
Yunjate dhuri no gashcha krishah sandhukshayanti cha
57.12
सर्वे वर्णाः स्वधर्मस्थाः सदा चेदिषु मानद
न तेऽस्त्यविदितं किंचित्त्रिषु लोकेषु यद्भवेत्
Sarve varnah svadharmasthah sada chedishu manada
Na testyaviditam kinchittrishu lokeshu yadbhavet
57.13
देवोपभोग्यं दिव्यं च आकाशे स्फाटिकं महत्
आकाशगं त्वां मद्दत्तं विमानमुपपत्स्यते
Devopabhogyam divyam cha akashe sphatikam mahat
Akashagam tvam maddattam vimanamupapatsyate
57.14
त्वमेकः सर्वमर्त्येषु विमानवरमास्थितः
चरिष्यस्युपरिस्थो वै देवो विग्रहवानिव
Tvamekah sarvamartyeshu vimanavaramasthitah
Charishyasyuparistho vai devo vigrahavaniva
57.15
ददामि ते वैजयन्तीं मालामम्लानपङ्कजाम्
धारयिष्यति संग्रामे या त्वां शस्त्रैरविक्षतम्
Dadami te vaijayantim malamamlanapankajam
Dharayishyati sangrame ya tvam shastrairavikshatam
57.16
लक्षणं चैतदेवेह भविता ते नराधिप
इन्द्रमालेति विख्यातं धन्यमप्रतिमं महत्
Lakshanam chaitadeveha bhavita te naradhipa
Indramaleti vikhyatam dhanyamapratimam mahat
57.17
वैशंपायन उवाच
यष्टिं च वैणवीं तस्मै ददौ वृत्रनिषूदनः
इष्टप्रदानमुद्दिश्य शिष्टानां परिपालिनीम्
Vaishampayana uvacha
Yashtim cha vainavim tasmai dadau vritranishudanah
Ishtapradanamuddishya shishtanam paripalinim
57.18
तस्याः शक्रस्य पूजार्थं भूमौ भूमिपतिस्तदा
प्रवेशं कारयामास गते संवत्सरे तदा
Tasyah shakrasya pujartham bhumau bhumipatistada
Pravesham karayamasa gate sanvatsare tada
57.19
ततः प्रभृति चाद्यापि यष्ट्याः क्षितिपसत्तमैः
प्रवेशः क्रियते राजन्यथा तेन प्रवर्तितः
Tatah prabhriti chadyapi yashtyah kshitipasattamaih
Praveshah kriyate rajanyatha tena pravartitah
57.20
अपरेद्युस्तथा चास्याः क्रियते उच्छ्रयो नृपैः
अलंकृतायाः पिटकैर्गन्धैर्माल्यैश्च भूषणैः
माल्यदामपरिक्षिप्ता विधिवत्क्रियतेऽपि च
Aparedyustatha chasyah kriyate uchchhrayo nripaih
Alankritayah pitakairgandhairmalyaishcha bhushanaih
Malyadamaparikshipta vidhivatkriyatepi cha
57.21
भगवान्पूज्यते चात्र हास्यरूपेण शंकरः
स्वयमेव गृहीतेन वसोः प्रीत्या महात्मनः
Bhagavanpujyate chatra hasyarupena shankarah
Svayameva grihitena vasoh pritya mahatmanah
57.22
एतां पूजां महेन्द्रस्तु दृष्ट्वा देव कृतां शुभाम्
वसुना राजमुख्येन प्रीतिमानब्रवीद्विभुः
Etam pujam mahendrastu drishtva deva kritam shubham
Vasuna rajamukhyena pritimanabravidvibhuh
57.23
ये पूजयिष्यन्ति नरा राजानश्च महं मम
कारयिष्यन्ति च मुदा यथा चेदिपतिर्नृपः
Ye pujayishyanti nara rajanashcha maham mama
Karayishyanti cha muda yatha chedipatirnripah
57.24
