Utshovঅধ্যায় 79
79.1
বৈশংপায়ন উবাচ
জরাং প্রাপ্য যয়াতিস্তু স্বপুরং প্রাপ্য চৈব হ
পুত্রং জ্যেষ্ঠং বরিষ্ঠং চ যদুমিত্যব্রবীদ্বচঃ
79.2
জরা বলী চ মাং তাত পলিতানি চ পর্যগুঃ
কাব্যস্যোশনসঃ শাপান্ন চ তৃপ্তোঽস্মি যৌবনে
79.3
ত্বং যদো প্রতিপদ্যস্ব পাপ্মানং জরয়া সহ
যৌবনেন ত্বদীয়েন চরেয়ং বিষয়ানহম্
79.4
পূর্ণে বর্ষসহস্রে তু পুনস্তে যৌবনং ত্বহম্
দত্ত্বা স্বং প্রতিপত্স্যামি পাপ্মানং জরয়া সহ
79.5
যদুরুবাচ
সিতশ্মশ্রুশিরা দীনো জরয়া শিথিলীকৃতঃ
বলীসংততগাত্রশ্চ দুর্দর্শো দুর্বলঃ কৃশঃ
79.6
অশক্তঃ কার্যকরণে পরিভূতঃ স যৌবনৈঃ
সহোপজীবিভিশ্চৈব তাং জরাং নাভিকাময়ে
79.7
যয়াতিরুবাচ
যত্ত্বং মে হৃদয়াজ্জাতো বয়ঃ স্বং ন প্রয়চ্ছসি
তস্মাদরাজ্যভাক্তাত প্রজা তে বৈ ভবিষ্যতি
79.8
তুর্বসো প্রতিপদ্যস্ব পাপ্মানং জরয়া সহ
যৌবনেন চরেয়ং বৈ বিষয়াংস্তব পুত্রক
79.9
পূর্ণে বর্ষসহস্রে তু পুনর্দাস্যামি যৌবনম্
স্বং চৈব প্রতিপত্স্যামি পাপ্মানং জরয়া সহ
79.10
তুর্বসুরুবাচ
ন কাময়ে জরাং তাত কামভোগপ্রণাশিনীম্
বলরূপান্তকরণীং বুদ্ধিপ্রাণবিনাশিনীম্
79.11
যয়াতিরুবাচ
যত্ত্বং মে হৃদয়াজ্জাতো বয়ঃ স্বং ন প্রয়চ্ছসি
তস্মাত্প্রজা সমুচ্ছেদং তুর্বসো তব যাস্যতি
79.12
সংকীর্ণাচারধর্মেষু প্রতিলোমচরেষু চ
পিশিতাশিষু চান্ত্যেষু মূঢ রাজা ভবিষ্যসি
79.13
গুরুদারপ্রসক্তেষু তির্যগ্যোনিগতেষু চ
পশুধর্মিষু পাপেষু ম্লেচ্ছেষু প্রভবিষ্যসি
79.14
বৈশংপায়ন উবাচ
এবং স তুর্বসুং শপ্ত্বা যয়াতিঃ সুতমাত্মনঃ
শর্মিষ্ঠায়াঃ সুতং দ্রুহ্যুমিদং বচনমব্রবীৎ
79.15
দ্রুহ্যো ত্বং প্রতিপদ্যস্ব বর্ণরূপবিনাশিনীম্
জরাং বর্ষসহস্রং মে যৌবনং স্বং দদস্ব চ
79.16
পূর্ণে বর্ষসহস্রে তু প্রতিদাস্যামি যৌবনম্
স্বং চাদাস্যামি ভূয়োঽহং পাপ্মানং জরয়া সহ
79.17
দ্রুহ্যুরুবাচ
ন গজং ন রথং নাশ্বং জীর্ণো ভুঙ্ক্তে ন চ স্ত্রিয়ম্
বাগ্ভঙ্গশ্চাস্য ভবতি তজ্জরাং নাভিকাময়ে
79.18
যয়াতিরুবাচ
যত্ত্বং মে হৃদয়াজ্জাতো বয়ঃ স্বং ন প্রয়চ্ছসি
তস্মাদ্দ্রুহ্যো প্রিয়ঃ কামো ন তে সংপত্স্যতে ক্বচিৎ
79.19
উডুপপ্লবসংতারো যত্র নিত্যং ভবিষ্যতি
অরাজা ভোজশব্দং ত্বং তত্রাবাপ্স্যসি সান্বয়ঃ
79.20
অনো ত্বং প্রতিপদ্যস্ব পাপ্মানং জরয়া সহ
একং বর্ষসহস্রং তু চরেয়ং যৌবনেন তে
79.21
অনুরুবাচ
জীর্ণঃ শিশুবদাদত্তেঽকালেঽন্নমশুচির্যথা
ন জুহোতি চ কালেঽগ্নিং তাং জরাং নাভিকাময়ে
79.22
যয়াতিরুবাচ
যত্ত্বং মে হৃদয়াজ্জাতো বয়ঃ স্বং ন প্রয়চ্ছসি
জরাদোষস্ত্বয়োক্তোঽয়ং তস্মাত্ত্বং প্রতিপত্স্যসে
79.23
প্রজাশ্চ যৌবনপ্রাপ্তা বিনশিষ্যন্ত্যনো তব
অগ্নিপ্রস্কন্দনপরস্ত্বং চাপ্যেবং ভবিষ্যসি
79.24
পূরো ত্বং মে প্রিয়ঃ পুত্রস্ত্বং বরীয়ান্ভবিষ্যসি
জরা বলী চ মে তাত পলিতানি চ পর্যগুঃ
কাব্যস্যোশনসঃ শাপান্ন চ তৃপ্তোঽস্মি যৌবনে
79.25
পূরো ত্বং প্রতিপদ্যস্ব পাপ্মানং জরয়া সহ
কংচিত্কালং চরেয়ং বৈ বিষয়ান্বয়সা তব
79.26
পূর্ণে বর্ষসহস্রে তু প্রতিদাস্যামি যৌবনম্
স্বং চৈব প্রতিপত্স্যামি পাপ্মানং জরয়া সহ
79.27
বৈশংপায়ন উবাচ
এবমুক্তঃ প্রত্যুবাচ পূরুঃ পিতরমঞ্জসা
যথাত্থ মাং মহারাজ তত্করিষ্যামি তে বচঃ
79.28
প্রতিপত্স্যামি তে রাজন্পাপ্মানং জরয়া সহ
গৃহাণ যৌবনং মত্তশ্চর কামান্যথেপ্সিতান্
79.29
জরয়াহং প্রতিচ্ছন্নো বয়োরূপধরস্তব
যৌবনং ভবতে দত্ত্বা চরিষ্যামি যথাত্থ মাম্
79.30
যয়াতিরুবাচ
পূরো প্রীতোঽস্মি তে বত্স প্রীতশ্চেদং দদামি তে
সর্বকামসমৃদ্ধা তে প্রজা রাজ্যে ভবিষ্যতি