Utshovঅধ্যায় 78
78.1
বৈশংপায়ন উবাচ
শ্রুত্বা কুমারং জাতং তু দেবয়ানী শুচিস্মিতা
চিন্তয়ামাস দুঃখার্তা শর্মিষ্ঠাং প্রতি ভারত
78.2
অভিগম্য চ শর্মিষ্ঠাং দেবয়ান্যব্রবীদিদম্
কিমিদং বৃজিনং সুভ্রু কৃতং তে কামলুব্ধয়া
78.3
শর্মিষ্ঠোবাচ
ঋষিরভ্যাগতঃ কশ্চিদ্ধর্মাত্মা বেদপারগঃ
স ময়া বরদঃ কামং যাচিতো ধর্মসংহিতম্
78.4
নাহমন্যায়তঃ কামমাচরামি শুচিস্মিতে
তস্মাদৃষের্মমাপত্যমিতি সত্যং ব্রবীমি তে
78.5
দেবয়ান্যুবাচ
শোভনং ভীরু সত্যং চেদথ স জ্ঞায়তে দ্বিজঃ
গোত্রনামাভিজনতো বেত্তুমিচ্ছামি তং দ্বিজম্
78.6
শর্মিষ্ঠোবাচ
ওজসা তেজসা চৈব দীপ্যমানং রবিং যথা
তং দৃষ্ট্বা মম সংপ্রষ্টুং শক্তির্নাসীচ্ছুচিস্মিতে
78.7
দেবয়ান্যুবাচ
যদ্যেতদেবং শর্মিষ্ঠে ন মন্যুর্বিদ্যতে মম
অপত্যং যদি তে লব্ধং জ্যেষ্ঠাচ্ছ্রেষ্ঠাচ্চ বৈ দ্বিজাৎ
78.8
বৈশংপায়ন উবাচ
অন্যোন্যমেবমুক্ত্বা চ সংপ্রহস্য চ তে মিথঃ
জগাম ভার্গবী বেশ্ম তথ্যমিত্যেব জজ্ঞুষী
78.9
যয়াতির্দেবয়ান্যাং তু পুত্রাবজনয়ন্নৃপঃ
যদুং চ তুর্বসুং চৈব শক্রবিষ্ণূ ইবাপরৌ
78.10
তস্মাদেব তু রাজর্ষেঃ শর্মিষ্ঠা বার্ষপর্বণী
দ্রুহ্যুং চানুং চ পূরুং চ ত্রীন্কুমারানজীজনৎ
78.11
ততঃ কালে তু কস্মিংশ্চিদ্দেবয়ানী শুচিস্মিতা
যয়াতিসহিতা রাজন্নির্জগাম মহাবনম্
78.12
দদর্শ চ তদা তত্র কুমারান্দেবরূপিণঃ
ক্রীডমানান্সুবিশ্রব্ধান্বিস্মিতা চেদমব্রবীৎ
78.13
কস্যৈতে দারকা রাজন্দেবপুত্রোপমাঃ শুভাঃ
বর্চসা রূপতশ্চৈব সদৃশা মে মতাস্তব
78.14
এবং পৃষ্ট্বা তু রাজানং কুমারান্পর্যপৃচ্ছত
কিংনামধেয়গোত্রো বঃ পুত্রকা ব্রাহ্মণঃ পিতা
বিব্রূত মে যথাতথ্যং শ্রোতুমিচ্ছামি তং হ্যহম্
78.15
তেঽদর্শয়ন্প্রদেশিন্যা তমেব নৃপসত্তমম্
শর্মিষ্ঠাং মাতরং চৈব তস্যাচখ্যুশ্চ দারকাঃ
78.16
ইত্যুক্ত্বা সহিতাস্তে তু রাজানমুপচক্রমুঃ
নাভ্যনন্দত তান্রাজা দেবয়ান্যাস্তদান্তিকে
রুদন্তস্তেঽথ শর্মিষ্ঠামভ্যয়ুর্বালকাস্ততঃ
78.17
দৃষ্ট্বা তু তেষাং বালানাং প্রণয়ং পার্থিবং প্রতি
বুদ্ধ্বা চ তত্ত্বতো দেবী শর্মিষ্ঠামিদমব্রবীৎ
78.18
মদধীনা সতী কস্মাদকার্ষীর্বিপ্রিয়ং মম
তমেবাসুরধর্মং ত্বমাস্থিতা ন বিভেষি কিম্
78.19
শর্মিষ্ঠোবাচ
যদুক্তমৃষিরিত্যেব তত্সত্যং চারুহাসিনি
ন্যায়তো ধর্মতশ্চৈব চরন্তী ন বিভেমি তে
78.20
যদা ত্বয়া বৃতো রাজা বৃত এব তদা ময়া
সখীভর্তা হি ধর্মেণ ভর্তা ভবতি শোভনে
78.21
পূজ্যাসি মম মান্যা চ জ্যেষ্ঠা শ্রেষ্ঠা চ ব্রাহ্মণী