तेषां श्रीर्विजयश्चैव सराष्ट्राणां भविष्यति
तथा स्फीतो जनपदो मुदितश्च भविष्यति
Tesham shrirvijayashchaiva sarashtranam bhavishyati
Tatha sphito janapado muditashcha bhavishyati
57.25
एवं महात्मना तेन महेन्द्रेण नराधिप
वसुः प्रीत्या मघवता महाराजोऽभिसत्कृतः
Evam mahatmana tena mahendrena naradhipa
Vasuh pritya maghavata maharajobhisatkritah
57.26
उत्सवं कारयिष्यन्ति सदा शक्रस्य ये नराः
भूमिदानादिभिर्दानैर्यथा पूता भवन्ति वै
वरदानमहायज्ञैस्तथा शक्रोत्सवेन ते
Utsavam karayishyanti sada shakrasya ye narah
Bhumidanadibhirdanairyatha puta bhavanti vai
Varadanamahayagyaistatha shakrotsavena te
57.27
संपूजितो मघवता वसुश्चेदिपतिस्तदा
पालयामास धर्मेण चेदिस्थः पृथिवीमिमाम्
इन्द्रप्रीत्या भूमिपतिश्चकारेन्द्रमहं वसुः
Sampujito maghavata vasushchedipatistada
Palayamasa dharmena chedisthah prithivimimam
Indrapritya bhumipatishchakarendramaham vasuh
57.28
पुत्राश्चास्य महावीर्याः पञ्चासन्नमितौजसः
नानाराज्येषु च सुतान्स सम्राडभ्यषेचयत्
Putrashchasya mahaviryah panchasannamitaujasah
Nanarajyeshu cha sutansa samradabhyashechayat
57.29
महारथो मगधराड्विश्रुतो यो बृहद्रथः
प्रत्यग्रहः कुशाम्बश्च यमाहुर्मणिवाहनम्
मच्छिल्लश्च यदुश्चैव राजन्यश्चापराजितः
Maharatho magadharadvishruto yo brihadrathah
Pratyagrahah kushambashcha yamahurmanivahanam
Machchhillashcha yadushchaiva rajanyashchaparajitah
57.30
एते तस्य सुता राजन्राजर्षेर्भूरितेजसः
न्यवेशयन्नामभिः स्वैस्ते देशांश्च पुराणि च
वासवाः पञ्च राजानः पृथग्वंशाश्च शाश्वताः
Ete tasya suta rajanrajarsherbhuritejasah
Nyaveshayannamabhih svaiste deshanshcha purani cha
Vasavah pancha rajanah prithagvanshashcha shashvatah
57.31
वसन्तमिन्द्रप्रासादे आकाशे स्फाटिके च तम्
उपतस्थुर्महात्मानं गन्धर्वाप्सरसो नृपम्
राजोपरिचरेत्येवं नाम तस्याथ विश्रुतम्
Vasantamindraprasade akashe sphatike cha tam
Upatasthurmahatmanam gandharvapsaraso nripam
Rajoparicharetyevam nama tasyatha vishrutam
57.32
पुरोपवाहिनीं तस्य नदीं शुक्तिमतीं गिरिः
अरौत्सीच्चेतनायुक्तः कामात्कोलाहलः किल
Puropavahinim tasya nadim shuktimatim girih
Arautsichchetanayuktah kamatkolahalah kila
57.33
गिरिं कोलाहलं तं तु पदा वसुरताडयत्
निश्चक्राम नदी तेन प्रहारविवरेण सा
Girim kolahalam tam tu pada vasuratadayat
Nishchakrama nadi tena praharavivarena sa
57.34
तस्यां नद्यामजनयन्मिथुनं पर्वतः स्वयम्
तस्माद्विमोक्षणात्प्रीता नदी राज्ञे न्यवेदयत्
Tasyam nadyamajanayanmithunam parvatah svayam
Tasmadvimokshanatprita nadi ragye nyavedayat
57.35
