Utshovঅধ্যায় 77
77.1
বৈশংপায়ন উবাচ
যয়াতিঃ স্বপুরং প্রাপ্য মহেন্দ্রপুরসংনিভম্
প্রবিশ্যান্তঃপুরং তত্র দেবয়ানীং ন্যবেশয়ৎ
77.2
দেবয়ান্যাশ্চানুমতে তাং সুতাং বৃষপর্বণঃ
অশোকবনিকাভ্যাশে গৃহং কৃত্বা ন্যবেশয়ৎ
77.3
বৃতাং দাসীসহস্রেণ শর্মিষ্ঠামাসুরায়ণীম্
বাসোভিরন্নপানৈশ্চ সংবিভজ্য সুসত্কৃতাম্
77.4
দেবয়ান্যা তু সহিতঃ স নৃপো নহুষাত্মজঃ
বিজহার বহূনব্দান্দেববন্মুদিতো ভৃশম্
77.5
ঋতুকালে তু সংপ্রাপ্তে দেবয়ানী বরাঙ্গনা
লেভে গর্ভং প্রথমতঃ কুমারং চ ব্যজায়ত
77.6
গতে বর্ষসহস্রে তু শর্মিষ্ঠা বার্ষপর্বণী
দদর্শ যৌবনং প্রাপ্তা ঋতুং সা চান্বচিন্তয়ৎ
77.7
ঋতুকালশ্চ সংপ্রাপ্তো ন চ মেঽস্তি পতির্বৃতঃ
কিং প্রাপ্তং কিং নু কর্তব্যং কিং বা কৃত্বা কৃতং ভবেৎ
77.8
দেবয়ানী প্রজাতাসৌ বৃথাহং প্রাপ্তয়ৌবনা
যথা তয়া বৃতো ভর্তা তথৈবাহং বৃণোমি তম্
77.9
রাজ্ঞা পুত্রফলং দেয়মিতি মে নিশ্চিতা মতিঃ
অপীদানীং স ধর্মাত্মা ইয়ান্মে দর্শনং রহঃ
77.10
অথ নিষ্ক্রম্য রাজাসৌ তস্মিন্কালে যদৃচ্ছয়া
অশোকবনিকাভ্যাশে শর্মিষ্ঠাং প্রাপ্য বিষ্ঠিতঃ
77.11
তমেকং রহিতে দৃষ্ট্বা শর্মিষ্ঠা চারুহাসিনী
প্রত্যুদ্গম্যাঞ্জলিং কৃত্বা রাজানং বাক্যমব্রবীৎ
77.12
সোমস্যেন্দ্রস্য বিষ্ণোর্বা যমস্য বরুণস্য বা
তব বা নাহুষ কুলে কঃ স্ত্রিয়ং স্প্রষ্টুমর্হতি
77.13
রূপাভিজনশীলৈর্হি ত্বং রাজন্বেত্থ মাং সদা
সা ত্বাং যাচে প্রসাদ্যাহমৃতুং দেহি নরাধিপ
77.14
যয়াতিরুবাচ
বেদ্মি ত্বাং শীলসংপন্নাং দৈত্যকন্যামনিন্দিতাম্
রূপে চ তে ন পশ্যামি সূচ্যগ্রমপি নিন্দিতম্
77.15
অব্রবীদুশনা কাব্যো দেবয়ানীং যদাবহম্
নেয়মাহ্বয়িতব্যা তে শয়নে বার্ষপর্বণী
77.16
শর্মিষ্ঠোবাচ
ন নর্ময়ুক্তং বচনং হিনস্তি; ন স্ত্রীষু রাজন্ন বিবাহকালে
প্রাণাত্যয়ে সর্বধনাপহারে; পঞ্চানৃতান্যাহুরপাতকানি
77.17
পৃষ্টং তু সাক্ষ্যে প্রবদন্তমন্যথা; বদন্তি মিথ্যোপহিতং নরেন্দ্র
একার্থতায়াং তু সমাহিতায়াং; মিথ্যা বদন্তমনৃতং হিনস্তি
77.18
যয়াতিরুবাচ
রাজা প্রমাণং ভূতানাং স নশ্যেত মৃষা বদন্
অর্থকৃচ্ছ্রমপি প্রাপ্য ন মিথ্যা কর্তুমুত্সহে
77.19
শর্মিষ্ঠোবাচ
সমাবেতৌ মতৌ রাজন্পতিঃ সখ্যাশ্চ যঃ পতিঃ
সমং বিবাহমিত্যাহুঃ সখ্যা মেঽসি পতির্বৃতঃ
77.20
যয়াতিরুবাচ
দাতব্যং যাচমানেভ্য ইতি মে ব্রতমাহিতম্
ত্বং চ যাচসি মাং কামং ব্রূহি কিং করবাণি তে
77.21
শর্মিষ্ঠোবাচ
অধর্মাত্ত্রাহি মাং রাজন্ধর্মং চ প্রতিপাদয়
ত্বত্তোঽপত্যবতী লোকে চরেয়ং ধর্মমুত্তমম্
77.22
ত্রয় এবাধনা রাজন্ভার্যা দাসস্তথা সুতঃ
যত্তে সমধিগচ্ছন্তি যস্য তে তস্য তদ্ধনম্
77.23
দেবয়ান্যা ভুজিষ্যাস্মি বশ্যা চ তব ভার্গবী
সা চাহং চ ত্বয়া রাজন্ভরণীয়ে ভজস্ব মাম্
77.24
বৈশংপায়ন উবাচ
এবমুক্তস্তু রাজা স তথ্যমিত্যেব জজ্ঞিবান্
পূজয়ামাস শর্মিষ্ঠাং ধর্মং চ প্রত্যপাদয়ৎ
77.25
সমাগম্য চ শর্মিষ্ঠাং যথাকামমবাপ্য চ
অন্যোন্যমভিসংপূজ্য জগ্মতুস্তৌ যথাগতম্
77.26
তস্মিন্সমাগমে সুভ্রূঃ শর্মিষ্ঠা চারুহাসিনী
লেভে গর্ভং প্রথমতস্তস্মান্নৃপতিসত্তমাৎ
77.27
প্রজজ্ঞে চ ততঃ কালে রাজন্রাজীবলোচনা
কুমারং দেবগর্ভাভং রাজীবনিভলোচনম্