ত্বত্তোঽপি মে পূজ্যতমো রাজর্ষিঃ কিং ন বেত্থ তৎ
78.22
বৈশংপায়ন উবাচ
শ্রুত্বা তস্যাস্ততো বাক্যং দেবয়ান্যব্রবীদিদম্
রাজন্নাদ্যেহ বত্স্যামি বিপ্রিয়ং মে কৃতং ত্বয়া
78.23
সহসোত্পতিতাং শ্যামাং দৃষ্ট্বা তাং সাশ্রুলোচনাম্
ত্বরিতং সকাশং কাব্যস্য প্রস্থিতাং ব্যথিতস্তদা
78.24
অনুবব্রাজ সংভ্রান্তঃ পৃষ্ঠতঃ সান্ত্বয়ন্নৃপঃ
ন্যবর্তত ন চৈব স্ম ক্রোধসংরক্তলোচনা
78.25
অবিব্রুবন্তী কিংচিত্তু রাজানং চারুলোচনা
অচিরাদিব সংপ্রাপ্তা কাব্যস্যোশনসোঽন্তিকম্
78.26
সা তু দৃষ্ট্বৈব পিতরমভিবাদ্যাগ্রতঃ স্থিতা
অনন্তরং যয়াতিস্তু পূজয়ামাস ভার্গবম্
78.27
দেবয়ান্যুবাচ
অধর্মেণ জিতো ধর্মঃ প্রবৃত্তমধরোত্তরম্
শর্মিষ্ঠয়াতিবৃত্তাস্মি দুহিত্রা বৃষপর্বণঃ
78.28
ত্রয়োঽস্যাং জনিতাঃ পুত্রা রাজ্ঞানেন যয়াতিনা
দুর্ভগায়া মম দ্বৌ তু পুত্রৌ তাত ব্রবীমি তে
78.29
ধর্মজ্ঞ ইতি বিখ্যাত এষ রাজা ভৃগূদ্বহ
অতিক্রান্তশ্চ মর্যাদাং কাব্যৈতত্কথয়ামি তে
78.30
শুক্র উবাচ
ধর্মজ্ঞঃ সন্মহারাজ যোঽধর্মমকৃথাঃ প্রিয়ম্
তস্মাজ্জরা ত্বামচিরাদ্ধর্ষয়িষ্যতি দুর্জয়া
78.31
যয়াতিরুবাচ
ঋতুং বৈ যাচমানায়া ভগবন্নান্যচেতসা
দুহিতুর্দানবেন্দ্রস্য ধর্ম্যমেতত্কৃতং ময়া
78.32
ঋতুং বৈ যাচমানায়া ন দদাতি পুমান্বৃতঃ
ভ্রূণহেত্যুচ্যতে ব্রহ্মন্স ইহ ব্রহ্মবাদিভিঃ
78.33
অভিকামাং স্ত্রিয়ং যস্তু গম্যাং রহসি যাচিতঃ
নোপৈতি স চ ধর্মেষু ভ্রূণহেত্যুচ্যতে বুধৈঃ
78.34
ইত্যেতানি সমীক্ষ্যাহং কারণানি ভৃগূদ্বহ
অধর্মভয়সংবিগ্নঃ শর্মিষ্ঠামুপজগ্মিবান্
78.35
শুক্র উবাচ
নন্বহং প্রত্যবেক্ষ্যস্তে মদধীনোঽসি পার্থিব
মিথ্যাচারস্য ধর্মেষু চৌর্যং ভবতি নাহুষ
78.36
বৈশংপায়ন উবাচ
ক্রুদ্ধেনোশনসা শপ্তো যয়াতির্নাহুষস্তদা
পূর্বং বয়ঃ পরিত্যজ্য জরাং সদ্যোঽন্বপদ্যত
78.37
যয়াতিরুবাচ
অতৃপ্তো যৌবনস্যাহং দেবয়ান্যাং ভৃগূদ্বহ
প্রসাদং কুরু মে ব্রহ্মঞ্জরেয়ং মা বিশেত মাম্
78.38
শুক্র উবাচ
নাহং মৃষা ব্রবীম্যেতজ্জরাং প্রাপ্তোঽসি ভূমিপ
জরাং ত্বেতাং ত্বমন্যস্মৈ সংক্রাময় যদীচ্ছসি
78.39
যয়াতিরুবাচ
রাজ্যভাক্স ভবেদ্ব্রহ্মন্পুণ্যভাক্কীর্তিভাক্তথা
যো মে দদ্যাদ্বয়ঃ পুত্রস্তদ্ভবাননুমন্যতাম্
78.40
শুক্র উবাচ
সংক্রাময়িষ্যসি জরাং যথেষ্টং নহুষাত্মজ
মামনুধ্যায় ভাবেন ন চ পাপমবাপ্স্যসি
78.41
বয়ো দাস্যতি তে পুত্রো যঃ স রাজা ভবিষ্যতি
আয়ুষ্মান্কীর্তিমাংশ্চৈব বহ্বপত্যস্তথৈব চ