यः पुमानभवत्तत्र तं स राजर्षिसत्तमः
वसुर्वसुप्रदश्चक्रे सेनापतिमरिंदमम्
चकार पत्नीं कन्यां तु दयितां गिरिकां नृपः
Yah pumanabhavattatra tam sa rajarshisattamah
Vasurvasupradashchakre senapatimarindamam
Chakara patnim kanyam tu dayitam girikam nripah
57.36
वसोः पत्नी तु गिरिका कामात्काले न्यवेदयत्
ऋतुकालमनुप्राप्तं स्नाता पुंसवने शुचिः
Vasoh patni tu girika kamatkale nyavedayat
Ritukalamanupraptam snata punsavane shuchih
57.37
तदहः पितरश्चैनमूचुर्जहि मृगानिति
तं राजसत्तमं प्रीतास्तदा मतिमतां वरम्
Tadahah pitarashchainamuchurjahi mriganiti
Tam rajasattamam pritastada matimatam varam
57.38
स पितॄणां नियोगं तमव्यतिक्रम्य पार्थिवः
चचार मृगयां कामी गिरिकामेव संस्मरन्
अतीव रूपसंपन्नां साक्षाच्छ्रियमिवापराम्
Sa pitrinam niyogam tamavyatikramya parthivah
Chachara mrigayam kami girikameva sansmaran
Ativa rupasampannam sakshachchhriyamivaparam
57.39
तस्य रेतः प्रचस्कन्द चरतो रुचिरे वने
स्कन्नमात्रं च तद्रेतो वृक्षपत्रेण भूमिपः
Tasya retah prachaskanda charato ruchire vane
Skannamatram cha tadreto vrikshapatrena bhumipah
57.40
प्रतिजग्राह मिथ्या मे न स्कन्देद्रेत इत्युत
ऋतुश्च तस्याः पत्न्या मे न मोघः स्यादिति प्रभुः
Pratijagraha mithya me na skandedreta ityuta
Ritushcha tasyah patnya me na moghah syaditi prabhuh
57.41
संचिन्त्यैवं तदा राजा विचार्य च पुनः पुनः
अमोघत्वं च विज्ञाय रेतसो राजसत्तमः
Sanchintyaivam tada raja vicharya cha punah punah
Amoghatvam cha vigyaya retaso rajasattamah
57.42
शुक्रप्रस्थापने कालं महिष्याः प्रसमीक्ष्य सः
अभिमन्त्र्याथ तच्छुक्रमारात्तिष्ठन्तमाशुगम्
सूक्ष्मधर्मार्थतत्त्वज्ञो ज्ञात्वा श्येनं ततोऽब्रवीत्
Shukraprasthapane kalam mahishyah prasamikshya sah
Abhimantryatha tachchhukramarattishthantamashugam
Sukshmadharmarthatattvagyo gyatva shyenam tatobravit
57.43
मत्प्रियार्थमिदं सौम्य शुक्रं मम गृहं नय
गिरिकायाः प्रयच्छाशु तस्या ह्यार्तवमद्य वै
Matpriyarthamidam saumya shukram mama griham naya
Girikayah prayachchhashu tasya hyartavamadya vai
57.44
गृहीत्वा तत्तदा श्येनस्तूर्णमुत्पत्य वेगवान्
जवं परममास्थाय प्रदुद्राव विहंगमः
Grihitva tattada shyenasturnamutpatya vegavan
Javam paramamasthaya pradudrava vihangamah
57.45
तमपश्यदथायान्तं श्येनं श्येनस्तथापरः
अभ्यद्रवच्च तं सद्यो दृष्ट्वैवामिषशङ्कया
Tamapashyadathayantam shyenam shyenastathaparah
Abhyadravachcha tam sadyo drishtvaivamishashankaya
57.46
तुण्डयुद्धमथाकाशे तावुभौ संप्रचक्रतुः
युध्यतोरपतद्रेतस्तच्चापि यमुनाम्भसि
Tundayuddhamathakashe tavubhau samprachakratuh
