UtshovChapter 66
66.1
शकुन्तलोवाच
एवमुक्तस्तया शक्रः संदिदेश सदागतिम्
प्रातिष्ठत तदा काले मेनका वायुना सह
Shakuntalovacha
Evamuktastaya shakrah sandidesha sadagatim
Pratishthata tada kale menaka vayuna saha
66.2
अथापश्यद्वरारोहा तपसा दग्धकिल्बिषम्
विश्वामित्रं तपस्यन्तं मेनका भीरुराश्रमे
Athapashyadvararoha tapasa dagdhakilbisham
Vishvamitram tapasyantam menaka bhirurashrame
66.3
अभिवाद्य ततः सा तं प्राक्रीडदृषिसंनिधौ
अपोवाह च वासोऽस्या मारुतः शशिसंनिभम्
Abhivadya tatah sa tam prakridadrishisannidhau
Apovaha cha vasosya marutah shashisannibham
66.4
सागच्छत्त्वरिता भूमिं वासस्तदभिलिङ्गती
उत्स्मयन्तीव सव्रीडं मारुतं वरवर्णिनी
Sagachchhattvarita bhumim vasastadabhilingati
Utsmayantiva savridam marutam varavarnini
66.5
गृद्धां वाससि संभ्रान्तां मेनकां मुनिसत्तमः
अनिर्देश्यवयोरूपामपश्यद्विवृतां तदा
Griddham vasasi sambhrantam menakam munisattamah
Anirdeshyavayorupamapashyadvivritam tada
66.6
तस्या रूपगुणं दृष्ट्वा स तु विप्रर्षभस्तदा
चकार भावं संसर्गे तया कामवशं गतः
Tasya rupagunam drishtva sa tu viprarshabhastada
Chakara bhavam sansarge taya kamavasham gatah
66.7
न्यमन्त्रयत चाप्येनां सा चाप्यैच्छदनिन्दिता
तौ तत्र सुचिरं कालं वने व्यहरतामुभौ
रममाणौ यथाकामं यथैकदिवसं तथा
Nyamantrayata chapyenam sa chapyaichchhadanindita
Tau tatra suchiram kalam vane vyaharatamubhau
Ramamanau yathakamam yathaikadivasam tatha
66.8
जनयामास स मुनिर्मेनकायां शकुन्तलाम्
प्रस्थे हिमवतो रम्ये मालिनीमभितो नदीम्
Janayamasa sa munirmenakayam shakuntalam
Prasthe himavato ramye malinimabhito nadim
66.9
जातमुत्सृज्य तं गर्भं मेनका मालिनीमनु
कृतकार्या ततस्तूर्णमगच्छच्छक्रसंसदम्
Jatamutsrijya tam garbham menaka malinimanu
Kritakarya tatasturnamagachchhachchhakrasansadam
66.10
तं वने विजने गर्भं सिंहव्याघ्रसमाकुले
दृष्ट्वा शयानं शकुनाः समन्तात्पर्यवारयन्
Tam vane vijane garbham sinhavyaghrasamakule
Drishtva shayanam shakunah samantatparyavarayan
66.11
नेमां हिंस्युर्वने बालां क्रव्यादा मांसगृद्धिनः
पर्यरक्षन्त तां तत्र शकुन्ता मेनकात्मजाम्
Nemam hinsyurvane balam kravyada mansagriddhinah
Paryarakshanta tam tatra shakunta menakatmajam
66.12
उपस्प्रष्टुं गतश्चाहमपश्यं शयितामिमाम्
निर्जने विपिनेऽरण्ये शकुन्तैः परिवारिताम्
आनयित्वा ततश्चैनां दुहितृत्वे न्ययोजयम्
Upasprashtum gatashchahamapashyam shayitamimam
Nirjane vipineranye shakuntaih parivaritam
Anayitva tatashchainam duhitritve nyayojayam
66.13
शरीरकृत्प्राणदाता यस्य चान्नानि भुञ्जते
क्रमेण ते त्रयोऽप्युक्ताः पितरो धर्मनिश्चये
Sharirakritpranadata yasya channani bhunjate
Kramena te trayopyuktah pitaro dharmanishchaye
66.14
निर्जने च वने यस्माच्छकुन्तैः परिरक्षिता
शकुन्तलेति नामास्याः कृतं चापि ततो मया
Nirjane cha vane yasmachchhakuntaih parirakshita
Shakuntaleti namasyah kritam chapi tato maya
66.15
एवं दुहितरं विद्धि मम सौम्य शकुन्तलाम्
शकुन्तला च पितरं मन्यते मामनिन्दिता
Evam duhitaram viddhi mama saumya shakuntalam
Shakuntala cha pitaram manyate mamanindita
66.16
एतदाचष्ट पृष्टः सन्मम जन्म महर्षये
सुतां कण्वस्य मामेवं विद्धि त्वं मनुजाधिप
Etadachashta prishtah sanmama janma maharshaye
Sutam kanvasya mamevam viddhi tvam manujadhipa
66.17
कण्वं हि पितरं मन्ये पितरं स्वमजानती
इति ते कथितं राजन्यथावृत्तं श्रुतं मया
Kanvam hi pitaram manye pitaram svamajanati
Iti te kathitam rajanyathavrittam shrutam maya