Utshovঅধ্যায় 80
80.1
বৈশংপায়ন উবাচ
পৌরবেণাথ বয়সা যয়াতির্নহুষাত্মজঃ
প্রীতিয়ুক্তো নৃপশ্রেষ্ঠশ্চচার বিষয়ান্প্রিয়ান্
80.2
যথাকামং যথোত্সাহং যথাকালং যথাসুখম্
ধর্মাবিরুদ্ধান্রাজেন্দ্রো যথার্হতি স এব হি
80.3
দেবানতর্পয়দ্যজ্ঞৈঃ শ্রাদ্ধৈস্তদ্বত্পিতৄনপি
দীনাননুগ্রহৈরিষ্টৈঃ কামৈশ্চ দ্বিজসত্তমান্
80.4
অতিথীনন্নপানৈশ্চ বিশশ্চ পরিপালনৈঃ
আনৃশংস্যেন শূদ্রাংশ্চ দস্যূন্সংনিগ্রহেণ চ
80.5
ধর্মেণ চ প্রজাঃ সর্বা যথাবদনুরঞ্জয়ন্
যয়াতিঃ পালয়ামাস সাক্ষাদিন্দ্র ইবাপরঃ
80.6
স রাজা সিংহবিক্রান্তো যুবা বিষয়গোচরঃ
অবিরোধেন ধর্মস্য চচার সুখমুত্তমম্
80.7
স সংপ্রাপ্য শুভান্কামাংস্তৃপ্তঃ খিন্নশ্চ পার্থিবঃ
কালং বর্ষসহস্রান্তং সস্মার মনুজাধিপঃ
80.8
পরিসংখ্যায় কালজ্ঞঃ কলাঃ কাষ্ঠাশ্চ বীর্যবান্
পূর্ণং মত্বা ততঃ কালং পূরুং পুত্রমুবাচ হ
80.9
যথাকামং যথোত্সাহং যথাকালমরিংদম
সেবিতা বিষয়াঃ পুত্র যৌবনেন ময়া তব
80.10
পূরো প্রীতোঽস্মি ভদ্রং তে গৃহাণেদং স্বয়ৌবনম্
রাজ্যং চৈব গৃহাণেদং ত্বং হি মে প্রিয়কৃত্সুতঃ
80.11
প্রতিপেদে জরাং রাজা যয়াতির্নাহুষস্তদা
যৌবনং প্রতিপেদে চ পূরুঃ স্বং পুনরাত্মনঃ
80.12
অভিষেক্তুকামং নৃপতিং পূরুং পুত্রং কনীয়সম্
ব্রাহ্মণপ্রমুখা বর্ণা ইদং বচনমব্রুবন্
80.13
কথং শুক্রস্য নপ্তারং দেবয়ান্যাঃ সুতং প্রভো
জ্যেষ্ঠং যদুমতিক্রম্য রাজ্যং পূরোঃ প্রদাস্যসি
80.14
যদুর্জ্যেষ্ঠস্তব সুতো জাতস্তমনু তুর্বসুঃ
শর্মিষ্ঠায়াঃ সুতো দ্রুহ্যুস্ততোঽনুঃ পূরুরেব চ
80.15
কথং জ্যেষ্ঠানতিক্রম্য কনীয়ান্রাজ্যমর্হতি
এতত্সংবোধয়ামস্ত্বাং ধর্মং ত্বমনুপালয়
80.16
যয়াতিরুবাচ
ব্রাহ্মণপ্রমুখা বর্ণাঃ সর্বে শৃণ্বন্তু মে বচঃ
জ্যেষ্ঠং প্রতি যথা রাজ্যং ন দেয়ং মে কথংচন
80.17
মম জ্যেষ্ঠেন যদুনা নিয়োগো নানুপালিতঃ
প্রতিকূলঃ পিতুর্যশ্চ ন স পুত্রঃ সতাং মতঃ
80.18
মাতাপিত্রোর্বচনকৃদ্ধিতঃ পথ্যশ্চ যঃ সুতঃ
স পুত্রঃ পুত্রবদ্যশ্চ বর্ততে পিতৃমাতৃষু
80.19
যদুনাহমবজ্ঞাতস্তথা তুর্বসুনাপি চ
দ্রুহ্যুনা চানুনা চৈব ময্যবজ্ঞা কৃতা ভৃশম্
80.20
পূরুণা মে কৃতং বাক্যং মানিতশ্চ বিশেষতঃ
কনীয়ান্মম দায়াদো জরা যেন ধৃতা মম
মম কামঃ স চ কৃতঃ পূরুণা পুত্ররূপিণা
80.21
শুক্রেণ চ বরো দত্তঃ কাব্যেনোশনসা স্বয়ম্
পুত্রো যস্ত্বানুবর্তেত স রাজা পৃথিবীপতিঃ
ভবতোঽনুনয়াম্যেবং পূরূ রাজ্যেঽভিষিচ্যতাম্
80.22
প্রকৃতয় ঊচুঃ
যঃ পুত্রো গুণসংপন্নো মাতাপিত্রোর্হিতঃ সদা
সর্বমর্হতি কল্যাণং কনীয়ানপি স প্রভো
80.23
অর্হঃ পূরুরিদং রাজ্যং যঃ সুতঃ প্রিয়কৃত্তব
বরদানেন শুক্রস্য ন শক্যং বক্তুমুত্তরম্
80.24
বৈশংপায়ন উবাচ
পৌরজানপদৈস্তুষ্টৈরিত্যুক্তো নাহুষস্তদা
অভ্যষিঞ্চত্ততঃ পূরুং রাজ্যে স্বে সুতমাত্মজম্
80.25
দত্ত্বা চ পূরবে রাজ্যং বনবাসায় দীক্ষিতঃ
পুরাত্স নির্যয়ৌ রাজা ব্রাহ্মণৈস্তাপসৈঃ সহ
80.26
যদোস্তু যাদবা জাতাস্তুর্বসোর্যবনাঃ সুতাঃ
দ্রুহ্যোরপি সুতা ভোজা অনোস্তু ম্লেচ্ছজাতয়ঃ
80.27
পূরোস্তু পৌরবো বংশো যত্র জাতোঽসি পার্থিব
ইদং বর্ষসহস্রায় রাজ্যং কারয়িতুং বশী