Yudhyatorapatadretastachchapi yamunambhasi
57.47
तत्राद्रिकेति विख्याता ब्रह्मशापाद्वराप्सराः
मीनभावमनुप्राप्ता बभूव यमुनाचरी
Tatradriketi vikhyata brahmashapadvarapsarah
Minabhavamanuprapta babhuva yamunachari
57.48
श्येनपादपरिभ्रष्टं तद्वीर्यमथ वासवम्
जग्राह तरसोपेत्य साद्रिका मत्स्यरूपिणी
Shyenapadaparibhrashtam tadviryamatha vasavam
Jagraha tarasopetya sadrika matsyarupini
57.49
कदाचिदथ मत्सीं तां बबन्धुर्मत्स्यजीविनः
मासे च दशमे प्राप्ते तदा भरतसत्तम
उज्जह्रुरुदरात्तस्याः स्त्रीपुमांसं च मानुषम्
Kadachidatha matsim tam babandhurmatsyajivinah
Mase cha dashame prapte tada bharatasattama
Ujjahrurudarattasyah stripumansam cha manusham
57.50
आश्चर्यभूतं मत्वा तद्राज्ञस्ते प्रत्यवेदयन्
काये मत्स्या इमौ राजन्संभूतौ मानुषाविति
Ashcharyabhutam matva tadragyaste pratyavedayan
Kaye matsya imau rajansambhutau manushaviti
57.51
तयोः पुमांसं जग्राह राजोपरिचरस्तदा
स मत्स्यो नाम राजासीद्धार्मिकः सत्यसंगरः
Tayoh pumansam jagraha rajoparicharastada
Sa matsyo nama rajasiddharmikah satyasangarah
57.52
साप्सरा मुक्तशापा च क्षणेन समपद्यत
पुरोक्ता या भगवता तिर्यग्योनिगता शुभे
मानुषौ जनयित्वा त्वं शापमोक्षमवाप्स्यसि
Sapsara muktashapa cha kshanena samapadyata
Purokta ya bhagavata tiryagyonigata shubhe
Manushau janayitva tvam shapamokshamavapsyasi
57.53
ततः सा जनयित्वा तौ विशस्ता मत्स्यघातिना
संत्यज्य मत्स्यरूपं सा दिव्यं रूपमवाप्य च
सिद्धर्षिचारणपथं जगामाथ वराप्सराः
Tatah sa janayitva tau vishasta matsyaghatina
Santyajya matsyarupam sa divyam rupamavapya cha
Siddharshicharanapatham jagamatha varapsarah
57.54
या कन्या दुहिता तस्या मत्स्या मत्स्यसगन्धिनी
राज्ञा दत्ताथ दाशाय इयं तव भवत्विति
रूपसत्त्वसमायुक्ता सर्वैः समुदिता गुणैः
Ya kanya duhita tasya matsya matsyasagandhini
Ragya dattatha dashaya iyam tava bhavatviti
Rupasattvasamayukta sarvaih samudita gunaih
57.55
सा तु सत्यवती नाम मत्स्यघात्यभिसंश्रयात्
आसीन्मत्स्यसगन्धैव कंचित्कालं शुचिस्मिता
Sa tu satyavati nama matsyaghatyabhisanshrayat
Asinmatsyasagandhaiva kanchitkalam shuchismita
57.56
शुश्रूषार्थं पितुर्नावं तां तु वाहयतीं जले
तीर्थयात्रां परिक्रामन्नपश्यद्वै पराशरः
Shushrushartham piturnavam tam tu vahayatim jale
Tirthayatram parikramannapashyadvai parasharah
57.57
अतीव रूपसंपन्नां सिद्धानामपि काङ्क्षिताम्
दृष्ट्वैव च स तां धीमांश्चकमे चारुदर्शनाम्
विद्वांस्तां वासवीं कन्यां कार्यवान्मुनिपुंगवः
Ativa rupasampannam siddhanamapi kankshitam
Drishtvaiva cha sa tam dhimanshchakame charudarshanam
Vidvanstam vasavim kanyam karyavanmunipungavah
57.58
साब्रवीत्पश्य भगवन्पारावारे ऋषीन्स्थितान्
आवयोर्दृश्यतोरेभिः कथं नु स्यात्समागमः
Sabravitpashya bhagavanparavare rishinsthitan
Avayordrishyatorebhih katham nu syatsamagamah
57.59
एवं तयोक्तो भगवान्नीहारमसृजत्प्रभुः
येन देशः स सर्वस्तु तमोभूत इवाभवत्
Evam tayokto bhagavanniharamasrijatprabhuh
Yena deshah sa sarvastu tamobhuta ivabhavat
57.60
दृष्ट्वा सृष्टं तु नीहारं ततस्तं परमर्षिणा
विस्मिता चाब्रवीत्कन्या व्रीडिता च मनस्विनी
Drishtva srishtam tu niharam tatastam paramarshina
Vismita chabravitkanya vridita cha manasvini
57.61
विद्धि मां भगवन्कन्यां सदा पितृवशानुगाम्
त्वत्संयोगाच्च दुष्येत कन्याभावो ममानघ
Viddhi mam bhagavankanyam sada pitrivashanugam
Tvatsanyogachcha dushyeta kanyabhavo mamanagha
57.62
कन्यात्वे दूषिते चापि कथं शक्ष्ये द्विजोत्तम
गन्तुं गृहं गृहे चाहं धीमन्न स्थातुमुत्सहे
एतत्संचिन्त्य भगवन्विधत्स्व यदनन्तरम्
Kanyatve dushite chapi katham shakshye dvijottama
Gantum griham grihe chaham dhimanna sthatumutsahe
Etatsanchintya bhagavanvidhatsva yadanantaram
57.63
एवमुक्तवतीं तां तु प्रीतिमानृषिसत्तमः
उवाच मत्प्रियं कृत्वा कन्यैव त्वं भविष्यसि
Evamuktavatim tam tu pritimanrishisattamah
Uvacha matpriyam kritva kanyaiva tvam bhavishyasi
57.64
वृणीष्व च वरं भीरु यं त्वमिच्छसि भामिनि
वृथा हि न प्रसादो मे भूतपूर्वः शुचिस्मिते
Vrinishva cha varam bhiru yam tvamichchhasi bhamini
Vritha hi na prasado me bhutapurvah shuchismite
57.65
एवमुक्ता वरं वव्रे गात्रसौगन्ध्यमुत्तमम्
स चास्यै भगवान्प्रादान्मनसः काङ्क्षितं प्रभुः
Evamukta varam vavre gatrasaugandhyamuttamam
Sa chasyai bhagavanpradanmanasah kankshitam prabhuh
57.66
ततो लब्धवरा प्रीता स्त्रीभावगुणभूषिता
जगाम सह संसर्गमृषिणाद्भुतकर्मणा
Tato labdhavara prita stribhavagunabhushita
Jagama saha sansargamrishinadbhutakarmana
57.67
तेन गन्धवतीत्येव नामास्याः प्रथितं भुवि
तस्यास्तु योजनाद्गन्धमाजिघ्रन्ति नरा भुवि
Tena gandhavatityeva namasyah prathitam bhuvi
Tasyastu yojanadgandhamajighranti nara bhuvi
57.68
ततो योजनगन्धेति तस्या नाम परिश्रुतम्
पराशरोऽपि भगवाञ्जगाम स्वं निवेशनम्
Tato yojanagandheti tasya nama parishrutam
Parasharopi bhagavanjagama svam niveshanam
57.69
इति सत्यवती हृष्टा लब्ध्वा वरमनुत्तमम्
पराशरेण संयुक्ता सद्यो गर्भं सुषाव सा
जज्ञे च यमुनाद्वीपे पाराशर्यः स वीर्यवान्
Iti satyavati hrishta labdhva varamanuttamam
Parasharena sanyukta sadyo garbham sushava sa
Jagye cha yamunadvipe parasharyah sa viryavan
57.70
स मातरमुपस्थाय तपस्येव मनो दधे
स्मृतोऽहं दर्शयिष्यामि कृत्येष्विति च सोऽब्रवीत्
Sa mataramupasthaya tapasyeva mano dadhe
Smritoham darshayishyami krityeshviti cha sobravit
57.71
एवं द्वैपायनो जज्ञे सत्यवत्यां पराशरात्
द्वीपे न्यस्तः स यद्बालस्तस्माद्द्वैपायनोऽभवत्
Evam dvaipayano jagye satyavatyam parasharat
Dvipe nyastah sa yadbalastasmaddvaipayanobhavat
57.72
पादापसारिणं धर्मं विद्वान्स तु युगे युगे
आयुः शक्तिं च मर्त्यानां युगानुगमवेक्ष्य च
Padapasarinam dharmam vidvansa tu yuge yuge
Ayuh shaktim cha martyanam yuganugamavekshya cha
57.73
ब्रह्मणो ब्राह्मणानां च तथानुग्रहकाम्यया
विव्यास वेदान्यस्माच्च तस्माद्व्यास इति स्मृतः
Brahmano brahmananam cha tathanugrahakamyaya
Vivyasa vedanyasmachcha tasmadvyasa iti smritah
57.74
वेदानध्यापयामास महाभारतपञ्चमान्
सुमन्तुं जैमिनिं पैलं शुकं चैव स्वमात्मजम्
Vedanadhyapayamasa mahabharatapanchaman
Sumantum jaiminim pailam shukam chaiva svamatmajam
57.75
प्रभुर्वरिष्ठो वरदो वैशंपायनमेव च
संहितास्तैः पृथक्त्वेन भारतस्य प्रकाशिताः
Prabhurvarishtho varado vaishampayanameva cha
Sanhitastaih prithaktvena bharatasya prakashitah
57.76
तथा भीष्मः शांतनवो गङ्गायाममितद्युतिः
वसुवीर्यात्समभवन्महावीर्यो महायशाः
Tatha bhishmah shantanavo gangayamamitadyutih
Vasuviryatsamabhavanmahaviryo mahayashah
57.77
शूले प्रोतः पुराणर्षिरचोरश्चोरशङ्कया
अणीमाण्डव्य इति वै विख्यातः सुमहायशाः
Shule protah puranarshirachorashchorashankaya
Animandavya iti vai vikhyatah sumahayashah
57.78
स धर्ममाहूय पुरा महर्षिरिदमुक्तवान्
इषीकया मया बाल्यादेका विद्धा शकुन्तिका
Sa dharmamahuya pura maharshiridamuktavan
Ishikaya maya balyadeka viddha shakuntika
57.79
तत्किल्बिषं स्मरे धर्म नान्यत्पापमहं स्मरे
तन्मे सहस्रसमितं कस्मान्नेहाजयत्तपः
Tatkilbisham smare dharma nanyatpapamaham smare
Tanme sahasrasamitam kasmannehajayattapah
57.80
गरीयान्ब्राह्मणवधः सर्वभूतवधाद्यतः
तस्मात्त्वं किल्बिषादस्माच्छूद्रयोनौ जनिष्यसि
Gariyanbrahmanavadhah sarvabhutavadhadyatah
Tasmattvam kilbishadasmachchhudrayonau janishyasi
57.81
तेन शापेन धर्मोऽपि शूद्रयोनावजायत
विद्वान्विदुररूपेण धार्मी तनुरकिल्बिषी
Tena shapena dharmopi shudrayonavajayata
Vidvanvidurarupena dharmi tanurakilbishi
57.82
संजयो मुनिकल्पस्तु जज्ञे सूतो गवल्गणात्
सूर्याच्च कुन्तिकन्यायां जज्ञे कर्णो महारथः
सहजं कवचं बिभ्रत्कुण्डलोद्द्योतिताननः
Sanjayo munikalpastu jagye suto gavalganat
Suryachcha kuntikanyayam jagye karno maharathah
Sahajam kavacham bibhratkundaloddyotitananah
57.83
अनुग्रहार्थं लोकानां विष्णुर्लोकनमस्कृतः
वसुदेवात्तु देवक्यां प्रादुर्भूतो महायशाः
Anugrahartham lokanam vishnurlokanamaskritah
Vasudevattu devakyam pradurbhuto mahayashah
57.84
अनादिनिधनो देवः स कर्ता जगतः प्रभुः
अव्यक्तमक्षरं ब्रह्म प्रधानं निर्गुणात्मकम्
Anadinidhano devah sa karta jagatah prabhuh
Avyaktamaksharam brahma pradhanam nirgunatmakam
57.85
आत्मानमव्ययं चैव प्रकृतिं प्रभवं परम्
पुरुषं विश्वकर्माणं सत्त्वयोगं ध्रुवाक्षरम्
Atmanamavyayam chaiva prakritim prabhavam param
Purusham vishvakarmanam sattvayogam dhruvaksharam
57.86
अनन्तमचलं देवं हंसं नारायणं प्रभुम्
धातारमजरं नित्यं तमाहुः परमव्ययम्
Anantamachalam devam hansam narayanam prabhum
Dhataramajaram nityam tamahuh paramavyayam
57.87
पुरुषः स विभुः कर्ता सर्वभूतपितामहः
धर्मसंवर्धनार्थाय प्रजज्ञेऽन्धकवृष्णिषु
Purushah sa vibhuh karta sarvabhutapitamahah
Dharmasanvardhanarthaya prajagyendhakavrishnishu
57.88
अस्त्रज्ञौ तु महावीर्यौ सर्वशस्त्रविशारदौ
सात्यकिः कृतवर्मा च नारायणमनुव्रतौ
सत्यकाद्धृदिकाच्चैव जज्ञातेऽस्त्रविशारदौ
Astragyau tu mahaviryau sarvashastravisharadau
Satyakih kritavarma cha narayanamanuvratau
Satyakaddhridikachchaiva jagyatestravisharadau
57.89
भरद्वाजस्य च स्कन्नं द्रोण्यां शुक्रमवर्धत
महर्षेरुग्रतपसस्तस्माद्द्रोणो व्यजायत
Bharadvajasya cha skannam dronyam shukramavardhata
Maharsherugratapasastasmaddrono vyajayata
57.90
गौतमान्मिथुनं जज्ञे शरस्तम्बाच्छरद्वतः
अश्वत्थाम्नश्च जननी कृपश्चैव महाबलः
अश्वत्थामा ततो जज्ञे द्रोणादस्त्रभृतां वरः
Gautamanmithunam jagye sharastambachchharadvatah
Ashvatthamnashcha janani kripashchaiva mahabalah
Ashvatthama tato jagye dronadastrabhritam varah
57.91
तथैव धृष्टद्युम्नोऽपि साक्षादग्निसमद्युतिः
वैताने कर्मणि तते पावकात्समजायत
वीरो द्रोणविनाशाय धनुषा सह वीर्यवान्
Tathaiva dhrishtadyumnopi sakshadagnisamadyutih
Vaitane karmani tate pavakatsamajayata
Viro dronavinashaya dhanusha saha viryavan
57.92
तथैव वेद्यां कृष्णापि जज्ञे तेजस्विनी शुभा
विभ्राजमाना वपुषा बिभ्रती रूपमुत्तमम्
Tathaiva vedyam krishnapi jagye tejasvini shubha
Vibhrajamana vapusha bibhrati rupamuttamam
57.93
प्रह्रादशिष्यो नग्नजित्सुबलश्चाभवत्ततः
तस्य प्रजा धर्महन्त्री जज्ञे देवप्रकोपनात्
Prahradashishyo nagnajitsubalashchabhavattatah
Tasya praja dharmahantri jagye devaprakopanat
57.94
गान्धारराजपुत्रोऽभूच्छकुनिः सौबलस्तथा
दुर्योधनस्य माता च जज्ञातेऽर्थविदावुभौ
Gandhararajaputrobhuchchhakunih saubalastatha
Duryodhanasya mata cha jagyaterthavidavubhau
57.95
कृष्णद्वैपायनाज्जज्ञे धृतराष्ट्रो जनेश्वरः
क्षेत्रे विचित्रवीर्यस्य पाण्डुश्चैव महाबलः
Krishnadvaipayanajjagye dhritarashtro janeshvarah
Kshetre vichitraviryasya pandushchaiva mahabalah
57.96
पाण्डोस्तु जज्ञिरे पञ्च पुत्रा देवसमाः पृथक्
द्वयोः स्त्रियोर्गुणज्येष्ठस्तेषामासीद्युधिष्ठिरः
Pandostu jagyire pancha putra devasamah prithak
Dvayoh striyorgunajyeshthasteshamasidyudhishthirah
57.97
धर्माद्युधिष्ठिरो जज्ञे मारुतात्तु वृकोदरः
इन्द्राद्धनंजयः श्रीमान्सर्वशस्त्रभृतां वरः
Dharmadyudhishthiro jagye marutattu vrikodarah
Indraddhananjayah shrimansarvashastrabhritam varah
57.98
जज्ञाते रूपसंपन्नावश्विभ्यां तु यमावुभौ
नकुलः सहदेवश्च गुरुशुश्रूषणे रतौ
Jagyate rupasampannavashvibhyam tu yamavubhau
Nakulah sahadevashcha gurushushrushane ratau
57.99
तथा पुत्रशतं जज्ञे धृतराष्ट्रस्य धीमतः
दुर्योधनप्रभृतयो युयुत्सुः करणस्तथा
Tatha putrashatam jagye dhritarashtrasya dhimatah
Duryodhanaprabhritayo yuyutsuh karanastatha
57.100
अभिमन्युः सुभद्रायामर्जुनादभ्यजायत
स्वस्रीयो वासुदेवस्य पौत्रः पाण्डोर्महात्मनः
Abhimanyuh subhadrayamarjunadabhyajayata
Svasriyo vasudevasya pautrah pandormahatmanah
57.101
पाण्डवेभ्योऽपि पञ्चभ्यः कृष्णायां पञ्च जज्ञिरे
कुमारा रूपसंपन्नाः सर्वशस्त्रविशारदाः
Pandavebhyopi panchabhyah krishnayam pancha jagyire
Kumara rupasampannah sarvashastravisharadah
57.102
प्रतिविन्ध्यो युधिष्ठिरात्सुतसोमो वृकोदरात्
अर्जुनाच्छ्रुतकीर्तिस्तु शतानीकस्तु नाकुलिः
Prativindhyo yudhishthiratsutasomo vrikodarat
Arjunachchhrutakirtistu shatanikastu nakulih
57.103
तथैव सहदेवाच्च श्रुतसेनः प्रतापवान्
हिडिम्बायां च भीमेन वने जज्ञे घटोत्कचः
Tathaiva sahadevachcha shrutasenah pratapavan
Hidimbayam cha bhimena vane jagye ghatotkachah
57.104
शिखण्डी द्रुपदाज्जज्ञे कन्या पुत्रत्वमागता
यां यक्षः पुरुषं चक्रे स्थूणः प्रियचिकीर्षया
Shikhandi drupadajjagye kanya putratvamagata
Yam yakshah purusham chakre sthunah priyachikirshaya
57.105
कुरूणां विग्रहे तस्मिन्समागच्छन्बहून्यथ
राज्ञां शतसहस्राणि योत्स्यमानानि संयुगे
Kurunam vigrahe tasminsamagachchhanbahunyatha
Ragyam shatasahasrani yotsyamanani sanyuge
57.106
तेषामपरिमेयानि नामधेयानि सर्वशः
न शक्यं परिसंख्यातुं वर्षाणामयुतैरपि
एते तु कीर्तिता मुख्या यैराख्यानमिदं ततम्
Teshamaparimeyani namadheyani sarvashah
Na shakyam parisankhyatum varshanamayutairapi
Ete tu kirtita mukhya yairakhyanamidam tatam